MUC

Print Friendly and PDF

Thursday, March 16, 2017

LESSON 4 APRIL 15 – 21 MI TAWH KIZOPNA





SABBATH NITAK


TU KAAL SUNG SIM DING: 1Pet. 2: 13 – 23; 3: 1-7; 1Kor. 7: 12 – 16; Gal. 3: 27, 28; Sawl. 5: 27 – 32; Siam. 19: 18.


KAMNGAH: Itna in mawhna tampi khuhcip thei ahih manin lungsim takpi tawh khatlekhat ki-it ding thupi ngaihsut pha pen un.” 1Pet. 4: 8.

Peter in ama hun sungin khat le khat kizopna tawh kisai buai-nate phukha hi. A laikhak sungah zong tua thute pulaak hi. Gentehna-in koici bangin Khristiante in pagan Roman Empire hoihlote le thuman lo nasemte tawh kizopzia ding hong hilh hi. Peter’gen thute in tuhun a’dingin bang hong hilh hiam?

Koi bangin Khristian sila khat in thuman lo, a gilo to-te tungah bang lungsim puak nei ding kisam hiam? Nidanglai to le sila kizopzia le tuhun nasemte le nasemcial mite kizopzia kibang lo hi. Ahi zongin thuman lo, a gilo nasemcial mite tungah nasemte’n Khristian nunzia kilangsak ding kisam hi (1Pet. 2: 21- 24).

Koi bangin zi le pasal, adiakdiakin upna kibang lo zi le pasal kikaal kizopna kisam hiam? Khristiante tungah a thuman lo, amaute a bawlsia kumpi, gam makai, hausa cihte a kipan ulian tungah bang lungsim kisam hiam?


SUNDAY APRIL 16

PAWLPI LE GAM KI-UKNA


Lai Siangtho kigelh zawh kum tul tampi pha khin taleh tuhun a’dingin Khristiante le kumpi kizopzia ding hong hilh hi. Mang. 13 ah kumpite’ thupiak zuihna in Pasian langpan suak ding hi. Tua bangte ah Pasian zui zaw ding maw, kumpite zui zaw ding cih pen mimal khensat ding ahi hi (Thursday thusinna en in).

1Pet. 2: 13 – 17 sim in. Koi bangin Lai Siangtho in kumpite tawh kizopzia ding hong hilh hiam?

_________________________________________________________________

_________________________________________________________________

Peter hun lai-a mite’n Romans kumpi’ hoihlohna a thei lo om lo uh hi. Thatanghatna zangin thuman lo-in gam mite uk uh hi. Kumpi langpan peuhmah in bawlsiat thuak uh hi; singlamteh tungah khailupna thuak uh hi. Romans kumpi in thuman lo-in gam uk hi. Gam uk makaite’n amau sanggam tanaute mah gam uk dingin koih uh hi. Pilna, siamna tawh gam uk hi khol lo uh hi. Peter in tua bang gam uk, makaite’ thu nial lo dingin laikhak hi (1Pet. 2: 13, 14).

Bang hangin kumpi, makaite’ thu mang kul hiam ci-in Peter in a genin ah gam uk, makaite’n mi gilote gimpia hi. Na hoih semte pahtawi uh hi

(1Pet. 2: 14) Tua hi-in gam makaite pen gam khantoh nading nasemte hi, ci hi. Roman kumpi in siatna tawh a kidim uh hangun gam kipsak hi. Galte khut sung pan suahtakna pia hi. Thuman lo-in a sepna uh a om phial hangin gam ki-ukna zui-in nasem uh hi. Mun khat le khat kizopna lampite bawl uh hi. Sum bawl, van lei van zuakna uk uh hi. Gam huu ding galkap koih uh hi.

Gammi tampi in phattuampih hi. Hihte hangin Peter in kumpi langpan lo ding hanthawn hi kha ding hi. Genbaang lo kumpi om lo hi. Tua bang mahin Peter in a laikhak pawlpi zong genbaang veve hi.

Peter’ hong hilhnop thu lianpen in thu-um mi khat pen gammi hoih khat hi ding hi. Gammi hoih i cih in gam thukhun zui hi.

