LESSON 10 MAY 27 – JUNE 2 GENKHOLHNA LE LAI SIANGTHO

SABBATH NITAK

TU KAAL SUNG SIM DING: Isa. 53: 1-12; Dan. 7: 13, 14; 2Pet. 1: 16-20; Matt. 17: 1 – 6; 2Tim. 3: 15- 17.

KAMNGAH: “Tua ahihman in kamsangte’ gen thute aman taktak ahihna thu ka tel theih uh hi. Note’ lungsim ah zingsol hong suak in khua a hongvak matengin khuamial lak a meitang bangin hih thute ngaihsun le uh cin hoih mahmah ding hi” (2Pet 1:19)

Peter laigelhte i sim ciangin, Peter in a gelh thute upna, muanna tawh a gelh hi, cih i phawk ding kisam hi. Paul zong tua bang mahin Jesuh le a hong sihna thu a up, a muan thute gelhkhia hi. Bang hangin Peter in tua bang upna, muanna nei hi ding hiam, cih thute tu kaal sungin i sin ding hi.

Peter in ama mit mahmah in Topa mu hi (2Pet. 1:9). Lai Siangtho gen thute amau mit tawh a mu kha lo mite a’dingin hih thu in thupi hi (2Pet. 1: 19). Lai Siangtho pulak kholhna bang mahin Jesuh hong nungta hi. Jesuh mahmah in zong Lai Siangtho manpha-sa mahmah hi (Matt. 26: 54; Luke 24: 27). Jesuh le Peter in Lai Siangtho thupi ngaihsut uh ahih leh eite in zong manpha-sak ding kisam lo hiam?

SUNDAY MAY 28

THUCIAM LUI SUNGAH JESUH

Peter in a laikhakte thuman thutak hi, ci-in pulaak hi.A gen thute theitel hi. Bang hang hiam cihleh aman kua’ thu gen cih theitel hi. Peter in

Kamsangte in Jesuh thu pulaak khol hi, ci-in um hi. A kigelh THU muanna in mihingin hong piang tua THU theitelsak hi (John 1: 14).

Peter in a laikhakna ah kamsangte in Jesuh’ thu a pulaak thute pulaak hi (1Pet. 1: 10-12). Kha Siangtho in Jesuh thu tawh kisai kamsangte tungah thunih pulaak hi. Thuciam Lui in Khrih thuak gimna le vangliatna pulaak hi

(1Pet. 1: 11).

Late 22; Isa. 53: 1-12; Zech. 12: 10, 13: 7; Jer. 33: 14, 15; Dan. 7: 13, 14 cihte in Jesuh thu bang pulaak khol hiam?

________________________________________________________________

________________________________________________________________

Peter in a laikhak ngah thu-um mite kiangah hotkhiatna sungah om ahihna uh limtakin hilhcian hi. Kamsangte sangin amau tungah hotkhiatna thuman tam kilang zaw hi, ci-in hilh hi. Kamsangte in a gen uh hi bek a, a tangtunna thu mu kha lo uh hi. Kamsangte’ genkholhna pawl khat Peter hunin tangtung khin hi. Vantungmite’ theihnop thute tu-in thu-um mite in thei uh hi. Bang hang hiam cihleh Kha Siangtho in amaute tungah pulaak hi (1Pet. 1: 12). Kamsangte sangin sawltakte hun le tuhun a thu-um mite’n

Khrih’ thuak gimna le a sihna thu a kicingin mutel zaw hi. Ahi zongin vangliatna hong tung ding i ngak lai hi (1Pet. 1: 11). Genkholhnate kimkhat tangtung khin a, a hong tung lai ding zong i ngak hi.

Lai Siangtho kamciam na ngah hiam? Bang kamciamte ngah ding na ngak hiam? Bang bang piang taleh koi bangin Topa kamciamte muang ding na hiam?

MONDAY MAY 29

VANGLIATNA A MU MITE

2Pet. 1: 16- 18 sim in. Peter in Jesuh a upna thu bang pulaak hiam?

____________________________________________________________________

_____________________________________________________________________

Kamsangte genkholhte banah Peter mahmah in a muh thute hong hilh hi. Khristian biakna in phuahtawm tangthu siksan hi lo hi (2Pet. 1: 16). A piang taktak thute tungah kinga hi.

