LESSON 12 JUNE 10 – 16 TOPA NI

SABBATH NITAK

TU KAAL SUNG SIM DING: 2Pet. 3: 1, 2; 3: 3-18; John 21: 15 – 17; Late 90: 4; Matt. 24: 43 – 51.

KAMNGAH: Tua bangin na khempeuh tuimang ding ahihman in note bangci bangmi hi dingin kilawm cih ngaihsun un. Pasian sutna le Siangtho nuntakna ah gamta un. (2 Pet 3:11)

Nidanglai-in Pasian thu-um mi khat pen muanhuai lo, lauhuai hi, ci-in ngaihsun uh hi. Bang hang ai diam? Pasian um kei leh, thukhenna zong a um lo hi pahin, amau ut bangin gamtat ding phamawksa lo hi pah hi. Thukhenna om lo hileh mihing in siat theihzahin sia ding hi.

Thukhen tuak ding kihtak manin gamtat hoih a nei hi kei in. Pasian theihtelna in a hoihin hong gamta-sak ding hi. Peter in siatna bawlte’n a lauhuai thukhenna thuak ding hi. Tua thukhen in na khempeuh kisiat hun – Jesuh nihvei hong pai kik hun hi ding hi (2Pet. 3: 10). Mi khempeuh in mimawh i hih manin bangci bangin Pasian deihna le a siangtho-in nungta thei ding i hiam?

SUNDAY JUNE 11

A VANGLIAN THUPIAK

Peter in a laikhakna ah pawlpi in a lauhuai thuhilhna tuak ding hi, ci-in hilhkhol hi. Zuau thuhilhte’n suahtakna thu gen ding uh a, nunlui gamtatna zui kik dingin tua bangin thu hilh ding uh hi. Khrih sungah a hong kipia suahtakna in tua bang suahtakna hi lo hi.

A dang lauhuai thu hong tung ding hi. “Kong itte aw, tu-a kong laikhak a nihveina ahi hi. A siangtho kamsangte in nidang a a gen uh thute Topa le Honpa in sawltakte tungtawn a hong piak thute na phawkkik ding uh ka deih hi” (2Pet. 3: 1,2). Bang hangin Peter laikhakte sim kul hiam?

______________________________________________________

________________________________________________________________

Peter in Pasian kamsangte’ pulaak thute thu-um mite phawksak kik hi. Peter in Lai Siangtho – Thuciam Lui siksanin thu-um mite laikhak hi. Topa kammal in thuman thutak hi (2Pet. 1:19). I upna in Pasian kammal tungah kinga ding hong hanthawn hi. Thuciam Thak sungah Thuciam Lui kisam nawn lo hi, ci-in a pulaakna mun om lo hi. Tham lo-in Thuciam Lui in Peter gen Jesuh thute hong theitelsak hi.

Pasian kamsangte in thu a neih mah bangun Peter in zong Topa le Honpa sawltak khat ahih manin a thuneihna pulaak hi. A gen thute in Pasian deihna tawh kituak hi, cih thu theitel hi. Theihtelna tawh thugen hi. A gen thute hong paina mun tel hi.

  

Bang hangin ngeina khat, i hoihsak khat peuh sangin Pasian kammal ki-uk sak zaw ding i hiam? Bang hangin nidangte sangin Sabbath ni-in Pasian biak ding hi zaw hiam?

MONDAY JUNE 12

THUMAN ZAHPIHTE

Peter in kamsangte’ pulaak thu a gen khitteh Jesuh’ thupiakte pulaak hi (2Pet. 3:2). Peter in a lauhuai thute a hilhkholhna ah Lai Siangtho’ thuneihna siksanin pulaak hi.

2Pet. 3: 3, 4 sim in.Khrih hong pai kik ding tawh kisai-in a um lo mite’n bang paulap nei hiam?

______________________________________________________________

______________________________________________________________

Suahtakna man lo hilhte le Nihvei Kumkikna a um mite in kibang uh hi. Suahtakna man lo hilhte in a kihhuai ci le sa gamtatna tawh nungta uh hi (2Pet. 2: 10). Nihvei Kumkikna a um lo mite’n zong amau pumpi lunggulhna bangin nungta uh hi (2Pet. 3: 3)

Thuman umlote’n Khrih hong pai kik ding kamciam koi ah tangtung hiam? ci-in zahpih kampau uh hi (2Pet. 3: 4). Amaute’n kamsangte’ pulaak Khrih hong pai kik ding hi, cih upna nial uh hi. Tua bang mite in nuntakna bei dongin thuman a um mite’ upna nial uh hi. Na khempeuh kibang tawntung ding hi, ci uh hi. Mi tampi in Khrih hong pai kik takpi mah ding hiam ci uh hi. Mi siangtho Enoch in midik a hi a, mi gilo hi taleh anih un leivui suak uh hi; a tunna mun uh kibang hi, ci-in pulaak hi (Prophets and Patriachs, 85). Tuiciin tunma-a nungta Enoch in tua bangin pulaak ahihleh ama khita kum tul tampi a nungta mite sungah muanlahna a om thei ding mah ahi hi. Tuhun SDA thu-umte ee? I pawlpi min in Khrih nihvei hong pai ding pulaak hi. Tudong Khrih hong pai lo hi. Peter’ genkholh bangin mite’n i upna hong zahpih hi.

