SABBATH NITAK
TU KAAL SUNG
SIM DING: 1Pet. 1: 1, 2; 1: 3 – 21, 22 – 25; John 3: 16; Ezek.
33: 11; Siam. 11: 44.
KAMNGAH: “ Tu-in lungdamna thuman na zuihna
hangun note kisiansuah khinin, na thu uppih mite uh lungsim tak tawh itthei
khinta na hih manun na lungsim khempeuh uh tawh limtakin na
ki-it
un” (1Peter 1: 22).
Saupi a hi a, tomno khat ahi
zongin Lai Siangtho i sim ciangin kuate tungah kipulaak hiam? Bang hang a gelh,
laigelhte’ mungtup theih ding kisam hi. (Paul in Galatia khua mite tungah a
gelhin ah hotkhiatna le thukham tel khial uh ahih manin a hilhcianna-in a gelh
khiat ahi hi.) Thuciam Thak a tam zaw pen laikhak vive hi. Laigelhte in amau
gelh lai-te kua tungah a khak hiam cih thu kan masak kul hi.
Tua hi-in Peter laikhak i
sim ciangin amau hun lai-a thu piang pawl khat i theih ding kisam hi. Bang thu
kipulaak hiam? Bang hang hiam? cihte kan kul hi. A thupi pen ah Kha Siangtho’
makaihna tawh kigelh tua thute panin bang thuman nuntakpih ding ka hiam, cih
kidot ding ahi hi. Peter in eite nuntakpih ding a hong hilh thute i kikum ding
hi.
SUNDAY APRIL 2
GAMBEL
MITE TUNGAH
Lai khat peuh na sim ciangin,
a masa-in “Kong it…” na sim khak leh tua lai in lai ding hi lo-in laikhak hi,
cih kitel pah hi. Na theih ngei loh mi khat in lai hong khak hi leh bang hong
gen nuam hi ding hiam, ci-in na lungngai ding hi. Nidang laikhakgelhziate in
tuhun lai kikhak gelhzia tawh kibang hi. A masa-in laikhakgelh kipulaak masa
hi. Tua khitteh lai ngah dingte kigelh hi.
1Pet. 1: 1 sim in.
Peter in bang thupiang hangin laikhak gelh hi ding hiam?
________________________________________________________________
_________________________________________________________________
Peter in amah le amah “
Jesuh Khrih sawltak ka hi, ci-in kipulaak hi. A laigelhna ah ama min gelh masa
pen hi. Paul mah bangin (Gal. 1:1; Rom. 1:1; Eph 1: 1) Peter in zong Pasian’
sawlna tawh pulaak a hihna, Pasian sapna a ngahna cihte pulaak hi. “ Sawltak’
cih kammal in ‘sawlna ngah’ ‘ a kisawlkhia’ cihna hi-in, Topa Jesuh in sawl
cihna hi.
Peter in a laikhak a ngah
ding mite omna mun zong pulaak hi: “Pontus, Galatia, Cappadocia, Asia le
Bithynia munte hi. Hihte in Asia Minor sungah om hi. Tuhun Turkey, Bosphorus’
nisuahna lam munte hi, ci-in kiciamteh hi.
Peter in Gentile thu-um mite tungah maw, ahih
kei leh Jew thu-um mite tungah gelh maw cih muhzia namnih om hi. Peter in a
kammal zat “a kithehthaang’ ‘pemta’ ( 1Pet. 1:1) cih kammalte in kum zalom khat
lai-a, Holy Land (Israel) gampua a om Jew mite hi, ci-in kiciamteh hi.
“Teltuam’ “siangtho” cih kammal in Jew hi taleh Khristian hi, cih kilang hi
(1Pet. 1: 2). Peter in Israel gampua-a om Jew ngeina a nei Gentiles mite a’ding
zong laikhak hi (1Pet. 2: 12; 4: 3).
Mi kimkhat in 1Pet. 1: 18; 4:
3 tungtawnin Peter in Gentile mi Khristian hong suak mite tungah a laikhak hi,
ci uh hi. “ A beisa hunah dawibiate’gamtat bangin a hoihkhop khat na gamta khin
uh hi.” Peter in kuate tungah a laikhak hi ding hiam ci-a buaipih luat ding
sangin a laikhak in tuhun thu-um mite a’dingin bang hong hilh hiam? cih laak
theih ding kisam zaw hi.