Peter in Khrih mahmah tawh kikhawl, nekhawm, dawnkhawmin a kithuah mahmah nungzui khat hi. Khrih nasep a kipan – thuhilhna, thugenna, nalamdang bawlna cihte Peter in a mit tawh a muh thute hi. Zan tawntung ngabeng uh a, bang mah a mat loh uh hangin Jesuh thupiakna hangin nga tampi a mat uh a kipan sihna pan a thawh kik hun dong, Peter in a piang thute a mitmuh ahi hi (John 21: 15; Luke 5: 4-6).

2Pet. 1: 17, 18 ah Peter in a muh bang thupiang tungah kinga hiam? Bang thupiang in thupia hiam?

_____________________________________________________________________

_____________________________________________________________________

Peter in Jesuh melkikhelna pulaak hi. Mual tungah thungen dingin Jesuh in Peter, John le James tonpih hi (Luke 9: 28). Amaute tawh a omkhawm laitakun amau muhna ah Jesuh in vangliatna tawh kidim. A mai in khuavak tawh kidim hi. A puan in tee deldel hi (Matt. 17: 2; Luke 9: 29). Moses le

Elijah in amaute tawh hong omin van panin awging khat in “ Hih in ka it ka

Tapa hi. Ama in ka lung hong kimsak hi,” ci hi (Matt. 17: 5)

Peter in Jesuh tawh a kithuahna uah hih mel kikhelna lamdangsa hi.

Jesuh in Pasian Tapa takpi ahihna, Pasian geelna bangin nasem dingin leitungah mihingin a hong pianna, Pa Pasian tawh a lamdang kizopna cihte kimu thei hi. Jesuh nunzia tampi a muhte lak pan vantung panin awging in lamdang pen hi (2Pet. 1:18).

Na upna le Pasian tawh na kizopzia a lamdang na phawk diak a om hiam? Bang thu in koi bangin na nunna hong huzaap, hong kikhelsak hiam? Bang hangin tua thu in na nunna hong khel hiam? Na lawmte tawh kikum in.

TUESDAY MAY 30

LUNGTANGAH KHRIH KHUAVAK

“A kip a kho kamsangte thugente i nei hi. Note lungsim sungah, zingsang khua hong vak in zingsol hong suah mateng khuamial laka meitang bangin hih thute lim ngaihsut le-uh note a’ dingin a hoih mahmah hi” (2Pet. 1: 19). Peter in tuhun a’dingin bang pulaak hiam?

_________________________________________________________________

_________________________________________________________________

Lai Siangtho mundangte ah zong a kipulaak mah bangin (Pian. 1: 4; John 1:5; Isa. 5: 20; Eph. 5:8), Peter in zong khuavak le khuamial kilamdanna pulaak hi. Pasian kammal in khuamial laka khuavak tawh kibang hi. Tua hangin khuavak sung nungta dingin hong hilh tawntung hi. Zingsol khuavak in i lungtang hong tan mateng tua khuavak sungah om dingin hong hilh hi. Eite in mawhna tawh kidimin, khuamial sungah i nungta ngei hi. Hih khuamial panin khuavak ah hong paipih Pasian’ vangliatna i kisamden hi. Tua khuavak in Jesuh hi.

Peter in a laikhaksim mite in mungtup khat pulaak hi. Thu-um kimkhat in khuavak mateng cih thu in Jesuh hong pai kik ding hun hi, ci-in ngaihsun uh hi. Jesuh hong pai kik ding i lametna lianpi hi. Khrih hong pai ding hun sangin, tua zingsol khuavak in i lungtang hong om ding kisam masa hi.

Jesuh hi (Mang. 2: 28; 22: 16). Thu-um mite sungah tua khuavak hong om ciangin Jesuh theihtelna, Amah tawh nungta khawmin, a nungta Khrih theihtelna tawh i kidim ding hi. A thu-in theihna bek hi lo ding hi. Khrih in i nunzia hong huzaap ding kisam hi. Amah in i upna le i lametna ahi hi. Tua hi-in Peter in Pasian kammal lungngaihna le Zingsol Khuavak Jesuh tawh kizopna in a tonkhawm ahihlam hong hilh hi.