Koi bangin Khrih hong pai nai lohna thu na pulaak diam? Na lawmte tawh kikum in.

TUESDAY JUNE 13

KUM TULKHAT IN NI KHAT BANG

Peter in zahko mite bangci dawn kik hiam? (2Pet. 3: 8-10). Bang hanga Khrih hong pai nailohna thu na thei hiam?

______________________________________________________________

______________________________________________________________

Lei piancial a kipan nate in a ngei-ngei hi lo hi. Leitung in siatna tawh kidim ahih manin leitungah tuiciin hong tung hi (2Pet. 3:6) Tuiciin a kipan na khempeuh kikhel hi. Leitung in siatna tawh kidim kik ahih manin a sawt lo-in meikhuangpi in leitung hahsiang ding hi ( 2Pet. 3:10). Peter in Lai Siangtho siksanin a gen hi-in Lai Siangtho in kip tawntung ahihlam zong hong hilh hi.

Mihingte ngaihsutna-ah Khrih hong pai ding zekai tawh kibang hi. Ahi zongin Pasian’ muhna pan zekai cih om lo hi. Pasian in mi khat zong kisia lo ding deih hi (2Pet. 3:9). Pasian in mihingte a mawhna uh kisik nading hun hong pia zaw hi. Mi tampi in mawh kisik ding ngak hi. Ahi zongin Pasian’ lungduai-na thupi ngaihsut ding kisam hi. Lamet loh laitak guta a hong pai mah bangin mite lamet loh kalin Khrih hong pai ding hi. Guta in nate a guk nop manin kuama theihloh kalin hong pai hi. Ahi zongin Topa hong pai ciangin a thei lo kuamah om lo ding hi. Peter gen bang mahin “Tua Ni ciangin van in aw lian mahmah tawh mangthang ding a, a nate zong sa lua-in a kisia ding uh hi. Leitunga kipan leitungah kibawl na khempeuh a kang tum ding uh hi” (2Pet. 3: 10). Paul in zong hih bangin hong hilhkhol hi: “A kilawm hun ciangin nangma kam ka ngaih ding hi; gupna ni ciangin nang kong huh hi” (2Kor. 6:2).

WEDNESDAY JUNE 14     

TUA AHIH LEH BANGCIH DING?

Khangno khat in a nu kiangah Pasian thu hilh hi. A nu kiangah Jesuh hong sihna le a hong pai kik ding kamciamte pulaak hi. Tua tangval pa in na hoih semin amah le amah lungkim hi. Tua bang khitteh a nu in tangval pa kiangah “ na gen thute in tu-in bang khiatna nei hiam? ci-in dong hi.

2Pet. 3: 11 – 13 sim in. Koi bangin Peter in ‘na gen thute tu-in bang khiatna nei hiam” cih dotna koi bangin dawng hiam? Matt. 24: 43 – 51 zong sim in.

_________________________________________________________

____________________________________________________________

Seventh-day Adventist min in Khrih hong pai kik ding hi, cih pulaak hi. Khrih hong pai kik ding cih thu in eite siksan bulpi lianpen hi. Khrih hong pai lo ding hi leh na khempeuh in a mawkna suak ding hi. Ahi zongin thuman lo nasem pa i hih khak loh nading kisam hi (Matt. 24: 43 – 51). Tua thugentehna sunga siatna khempeuh i bawl kei zongin nunzia i niamsak leh, mi tawh kizopna gina kei leh leitung mite tawh a kibang i hi ding hi. Khrih hong pai kik ding hi, cih kamciam zong i muang zo kei ding hi.

Mi tampi in Khrih hong pai hun ding – a ni, a kum dongin pulaak zel uh hi. Khrih hong pai ding a hun sehkholhna sangin a lauhuai khat om hi. Tua in Khrih hong pai kik ding lametna nei nawn lo, Ama hong pai ding lawpna nei nawn lo cihte hi. Kuamah in Khrih hong pai ding hun a theih loh hangin a hong pai ding hun tawh i kinai zaw semsem hi. Tua hi napi mi tampi in Khrih hong pai lo ding bangin nungta uh hi. Khrih hong pai ding cih lametna in i nuntakna huzaap kul hi. Khrih hong pai ding ahih manin Pasian’ deihna tawh kituak – a siangtho-in nuntak ding kisam hi (2Pet. 3: 11). Khrih hong pai ding cih thu in tu-a i nunzia hong puahphat kul hi.