Bang hangin Khristian khat in gam sung ki-ukzia hoih kei taleh gam mi hoih khat hi ding thupi hiam? Bangci bangin na khua na tui, na tenna mun puah ding na hiam?


MONDAY APRIL 17

SILATE LE TOTE


1Pet. 2: 18 – 23 sim in. Koi bangin Peter’ gen thu na tel hiam?

Bang thupaipi hong hilh hiam?

______________________________________________________________

______________________________________________________________

1Pet. 2: 18 – 23 ki-apna tawh sim lecin sila thu sangin hamsat hun ciangin nunzia ding hong hilh hi. 1Pet. 2: 18 ah “oiketes’ cih kammal in inn nasem sila cihna hi-in, Eph. 6:5 ah zong ‘doulos’ kammal in silate makaih cihna hi. Romans uk sungah sila-te pen mihing bangin ngaihsun lo uh hi; van bangin ngaihsun uh hi. Silate in bawlsiat thuak hi. A silate uh kuate hiam cihleh gallel, silate’ ta,leibat lohna dingin zuakna thuak mite hi. Sila kimkhat in masuan lianpipi nei hi. Mi khatte’n inn sung nasep khempeuh uk uh hi. Sila pawl khat in amau neihsa khempeuh amau mah in uk hi. Sila kimkhat in a to-te uh naupangte laihilh, pantahin uh hi.

Sila khat sum tawh kitanin suakta thei hi. Tua bangin sum tawh a kitankhia sila siksan in Paul in hotkhiatna thu hilh hi. Eite a’ding Jesuh sep khempeuh hong theisak hi (Eph. 1:7; Rom. 3: 24; Kol. 1: 14; 1Pet. 1: 18, 19).

Khristian masa a tamzaw sila hi. Amaute khel theih loh ki-ukna sungah nungta uh hi. Sila tampi in a gilo to nei uh hi. Thuciam Thak in hong hilh mah bangin Peter in sila khat ii nunzia ding hilh hi. Peter in silate tungah Khrih bangin thuak keeikaai-in to-te tungah ki-ap ding hi, ci-in hilh hi (1Pet. 2: 18

– 20). Siatna bawl khak manin gim thuak ding mah hi. Ahi zongin Khrih bangin thuman lopi gim thuak mite in thupha ngah ding hi. Jesuh mah bangin gimthuak mite in thukkik ding ngaihsut lo-in thuman tawh thukhen Pasian tungah ki-ap ding kisam hi (1Pet. 2: 23)



Peter in sila-te tungah a gen thute lak pan bang thute nuntakpih ding na hiam? Gen ding, nget ding a kilawm thute gen lo, ngen lo ding a ci hiam? Na lawmte tawh kikum in.

TUESDAY APRIL 18

ZI LE PASALTE


1Pet. 3: 1-7 sim in. Peter in bang thu siksanin thuhilh hiam? Koi bangin tuhun zi le pasal kizopzia ding hong hilh hiam?

__________________________________________________________________

___________________________________________________________________

Peter in nupa thu a genna ah thu-um numei khat le thu-um lo pasal khat kikal kizopzia ding pulaak hi. (1Pet. 3: 1). Upna kibang lo nupa hihna in hamsatna piangsak hi. Khristian numei khat in Khristian hi lo pasal tawh tawh kiteng leh, amaute kikaal ah buaina piang thei hi. Tua ahih leh amaute kikhen ding maw? Peter le Paul in tua bangin kikhen ding gen lo uh hi (1Kor. 7: 12 – 16). Thu-um zi in thu-um lo a pasal in a etteh dingin om hen, ci zaw hi.

Kum zalom Roman Empire hun sungin Roman’ ngeina in numei nunzia tampi huzaap hi. Peter in a laikhak gelh hun lai-in numeite in nawlkhin thuak uh hi. Gam ki-ukna, biakna le na khempeuh ah nengniamna thuak uh hi. Bang bang thuak ta le uh gamtat hoih nei-in mite pahtak kaai dingin Peter in amaute hanthawn hi. A siangtho ding le pasal zahtak dingin hanthawn hi (1Pet. 3: 2). A kimu thei pualam hoihna kipuahna – sambawlna, kizepna tuamtuam le a manpha puansilhte sangin sunglam kizepna lungsim hoih ding hanthawn hi (1Pet. 3: 3-5). Tua bangin lungsim hoih nei Khristian nupi khat in thu-um lo a pasal a’dingin limpha suak a, a khuavak tangsak hi pah hi.