Khuavak in hong tan ciang bekin khuavak i tangsak thei ding hi. “ A vanglian Pasian’ thuman in mun khempeuh, minam khempeuh tungah hong tang hi. Tua khuavak a ngah mi in khuavak tangsak thei ding hi. Sun nitang in eite hong tan ahih manin tua khuavak in khuamial sunga om mite pai nading lampi khuavak sak hi.” Ellen G. White, Christian Experience and Teachings of Ellen G. White, 220.

Koi bangin Lai Siangtho na simna tungtawnin Jesuh na theitel hiam?

WEDNESDAY  MAY 31

A MUANHUAI GENKHOLHNA

2Pet. 1: 19- 21 sim in. Peter in genkholhna bang pulaak hiam? Mimal deihna bangin tua genkholhnate deihkaih ding hi lo hi, cih thu in bang hong hilh hiam?

______________________________________________________________

______________________________________________________________

Khristian upna in phuahtawm tangthu tungah kinga hi lo hi. Peter in a gen thute muanhuai-zia thunih pulaak hi (2Pet. 1: 16). A gen thute in mittang tawh kimu thute hi (2Pet. 1: 16- 18). Nihna ah: Peter in a pulaaksa bangin (1Pet. 1: 10-12) Lai Siangtho’ genkholh bangin piang hi (2Pet. 1: 19- 21).

I deih bangin kamsangte’ gen thu a khiatna pulaak ding hi lo hi (2Pet. 1: 20). Lai Siangtho sim kei un, hongci hi lo hi. Tua bang hi peuh mah lo hi: “ Note tungah hong tung ding hehpihna thupha a genkhol kamsangte in tua hotkhiatna thu phatakin a kantel uh hi” (1Pet. 1: 10). Tua ahih leh Peter in bang hong hilh hiam? A hong hilhnop thute in: Pawlpi masate in Lai Siangtho simkhawm, semkhawmin khangto uh hi. Khristiante in pumpi nate tawh kibang uh hi (1Kor. 12: 12-14). Khristian khat in pawlpi thupuakte a nial ding hi lo hi. Khristian pihte tawh kipawl, kizopna tungtawnin pawlpi khangto hi. Kha Siangtho in mimal leh mihon tawh nasem hi. Upna, muhzia pulaak kul hi. Khat le khat kihilh kul hi. Hawmsawnna tungtawnin theihtelna kingah hi. Ahi zongin midangte thu nialin amah kia bekin nasepna in lampial thei hi. Genkholhna tawh kisai thute zong kitelkhial thei hi.

Khristian lakah kamsang zuau le zuau thuhilh om ahih manin (2Pet. 2:

1), Peter in mimal khat ii theihna sangin mihon –pawlpi theihna siksan zaw dingin hong hilh hi. Kha Siangtho’ makaih pawlpi hilhna a nial manun upkhialhna, ngaihsutna om lo upna (fanaticism) cihte hong om hi lo hiam?

Nidangin tua bang lauhuai thuzuihna a om mah bangin tuhunin zong om hi lo hiam?

Bang hangin pawlpi hong makaihna, hong hilhnate thupi hiam?

Ahi zongin mi tungah kingak luatna in lauhuai ahih manin pawlpi tung kingakna bangci ciangtan ding i hiam?

THURSDAY  JUNE 1

PASIAN KAMMAL TAWH NUNGTA

Peter in Lai Siangtho limgen mahmah hi.Khristian nunna ah Lai Siangtho lo-in kinungta lo hi (2Pet. 1: 19- 21). Lai Siangtho in laibu dangte bang lo-in mihing’ bawltawm hi lo hi. Pasian misiangthote tungtawnin Kha Siangtho’ makaihna tawh Pasian misiangthote in a gelhkhiat uh ahi hi.

2Tim. 3: 15 – 17 sim in. Koi bangin Lai Siangtho in na nuntakna ah bang dinmun nei hiam? Koi bangin 2Pet. 1: 19- 21 sung thute hong phawk sak hiam?

________________________________________________________________

_________________________________________________________________

Pawlpi le Timothy in a lauhuai thute a pulaak khit ciangin Paul in Lai Siangtho thupitna pulaak hi. “Lai Siangtho buppi in Pasian humuapna tawh hong kipia hi a, thuhilh nading, mawhna kiphawksak nading, kibawlphat nading, le dikna thu ah kipattah nadingin manpha hi” (2Tim. 3: 16). Hih thuthum pulaak hi.

