KHAWKPI 9 LUNGKHAM NA HUNPI PEN THU OMZIA

KHAWKPI 9
LUNGKHAM NA HUNPI PEN

THU OMZIA

“Lungkhamna hun pen bang tan’ vei sawt ding hiam? ki thei lo hi. A hi zongin tom ding hi. Mang. 22:11 sunga, vantung panin, hehpihna hun hoih beita, gupna thupha om nawn lo ci a agen khiat pan kipan dinga, Khris hong pai suk dong hi ding hi.

Dan. 12:1 in, hih hun agenna ah: Tua hun ciangin Micheal in Amite a dingin hong ding khia ta ding hi” ci hi. Micheal pen Khris ahi hi, Zeisu in apalai nasep zota a, Siampi puan suah khia ta in, a Kumpi puan silh ta a, biakinn pua lam ah pusuak khia ta hi.

Hih hun ciangin laisiangtho hilhkholhna teng atung kimta hong hi ding hi. Gupna thu tangkona kizo ta a, sin’khiatna hun leh ciaptehna hun kikheng tota a, guah nunung zong a zu khin ta a hi ding hi.

Tua lungkham hun pen, gimna nam sagih te kiat laitak na hi a, aki sik kik lo mite tungah dan lianpi tung hi. Amau lah Pasian mite bang mah lawh zo lo uh hi. Mang. 7 sunga vantung mi lite in, buaina huihte khah ta uh a, nate a pian’ bangbang in apiang hi mai ta hi. Pasian upadi a nawngkai sak mei te ki lawn khia gawp ta hi. Tua gimna dante Pasian hehpihna tawh kihel nawn lo in a ki buasuk hi ta a, leitung pan in ahong hum niloh Khasiangtho pen aki lakhia kik khinta ahi hi.

Hun hoih aki hon’ lai a, Sunday law tawh bawlsiatna omsa pen, hih lungkhamni hun ciangin uang semsem dinga, sihna decree (thupiak) ding dong tun to ta ding uh hi. A hih hangin hih thu piakna in bang mah sem zolo veve ding hi. Pasian in tua hun ciangin Amite alamdang mahmah tawh honkhia ding a lauhuai tak in Amah hehna kilang ta ding hi.

Gimna gukna leh sagihna nuai ah, Armagedon galpi kido ding hi. Sisan luan’na te tawh kidim buaina a piangsak ding hi.

Midikte in tua dan thuak kha lo in alamdang mahmah tawh vaakna ngah a, kikem kivil hi napi, lungkham na lianpi tawh kidim uh hi. (1) A pumpi uh thatang gim hi. Bang hang hiam cih leh, bawlsiatna kihta in mihon, omna munte pan taikhia uh hi. (2) A lunguh kham hi. Bang hang hiam cih mawh maisakna adeih lua uh hi.

Atawpna ah bel lungnop uh hi. Bang hang hiam cih leh pulaak nai loh mawhna , aki mai sak nai lo mawhna a phawk zo kei uh hi. Tua lungkham pi hun sungin hun khenkhat pen, Jacob lung kham hun, aki ci hun om hi. Jer. 30:7. Tua pen sihna decree pusuah-gimna te ki buak zawh pan kipan in hotkhiatna hun dong ahuam to hi.

Puahphatna hun a puahphatna angah, ciaptehna kipia mite bek in, hih khuasia kipei mialpi sung apai let zo bek uh hi. Kip takin dingin Topa Zeisu hong pai kikna genzawh loh lungdamna tawh adawn dingte ahi uh hi. Tua hun haksa sungin palai lah nei nawnlo, mawh kimai sak tawmtawm na lah om nawn lo hun adingin lungsim pumpi kipuah siang a, kawk bang nawn lo ding a kigin’ kholh mahmah akul ahihi.