Pasal in ama ut bangin a zi tungah bawl lo ding hi. Pasal in a zi hehpihin it ding hi (1Pet. 3:7). Khristian nupi khat in Khristian hi lo a pasal tungah a gamtatzia ding Peter thuhilh in zi le pasal kizopzia ding ahi hi. Nupa kizopna-ah khat le khat kipanpih, citak ding kisam hi. Amaute nisim nunzia, gamtatnate in biakpiakna ahihlam a phawk ding uh kisam hi.

WEDNESDAY APRIL 19

MI TAWH KIZOPNA


Romans 13: 1-7; Eph. 5: 22 – 33; 1Kor. 7: 12 – 16; Gal. 3: 27, 28 sim in. Koi bangin Paul in 1Pet. 2: 11 - - 3:7 sunga thute kisai-in gen hiam?

__________________________________________________________________

___________________________________________________________________

Paul in 1Pet. 2: 11 – 3: 7 sunga thute pulaak hi. A kitukalh om lo hi. Peter bang mahin Paul in zong ‘kumpi makaite’ thu mang dingin hong hilh hi (Rom. 13: 1). Kumpi, makaite pen siatna a dal ding, hoihna a bawl dingin Pasian in a koih a hi hi (Rom. 13:3) Tua hi-a Khristian khempeuh in “Tua ahih manin phiangsiah piak dingte tungah pia-in, mangmu piak dingte tungah pia-in, zahtak dingte zahtak bawlin, pahtawi dingte pahtawi ta un” Rom. 13: 7.

Paul in thu-um lo pasal nei numeite tungah a pasalte a’ding limpha, etteh takcing ahi dingin hanthawn hi. Tua bangin amau gamtat hoihna hangin thu-um lo pasal in thu-um mi hong suak thei ding hi (1Kor. 7: 12 – 16). Gamtat hoih tawh zi le pasal kizop ding pen ngei-na hoih khat hi. Khrih in pawlpi a it bangin pasal in zi it ding hi (Eph. 5: 25). Tua banah sila in amah a uk a topa’ thu a man ding kisam hi (Eph. 6:5).

Paul in a nasepna ah mite ngei-na langpanin nasem lo hi. Nusiat huai ngei-na nusiat loh ding ngei-na cihte zong khentel siam hi. Khristian upna in ngei-na puahpha-in gam sung khantohna piangsak thei hi. Jesuh in leitung gam puah ding hong pai ahih loh mah bangin gam khantoh nading nasem lo hi. Tua bang mahin Peter, Paul cihte in zong leitung khantoh nading nasem uh hi lo hi. Amau’ tangko thu a zui mite tungtawnin gam hoih, gam khangto ding hi zaw hi.

Gal. 3: 27 – 29 sim in. Jesuh in amaute a’ding a sepna tungtawnin mihingte khat le khat kizopna tawh kisai bang hong hilh hiam?


THURSDAY APRIL 20

KHRISTIAN BIAKNA LE MITE OMZIA


Leitung kipawlna le kumpite in siatna nei lo om lo hi. Thuman lohna, gitlohna tawh kidim uh hi. Tua bangpi mah Peter le Paul in amaute’ thu mang dingin hong hilh hi (1Pet. 2: 13 – 17; Rom. 13: 1-10). Khristian in phiangsiah piak loh phamawh hi. Khristian mi khat in gam mi hoih a hih kul hi.

Sawl. 5: 27 – 32 sim in. Pasian thu manna le hong uk ulian, makaite’ thuman bang kilam dang hiam? (1Pet. 2: 13- 17). Peter le sawltakte kumpi uliante tawh bangci kizop uh hiam?

