March 4, 2017 BAWLSIATNA THUAK TALEH UPNA KIP Moalign

BAWLSIATNA THUAK TALEH UPNA KIP

 Thupuak: Moalign

Norway gam, Oslo khuapi a om Bethel SDA pawlpite lawp thei mahmah uh hi. Gam tuamtuam pan hong peem SDA thu-umte zong hong kikhawm uh hi. Tuate lakah Moalign zong kihel hi. Moalign in Ethiopia gam panin khangkhia hi. A upna hangun a pa kipan Moalign
in bawlsiatna tampi thuakkhin hi. A pa pen 1940 – 50 kim pawlin SDA pawlpi sungah om hi. Mary langpangte ci-in thongkiatna cihte a kipan hamsatna tampi thuak hi. Thong sunga om lai-in a sat gawp uh a, a khe ah sikkol a bulh uhteh tua sikkhol in ama thu-in kitat khia pahpah hi. A dang sikkol khat tawh hen kik uh a, tua zong kitat kik leuleu hi. A mu khempeuh in lamdangsa ciat uh hi.

A pa’ thuaknate a theih ciangin Moalign upna hong khuah zaw semsem hi. Kum 16 a phakin Moalign in Ethiopia gam in Socialist ki-ukna zui ahih manin (1978 – 1991) Khristian thu-ummite in hamsatna tampi thuak uh hi. Sanginnte ah Pasian om lo hi, ci-in kihilh uh hi. Sabbath ni sialin kikhawm thei lo uh hi. Tua bangin “ Pasian om lo hi,” ci-in khua sungah awng kawikawi ding a kisawl ciangin Moalign le a lawm pawl khat in nial uh ahih manin satthuakin thongkia uh hi.

Thonginn sungah

Pasian nusia-in hamsiat ding deih uh hi. Biakna in khiatna nei lo hi. Saturday ni-in nasem ding ci-in kisawl uh hi. Ahi zongin Moalign in nial teitei a, mi dangte in zong Saturday ni-in nasem uh hi, ci-in kisawl veve hi. Thongcingte in gam khantoh nadingin na kisem hi. No nasem nuamlo thadah, gam khantoh nading deih lo hi uhteh ci-in mawhsak uh hi. A pa mah bangin Moalign in thong sungah bawlsiat gawpgawp uh hi. Ahi zong tua bawlsiatnate khempeuh Moalign in kantan zo hi. Bangci bangin thuak zo hiam ci-in a kidotteh Moalign “ bangci bang hiam thei keng, Topa Zeisu dong un, ken thungen ing, ci-in dawng kik ziau hi. Kum khat sung thongah a om khitteh a pa in thonginn ah va mu thei hi. A pa in a tapa’ upna a muh ciangin lungkim mahmah hi. A tapa in a pa kiangah ‘ i kimuh kik nawn kei leh lunghimawh kei in. Kei hangin lungkham kei in. Topa tawh a tawntungin a mangkhawm ding ka hi hi, ci-in a pa kiangah gen hi.

“Eite aa hi lo”

Kum 7 sung thongkia-in a om khitteh Moalign le SDA thu-um mi nih tawh thah dingin mun khat ah kipaipih hi. Ahi zongin sihna dingin Pasian in amaute honkhia hi. Makaite in Moalign le a lawmte’ upna hangin kum 7 sung bawlsiatna a thuah uh hangin a upna uh nusiat sawm lohna thu a theihteh lamdangsa hi. Thongkia Moalign le a lawmte suahtak nading a pulaak khia hi. Tua ulian pa in na upna uh kuamah tungah gen nawn kei un, kua mah in hong um lo ding hi. Note thugen lel bel tuipi sungah tui taak khat tawh kibang lel hi, ci-in thonginn panin khahkhia hi.

Moalign le a lawmte in bang bang ka thuak uh zong ka upna uh pulaak lo-in ka om thei kei uh hi. Thonginn sungah ka om sungin ka upna thute uh ka pulaak khia thei uh hi. Thongkia hi kei le ung, ka pulaak thute uh thong sung aa om mite in za kha lo ding hi, ci-in gen hi.

Nasem ding Sapna Ngah:

Thonginn sung pan a suahtakin Moalign in kum 23 pha hi. A suahtak khitteh Lai Siangtho sin dingin Adventist University of Eastern Africa ah sangkah hi. A sangkah man ciangin Ethiopia nasem dingin kisam a, Youth le Stewardship director in kikoih hi. Tua khit ciangin London khuapi sunga om Ethiopia gam pan thu-um mite makaih dingin sapna ngah hi. Tua munah a sep khitteh Norway gam ah kisam leuleu hi. Tu-in Oslo khuapi ah evangelist sia khat in omin, mi 50 tawh nasem piteek, puteek, cinate kem uh hi. Oslo khuapi a om Bethel SDA pawlpi banah khua sung mi 3000 valin ama nasepna tungtawnin phattuam khin uh hi. Norway gammi 90% in Lutheran upna zui uh hi. 2016 kumin gam bup mi 14 % pen gam tuamtuam pan peemta vive hi. Norway gam sunga om kumpi universityte ah gam dang pan sangnaupangte a khawnkhongin sangkah thei hi.

Tu quarter 13 Sabbath School sumpi in Oslo khua-a om SDA pawlpi nasep nadingin kipuak ding hi. MUC in Laibung khua thaka pawlpi huhna dingin kipuak ding hi.