SABBATH NITAK
TU KAAL SUNG SIM DING: 2Pet.
2: 1-22; John 8: 34 – 36; Matt. 12: 43 – 45; Jude 4 – 19; Pian. 18: 16 – 33.
KAMNGAH: “Ka hong suaktasak ding uh hi ci-in
midangte kamciam a piak uh hangin amaute mahmah siatna sila ahi uh hi. Banghang
hiam cihleh na khatpeuh in mi khat a thuzawh leh tua mipa in tua sila ahi hi.
(2Pet 2:19)
A Laikhak Masakna ah Peter in a laikhak sim
mite in bawlsiatna thuak uh ahih manin upna ah a kip nading uh tha pia hi.
Bangci bang bawlsiatna i theih loh hangin Roman Empire kumpi in Khristian kici
khempeuh beimang dingin nasem hi.
Satan in zong lampi nih tawh nasem hi. Pawl
pua panin bawlsiatna sangin a lauhuai zaw pawl sung panin zuau thuhilhsia hong
om hi. Jew mite lakah zuau kamsang a om bang mahin Peter hunin zong simthamin
thuzuau hilhsia om hi (2Pet. 2:1). Tampi in tua thuzuau hilhte nungzui uh hi
(2Pet. 2:2).
Peter in a lauhuai bang thuzuau pulaak hiam?
Koi bangin Peter in tua thute nial hiam? Pawl sung pan thuman lo thute bangci
pelh ding i hiam?
SUNDAY JUNE 4
KAMSANGZUAUTE LE THUHILHZUAUTE
Thu-um mi masate khat le
khat kithuhual uh hi. Pawlpi masate nuamna tawh kidim i sakkhak leh tua bang hi
lo hi. Nungzui 12 lak pan Judah in a simthamin siatna bawl hi. Pawlpi masate
lak panin zong zuau thuhilh hong piang hi. Pua lam pan bawlsiatna a thuak uh
banah pawl sung panin buai-na hong om hi. Bang buai-na hong om hiam?
“Israel mite lakah
kamsangzuaute a om ngei mah bangin note lakah zong thuzuau hilhte a hong om
ding hi. Amaute ina hong siasak thei upna maanlote hong lutpih sim ding uh a,
amaute a lei Topa nangawn nial uh ahih manin amaute tung mahah siatna tung pah
ding hi. Mi tampi in tua mite siatna lampite zui ding uh a, amaute hangin
thuman thutak lampi a zahko ding uh hi. Amaute duhlop huaiham mahmah uh ahih
manin zuauthu tawh note nek zonna in hong nei ding uh hi. Tanglai a kipanin
Pasian in amaute thukhen zo a, a sawtlo-in kisiatna a thuak ding uh hi” (2Pet.
2: 1-3). Nopna tawh kidim thu-um sanggam u le naute lakah tua bang buaina a om
ding lamdang kisa ciat hi.
2Pet. 2: 1-3, 10 – 22
sim in. Peter in bang hong hilhkhol hiam? Pawl sungah bang thuzuau kihilh hiam?
___________________________________________________________________
____________________________________________________________________
Topa in pawlpite tungah a
nihveina laikhak dingin Peter tungah pulaak hi (2Pet. 2:1). A beisa-ah
kamsangzuau a om bang mahin mailam ah zong hong om ding hi. Zuau hilhte in
siatna ding bek hilh uh hi (2Pet. 2: 1, 19).
Tua
bang thuhilhnate lauhuai ahih manin Peter in khauhtakin nial hi.
Peter in tua bang
thuzuau hilhte a langpanzia ngaihsun in. Thuman a thupitna bang hong hilh hiam?
Koi bangin pawl sungah tua bang zuau thu hong lut loh nadingin ei le ei kidal
ding i hiam?
MONDAY JUNE 5
KHRIH
SUNGAH SUAHTA?