____________________________________________________________

__________________________________________________________________

Pawlpi masate in a nasepna uh khangto ahih manin Peter le John in mat le hen thuak hi (Sawl. 4: 1-4). Uliante, khua sung upa khuasa, laitheite in amaute thusit hi. Lungdamna thu a hilh nawn loh nadingun khaam hi

(Sawl. 4: 5 – 23). Ahi zongin sawltakte in a thuhilh uh khawl tuan lo ahih manun thongkia uh hi (Sawl. 5: 28). Peter in bangci dawn hiam cihleh “ Mite sangin Pasian thu man zawk ding hi” ci hi (Sawl. 5: 29).

Sawl. 5: 29 in bang thulaigil hong hilh hiam?

____________________________________________________________

_____________________________________________________________

Peter in a neihkhem, puatham nasem hi lo hi. Sawltakte in koi zaw zui ding- Pasian’ thupiak zaw, mihing’ thupiak cih pen teel zawk ding thei hi. Tua bangin teel zawk ding a om masiah kumpite’ thu man ding ahi hi. Gam khantoh nading, kimlepaam puah nasepna khat peuh in Jesuh hong thupiakte, a hong hilh thute kilangsak ding kisam hi. Koi bangin tua bangin nasem ding cih pen hun le mun cihte tungah kinga hi. Gam hoih khat in Khristian hoih khat hi thei lo cih hi lo hi. Khristian thu-um khat in kimlepaam hoihna, khantoh nading hanciamin nasem ding hi.

Siam. 19: 18; Matt. 22: 39 sim in. Ei le ei i ki-it bangin midangte zong it ding cih thupiak in bangci bangin kimlepaam kilamdanna, hoih nadingin hong huh hiam?


FRIDAY APRIL 21
NGAIHSUTBEH DING: Ellen G. White, “The Impending Conflict,” pp. 582 – 592; “ The Scriptures a Safeguard,” pp. 593 – 602; “ The Time of Trouble,”

pp.       613 – 634 in the Great Controversy.

Ellen G. White in “ Seventh-day Adventist khat in gammi hoih hi ding a,

gam thukhun zui ding hi,” ci-in hong hanthawn hi. Sunday ni-in tawlnga hamtang ding cih thupiak om leh zong kilangtangin nial, langpan ding hi lo hi. Pasian’ thupiak ni sagih Sabbath ni a tawlngak nak uh leh Sunday thupiak zuih ding pen nialtentan ding kisam lo hi. Sunday thukhun mang ding cihna hi pah lo hi. Gam thukhun in “sila taisim a om leh a to kiangah ciah kik hen,” ci hi. Ellen G. White in hih thukhun langpan hi. Bang bang thuak ding hi taleh SDA thu-um mi khat in tua bang thukhun zuih kul lo hi, ci-in pulaak hi. “ Pasian’ thupiak le mihing’ thupiak a kilangdo ciangin mihing’ thupiak sangin Pasian’ thupiak zuih zawk ding ahi hi.Sila cih pen van hi lo hi. Mihing hi. Pasian simloh kuamah in mihing tungah thunei lo hi. Mihing a piangsak Pasian bek in mihing tungah thunei thei bek ding hi.” 1T., 201, 202.

KIKUP DING DOTNATE:

1.  Monday ni-a thusinna sungah mihing in a ngah ding hamphatna, thuneihna

(human right) nial ding kilawm hiam? Mihing in bang teng thuneihna

(human right) nei hiam?

2.  Khristian thu-umte hangin gam khantohna, kimlepaam khantohnate pulaak in.

3.  Khristian thu-umte in gam khantoh nading, kimlepaam khantoh nading sem lo-in siatna a piangsak zaw nasepna ngaihsun in.

4.  “Hong uk kumpite zahtak un” (1Pet. 2: 17). Tua hun lai-in kumpi in Nero hi. Amah pen siatna khempeuh tawh kidim kumpi khat hi. Peter thupiak ‘hong uk kumpite zahtak un’ cih thupiak bangin bangci bangin gam uk makaite na zahtak hiam? Peter in “ mi khempeuh zahtak un” ci hi leh a thupiak deihna i telthei zaw diam?

5.  1Pet. 2: 21- 25 sim in. Koi bangin a huamin tatkhiatna pulaak hiam? Bang lametna hong guan hiam? Nasep ding bang hong hilh hiam? Sep dinga hong kisawlte i sem takpi hiam?





To get the latest update of me and my works

>> <<