LESSON 13 JUNE 17 – 23 PETER MASA LE NIHNA SUNGA THU BULPITE

SABBATH NITAK

TU KAAL SUNG SIM DING: Isa. 53: 5, 6; Siam. 16: 16 – 19; 11: 44; Rom.13: 1-7; 1Kor. 14: 40; 2Tim. 3: 16.

_KAMNGAH: “Eite in mawhna lamah si i hih khit ciangin dikna lamah i 

nuntakna dingin, eite mawhnate amah mahin singkhuam tungah 

ama pumpi in a thuak hi. Ama liamnate hangin damna i ngah zo hi” 

(1Pet. 2: 24).

1 & 2 Petet in nunzia ding hong hilh hi.1Peter sungah bawlsiatna tawh kisai thu kigelh hi. 2Peter in pawl sunga zuau thuhilhte’ omzia pulaak hi. Peter in Khristian thu-um mite in a tuah ding uh thute hilhkhol hi. Peter’ hilh thute in vanglian hi; a kipelh thei lo thute hi. Peter in tua bang thute tawh kisai a gelhte in thupi hi. Bawlsiatna a thuak mite in a hong kihotkhiatna dingin Khrih’ thuakna phawk ding kisam hi. Jesuh in zuau thuhilhte thukhen dingin hong pai hi. Peter in hih thute a laikhakna ah pulaak hi.

A hong hotkhiatna dingin Khrih thuakna, Pasian in a tawpkhakna ah thukhen ding hi, cih phawkin nungta ding, Jesuh hong kumkik ding lametna, kimlepaam hoih le pawl sung hoihna, i nuntakna ah Lai Siangtho’ makaihna cihte hi. Tu kaal sungin Peter laikhakna sunga thu bulpi nga i en ding hi.

SUNDAY JUNE 18

GIMNA, JESUH LE HOTKHIATNA

A nuai-a Lai Siangthote in hotkhiatna thu bang pulaak hiam?

1Pet. 1: 2 ___________________________________________________

1Pet. 1: 8, 9 _________________________________________________

1Pet. 1: 18, 19 _______________________________________________

1Pet. 2: 22 – 25 ______________________________________________

1Pet. 3: 18 __________________________________________________

Peter in hotkhiatna thu a pulaakna-in ah mawhneite munah hong si Jesuh’ sihna thu pulaak hi. Gentehna-in 1Pet. 2: 22 – 24 sungah Khrih thuak gimna a pulaakte in Isaiah 53: 5, 6, 9 sunga thute hong phawksak hi. I mawhna khempeuh Khrih pumpi-in pua khia hi. Ama liammate hangin eite in damna i ngah hi (1Pet. 2: 24). Hih thute in mawhneite tangin Ama hong sihna pulaak hi.

Biakbuk hunlai-in mawhnei mi in ama biakpiakna dingin biakbuk ah gan khat hong paipih hi. Tua gan tungah a khut nga hi. Hih in mawhnei mi’ mawhna ganhing tungah kisuan hi, cih limcing hi. Tua ganhing in mawhnei mi sih tangin si hi (Siam. 4: 29, 30, 33, 34; 14: 10 – 13. Biakna tau tungah niinbang khempeuh Mawhsutpi Ni ciangin kisiangtho sak hi (Siam. 16: 16 – 19).

Mawhmai nadingin sisan in thupi mahmah hi. Khristian thu-um mite in

Jesuh’ sisan tawh i siang zo hi. (1Pet. 1: 18, 19). Paul in zong mawhnei mi sih tangin mawhnei lo Jesuh sihna thu mah pulaak hi (2Kor. 5: 21). Mawh nei lo mi in mawhneite a’dingin hong si hi ( 1Pet. 3: 18).

Paul mah bangin Peter in zong upna kisam hi, ci-in pulaak tawntung hi. “ Tua Topa note in na muh ngeiloh uh hangin na it uh hi…………nopna lungsim tawh lungdamin na nuntakna uh gupna ahi note upna phattuamna na ngah uh hi” (1Pet. 1: 8, 9) ci-in laikahk hi. Gamtat hoih in hong honkhia thei lo hi. Khrih in ei aa dingin a sep khempeuh i um a, Honpa-in i upna tawh hotkhiatna ngah i hi hi. Gamtat hoihna sungah lungmuang hilo-in , Khrih sungah i khamuang hi. Ei le ei kimuang ding hi lehang i kimuan takpi ding a om diam?

Bang hangin eite tangin hong si Jesuh in i lametna lianpi hi thei hiam? Hih a lamdang thu tungtawnin bang lametna lianpi nei in khamuanna bang hong guan hiam?

