Ø Ngaihsut kibang lo mi nih nasep khop penTha kituak lo bawng leeng
kai tawh kibang hi.
Ø Ui in a kihtakte tawngin a kihtakte pet a,
Ø Mihing hong kihta ten hong koko in,
Ø Hong kihta lote in hong su-ek hi.
Ø Pasian in mawhna pulak pah lo, thukpah lo a,
Ø A pulak ciangin mi mai-ah pulak in, a thuk kik teh a khangin thuk
hi.
Ø Tu lai nungak tangvalte ki-it loin kingai uh a,
Ø Khantawn ading hi loin tawlkhat adingin kiteng uh hi.
Ø Na lian khat i sep zawh ciang bekin phatna kingah a,
Ø Na nengno khat i sep khialh ciangin nangawnin
Ø Gensiatna kingah hi.
Ø Mi pawl khatte a mi pum piangthak in, a neihsa piangthak lo a,
Ø Mi pawl khatte a mipum piangthak loin a neihsate piangthak hi.
Ø I piak ding sumpi a tawm ciangin kithuman zo lo a, i
Ø I piak ding sumpi a tam ciangin kihaza thei hi.
Ø Nuihna khempeuh nuamna hi kim lo a,
Ø Kahna khempeuh dahna hi kim lo hi.
Ø Vantung a tung mite adingin leitung pen hell tawh kibang a,
Ø Hell sung a tung mite adingin leitung pen vantung tawh kibang hi.
Ø Mihing in ei bek aman i kisa a,
Ø Ahi zongin Pasian in kei mawh nei hing a cite deih hi.
Ø Hong kiphat ciangin nuih pah pekpak ken la,
Ø Hong kigensiat ciangin gum pah ngeungau kei in.
Ø Kiphatna zong gensiatna kipatna hi thei a,
Ø Kigensiatna zong pahtakna hi thei hi.
Ø Mihai sawm in hong muhkhialh sangin,
Ø Mipil khat in hong muhkhialh dah huai zaw hi.
Ø Mi hai sawm in hong phat sangin,
Ø Mipil khat in hong phat ut huai zaw hi.
Ø I muan pente mah in hong khemzo pen a,
Ø I ngaih pente mah in hong mudah zo pen hi.
Ø Pilat mai-ah Jesuh a kisit theih mah bangin,
Ø Pawlpi mite mai-ah siate thu kisit hun om thei hi.
Ø A kamtam pente nasem pente hi leh,
Ø Siate sang a khasim piak tak zaw tampi om ding hi.
Ø A mi na muhdah manin a thu nial ken la,
Ø A thu na deih loh manin a mi mudah ken.
Ø An na duh mah bangin,
Ø Nasep na duh leh na puksi ngei kei ding hi.
Ø Gilkial loh na’ngin an nek a kul mah bangin,
Ø Puksih loh na’ngin nasep kul hi.
Ø Innkuan sungah sila leh to om lo ahih manin,
Ø Nasep kituh lo a i kikhiat laiteng nasep zo leh innkuan nuam om
thei lo hi.
Ø A tak kolh khempeuh a pil kim loh hangin,
Ø A pil khempeuh a tal kolh kim hi.
Ø Mi i hawmthawh nop leh amah sangin,
Ø Sep zawkna leh hoih zawkna i neih phot kul hi.
Ø Kisawl ciang bek a sep pen mi thanuam kici thei lo hi.
Ø Pasian gal pen Satan hi a, mihing gal pen mihing mah hi.
Ø Thu na lang zak leh,
Ø A lang bek mah um pah in.
Ø Meigit khatin gam khat a kat theih bangin,
Ø Thopuan sung thu in khua khat siasak thei hi.
Ø Na kiangah mikhat hong kigensiat leh,
Ø A kilem lohna uh leh ama pianzia thei masa in.
Ø Pastor khat a lungdam khempeuh tawh a lungdam kim loh hangin,
Ø A dah khempeuh tawh dah khawm hi.
Ø Zu leh va in a gawl sih pih a,
Ø Mihing in a lungsim sihpih hi.