HEHPIHNA (HUNHOIH) KONG KIKHAK

“Ngai un, Kei mah in guta bangin ka hong tung ding hi. A ma puante keem a angak mi-in a hampha hi. Tua bang lo mite guaksuak in, ama maizumna amu ding hi.” Mang. 16:15. Hih mun in, kantel thu khenna bei na leh hehpihna kong kikhak pen, lamet loh laitakin hong tung ding hi, cih hong lak hi. Hih hun ciang ding pen Daniel in, 12:1 ah, tua hun ciang in Micheal hong ding khia ta dinga Amite adingin hong kilang khia in, tu masiah a, apiang ngei nai lo gimna lianpi piang ding hi. Tua laitak in laibu sungah amin kigelh peuh mah kihon khia ding hi.” ci hi.

Hih hun pan a kipan, mi khempeuh pianzia ding ciat pen, ahih bangbang atawntung a ki mang ding thu ahi ta ding hi. Bang hang hiam cih leh, “A thu maan lo mite thu man lo den hen, akihhuai te kihhuai den hen, a siangtho te siangtho den hen, En un, aman lang in ka hong pai ta ding hi, ka letsong ding kong keng hi. Mi khempeuh amau gamtatna bang tek in ka pia ding hi” ci khinta hi. Mang. 22:11,12.

Zeisu, eite siampi lianpa, in van biakbuk ah tu in eite a dingin palai semsem lai hi. Tua hun teh apalai nasep, asiampi nasep mawh mai sak nasep, a zota hong hi ding hi.

“Tua ciangin vantiungmi in hai la a, biakna tau a meikuang tawh bi-in, meikuang dim sak a, leitung ah akhiat suk leh, awging te vangingte, khuaphiate, zinlingte, apiang hi.” Mang. 8:5.

“Zeisu in thupiak sawmte kikoihna singkuang tungah mawhmaina nasep a semsem kimlai in, atawi hai a paai ka mu hi. A khut laamto in nakpi kiko a, “A zozo hi” a ci hi.” EV 279.

Kantel na nasep abei ciangin, (Dawpkholh thukhenna) khang tawntung a thuzui mihing akici mite thu, kitelsit a, akikhentel khit ciangin, tua hun hoih kong kikhak ta a, hehpihna kong kikalh ta ding hi. A tom gen na ah Mopawi ading a kiging khol teng sung tum in kong ki sungkalh ta hi.” GC 428.

“Gamdai takin, zankim a guta bangin, mi khempeuhte omzia ding teng khensatna hun hong tung ding a, mawhneite adinga kipia hehpihna te kidawk khia ta ding hi.” GC 491.

“Leitung pana hong ciahto vantung mi khat in, ama’ nasep kizota cih thu hong gen a, leitungah sittel na ki bawl zo a, Pasian thukham zui dinga ki puah mi khempeuh in, anungta Pasian ciaptehna ngah kim khin hi” hong ci hi. Tua ciangin Zeisu in van biakbuk a apalai nasep khawl in, A khut laamto in, awngaih pi tawh, Azo zo hi, a cih leh, vantung mihonpite in akham lukhu te a suahkhia uh hi.

Amah in thuzaksakna thupi genkhia a, “A diklo mi diklo den hen, akih huai mi kihhuai den hen, athu maan mi thumaan den hen, asiangtho mi siangtho den hen” Mang 22:11, a ci hi. Mi khempeuh te thu, sihna ngah ding maw? Hin’na ngah ding maw? cih kikhen tel khin ta ahihi.” GC 613.

“Eite in vantung mi thumna thupuak leitung ah ih tangko ding hi. Mite in sapi leh ama lim bia kha lo a, Pasian thukham te zui in Zeisu upna nei din’ mun a let nading uh, ih zasak ding hi. Pasian in bang hun teh hih ih nasep tawp ding cih ahi zong, hun hoih kong bang hun teh kikhak ding a beina hi ding cih ahi zongin, hong hilh lo hi. Ih mai a ahong kipia bangbang sang lel in, ei leh ih tate zui sak ni. Pasian Council a, eite hong hilh loh thusim pen, thei ding in hanciam dah ni. Eite tavuan in, vil ding, sem ding, ngak ding, akisia ding khate a dingin hun khempeuh nasepna a zat ding ahihi.” R.H. Oct. 9, 1894.

