SABBATH NITAK:
TU KAAL SUNG SIM
DING: Eph. 1: 22, 23; 4: 5, 6; 1Kor. 12:
13; Rom. 6: 3-7; Sawl. 17:11; 2: 4, 11.
KAMNGAH: “Kha Siangtho kimakai
sakin, khatlekhat kilemin pawlkhat na hihna uh na kipsak tawntung un. A kibang
lametna khat bek a ngahkhawm dingin Pasian in note hong sap mah bangin eite khempeuh pumkhat bek
hi-in Kha Siangtho zong khat bek mah a neikhawm ihi hi. Topa khat bek, upna
khat bek, tuiphumna khat bek mah a zangkhawm ihi hi” Eph. 4: 3-5.
Kha Siangtho in mimal tung bekah
nasem hi, ci-in kingaihsun kha thei hi. Ahi zongin mihon, pawlpi tungah a sepna
pen mimal panin hong kipan khia hi. Pasian in a sepna hangin pawlpi hong piang
hi; Kha Siangtho zangin eite tungtawnin tu dongin Pasian in nasem hi. Tua ding
mahin Pasian in geel hi. Pawlpi Sepna, kipawlna picing kisam mah hi. Ahi zongin
tuate hangin pawlpi hong piang hi lo hi. Pasian in tatkhiat nasep semin ei aa
dingin Kha Siangtho tungtawnin hong sem lai hi. Pawlpi a omkhia sak Kha
Siangtho mah hi. Kha Siangtho mah in Lai Siangtho hong piangkhia hi. Tua Kha
Siangtho mah in zuih ding thuman le nunzia ding hong hilh hi. Kha Siangtho
makaihna tawh hong piangkhia Lai Siangtho in thuzuihna ah pawlpi hong kipumkhatsak
hi. Kha Siangtho lo-in pawlpi om lo ding hi. Kha Siangtho lo-in pawlpi in a
nasep tangtung lo ding hi.
SUNDAY FEB. 26
KHRIH TAWH HONG PUMKHATSAK KHA
SIANGTHO
Kha Siangtho in lampi tuamtuam tawh
thu-um mite hong kipum khatsak hi. Kha Siangtho in Khrih tawh pumkhat hong
suaksak lo hi leh thu-um mite kipumkhat thei lo ding hi. Khrih in pawlpi lutang
hi (Eph. 1: 22, 23; 5: 23). Khrih tawh pumkhat hihna in hotkhiatna bulpi tawh
kizopna le tawntung nuntakna thupha hong ngahsak hi. Bang hang hiam cihleh i
ngah na khempeuh Khrih kiang pan hong pai ahi hi. Khrih tawh kipumkhatna panin
dikna, siantho-na, Ama tanu tapa hihna, mawhna tungah gualzawhna le nuntak
tawntungna i ngah hi. Tua hi-in Kha Siangtho in thu-um mite nuntakna ah a bulpi
ahi hi.
Eph. 2: 18, 20 – 22; 1Pet. 2: 6, 7
sim in. Pawlpi hong piankhiatna dingin Kha Siangtho le Jesuh Khrih koi bangin
nasem hiam?
__________________________________________________________________
__________________________________________________________________
Kha Siangtho tungtawnin Pa Pasian
tawh kizom thei i hi hi. Jesuh in eite kihotkhiatna Suangpi hi. Suangpi tungah
innpi a ding thei ahi hi. Kha Siangtho in mimal tungtawnin nasem a, mimal panin
upna kikhat thu-um mihon- pawlpi hong piang hi. Upna tawh Khrih sungah
hotkhiatna a ngah mi khempeuh in Pasian’ itna in hong khel hi-in, Kha Siangtho
tawh kilawmtatna nuam i nei thei hi ( 2Kor.
14). Thu-um mimal khat ciat in Kha
Siangtho sungah Pasian’ innkuanpih ahi uh hi (Eph. 2: 22). Khrih nungzui-te in
khatlekhat kilemin Kha Siangtho sungah pumkhat ahi uh hi (Eph. 4: 3). Thuman
thutak nusia lo-in thu-um mite kipumkhat dingin hanciam kul hi.