Koici-in Khrih hong pai kik ding hi, cihthu in na nunzia, gamtat, ngaihsutna khempeuh hong huzaap hiam? Tua in na dinmun in na upna, na nunzia pulaak hi lo hiam?

THURSDAY JUNE 15

A TAWPNA THUUMNA

A thupatna ah a pulaak mah bangin Peter in a laikhak a khupna ah zong “ a siangtho-in nungta-in gitlohna lampi zui lo dingin pulaak kik hi (2Pet. 3: 17).

2Pet. 3: 14 – 18 sim in. Peter in kua tungah thuumna nei hiam? Bang lauhuai thu pulaak hiam?

____________________________________________________________

____________________________________________________________

Peter in Paul’ gen thute siksanin a laikhak sim mite tungah thuumna nei hi (2Pet. 3: 15). Khrih hong pai hun naita ahih manin Amah a ngak mite in ki-it kilemin, a siangtho-a a nungta dingin hong hilh hi (Rom. 2:4; 12: 18; Phil. 2: 12). Tua banah Paul’ laikhakte thu-um mite’n manpha-sa hi, cih thu Peter in pulaak hi. Peter in tawmno khat maw? A bupin pulaak maw, cih i thei kei hi. Bang bang hi taleh Paul’ laikhakte Topa kammalin kisang hi.

A tawpna-ah Lai Siangtho mundangte mah bangin Paul’ laikhakte zong kitelkhial kha thei hi, ci-in Peter in pulaak hi. Greek laimal ah ‘grapha’ cih a khiatna in ‘a kigelh lai’ cihna hi-a, hih mun ah Moses le kamsangte’ gelh bang mahin tua lai-te in manpha hi. Paul’ laikhakte in kamsangte’ gelh Lai Siangtho mah bangin thunei hi.

Paul’ laikhakte siksanin zuau thuhilhte’n suahtakna man lo hilh uh hi. Paul in upna tawh dik ngahna thu limtakin hilh hi (Rom. 3: 21, 22). Paul in ci le sa zui-in ut bangin mawhbawl ding hilh ngei lo hi (Rom. 6: 1-14). Paul in upna tawh dikna kingahna thu a gen ciangin zuau thuhilhte’n nial uh hi. Tua bangin zuau thuhilhte’n amau siatna lam manawh hi.

Khrih sunga a nungta dingin a hong kisapna tawh kizui-in na nuntak nading tuni-in bang khentat ding na hiam?

FRIDAY JUNE 16

NGAIHSUTBEH DING: Khrih hong zekai mahmahin i ngaihsun hi. Jesuh in tua bangin i ngaihsut ding thei hi. A thugentehnate ah nasem pa in ka topa hong pai hak nangawn ding aiteh ci-in pilvang lo hi (Matt. 24: 45 – 51). A nihun a topa uh hong pai ding cih pen lamet uh hi. A lamet hun uh kibang lo hi. Khat in a topa pai ding a tawntungin kiging hi. Khat in ahih leh ka topa zekai ding ahihteh ci-in siatna sungah nuamsa hi. “A hong pai hun ding thei khol lo ihih manin a tawntungin kigingkhol dingin thu hong pia hi. Topa hong pai ciangin ngakin a kiging mi in thupha ngah mi ahi hi” (Luke 12: 37). Topa hong pai ding a ngak mite in thadah lo uh hi. Khrih hong pai kik ding lametna in Topa kihtakna, Amah a langpangte tungah a thukhenna cihte hong kihta-sak hi. A hehpihna a nial mite’ thuak ding gimna lian hi, cih hong phawksak hi. Topa a ngak mite in thuman zui-in a nuntakna uh kihahsiang uh hi.” Ellen G. White, The Desire of Ages,634.

KIKUP DING DOTNATE

1.   Monday ni-a Nihvei Kumna tawh kisai dotna na lawmte tawh kikum in. Bang thute hangin Khrih hong pai thei nai lo hiam?

2.   Ngei-na siksan lo-in Lai Siangtho siksanin SDA pawlpi upna, thuzuih, thuhilh thute pulaak in.

3.   Tu kaal sung thusinna ah Peter in zuau thuhilh le siatna kizopzia bang pulaak hiam? A kizom kha mawkmawk ahih lohzia pulaak in. Bang hang hi ding hiam? Bang thute hangin kizom hi ding hiam?

4.   Albert Einstein in hun tawh kisai a pulaak thute lamdang mahmah hi. Hun sawt le hun tom i cihin i omna mun tawh kisai hi, ci hi. I it khat tawh om lehang hun tom i sa hi. I muhtheih loh khat tawh om lehang hun i cimtak hi. Cihnopna-ah hun cih pen mihing in a telzawhloh a lamdang mahmah khat hi. Koi bangin hih thu in Khrih hong pai nailoh tawh kisai-in mihing in hun a muhzia le Pasian muhzia kibang lo hi, cih hong theisak hiam?