Khatna in: Thuman Thutak (Doctrine). Doctrine pen pawlpite hong hilh thute hi. Pasian kammal in a pulaak thuman thutak siksanin pawlpi’ upna a pulaak thute hi. Tua upna thute in Khrih bulphuh hi. Upna khat ciat in Pasian’ deihna tawh kituakin i nuntakzia ding hong hilh uh hi (Rom. 12: 2).

Nihna in: Lamhilhna. Paul in Timothy kiangah Lai Siangtho in thuhilh nading, mawhna kiphawksak nading, kibawlphat nading, le dikna thu ah kipattah nadingin manpha hi, ci-in hilh hi (2Tim. 3: 16). Peter in zong hih thu mah pulaak hi. Kamsangte hilhkholh thute in khuamial lakah khuavak bang hi (2Pet. 1: 19). Lai Siangtho in i gamtat zia ding, nunzia ding hong hilh hi. A sia, a pha hong khentel thei-sak hi. Kha Siangtho humuapna tawh kigelh Lai Siangtho in Pasian’ deih thute hong hilh hi.

‘Hotkhiatna ngah nadingin pilna a hong pia thei Lai Siangtho’ a cih in (2Tim. 3: 15), Lai Siangtho in Jesuh kiang hong tunpih hi. I mawhna hangin Jesuh hong si hi, cih upna in hotkhiatna bulpi ahi hi.

Thuman thutak (Doctrine), gamtat zia ding, hotkhiatna thu cihte in Pasian kammal in khuamial laka zingsol khuavak bangin tang hi, ci-in hong hilh hi (2Pet. 1: 19).

FRIDAY JUNE 2

NGAIHSUTBEH DING: Thuman in bang hiam cih theihtel nadingin Lai Siangtho sim kul hi. Tua khuavak sungah a nungta mi in, mite zong khuavak sungah a nungta dingin etteh huai-in nungta ding hi. Hih in a masa pen le a thupi pen mihing masuan hi. Nisimin Lai Siangtho sim ding kisam hi. Ngaihsutna, gamtatna khempeuh Lai Siangtho tawh sittel kul hi. Lai Siangtho mun khat le mun khat en kak in. Kha Siangtho huhna tawh na nunzia ding na thei ding hi. Pasian in thuman khuavak na muhna tungtawnin thu hong khen ding hi.

“Lai Siangtho thumante mipil tampi in um lo uh hi;muang lo uh hi. Pilna nei a kici mite’n Lai Siangtho in a kisel thusim hi, ci-in thuman mu thei lo uh hi. Mannei lo hi, ci uh hi. Hih bang mite in zuau thuhilh uh hi. Tua bang mite tungah Khrih in “Lai Siangtho ahi a, Pasian vangliatna ahi zongin thei lo na hih manun na sangkhial uh hi,’ ci hi (Mark 12: 24). Limciinna, gentehna kammalte simloh Lai Siangtho kammalte a hi bang lianlianin up ding hi. Khrih in hong kamciam khin hi. “ Pasian deihna bangin a nungta mi in thuman thutak thei ding hi” John 7: 17.

“Lai Siangtho gen bangin ki- um pah hen leh, zuau thuhilh cihte zong om kei leh, vantung mite lungdamna lianpi hi ding hi. Tua banah thuman thei khial, thuman thutak lampi panin lampial cihte zong om lo ding hi.” Ellen

G. White, The Great Controversy, 598, 599.

KIKUP DING DOTNATE

1.   Lai Siangtho thu theihtel nadingin thuguipi bang kisam hiam?

2.   Martin Luther in “Lai Siangtho in khuavak hi” ci-in pulaak hi. Lai Siangtho mun khat in i tel zawh loh a dang mun khat hong telsak ding hi.

Bang munte ah hih in hong huh thei ding hiam?

3.   Monday ni-a thusinna ah Khristian nunzia hong huzaap thute le natengaihsun in. Midangte’ tuahkhak thu tungtawnin bang thuman na ngah hiam?

4.   Topa tawh kinai zawk nadingin Lai Siangtho simzia ding hong kidong hi leh, koi bangin na dawng hiam? Lai Siangtho tungtawnin Jesuh Topa theihtelna dingin Lai Siangtho simzia thuguipi bang kisam hiam?