Kol. 3: 12 – 14 sim in. Koi bangin
pawlpi kilemna dingin na nungta hiam? Bang hangin pawlpi pumkhat nading tua
bang nunzia kisam hiam?
MONDAY FEB. 27
TUIPHUMNA IN KHA SIANGTHO TAWH HONG
PUMKHATSAK
1Kor. 12: 13 sim in. Koi bangin
tuiphumna in Khrih le Kha Siangtho
tawh hong kipumkhatsak hiam?
____________________________________________________________ ________________________________________________________________
Kha Siangtho in thu-um mite khat le
khat hong kipumkhatsak hi. Tuiphumna tungtawnin vantung innkuan sungah i om
thei hi. Pawlpi sung lut nadingin tuiphum kisam hi.Tuiphumna in thu-um kipawlna
sungah va kihelna khat hi. Khrih nungzui mi khempeuh in kuamah tawh kipawlna
nei lo-in tangom ding hi lo hi. Kihuhna, kipanpihna tha kipiakna cihte kisam hi.
Tua hangin Pasian in pawlpi piangsak hi. Khrih nungzui khat in thu-um mite tawh
kilawmtatna, kipawlna nei hi. Tua hi-in tuiphumna le pawlpi pen a kisam thu hi.
Romans 6: 3-7 sim in. Bang tawh
tuiphumna limcing hiam?
___________________________________________________________
________________________________________________________________
Tui sungah pumpi kiphumsukna pen
hankhuk ah kiphum Khrih limcing hi. Tui sung pan pusuahna in nunlui nusia-in
nunna thak tawh nungta-in Khrih in ka Honpa hi, ci-in mite mai-ah mawhna dim
nunzia nusiat kipulaak khiatna ahi hi. Tuiphumna in leitung nunzia nusiatna
limcing hi. Tui in pumpi khempeuh tumcip mang a, vantungmi khempeuhte mai-ah Pa
min, Tapa min le Kha Siangtho min tawh kiciamin, tui sung pan pusuahna in
nunlui nusia-in Khrih tungah citakin nunna thak tawh a nungta ding nunzia
limcing hi. Ellen G. White, The SDA Bible Commentary,. vol.,6 1074.
Tuiphumna in nuntakna ah kalsuan
kipat khiatna hi-in Pa, Tapa le Kha Siangtho’ ukna nuai-ah nuntak kipatna hi.
Tuiphumna in kisikna man pulaakna hi-in, nunzia sihsakna, suahkikna, kikhelna
limcing hi. Tua banah Pasian tungah thuciamna a nei i hi hi. Thu-um mi in
Pasian tungah citak ding, a thupiak bangin nungta ding c-in kamciam a pia i hi
hi. Pasian in Ama tungah a kinga mi kitangsapna bangin huh ding hi.
Tui kiphum khin na hiam? A kiphum
nai lo na hih leh bang in hong khaktan hiam? Tui kiphum khin na hihleh koi
bangin kituiphumna in Khrih tawh na kizopzia huzaap hiam?
TUEDSDAY FEB. 28
PASIAN KAMMAL IN KHA SIANGTHO HONG
PUMKHAT
Sawl. 17: 11; John 5: 39, 46, 47;
8: 31, 32. Khrih’ nungzui taktak bang tawh kithei thei hiam?
Bang hangin Lai Siangtho lo-in Khrih nungzui taktak kisuak thei lo hiam?
____________________________________________________
_____________________________________________________________
Khrih tawh kizopna hong neisak thei
masa pen in Lai Siangtho hi. Lai Siangtho in Jesuh le Pasian’ deihna hong
theitelsak hi. Lai Siangtho sim ding le lot ngah ding kisam mahmah hi. Lai
Siangtho in thuman le zuau thu hong khentel theisak hi. Paul in Berean khua
mite mi cingtaak hi, ci-in pulaak hi ( Sawl. 17: 11) Bang hang hiam cihleh
amaute in a zak thute uh thuman le thuman lo a theihna dingin Lai Siangtho tawh
sittel uh hi.