MONDAY APRIL 3
TELNGAH
MITE
1Pet. 1:2 sim in.
Peter in kua tungah zong laikhak hiam? Peter in amaute tawh koi bangin na kizom
hiam?
_______________________________________________________
____________________________________________________________
Peter in Gentile ahih kei
leh Jew mite tung hi taleh a thupi-in ah “amaute in Pa Pasian muhkholhna,
theihkholhna siksanin teltuam mite hi” cih thu hi (1Pet. 1:2). Hih mun ah kidop
ding thu khat om hi. Pasian in mi kim khat tawntung sihna tung ding le tawntung
hinna tung ding mi tuamkhen khol lo hi. A genthei mite mangthang ding a,
Pasian’ tel mite ahih leh nuamsa ding uh hi,” ci-in Lai Siangtho in hong hilh
lo hi.
1Tim. 2: 4; 2Pet.
3:9; John 3: 16; Eze. 33:11 sim in. Koi bangin “A kitel mi” cih thu na theitel
hiam?
______________________________________________________
_____________________________________________________________________
Pasian in na khempeuh a
bawlma-in mi khempeuh in tatkhiatna ngah dingin a geelsa hi (Eph. 1:4). Khat
zong kisia lo-in mi khempeuh in hotkhiatna ngah dingin Pasian in geel hi. Mi
khempeuh a’dingin hotkhiatna in kicing hi. Mi khat bek a’dingin zong kicing hi.
Pasian in thei khol cih thu in mihing’ deihtelna mu khol cihna hi. Naupang khat
mai-ah chocolate lim mahmah khat leh a lim lo nektheih khat koih lehang tua
naupang in chocolate mah hong tel zaw ding hi, cih pen i theihkholhsa hi. Tua i
theihkholh manin naupang in ama deih khaktan lo hi.
Hotkhiat ngah dingin Pasian in nang hong
telkhin hi, cih thu in khamuanna hong pia hiam?
TUESDAY APRIL 4
A THUPI THUTE
1Pet. 1: 3 – 12 sim in. Bang thulaigil
kigelh hiam?
___________________________________________________________________
___________________________________________________________________
Peter in thu-um mite a hopih kammal masa ah “Pa,
Tapa le Kha Siangtho pulaak hi (1Pet. 1: 1, 2). Thum gawm Pasian tawh kisai
1Pet. 1: 3- 12 ah kimu thei hi. Pa le Tapa tawh kisai 1Pet. 1: 3 -9 in
pulaakin, Kha Siangtho tawh kisai thu 1Pet. 1: 10-12 ah kigelh hi. Pa, Tapa le
Kha Siangtho tawh kisai thu a genna sungah thulaigil tuamtuam kimu thei hi.
Peter in a laikhak a patna-ah Khristian cih
in a suakkik mi hi, ci-in pulaak hi (1Pet. 1: 3; John 3:7). Sihna pan Jesuh’
thawhkikna in amaute nunzia puahpha hi. Amaute ngah ding thupha in vantungah
kikoih a, a tawntungin amaute nungta ding uh hi (1Pet. 1: 3, 4). Lai Siangtho
in a pulaak mah bangin Peter in zong sihna pan Jesuh’ thawhna in thu-um mite
lametna bulpi hi. Bang bang gimna thuak taleng tua lametna in hong lungnuamsak
hi. Mei in kham le ngun a hahsiang bang mahin gimna in upna hong khuahsak hi;
nunzia hong puahpha hi. Peter laikhak a ngah mite in Jesuh a muh khak loh uh
hangun Jesuh umin it uh hi. Jesuh um uh ahih manin amaute kihonkhia ding hi. “
Amaute ngah ding thuphate sia ngei lo, nin ngei lo, mual ngei loin a om
tawntungna vantungah amaute a’dingin kikoihsak hi” (1Pet. 1:4).