MONDAY JUNE 19

KOIBANGIN NUNGTA DING?

Peter in a pulaak mun mahmah thubulpi khat in “Na khempeuh mangthang ding ahih ciangin … Pasian biakna ah nopsakna tawh bang ci mi na hi ding uh kilawm hiam? ci-in kidot ding kisam hi (2Pet. 3: 11).

1Pet. 1: 15- 17, 22; 2: 1; 3: 8, 9; 4: 7-11; 3: 11 in Khristian gamtatzia ding bang hong hilh hiam?

____________________________________________________________

____________________________________________________________

Peter laikhak sung mun tampi ah Khristian gamtatzia ding hong hilh hi. Khatna-ah: Pasian thukhenna le Khristian gamtatzia kizopna pulaak hi (1Pet. 1: 17; 2Pet. 3: 11). Pasian in mihing gamtatna khempeuh hong sit ding hi.

Tua hi-in Khristian khat in a siangtho-in a nuntak ding kisam hi.

Nihna-ah: Peter in Khristian khat in siangtho ding kisam hi, ci-in hong hilh phapha hi. Moses hun lai-in a siangtho-nate biakbuk sung zat dingin kituamkoih hi (Pai. 26: 34; 28: 36; 29: 6, 37), Pasian a’dingin kikoih hi (gentehna-in Sabbath – Pian. 2:3). Pasian a siantho mah bangin Ama mite zong a siangtho ding ahi hi. Tua dingin Pasian in geel hi (Siam. 11: 44; 19:

2; 1Pet. 1: 15, 16). Pasian a’ dingin a kituamkoih na khat pen siangtho hi.

Peter in a laikhak a sim khempeuh Kha Siangtho tawh kipuahpha-in Jesuh thu a mang dingin lunggulh hi (1Pet. 1:2).

Thumna-ah: Peter in a siangtho khin mite nunzia pawlkhat pulaak hi. Amaute in zuau gen lo uh hi. Gitlohna hemkhia uh hi. Mi kheem lo uh hi. Simtat lo, enna sumit, gensiatna zang lo uh hi (1Pet. 2: 1). Amaute kipumkhat hi. Khat le khat ki-it uh hi. Kiniamkhiat uh hi (1Pet. 3: 8,9). Hoihna tawh kidim uh hi. Pasian’ deih bangin nungta uh hi (2Pet. 1: 5-7). Itna kip nei uh hi. A tawpna ah Peter in i lungkhamna, lunghimawhna khempeuh Jesuh ap ding hong hanthawn hi (1Pet. 5: 7).

Koi bangin mawhna kawk lo-in Peter’ hong hilh bangin a nungta dingin khat le khat tha kipia ding i hiam?

TUESDAY JUNE 20

NIHVEI KUM KIKNA LAMEN

A nuai-a Lai Siangthote sim in. Mailam ah bang thu hong om ding hiam?

1Pet. 1:4 ____________________________________________________

1Pet. 1: 17 __________________________________________________

1Pet. 4: 5, 6 _________________________________________________

1Pet. 4: 17 __________________________________________________

2Pet. 3: 1-10 _________________________________________________

Peter in bawlsiatna tawh kisai thu limgen mahmah hi. Ama laikhak a sim mite’n bawlsiatna a thuak uh hangin amaute ngah ding thupha in ngak ahih manin a upna uh nusia lo-in lametna tawh a nungta dingin hanthawn hi. Amaute ngah ding cikmah hunin kisia lo ding gamh in vantung ah kikoih hi (1Pet. 1:4).

Peter in mailamah a piang lai ding thunih pulaak hi: A nunung thukhenna le siatna khempeuh a beimang hun hong tung ding hi. Tu-in bawlsiatna a om hangin a man thukhenna hong tung ding hi. Bawlsiatna thuak mite’n tawntung nuamna ngah ding uh hi. Peter in thukhenna tawh kisai mun thum ah pulaak hi (1Pet. 1: 17; 4:5, 6, 17). Pa Pasian in mi khempeuh tungah a manin thukhen ding hi (1Pet. 1:17). Jesuh Khrih mahmah in a nungta lai mite le a si khin mite tungah thukhen ding hi (1Pet. 4:5). Tua thukhenna in Pasian’mite tungah thukhenna tawh kipan ding hi (1Pet. 4: 17). Pasian tawh a nungta lo mite in kaat le mei tawh kisusia mang ding uh hi (2Pet. 3:7).