Ø Pasian in lem a sak nak leh,
Ø A lem lo munte ah zong lem veve hi.
Ø Sihna lamdang i sa a, a sihna lamdang lo zaw in,
Ø Suahna lamdang zaw tham hi.
Ø Natna lamdang i sa a, a natna lamdang lo zaw in,
Ø Damna lamdang zaw tham hi.
Ø Haina lamdang i sa a, haina lamdang lo zaw in,
Ø Pilna lamdang zaw tham hi.
Ø Mi minthangte a sih teh minthang zaw a,
Ø Mi minsiate a sih ma-in minsia hi.
Ø Mi khempeuh khatvei tek kikhem zo a,
Ø Tua khemna hong kitheih leh khantawn hong ki-um nawn lo hi.
Ø Pasian in a tawisan mi khat na nen’niam leh,
Ø Pasian in tawisang veve ding a, nang na min dai ding hi.
Ø Natna in Pasian tawh hong kinaisak a,
Ø Sihna in Pasian tawh hong omkhawm sak hi.
Ø A cinghte tungah Pasian cingha,
Ø A huaihamte tungah Pasian ciil hi.
Ø Thau-muuk sangin laikung kihtaak huai zaw a,
Ø I galte sangin I lawmte kihtak huai zaw thei hi.
Ø Itna a kiam leh mawhna kizong a,
Ø Itna a khan leh dikna kizong hi.
Ø Pawisiimna sangin sigalna hoih zaw a,
Ø Sigalna sangin nat vehna hoih zaw lai hi.
Ø Na khempeuh ah paulap bei mawh a,
Ø A piang khempeuh lungkim leng,
Ø Paulap khempeuh bei pah hi.
Ø Thupha ciamteh theihna pen gual zawhna hi a,
Ø Thusia ciamteh theihna pen guallelhna hi.
Ø Mawhsakna pen dikna pulakna hi thei a,
Ø Gensiatna pen pahtak piakna hi thei hi.
Ø Thupha simsim le teh thusia ta zo lo ding a,
Ø Thusia simsim leteh thupa ta zo lo diing hi.
Ø Guah zuk ma-in huih nung thei den a,
Ø Thupha ngah ma in ze-etna kituak thei hi.
Ø Pawlpi kimkhat in siate thu dong a,
Ø Kimkhat in siate thuhilh hi.
Ø Thupi na nasak mahmahte Pasian adingin thupi lo thei a,
Ø Thupi na nasak het lohte Pasian adingin thupi zaw thei hi.
Ø Sahang in mi a peh ding teh ngik masa a,
Ø Mihing hong bawl sia dingte in hong pakta masa hi.
Ø Mi ih gensiat leh ei a kiphat pian i hipah a,
Ø Mi i phat leh ei a kiniamkhiat i hipah hi.
Ø Mipilte’ gamah mipoite kihehpih a,
Ø Mihaite’ gamah mipoite kisimmawh hi.
Ø Hong ngaite sangin hong itte teenpih huai zaw a,
Ø Hong itte sangin hong hehpihte teenpih huai zaw lai hi.
Ø Khatvei minthan’ khantawn ki mang lo a,
Ø Khatvei minsiat khantawn kimang hi.
Ø Nang deih bangin a pian kei leh,
Ø Nang deih bang Topa’ cipah in.
Ø Nang deih bang Topa’ na cih leh,
Ø A piang bangbang ah lungkim in.
Ø Na dinmun sanga na kiniamkhiat zawk leh,
Ø Na dinmun sangin hong kitawisang zaw ding hi.
Ø Na dinmun sanga na kitawisan’ zawk leh,
Ø Na dinmun sangin hong kiniamkhiat zaw ding hi.
Ø Gualzawh ma-in guallelhna a om leh,
Ø Tua gualzawh na limci thei pan hi.
Ø Tu ni-a mihaupa zing teh khutdawh suakthei a,
Ø Tu ni mipilpa zing teh mihai suakthei hi.
Ø Sia i deih ciangin paulap tampi tawh i zong a,
Ø I deih nawn lo ciangin paulap tampi mah tawh i hawl khia hi.
o -Job Thawngno