“Amaute in kimanna neilo kiphatsakna kam pau
uh a, khialhna sunga om mite lak panin a suakta mite, ci le sa lunggulhna
zui-in a paktat dingin a zol uh hi” (2Pet. 2: 18). Peter in a lauhuai bang thu
hilhkhol hiam? A theihsaknop thu bang pulaak hiam? “Suahtakna’ ‘ut bangin omna’
in bang thupi hiam?
____________________________________________________________
____________________________________________________________
Zuau thuhilhte in suahtakna, ut bangin om
cihte hilh uh a, tua in a taktakin koltanna sung lutpih zaw hi. Zuau hilhte’n
tatkhiatna thuman pulaak lo uh hi. Khrih sungah suahtakna in mawhna pan
suahtakna hi (Rom. 6:1-4). Khrih sungah suakta ci-in mawhna sila-in nuntakna
pen a lauhuai suahtakna man lo hi. Thuman langpanna muhzia tuamtuam a om hangin
Peter in mawhna le mawhna sila hihna in thuman langpanna hi.
John 8: 34 – 36 sim in. Koi bangin Khrih
kammal in Peter thuhilhte hong theisak hiam?
____________________________________________________________
____________________________________________________________
Zuauhilhte in bang bang a hilh zongun Khrih a
um mite nangawn mawhna sila dingin hanthawn hi. A nusiatsa-uh siatna dim nunna
ah kileh kik dingin hehpihna thu hilh uh hi (2Pet. 2: 19).
Koi bangin Khrih sungah
suahtakna na tel hiam? Khrih in bang panin hong suakta-sak hiam?
TUESDAY JUNE 6
UI IN A
LUAK NE KIK
2Pet. 2: 17 – 22;
Matt. 12: 43 – 45 sim in. Khristian khat in a nunlui zuan kik leh bang
lauhuai-na tuak thei ding hiam?
____________________________________________________________
____________________________________________________________
Zuau hilhsiate’n nunlui zuan
kik dingin thuhilh uh hi (2Pet. 2: 18). Tua banah suahtakna kamciam pia uh hi.
Ahi zongin tua suahtakna in Jesuh hong piak suahtakna tawh kibang lo hi. Peter
in khauhtakin thuhilh hi. Thuman thei-in nungkik sangin thei kha ngei kei vet
le-uh amau a’ding hoih zaw ding hi (2Pet. 2: 21). Tua bangin amaute’n nuntak uh
hangin lamet bei hi nai lo uh hi. Topa nusia-in ahi zongin hong kihei kik mi om
hi. Tua bangin Topa kiang a kihei kik mi hangin Topa lungdam hi (Luke 15: 11
-32). Topa tawh kigamlatna in a lauhuai dinmun hi; deihhuai lo hi. Peter in tua
bang nunzia a luak ne kik ui tawh genteh hi.
Jesuh’ thuhilhte Peter in
zong hilh kik hi (2Pet. 2: 20; Matt. 12: 45; Luke 11: 26). Jesuh thugentehna ah
dawivei mi khat in suahtakna ngah hi. Tua dawi in a om nading mun zong kawikawi
hi. Ahi zongin a om nading mun mu zo lo ahih manin a nusiat mun hong zuan kik
hi (Matt. 12: 44). Tua bangin hong lut kik ciangin amah tawh kibang dawi 7 hong
tonpih hi. A masa nunzia sangin sia zaw hi (Matt. 12: 45). Jesuh le Peter in a
lauhuai nunzia hong hilh hi. Khrih sungah mi thak in a nunlui nusia ahih manin
Kha Siangtho tawh a kidim ding ahi hi. Biakpiakna, pawl sung nasepnate-ah a
kihel kei leh nidang gamtat luiteng in hong bawmkik ding hi.
Koi bangin pawlpi sung hong
lut thak mite pawlpi in panpah thei ding hiam?