“Pasian awlmawh lo mite tungah Pasian ni-in akigin’ loh lai tak un a tung ding hi. Bang mah kilamdang lo tawh kibanga ih nuntak tohtoh lai tak, mite nopsa a, nasem a, sumbawl a, biakna makaite in lah leitung mainawt na ding bek hanciam pih a, mite in amuan huai lo hih leitung kepna tawh ki khim a, a om lai tak, zan kim gutate in, a ki villo nate a guk bangin, aki ginglo paangtat mite tungah siatcipna tung ding a, amaute a suakta kei ding uh hi.” GC 38.

“Jews te kiang pan Pasian ompihna aki dawh khiat lai in zong, siampi te leh midangte in phawk lo uh hi. satan in ukgawp a, buaina tawh adim sak khit na ngawn in Pasian teel mite hi hang, akici lai uh hi. A biak inn sung uh ah, mawh maisakna nasepte semsem lai uh a, a ki phiatsa biakna tau ah ganhing note piapia lai uh a, nisial in Pasian Tapa’ sisan tunga mawh mi teek teek leh, Ama na asem te leh A sawltakte that dinga azongzongte teek teek tunga thupha pia dingin, ngen ngen lai uh hi. Tua mah bangin aki puah kik thei het lo khentelna, van biakbuk ah ki pulaak khina, leitungte omzia ding aki khel thei nawnlo dingin, ki kip sak khin na pi-in, leitung ateng mite in tua thu athei kei uh hi. Biakna lim pen cingcing lai uh a, ahih hangin Pasian Khasiangtho tua mite lakpan kidawk khia khin hi. Gilo kumpipa in amaute thalawp sak in, a ngimna bang thuak siatnate atun’ kim theih nadingin, tawholh a, amau thalawpnate Pasian ading bangin kidawk sak hi.” GC 615.

“Eite in khang tawntung a lauhuai penpen mun[gong] ah ih ding ta hi. Hehpihna tawi vantung mi in, akisik kik lo mite hum dingin khawlkhawl thei nawn lo hi. PK. 278.

“Lau huai na pen damdam in ih tung ah hong tungtung hi. Vantung ah ni pen angei in taang zel a, vantung in Pasian min than’na angei in lak zel hi. Mite in an nene a, tui dawn dawn in, lo khokho a, inn lamlam in, gualnuam in kiteng teng mai uh hi. Sum bawl te ki lei lei in, ki zuak zuak lai uh hi. Mite in din’ mun sang kituh in khat leh khat ki phul phul lai uh hi. A noptal mite laamna inn khawng, sakol tai kidemna khawng, thaikap na khawngah dim zelzul lai uh hi. Hun ling lawng penpen hun hi ta a, hehpihna kong kikhak baih mahmah ta ding hun hi. Thu khempeuh atawntung a kip dingin ki khentel ta ding hi. Satan in hun tomno bek nei ta cih a thei hi. Amah in akusale te mite khemsak a hehpihna kong a tawntung a dingin a kikhak tanghial ni mateng ukcip in pawl a lak beh saksak hi.” Gh S 51.

“Palsatna in a ciangtan’ na tung dek ta hi. Buaina in leitung dim aa, mihingte tungah lauhuaina lian hong tung ahi ta hi. Beina hun ding nai lua ta hi.” 8 T 28.

VANTUNGMI LITE IN HUIHTE KHAHKHIA TA

“Zeisu in van biakbuk a anasep azawh matengin vantungmi lite in huihte lencip lai ka mu hi. Tua khit ciangin gimna dan nam sagihte hong tung hi.” EW. 36.

“John muhna ah, vantung mi li-in huihte alet pen, zinling pite, khuapi ki peite, leitung ki-ukna gilo te, a len uh limlahna ahihi. Tua huihte pen, Pasian in khah mai ta un, a cih mateng akilen cip lai ahihi. Pasian pawlpi ahih leh lungmuan’ om hi. Pasian vantung mite in bel, a kisawl bangbang sem uh hi. Pasian nasemte ataltang uh ah ciaptehna aki piak khit mateng in singkung ahi zongin, tuipi tung ahi zongin, leitung ahi zongin, huihte anun lohna dingin, a lencip hi.” TM 441.