Kamsangte in zong tua upna thu pulaak uh hi,
ci-in Peter in hilh hi (1Pet. 1: 10). Jesuh sungah i ngah nuamna kamsangte’n
ngah nuam mahmah ta leh ngah kha lo uh hi. Amaute in Kido-na Lianpi sungah
nungta ahih manun a up thu hangin bawlsiatna thuak uh hi. Amaute’ phutkhak
thute in leitung na khempeuh sangin manpha zaw hi. Bawlsiat thuak taleh thuman
sungah kip tawntung dingin Peter in amaute hanthawn hi.
1Pet. 1: 4 “vantungah i ngah ding thupha” cih
thu na ngah ding tua thupha ngaihsun in. Koi bangin tua kamciam tawh na nungta
hiam?
WEDNESDAY APRIL 5
HOTKHIAT NUNNA TAWH NUNGTA
1Pet. 1: 13 – 21 sim in. Bang
thu in gamtat hoihsak hiam?
____________________________________________________________
___________________________________________________________________
“Tua ahih manin” cih kammal
in Peter in a gen ding thute pen a gen khitsa thute siksan hi, cih pulaak hi.
Pasian’ hehpihna le Jesuh Khrih sungah lamet om hi (1Pet. 1: 3 – 12). Tua
hehpihna le lametna hangin thu-um mite’n ‘lungsim ki-ukin a kigingsa-in om
ding” hong hilh hi (1Pet. 1: 13).Tua bangin a nungta mite in Jesuh sungah
hotkhiatna ngah mite hi; amaute in thuman sungah kiptakin ding ding uh a, Topa
tungah a citak mite hi (1Pet. 1: 13).
1Pet. 1: 13 sim in.
Jesuh hong piak hehpihna sungah lamet nei cih ciangin bang khiatna pulaak hiam?
____________________________________________________________
__________________________________________________________________
Thu-um mite’lamet in Jesuh
hi. Tua bang lametna nei khempeuh in hotkhiatna ngah mi ahih manun, Topa in tua
lametna tawh kituak gamtat zia le tong a nei dingin hong deih hi. Thu-um mite’
gamtat zia le tong in thu thum siksan hi: Pasian’ zia le tong (1Pet. 1: 14,
15); a hong tung ding thukhenna (1Pet. 1: 17); a hong kihotkhiatna dingin Jesuh
sihna (1Pet. 1: 17 – 21) cihte siksan hi.
Khristian gamtat zia le tong
in Pasian’ zia le tong siksan hi. Pasian’ zia le tong in siangtho hi. Siam. 11:
44, 45 ah “ Keimah ka siantho bangin note zong na siangtho ding uh hi” (1Pet.
1: 16). Tua hi-in Jesuh nung a zui khempeuh in siangtho ding hi (1Pet. 1: 15,
17).
Nihna-ah: Khristian zia le
tong in a siangtho Pasian in thu hong khen ding hi. I sepna bang ciatin thu
hong kikhen ding hi; thuman lo om lo ding hi (1Pet. 1: 17).
Thumna-ah: A hong kihonkhia
mite i hih manin zia le tong hoih a nei ding i hi hi. Man kiseh thei lo Jesuh’
sisan tawh a hong kilei i hi hi (1Pet. 1:
19). Jesuh in upmawh loh
laitak a si hi lo hi. Na khempeuh kipiansakma pekin a kigeel khol khinsa ahi hi
(1Pet. 1: 20).
Mi khat in bang hangin
Khristian suak na hiam? Bang in thu-um mi hong hisak hiam? Bang hang hiam?
ci-in hong dong leh, bang na ci dawn diam?
THURSDAY APRIL 6
KHAT LE KHAT KI-IT UN
Peter in nuntak
siangtho-in, upna tawh a nungta mi’ nunzia a nuai bangin hong hilh hi. 1Pet. 1:
22 – 25 sim in. Khristian cih a khiatna in bang hiam?
_________________________________________________________________
__________________________________________________________________
Peter in a thupatna ah
Khristian i cihte in a kisiansuah, a siangtho khin mite, thuman a zui, a
thumang mite hi, ci-in pulaak hi ( 1Pet. 1: 22).