WEDNESDAY JUNE 7
PETER LE JUDE
Mi kim khat in Jude14 – 19 sunga thute in
2Pet. 2: 1-3:7 sung thute a kipulaak kik hi, ci uh hi. Tua bangin Lai Siangtho
in a pulaak kikkik ciangin tua thute in thupi hi, cih hong theisak hi. Pasian
in mi gilote uk hi. Pasian in na khempeuh uk hi, cih hong hilh hi. Dawi gilote
le mi gilote in thukhenna thuak ding uh hi (2Pet. 2:9, 17; Jude 6
2Pet. 2: 1- 3:7; Jude 4 – 19 sim in. A beisa
huna Pasian’ thukhenna in siatna beisiang takpi ding hi, cih siksan ding a om
hiam?
_____________________________________________________________________
_____________________________________________________________________
Peter le Jude in Pasian’ thukhenna thum
pulaak uh hi.Tui in leitung mun khempeuh tuamin na khempeuh kisia hi. Sodom le
Gomorrah kisiatna leh vantungmite susiatna hangin a si mi tampi cih thute in a
lauhuai siatna hang ahi hi (2Pet. 2: 4-6; 3:7; Jude 6, 7). Hihte in leitung bei
ding hong hilhkhol uh hi. Lai Siangtho in Pasian’ hehpihna a hong hilh mah
bangin Pasian thumanna in mawhna susia hi.
A kihtakhuai thukhenna a piangsak siatna bang
hi ding hiam? Thuman panin lampialna, ukna nialna, nate’ sila hihna, Pasian
hehpihna siksanin ut bangin gamtatna, Jesuh in Khrih le Topa hi, na khempeuh uk
hi, cihte nialna, ci le sa gamtatna, amah le amah dikkisakna kampaute, mi
siatna ding kampau cihte hi (2Pet. 2: 1, 10, 19; 2: 18; Jude 4, 8, 10). Thu-um
mi pawl sungah hih bang siatnate a om lo hi lo hi. Pawl khatte’n hih bang
siatnate mawhna-in ngaihsut lo uh hi. Tua hi-in pawlpi in kipuahpha-in khanlawh
ding kisam hi.
2Pet. 2: 12; Jude 10 sim in. Mihing’ lungsim
in mihing tawh kilawmlo gamtatna, ganhing bangin gamtatna tawh kidim hi. Pasian
in mihing a hong bawlcillai tua bang dingin a hong bawl hi lo hi. Tua hun le
tuhun mihing nunzia tehkak in. Koi bangin siatna dal ding na hiam?
THURSDAY JUNE 8
THUCIAM LUI HONG HILH THUTE
2Pet. 2: 6 -16 sim in. Bang
in Siatna hong tun hiam?
____________________________________________________________
____________________________________________________________
Sodom min pulaak masakna mun
Pian. 13: 12, 13 hi. Neihlelamh hangin Lot le Abraham kikhen ding hi ta hi. Lot
in Jordan zangkuam Sodom mun teel hi (Pian. 13: 12). Sodom khua mite in siatna
tawh kidim uh hi; a mawhna uh lian mahmah hi (Pian. 13: 13). Topa in Sodom a
suksiat ding thu Abraham tungah pulaak hi. Abraham in Sodom khua sungah midik
10 a om leh tua khuapi a koih lai nadingin thuumsak hi (Pian. 18: 16 – 33).
Sodom khuapi sungah midik 10 om zo lo ahihzia a nungciangin amau gamtat in
pulaak hi. Sodom pen kisusia takpi hi. Lot le a tanu nih bek suakta uh hi
(Pian. 19: 12
–
25).
Peter in hih thupiang panin
theih ding thunih pulak hi: Khatna in, siatna hangin thukhenna om hi (2Pet. 2:
6). Nihna, Topa in siatna lakpan ama mite honkhia hi (2Pet. 2: 7 -9). Sodom le
Gomorrah khuapi sunga kisia mite’ nunzia-in a ut bangun ci le sa deihna zui uh
hi. Gam thukhun nei lo, siatna bawl ding hangsan uh hi. Vantungmite bawlsia
ding phamawhsa lo uh hi (2Pet. 2: 10, 11). Thuzuau hilhte le kamsangzuaute in
zong tua bangin gamta uh hi.
