CHURCH ELDER ( UPA )
ELDER: : Khawtual
pawlpi upa pen ama omna pawlpi ah pastor zoma a thunei pen ahi hi. Union
tuamtuamte ah elder khatna pen a khawtual pawlpi' a dingin lay pastor ahih kei
leh lay minister khat zahin kingaihsun hi. Pastor tawh kopin elder in ama
pawlpi khalam thute a vaan ding ahi hi.
LAI SIANGTHO SIIKSAN: : Hih panmun
athupina anuai-a Lai Siangtho munte in hong lak hi. Pai. 18:21; Sawl.6:3; ITim. 1:5-1; 3: 1-13;
4:12-16, IITim. 2:1,2; Tit.2:1,7,8: leh Hebia 13:17.
ELDER KILAWMNA:
1.
Kha lam ki-ap taktak mi hi ding.
2.
Ciimna leh thutheih-siamna anei mi hiding
3.
Upan akho mi hi ding.
4.
Lai Siangtho Kamsang laite a simsim mi hi ding.
5.
Pawlpi' sianthona akemcing dinga ki-ap mi hi ding.
6.
Christian nuntakzia thute' etteh tham cing mi hi ding.
7.
Lungdam thupiak khiatna leh tuute an vakna ah akin mi hi ding.
ELDER TEELNA: :
A kep uh pawlpi' tungah masuan lian nei ahih lam uh a kilatna dingin elder-te
khut ngakna tawh kikip sak hi. Tua hih manin elder teelna ah kidop mahmah ding
thu pawl khat om hi. Pawlpi' nasep na ah amah a kihel theih na ding lela kiteel
hi lo dinga, kihel khin zaw ahih mana teel ding hi zaw hi. Pawlpi' a dingin sum
tampipi hong pia zo ahih man peuh, citak a hih man peuh, kuamah dang in sem lo
ding ahih man peuh beka teel ding hilo hi. pawlpi leh pawlpi mi khempeuh khalam
khantoh na ding deih sakna leh itna taktak a neih man, itna taktak aneih man,
amin pua bek lo-a elder nasep ding te sem thei ding, makai thei ding a ahih
mana teel ding hi zaw hi.
ELDER-TE' MASUAN : : Amaute in pastor-a kipan deaconte leh pawlpi
makai dangte tawh nasep khop nuam a sak theihna dingun, amaute' tung pan bang kilamen
hiam cih elder-te in tel taka athieh ding uh thupi hi. A sep ding te uh pen
sabbath biakpiakna hun tawh kisai khawng, church board leh thu kikupna
tuamtuama kihel khawng, pawlpi' vaihawm tuamtuamte ah thu ahoih thei dinga
kuppih siamna khawng ahi hi. Platform masuante zong thupi ahih tei hangin,
pawlpi mite' inn a hawhna leh nasepna dangdang te ah amahmah a kihel ding a
thupi kaan ahi hi. Elderte in hih panmun
a saan ciangin, platform nasep teng bek asang ding hilo-in, a sep ding dang
khempeuh zong sem nuam takpi ahihna a lah khiat ding ahi hi.
BOARD MEMBER: : Pawlpi' tungah bang masuan nei
hiam cih phawk kawmsa in elderte in church board meeting khempeuh ah a kihel
hamtang theih na dingin a hun geel siam ding hi. Hih bang kikhopna te ah amah
pen a panpih a domto lam hi zaw dinga, ama thu leh ama deihna bek tawh a ukcip
mi hilo-in , pawlpi bup' a ding ahoih lama a pang mi hi ding hi. Pawlpi sunga
department tuamtuam te ah zong amah pen dot leh kohin kinei tawntung hi.
NASEP
TUAMTUAM PANPIH DING : : Elder in
pawlpi bup leh lam tuamtuam tawh pawlpi khantoh na ding lung himawh ding hi.
Tua ahih manin a siamna zah siit lo-in pawlpi ' nasepna tuamtuamte a panpih
ding ahi hi. Amahmah kihelin, makaihin, sem dinga, a hoih theithei dingin vai
hawm ding hi. Tua hi leh a pawlpi bup kisat suahin khangto thei pan ding hi.
Vaihawmna i cih pen kampi bek tawh hilo dinga, pumpi mahmah tawh kihel kul hi.