“Tua vantung mi lite in, ciaptehna nasep aki zawh mateng huihte len sak lai a, aki zawh teh, khah ta un, ci a thupia ding pen, a sang bel vantung mi aw ahi hi.” TM 445.

“Amah in patau tangko na leitung bup ah, aki piak khit cianga, aki gal ging nuamte aki gin mateng, khuamial thahatna adalsak lai ding hi.” 5 T 453 (2 TT 153).

“Ahih hangin van biakbuk sungah Zeisu in mite palai sema, a om lai teng, Khasiangtho in hong hum hum ahih na ukpate leh mite in athei ding uh hi. Tua in leitungte’ upadi zong akilawm ciang khat ukpih lai hi. Leitung te omzia asiat semsem zawkna in hih upadi temah hi zaw lo hiam? Ukpa tampite in Satan kusale hattak asep laitak un Pasian in zong leitung gam uk makai te lak ah Ama kusale te nei hi.” GC 610.

“Minam khat leh nam khat, gam khat leh gam khat aki el luat khit uh ciangin, taangpi nopsak na pen om nawn lo hi. Ahih hangin Pasian nasemte ataltang ah akiciam teh khit mateng, huih lite kilencip lai hi. Tua khit ciang in leitung kumpite in ahatna khempeuh uh gal kidona nunung pen adingin apuah ding uh hi.” 6 T 14 (2 TT 369).

LUNGKHAM HUN

“Zeisu siangtho bel khan pan paikhia a, a puan teep a long note ging sialsial ka za a, Ama nusiat khit ciangin, khuamial meilomsah in leitung a ateng mite khuh hi. Tua ciangin mawhnei mite leh Pasian kikal ah, palai omnawn lo hi. Pasian leh mawhneite kikal a, A din’ lai teng dawi mangpa pen akidal dal hi a, mihingte leh Pa kikalpan apai khiat san khit ciang in a dal om nawn lo in, Satan in akisiik kik nuam lo te, a pum a tang in a ukcip hi.” EW 280.

“Sawltak John in amang muhna ah, van pana kitangko thu in, leitung leh tuipi aa teng te khempeuh athuak sia uh hi. Bang hang hiam cih leh dawi in ama hun tomta cih thei in, lung ham sa in hong tuak suk hi. Mang. 12:12, cih za hi. Vantung AW aki zak ciangin lauhuai na a dim hi. Satan in ama hun tom semsem a, asin so semsem hi. Ama nasep mi khemna leh suksiatna pen hih lungkham hun sungin a mong tun’ ding hi.” GC 623.

LUNGKHAM HUN TELLAHNA

“Tua hun ciangin Micheal kumpi lian pa, amite adingin ading khia ta ding hi. Tua lai tak in mite tungah apiang ngei lo haksatna aom ding hi. Tua hun ciangin laibu sungah min kigelhsa mite khempeuh aki honkhia ta ding hi.” Dan. 12:1.

“Amah in biak innpi a nusiat khit ciangin, leitung a teng mite khuamial in tuam hi. Tua lauhuai hun sungin midikte in siangtho Pasian muhna ah palai neilo in a om uh hi. Mawhnei te kiang pan Satan pen akidal sak niloh hi a, ahong pai khiat san ciang in aki sik kik nuam lo mawh neite a ut a dah in Satan in uk cip gawp hi.

Pasian in lungduai tak a hong ngak niloh pen beita hi. Leitung in Ama hehpihna nial a, A hong itna te simmawh in, A upadite thukham te sikcip uh hi. Migilote in ahun hoih gamgi uh khengto ta uh a, Pasian Khasiangtho in thuak tentan a, ahum hum nate ki la khia ta hi. Pasian hehpihna tawh aki liah liah pen, tu in akem adal om nawn lo hi. Tua ciang ngaw ngaw in Satan in leitung mite haksatna tawp thuak siatna ah phumcip hi.

Pasian vantung mite in akihtak huai huihte a let niloh uh hi a, tu-in tua lauhuaina khempeuh kikhah khia lel ta hi. Leitung bup in tang lai Jerusalem khua kisiatna sangin alip khap huai zaw in aki sia cip ta hi.” GC 614.