Balaam thu en in (Gam. 22: 1
– 24: 25). Israel mite samsia dingin Moab kumpi Balak in a cial kamsang pa hi.
A masa-in Balaam lungtung zo tak lo hi. Sum ngah ding a theihteh zui hi ( Gam.
22: 7 – 21). A paina lampi ah Topa vantungmi tawh kituak a, a tuanna la-no in
ama sih nading panin honkhia hi. Balaam in la-no sat gawp hi. Ama mawhna a
phawk ciangin a mit kihong a, amah mah in Topa vantung mi mu hi (Gam. 22: 22 –
35). A tawpna ah Balaam in Israel mite thupha pia veve hi ( Gam. 23: 4 – 24:
24). Balaam a siat bangin kamsangzuaute le zuau thuhilhte zong numei pasal paktatna
le huaihamna tawh kidim uh hi (2Pet. 2: 14, 15). Tua mite’n thuman panin
pialkhia uh hi.
Lai Siangtho le Ellen
G. White hong gen thuman ngaihsun in. Bang hangin SDA thu-um mi khat in Pasian
thukhenna hong tung ding hilhkholhna om kei ci thei ding hiam?
FRIDAY
JUNE 9
NGAIHSUTBEH DING: Khrih
sungah suahtakna cih kammal a kiza mun mahmah kammal khat hi. Thukham in
hong mawhsakna pan suakta-in hotkhiat lungmuanna nei i hi hi. Bang hang hiam
cihleh Khrih in hong suakta-sak hi.
Mihing in amah le amahin a suahta thei kei hi. Martin
Luther in thukham tawh dikna ding a hanciamna pan a suahtak tak ciangin Khrih
sungah suahtakna taktak ngah hi. Peter hun in tua suahtakna in lampi man tawnlo
hi. “ Khrih bek in hong honkhia hi, ci-in um napi, mi tampi in suahtakna pan
lampial uh hi. Mi tampi’n Khrih sungah suahtakna pen thukham neihlohna hi, ci-in
ngaihsun khial uh hi. Bang hang hiam cihleh thukham’ mawhsakna panin a hong
suakta sak dingin Jesuh hong pai hi. Tua bang mite’n thukham nawlkhin uh a,
thukham a zui mite’n hehpihna ngahlo hi, ci-in pulaak uh hi. Thuman le thuzuau
kihelhzau ahih manin Kha Siangtho in hong makaih kei leh mihing in thuman i
thei kei ding hi. Thuman le thuzuau a khen lo mi in
Satan’ ukna sungah nungta hi. Satan in thuman sangin
thuzuau a kizui zaw dingin nasem hi.” Ellen G. White, Christ Triumphant, 324.
KIKUP DING DOTNATE
1. 2Pet.
2: 19 le zuau thute ngaihsun in. Bang hangin thuman theihtel ding thupi hiam?
Bang hangin up ding thute pawlpi in kithukim ding thupi hiam? Bang hunteh
pawlpi upnate a lauhuai dongah lampialpih kha uh hiam?
2. Peter
in a pulaak Pasian thukhenna le gimpiak pulaak a kammal zatte ngaihsun in.
“Amau mawhna in amau kisiatna hi (2Pet. 2:1) ‘thukhen ni teh gim thuak ding
ngak uh hi’ (2Pet. 2: 9) ‘amau siatna bei hun nei lo hi’ ( 2Pet. 2: 3). Siatna
bawl mite’n a lauhuai Pasian thukhenna thuak ding uh a, siatna a tunpih thuhilh
makaite’n zong a lauhuai thukhenna thuak ding ahihzia na ngaihsun hiam?
3. Khrih
sungah suahtakna ngah ci-in Thupiak Li-na Sabbath simloh zui napi, Sabbath
kisam lo hi, cih thu ngaihsun in. Khrih sungah suahtakna kizang khial ahihzia
na tel hiam?