Mi kim khat in Jesuh hong pai lo ding hi, ci uh a, mi khat in Jesuh hong pai ding hi, ci-in lamen uh hi. Peter in hih buaina tawh kisai zong hilhcian hi (2Pet. 3: 1-10). Jesuh a hong pai nailohna a hangin mi khempeuh in a mawhna uh kisikin hotkhiatna ngah ding hun a hong pia hi zaw hi. Tua bangin Jesuh hong pai kik ding a lamen mite in a siangtho, paubaanglo-in a nungta dingin hong hilh hi.

Tua hi-in Peter in Khristian nunzia ding a hong hilh banah lametna tawh a nungta dingin zong hong hilh hi. Bang bang thuakta lehang upna tawh kalsuana, Pasian thu a mang dingin hong hilh hi.

Bang bang piang taleh bang hangin upna nei-in thumang ding kisam hiam? A dang lampi om lo hiam?

WEDNESDAY JUNE 21

GAM SUNG LEH PAWL SUNG KI-UKNA HOIH

1Pet. 2: 11 – 21; 5: 1-5 sungah Peter in kumpi hoih le pawlpi kimakiahna hoih tawh kisai-in bang pulaak hiam? Koi bangin Khristian khat in khua sung hoih nading le pawl sung hoih nadingin mapang ding hiam? Koi bangin gammi hoih hi ding i hiam?

____________________________________________________________

____________________________________________________________

Peter in kumpite le biakna makaite in Khristian kici peuhmah a bawlsiat hunin nungta hi. Hih thu hangin Peter le Paul in kumpi hoih ding kisam ahihzia pulaak uh hi (1Pet. 2: 13 – 17; Rom 13: 1-7). Gam uk makaite pen Pasian sehna bangin kikoih hi. Amaute in siatna bawl mite gim pia-in hilh ding uh hi. Ahi zongin kumpite in tua bang hi khin lo hi. Peter mahmah in zong tua bang thuak kha hi. Tu-in zong kumpi khut sungah bawlsiatna thuak om hi.

Peter in a huampi-in a pulaakin kumpi hoih in gam mite phattuam nading nasem hi. Gam mite lungmuangsak hi. Thukhun tawh gam uk uh hi. Gam thukhunte a kizuih loh ciangin siatna tuamtuam in nungzuihpah hi.Tua hi-in kumpi hoih, ki-ukna hoih in Pasian kiang pan hong pai thupha khat ahi hi.

Peter in zong Paul gen bang mahin pawlpi kimakaihzia hoih kisam hi, cih pulaak hi. “ Biakpiakna ah na khempeuh a kilawm kituakin hih ding thupi hi”

(1Kor. 14: 40). Peter in pawlpi upa-te kiangah Pasian tuu-te makaih ding a kisapzia pulaak hi (1Pet. 5:2). Makai khat in kiniamkhiat ding kisam hi. Thu-um mite hoihtak makaih ding kisam hi. Pawlpi mite Pasian thu theihsak ding kisam hi. Makaih hoih khat in muhkholhna, geelna kician nei-in, pawlpi mite in Pasian minthangsak nadingin Kha Siangtho piak siamnate hoih tak a zang dingin makaih ding hi.

1Pet. 5:5 in “thu-um mite khat le khat kizopna ah kiniamkhiat un,” ci hi. Koi bangin kiniamkhiat ding hiam?

THURSDAY JUNE 22

NA KHEMPEUHTE TUNGAH LAI SIANGTHO

A nuai-a Lai Siangtho munte sim in. Upna le nunzia ding bang hong hilh hiam? Koi bangin tua thute nuntakpih ding na hiam?

1Pet. 1: 10-12 ________________________________________________

2Pet. 1: 16 – 20 ______________________________________________

2Pet. 3: 2 ___________________________________________________

2Pet. 3: 16 __________________________________________________

Peter Laikhak Nihna ah Peter in zuau kamsang tawh kisai thugen hi. A laikhakte tungah thuman bulpi nih pulaak hi: “Note in a siangtho kamsangte in nidang lai-inah a gensa thute ahi zongin, note sawltakte tungah hong piak Topa le Honpa’ thukham ahi zongin, na ngaihsut nadingun, hih lai nih sungah note lungsim siangtho uh hong phawksakin ka hong hansuah hi” (2Pet. 3: 2). Tuhunin zong Pasian kamsangte’ pulaak thu – Thuciam Lui kiplai hi. Tua kamsangte a om nawn loh uh hangin amau gen thute mah

Thuciam Thak in hong hilh hi. Matthew, Mark, Luke le Johnte in Jesuh nunzia, a hong sihna, sihna pan a thawhkikna thute hong hilh uh hi. Sawltakte Tangthu in pawlpi masate le sawltakte’ nasepziate hong hilh hi. Sawltakte’ laigelh thute in Kha Siangtho’ makaihna tawh a gelh uh hi-in tuni dongin thuman bulpi ahi hi. Pasian kammal in na khempeuh tungah thunei hi (2Tim. 3: 16). Tua hi-in Peter in zong thu-upna le gamtatzia khempeuh Lai Siangtho siksan ding hong hilh hi.