“Pasian mite zong kamsangte gen, Jacob lungkham hun, a cihna sungah lut ta uh hi. Topa in agen in ah: launa, liinna, patau aw, kiza hi. Mi khempeuh mai khing hi. Ala! Tua ni pen lian a, hih bang hun dang om ngei lo hi. Jacob lungkham hun bang lian a hi hi. A hih hang in tua lung khamna pan a suakta ding uh hi.” Jer. 30:5-7. GC 616.

Mihing te damsak zawhloh dahna leitungah hong tung ta hi. PK 277.

“Khris in biakbuk anusiat ciangin, hehpihna omlo, a cill (aciik)hehna; sapi leh amilim bia a, aciaptehna ngah mite tungah kibua ta ding hi.” Mang. 14:9,10, GC 621.

“Cikmah a om ngei lo haksatna hun hong tung baih ta ding hi. Tu a ih theih khak loh thu ih phukha ding hi. Mite in lah, tua thu ding awl mawh het lo uh hi.” GC 622.

“Leitung in lah galdo vai bek lawp uh hi. Dan. 11 sunga om hilh kholhna hong tung kim dekdek ta hi. Tua hilhkholhna a kigen haksatna te hong tung baih ta ding hi.” 9 T 14 (3 TT 283).

“Jerusalem kisiat ding a nai na limlahna pen, Rome galkapte hong kilat ciang ahih mah bangin, hih lampialna (Sunday matpong tenna thunei thum kikop America te in upadi a abawl na) pen in, Pasian hong thuak tentan, atawp na ding lim, ih minamte mawhna hai a dimta cihna, hehpihna tawi vantung mi hong ki leh kik nawn het lo dingin hong ciah san ta ding cihna lima hi hi.” 5 T 451 (2 TT 151.)

Siatna ah phum cip hi. Pasian vantung mite in akihtak huai huihte alet niloh uh hi a, tu in tua lauhuai na khempeuh kikhah khia lel ta hi. Leitung bup in tanglai Jerusalem khua kisiatna sangin alip khap huai zaw in kisia cip ta hi.” GC 614.

JACOB LUNGKHAM HUN

“Zeisu in biakbuk sunga anasep azawh mateng, vantung mi lite in huih lite lenlai ka mu hi. Tua khah khia le uh gimna nunung nam sagih te akia ta ding ahihi. Hih gimna te in, migilote, midikte tungah lung ham sak ding a, amau in eite Pasian hehna apiangsakte bangin hong ngawh ding uh hi. Leitung pan hong phiat siang zo le uh hih gimna dan te adai dingin a ngaihsun ding uh hi. Mi siangtho te thahna ding decree kipiakhia ta a, tua in amaute a sun azan in hotkhiat nading thunget kul sakhi. Tua hi a, Jacob lungkham hun kici hi. Tua ciangin mi siangthote lungkham in kap uh a, tua ciangin Pasian AW in ahon khia hi.” EW. 36,37.

Hih mangmuhna tawh kisai in thu mongkhak na in thu nih teel khia leng:

1. Jacob lungkham hun cih peh in, Pasian mite kithah nading decree pusuah leh amaute kihot khiatna hun kikal huam hi. Tua hun pen, amaute in Pasian hotkhiatna anget san lai tak uh ahihi.

2. Tua hun in, gimna nam sagih te hong kia ta hi. Bang ci theih ih hiam cih leh, tua thahna ding decree hong pusuah in, gimna pawl khatte tung khin hi. Tua gimnate khat bek zong hilo, thuak uh ahih man mah a, thah nading thupiak a om hi zaw hi.

LUNGSIM – PUMPI GIM

“Jacob in zan tawntung lungkham a vantung mi a buan niloh pen in, Zeisu hong pai mazek a, Pasian mite phutkhak ding lungkhamna limlak ahihi.” PP 221.

Jacob lungkhamna in, a sanggam pa ama tunga hehna thuk dingin galkap 400 tawh hong kuan hi. Mi siangtho te in zong, bawlsiatna thahna ding ciang tung ahih manin lungkham hi.