Mimal hi taleh pawlpi hi taleh
kipuahphatna le khanlawhna khempeuh Lai Siangtho siksan ding kisam hi. Eite
upna in Lai Siangtho siksan hi. Tua banah Jesuh hong itna le Ama kammal itna in
thu-um mi hong kipumkhatsak hi. John 17: 17 – 21 sim in.
Kipumkhatna in Khrih nungzui hihna pulaak hi. Bang in hong kipumkhatsak hiam?
_________________________________________________________
______________________________________________________________
Topa kammal in thuman thutak hi
(John 17: 17; Late 119: 160). Pawlpi kipumkhat theihna Kha Siangtho’ nasep hi.
Lai Siangtho siksanin hong kipumkhatsak hi. Kha Siangtho in Lai Siangtho hong
hilh thute muanlahna, uplohna hong guan lo hi. Kha Siangtho in Lai Siangtho
thuneihna hong theisak hi. Kha Siangtho in Lai Siangtho panin lam hong pialpih
lo hi. Lai Siangtho le Kha Siangtho muanna Kha Siangtho mah in hong neisak hi.
Lai Siangtho bek mah in thu-um mite hong kipumkhatsak hi.Lai Siangtho hong hilh
zui lo hi lehang pawlpi kipumkhatna kisia ding hi.
Lai Siangtho sim na-in na hun bang
zah zang na hiam? Koi bangin Lai Siangtho hong hilh bangin nungta na hiam?
WEDNESDAY MARCH 1
KHA SIANGTHO IN UPNA LE ZUIHNA
KIKHATSAK
“Topa khat, upna khat, tuiphumna
khat, Pasian khat, na khempeuh tungah om, na khempeuh tungtawna, na khempeuh
sunga ompa, mite khempeuh Pasian le Pa khat a om hi (Eph. 4: 5, 6).
Bang in kipumkhatna hi-in, bang in
hong kipumkhatsak hiam?
___________________________________________________________ _________________________________________________________________
Pasian kammal tungah cihtakna bek
in upna le thuzuihna hong kipumkhatsak hi. Zanni, tu ni, cihmahin kikhel ngei
lo Topa in eite hong kipumkhatsak hi. Kha Siangtho in hong suakthaksak hi. Kha
Siangtho in Pasian kammal bangin hong nungtasak hi. Tua Kha Siangtho mah in
kibatlohna, ngeina tuamtuamte kantanin upna le thuzuihna hong kipumkhatsak hi.
Pasian’ kammal zui-in Ama tungah ki-ap dingin hong kisam hi. Mi tawh kilem
nading hihtheihzah a sem dingin hong kisawl hi (Rom. 12: 18). Ei le ei-in a
kipumkhat thei i hi kei hi. Kipumkhatna i cih pen nasepna tungtawnin kingah hi
lo hi. Kha Siangtho hong piak ahi hi. Kha Siangtho in mimal sungah nasemin
thu-um mite, pawlpi hong kipumkhatsak hi.
Tua bangin pawlpi kipum khat
theihna in Pasian’ kammal siksan hi. Lai Siangtho kisamsa lo-in Kha Siangtho
bek a siksan upna in upna man le zuihna man hi lo hi. A lang khatah Kha
Siangtho kulsa lo-in Lai Siangtho bek kisam hi, cih upna in lawpna om lo hi.
Bang hang hiam cihleh Topa khat bek, upna khat bek, tuiphumna khat bek om hi.
Pasian’ kammal sungah nuamsa-in tua kammal tungah cihtakna bek in upna hong
kipumkhatsak hi. Upna le thu zuihna kipumkhat kei leh sepna zong kipumkhat thei
lo ding hi.