Lai Siangtho in thuman bulpi hi-in Kha Siangtho’ makaihna a om kei leh

Lai Siangtho sung thute kikhial ding hi. Tua in siatna lianpi hong tun ding hi. Hih in Lai Siangtho sinzia ding hong hilh hi. Thungetna le ki-apna tawh Lai Siangtho sim ding ahi hi. I simna mun ( chapter/verse) in Lai Siangtho buppi tawh kizopzia theih kul hi. Na simna mun a gelh kua hiam? Bang thu piang kigelh hiam? Bang hangin gelh hiam, cihte zong kan kul hi. Gentehna-in 1 & 2 Peter in kum zalom khat hun lai Roman Emperor uk hunin kigelh hi). Lai Siangtho i sim ciangin, i simna mun mun in, Khrih hong sihna tawh bangci kizop hiam, hotkhiatna thu bangci pulaak hiam, cihte bulphuha sim ding ahi hi (1Pet. 1: 10 – 12). A tawpna-ah tuhun a’dingin bang thu hong hilh hiam? cih ngaihsun in. Pasian in thuman bang hong hilh nuam hi ding hiam? Koi bangin na simna mun Pasian kammal nuntakpih thei ding na hiam? Koi bangin Pasian gam a’dingin nungta ding na hiam, cihte ngaihsun in.

FRIDAY JUNE 23

NGAIHSUTBEH DING. Peter laikhak sungah thuthuk tampi om hi. Ahi zongin Khristian nunzia ding, khatlekhat kizopzia ding hong hilh hi. Khrih thuman theih ding kisam mah hi. Ahi zongin tua thuman tawh nuntak ding thupi zaw hi. Tua hi-in “Tu-in na sanggamte uh itna takpi na neih nading uh le khat le khat na lungsim tawng ah tawh na ki-it tek nadingun thutak thu mangin no le no kisiansuah khin zo uh hi” ( 1Pet. 1: 22).

Peter in lungsim siantho-na le thutak thu manna kizom hi, ci-in a hong hilhzia ngaihsun in. Thuman in hong khel hi. Thuman in khat le khat siantho-na tawh hong ki-it sak hi. Thumang, siantho-na, itna cihte kizom hi. Tua in i nunzia ding ahi hi. Hih bangin a nungta hi lehang bangzahin i nunna a kilamdang diam? Bang zahin i pawl sung a nuam diam? Bang in thu-um mite hong kipumkhatsak ding hiam? “ Sanggamte aw, inn sung ah hi ta leh biakinn hi taleh, na omna khempeuh uah Khrih lungsim nei ding hi lo na hiam? Uplohna, mawh kizonna cihte hemkhia lo ding na hiam? Nidang sangin lungsim kihualin nasemkhawm ding kisam hi. Kipumkhatna in thahatna hi. Kikhenna le kipumkhat lohna in tha nemsak hi” Ellen G. White, 2SM., 373, 374.

KIKUP DING DOTNATE.

1.   “Jesuh hong pai kik ding Ni lametna tawh nungta un. Tua Ni hong tunbaih dingin nungta un. Tua Ni in vantungte mei-a halsiatna tun dinga, a satna sungah a bulpite a tuisuak ding hi” (2Pet. 3: 22). “Ni hong tunbaih dingin nungta un” cih kammal a khiatna bang hiam? Koi bangin leitungah Jesuh hong paibaihsak thei ding i hiam?

2.   Piansaknate in Pasian Lai Siangtho bu nihna hi. Ahi zongin Lai Siangtho a kitelkhialh bang mahin piansaknate thu zong kitelkhial hi. Gentehna-in bang ngimna tawh nate kipiangsak, bangci bangin kipiangsak, amau omzia cihte ki-um nawn lo-in, amau thu thu-in hong piangkhia tawm hi, (Darwinism and natural selection) cih upna hong lut hi. Nate in Pasian’ khutma hi lo hi, kici hi. Koi bangin piansaknate tung panin Pasian phawk thei ding i hiam? Bangci bangin piansak nate’ pulaak thu za thei ding i hiam? Piansaknate in ciangtan nei hi lo hiam? Lai Siangtho hong hilh thute thei hi lehang piansak nate’ pulaak thute thei lo-in om ding i hiam? A kipulaak piansaknate thu in Lai Siangtho pulaak thu tawh a kituah loh ciangin bang thu hong om hiam? Koi khial hi ding hiam?