Tham lo in, Jacob in Pasian a buan na pen, ama mawhna ki mai sak nai hiam? cih tel nai lo in thungen ahi hi. Misiangtho te in tua bang teekteek mah in lungkham ding hi. Ahih hangin zan bei a, Pasian in Jacob tungah lung muan’na leh thupha pia hi. Tua bang lian mah in, Topa in Amite ze-etna lian pan in lung muan’na leh lametna pia ding hi. Tua bang lian mah in amawh nate uh zong aki pulak khin aki maisak khin ana hihi.

PUMPI GIMNA PEN BAWLSIATNA HANG

Sabbath pen tapidaw’ na sunga kinialna thu mungpi hi a, biakna leh leitung Anaa kikop in Sunday tan’ nading Anaa hiala hong sawl teh, milom neu zaw thumang lo te, ci in leitung pan a vek un phiatsiang sawm mawk uh hi. Amaute in pawlpi leh leitung kikop upadi pen a zuih noploh uh ciangin, ki mawk koih thei lo in, thuak kul ding hi ta hi. Tua hi ta leh, leitung bup asia khin hiau ding ahih sangin, amau in thuaksia mai taleh hoih asa zaw lai uh hi. Tua thupiak pen, a tawpkhakna ah, Pasian thukham nambat lina asiangtho sak teitei te, dan nasia penpen pia in, tawm vei hun ciam na khat bawl in, tua khit ciangin amu pepeuh in, thah theih nading thu kipia hi. Hun lui lai in Rome te in bawlsia a; hun thak ciang leuleu in, lampial Protestant te in Pasian thupiakte zahtaka, a zui nuam mite, akibang in bawlsia khawm ding uh hi.” GC 615, 116

“Decree piakna a, hun ciangtan” thuciam pen hong nai ta a mite in tua milomno khat pen zung bawh khiat hiau dingin aki ciam uh hi. Zan khat thu a phiatsiang ding, thunial leh ahong kawk a om nawn loh het nadingin, ci-in vaihawm uh hi.

“Pasian mite pawlkhat thonginn sung pan, pawl khat gam simtham muallak guamlak pan, Pasian’ hotkhiat nading ngen in om uh a, alang ah galkap te alom lom in dawite' hanthawn sa in, that dingin kiging khol in om uh hi. Tua laitak in, hun lamdang, Israel te Pasian in, A teelsa mite a lamdang tawh ahon khia ding hi.” GC 635.

“Tu hun in Protestant leitung buppi in, kong cing Mordekai et bangin Sabbath tang milomno khat te pen en uh hi. Ama gamtat leh asep a bawlna in Pasian upadi zahtak ahihna kidawk sak in, Topa thukham Sabbath asik cipte thuhilh niloh bang hi a, tua aki pakta lo, thu om hamtang mawk pen, paihmang ding hi, ci uh hi.” 5 T 450, (2 TT 150).

Mordekai, Esther laibu a kigen pen, thupha deih mihoih hi a, kumpipa nuntakna aki sawm sim thu amu khia pa hi. Haman, Mordekai leh Jews minamte gal lianpa in, Mordekai khai lup nading tausang pi dawh a, angimna teng asep ni ding tak ciangin, aleh lam pang vive in kisem zaw khong hi. Khailupna tau Mordekai adinga kidawh pen, adawh pa ki khai na hi mawk hi.

Hun bei ding ciangin tua bang lian mah hong hi ding hi. Thumaan langpang te in Pasian thukham zuite suksiat sawm ding a, ahih hang in Ama mite hon khia ding a, agalte un, amau’ galhiam zatte mah tawh akisia cip ding uh hi.

“Tapidaw pawlpawlte in Pasian thukham zuite langdona tua decree apiak khiat uh ciangin, kumpi in gam mite akem thei nawnlo suak a, Pasian mite in khuapi khuaneu nusia in, a pawlpawl in taikhia in, gam daihna munte ah teng uh hi.”

Tam khop mah in muallak kawhawmte beel uh hi. Pidmond gamkuam a tapidaw te thuak ngeisa mah bangin, lei mun kho asanga mun khawngte biakinn bangin zang uh a, Pasian tungah tua suangpi belh theih nate lungdamna ako ding uh hi. Isai. 33:16.