Ahoih lama thu a kuppih thei dingin elderte kigingsa in om den ding hi.
Vaihawmna tampite sum leh paai tawh kisai hi. Hih thu ah zon gmakaih siam kisam
hi. Lim leh lai tawh elder te in sawma khat piakna, mission sumpi piakna,
khawtualpi sumpi piakna leh sumpi tuamtuam piakna te ah cihtakna alak ding ahi
hi.
Pawlpi sunga Pasian' thu puakkhiatna
vaihawm pawl zong panpih dinga, a kisep khiatna dingin zong hanthawn ding hi.
Tua nasepna ah mi' inn a hawhna, lai hawmna, Lai Siangtho sinpihna, crusade
bawlna cihte kihel hi. Khua sungah pawlpi in huzaap hoih aneih theihna dingin
amah hanciam dinga khua sung khantohna ding zong akisem thei zahzah sep khiat
ding hanciam ding hi.
INNLAK VAKNA : :
I gen sa mah bangin elderte inn lak vak ding hi. Pawlpi mi khempeuh akiphak kim
zawhna dingin pastor tawh masuan hawm khawm ding uh hi. Pawlpi bup kha lam
khantoh nading lung himawh a hih mah banga asep ding ahi hi. Elderte' inn lak
vak dan pen cimphawnna lel peuh, tanau kawm bang lel peuh hi lo ding hi. Pawlpi
mite hanga thupha akisannate, innkuan mmimal khat ciat i haksatnate, kha lam,
tha lam leh sum lampawlpi' kitangsapnate leh pawlpi in tuate a don ziate khawng kikup pih ding
ahi hi. Thungetna tawh kizom suak thei ding thute gen pih ding hi. Inn kim,
atang suahte dongin akiphak kimna dingin deacon leh deaconesste twah a veng a
vengin hawm dimdiam ding hi. Nihta kithuaha vak hoih pen hi. Pastor/ Elderte'n
zong a theihpihna dingin a hawm te uh haksatnate za sak ding hi. Tua banga inn
lak vakna pen haksatna leh lungkiatna
hun apawlpi mite in lametna leh thathak angah nadinga hawhna leh vakna hi ding
hi.
PAWLPI KIKHALNA : :
Tuni-in pawlpi tampi ah ki-uk kikhalna om mel lo hi. Tua pen ki-uk kikhalna
bang deihna hiam cih kitel lo a hih man hi penhi. Mi khat pawlpi mi dinga
kilawm lai maw kilawm nawnlo cih thu kanna hi masa lo a, pawlpi sungah siatna a
lut loh nadinga puahna leh ki dalna ahih banah ami mahmah zong puah phatna hi
zaw hi. A khial mi pawlpi pua-a koih ding ciang a kul hun hong om ding hi. Tua
hun ciang nangawn in zong Topa' lamah amah kingaha pawlpi sung mi hong suah kik
theihna dingin itna leh hehpihna tawh mah don kul lai hi.
Sawltak 5:1-11; 15: 1-13 leh I
Corinth 5:5 sung khawngah pawlpi' sianthona kep cingna ding leh pawlpi mite'
kha lam phattuamna dinga ki-uk kikhalna a kibawl ahih lam hong kilak tel hi.
Rom 12:17; I Cor. 14:23-25 leh John 13: 35 sung khawnga hong kilak mah bangin
mite' kiangah pawlpi' teci panna in mui a but na ding pawlpi sung ki-uk
kikhalna a kisam ahi hi.
Church Board meeting a om sialin
pawlpi mi sayin et kik zel ding kisam hi. Hansuah ding, veh ding, panpih ding
kua kisam hiam cih pastor, elderte leh hpawlpi makaite in aphawk den ding uh
phamawh hi. Kha lam cina pawlpi mite
panpih ding nasep pen elderte' nasep thupi pen ahi h. Itna tawh kihual khawm
thungetsakna tampi kisam hi. Ellen G White
in, " Na pawlpi mite tawh na
kizopna khempeuh ah, Pasian neihsa khat tawh akitalsikna hih lam manghilh
ngeikei in. Migi in, hehpihna nei in
thusiamin, Pasian leisa na zahtaak bawl in. Khat leh khat thudamna leh
thusiamna tawh kibawl un." hong ci hi.
Source: SEVENTH-DAY ADVENTIST
PAWLPI
A
ban zop lai ding.............