“Siansuah”
“sawpsiang” cih kammal in Peter pulaak khitsa (1Pet. 1: 15)
‘siangtho’ ‘siantho-na’ tawh
kizom hi. Jesuh tungah a thuciam uh lenkip, tui kiphum cihte in Pasian a’dingin
a kipia khia, a siangtho, thuman a zui mite hi,cih pulaak hi (1Pet. 3: 21, 22
tawh enkak in). Tua bangin a kisiansuah mite kipawl thei uh hi. Peter in tua
bang kipawlkhopna innkuan tawh genteh hi. Khristian thu-um mite sanggam bangin
khat le khat ki-it ding hi. 1Pet. 1: 22 sungah ‘sanggam ki-itna’ cih Greek
kammal in ‘philadelphia’ hi-in, sanggam tanau ki-itna pulaak hi. Innkuan
sung khat le khat ki-itna a nei ding hong hilh hi.
Greek kammal ‘philia’ – lawm
le gual ki-it ‘eros’ – zi le pasal ki-itna
‘agape’ –midangte
hoih ding deihsak itna, itna pulaak kammal tuamtuam om hi. Lungsim takpi tawh
itna ‘agape’ kammal tawh kizopna nei hi (1Pet. 1: 22). A sia thei lo
Topa kammal tawh a kisiansuah khin, a suakkik mi sung pan hong pai itna in a
siangtho itna, lungsim takpi tawh itna hi (1Pet. 1: 23; 1: 3). Hih bang itna in
Pasian kiang pan hong pai itna hi. Tua in huaiham, angsung thu zong lo hi. Tua
hangin Peter in thuman bangin nuntakna, suahkikna, siantho-na limtak in gen
phapha hi. Thuman a thei bek hi lo-in a nuntakpih thu-um mi dingin hong hilh hi
(1Pet. 1: 22)
Koi bangin itna nei
zaw ding na hiam? A siangtho lungsim pan hong pai itna na neih nadingin bang
khensatna kisam hiam?
FRIDAY
APRIL 7
NGAIHSUTBEH DING: Ellen
G. White, “ Perfect Obedience Through Christ,” 374, 375 in 1SM; Christ
the Way of Life”, 365 – 368, 1SM.
Peter masa in thuthuk tampi hong hilh hi.
Peter in Pa, Tapa le Kha Siangtho’ zia le tong pulaak masa hi. Pa in Tapa
tungtawnin mawhnei mite hong hon hi. Khrih sungah a siangtho ding, Ama thu mang
dingin eite hong teel hi. Jesuh a it dingte i hi hi. Ama sungah nuamna tawh i
nungta hi. Bang hang hiam cihleh Ama sihna le sihna pan a thawhkikna hangin a
sia thei lo nunna vantungah ei a’dingin kikoih khin hi. Bawlsiat, gimna lakah
zong a lungnuam thei i hi hi.Bang hang hiam cihleh Khrih sungah hotkhiatna
ngahte i hi hi. Peter’ laikhakte tungtawnin bawlsiat, hamsatna thuak khempeuh
in lawpna, upna kip nei thei ding uh hi. Pasian tawh a kigamla mi in tawntung
kisiatna lam zuan hi-a, tua bang siatna tawh kipelh nading upna sungah a
khangcing dingin thapiak kul hi.” Ellen G. White, The Acts of the Apostles,
517.
Kha Siangtho in kamsangte tungtawnin thu-um
mite’ nunzia ding hong hilh hi. Khristian khat in a siangtho-in a nuntak kul
hi. Thuman a zuih kul hi. A thu-up pih mite itna siangtho tawh a it ding kisam
hi.
KIKUP DING DOTNATE:
1. Wednesday
ni-a dotna na lawmte tawh kikum in. Bang in Khristian upna sungah hong tun
hiam? Na lawmte tawh kikum in.
2. 1Pet.
1: 3, 21 sungah sihna pan Jesuh thawhkikna thu nihvei kipulaak hi. Upna ah a
thupi mahmah Thawhkikna in bang hi pen hiam?
3. Peter
in a kisia thei lo ‘gamh’ thu gen hi (Dan. 7: 18 zong sim in). Tua in bang
hiam? A kisia baih, a sia thei leitung nate ngaihsun in. A kisia thei lo i ngah
dingin a hong kikamciam tua ‘gamh’ in bang zahin deih huai hiam?
4. Koi
bangin bawlsiat, hamsatna lakah upna kip thei ding hiam? Koici bang khensatnate
in bawlsiat, hamsatnate lak pan upna kipsak thei ding hiam?