“Ahih hangin namkim te lak panin, asang aniama, ahau azawng, avom akang, mi tampi mah in kilawm (taza) lo tak in khel bawlna, matna, henna a thuak ding uh hi. Pasian’ it mite in migilote' bawl siatna phukha uh hi. Sik khau in kihen hi. Thong inn kong ki kalh nelh hi. Thah dingin thu kikhen hi. Kim khat te khua mial kawhawm sungah gilkial a si lel dingin kikhia hi. Amaute thumna taunate kuamah in thu don lo hi. Amaute ahon ding om lo hi.” GC 626.

Hih khawkpi sung leh khawk neu te sungah, “Pasian ih belhna” Pasian in Amite ahuutna akepna, Khris ompih zia, amau te deih sakna tawh vantung mite’ nasepziate ih musuk ding hi. “Mi siangthote in lungsim gimna lianpi thuak baih ta ding ka mu hi. Amaute leitung a migilo honpi in uum cih in, a ki mu ding uh hi. A heisuk ahei tohna khempeuh uh ah, ki langdo sisek in amu ding uh hi. Kim khat te in, Pasian in, amaute migilote khutlum tawh kisia ding in hong nusia ta ahiam? ci in alau ding uh hi. Ahih hangin kiim uum pilpel ahih na, mu mah ding uh hi ven.” EW 283.

“Hun ciangtan tawm vei khit ciangin a ut peuh in amaute that thei hi ta hi. Satan in Asang bel pa’ misiangthote that nuam mahmah hi. Ahih hangin Zeisu in avantung mite dalsak hi. A sawt lo in misiangtho te lungsim gim mah mah ding uh hi. Leitung migilote in, amaute kiimum bangin amu ding uh hi. Ahih hangin mi siangthote in, amau thu amang tuan kei ding uh hi. Jacob bangin Pasian tawh kibuan ding uh hi.” EW. 283, 248.

“Pasian mite in kamsangpa’ genkholhsa om bangin, tua Jacob lungkhamna tawh akibang hun sungah lut ding uh hi. Mi dikte in athuak bawlsiatna hanga akahna Aw te uh, van ah kahto hi. Abel’ sisan leilak pan akiko mah bangin bawlsiatna han kong vang pan, tuipi hanthuk sung pan, mual kawhawm te pan Pasian kiangah kahna Aw te gingto hi. “Asiangtho, a thumaan Topa aw, leitung a atengte tungah, kote sisan phu la lo in bang tanvei om ding na hi hiam? ci uh hi. 5 T 451, (2 TT 151).

“Pasian vanglian khuavak aneite kilangdona akitehna ka mu hi. Amaute kiim ah khuamial sahin zing hi. Ahih hangin amaute in Pasian muangin ngak uh hi. Amaute lung patau uh hi. Pasian kiangah nakpi in kap uh hi. A sun azan in akah na uh dai lo hi. “Nangma deih bang piang ta hen, Na minthan’na akilat theih nadingin Na mite suahtak nang lampi hong hon’ sak in. Ka kiim uh a, hong uum cih lawkite khut pan in hong honkhia in. Amau in kote sih ding deih uh hi. A hih hangin Nang khut in gupna hong pia thei hi” ci uh hi. A vekpi in amaute manphat lohna, Pasian a aki-ap lel na uh ki dawk a, ahih hang in Jacob mah bangin, khat beek khawl lo in, hotkhiat nading ngen ciat uh hi.” EW 272.

“Tua hun in misiangthote adingin lauhuai lungkham pen hun ahihi. Sun tawh zan tawh Pasian kiangah hotkhiatna ding ngen uh hi. Mi muh theihna ciang lel-lel ah bel, amaute suahtak theih nading lampi omlo hi. Mi gilote kigual zo sak mahmah ta a, awng sa in,
“Bang hangin na Pasian un, kote khut panin hong honkhia lo hiam? Bang hangin note ding khia in na nuntakna uh huulo na hi uh hiam? ci uh hi. Ahih hangin misiangtho te in bel amaute thudon tuan lo uh hi.” EW. 283.