“ Eite in Topa khat, tuiphumna
khat, upna khat i nei hi. Khrih lungdamna thu in minam khempeuh, mun khempeuh,
pau nam khempeuh in a zak kul hi. Lungdamna thu in minam khempeuh sanggam hong
bangsak hi. I etteh ding Khrih bek i nei hi. Khrih in Ama deihna bangin a hong
bawl ciangin thu-um mi in paubaanna om lo-in kicinna tawh kidim ding hi. Minam
khempeuh Khrih sungah pumkhat suakin, ngaihsutna gawmkhawmin, deihna kibang,
thu khat in luangkhawmin Pasian minthangsak ding uh hi.”Ellen G. White, Our
High Calling, p. 171.
Ellen G. White hong hilh thute
ngaihsun pha kik in. Mite in bang gen, bang sem cih lunghimawh kei inla, “
thu-um mite kipumkhat nading in bang ka sem thei ding hiam?, ci-in nang le nang
kidong in.
THURSDAY MARCH 2
KHA SIANGTHO IN SEPNA LEH MABAN
KIHUALSAK
Sawl. 2: 4 – 11, 16 – 21 sim in.
Thu-um mite Kha Siangtho tawh a kidim manun bang piang hiam?
______________________________________________________________
______________________________________________________________
Kha Siangtho in Sawltakte nasepna
lawhcingsak hi. Pasian in a kithutuak lo, kipum khat lo mi honpi sangin a
kipumkhat mi tawmno tawh na lianpi sem hi. Ahi zongin mi honpi in kipumkhatin
siamna tuamtuam, tha le ngal, neih le lamh gawmkhawmin, mapang khawm leh na
lianpipi sem thei zaw hi.
Upna, sepna kikhat manin pawlpi a
dingkhia thei ahi hi. Meidawi, ginalo ahih uh hangun thu-um mite in namdang
tuamtuamte lakah na lianpi semkhia uh hi. Amaute in kithutuakin Pasian
nasepnate pulaak uh hi (Sawl. 2: 11). Pasian in Sawltakte hun lai-in a nasep
bangin nasep kizawh hun nunung ciangin zong na lianpipi hong sem ding hi.
Sawl. 2: 42 – 47 sim in. Thuciam
Thak thu-umte in bang thute ah zong kipumkhat uh hiam?
_________________________________________________________________
_________________________________________________________________
Pentecost Ni-in thu-um mite in Kha
Siangtho tawh kidimuh hi. Lai Siangtho simkhawm uh hi. Sawltakte’ thuhilhnate
ngai khawm uh hi (Sawl. 2: 42). Kikhawm khawm uh hi. Khomun ne khawm uh hi.
Thungen khawm uh hi. Pasian min phat khawm uh hi (Sawl. 2: 47). Cimawh genthei
mite aa dingin a neih khempeuh gawmkhawmin huh uh hi. A tasam kuamah om lo uh
hi (Sawl. 2: 44, 45). Tua ahih manin nasepna ah zong semkhawm thei uh hi. Kha
Siangtho in i mit hong vaksak ding a, huh kisam mite mu-in hong huhsak ding hi.
Koi bangin pawlpi kipumkhatzia na
pawlpi in pulaak hiam? Koi bangin kipumkhat zaw thei ding
hiam?
FRIDAY MARCH 3
NGAIHSUTBEH DING: “Hotkhiat nasep
tawh kisai-in mimal khat ciat in a sep ding om hi. A lamdang thu khat a piang
ding ngak lo-in na khat peuhpeuh sep kipan zaw in. Kha Siangtho in hong makaih
ding a, vangliatna tawh kidimin tawntung a si ding mite in nunna khomun ngahin
tawntung nunna sungah om thei ding uh hi.” Ellen G. White, 1SM. 186.
“Mimal khat ciat in huzaap lianpi
nei hi. Pasian in mimal khat ciat hong zangin na lianpi sem thei hi. Nunzia
hong khel Ama hong hehpihna leKha Siangtho in thu-um mite hong kipumkhatsak
hi.” 3SM. 21, 21.
KIKUP
DING DOTNATE:
“Mimal nunzia in huzaap lianpi nei
hi” cih thu in bang pulaak hiam? Bang hangin ci le sa siksanin mi tungah om
nuam i hiam? (Phil. 2: 3, 4).
Mi kimkhat in “upna hi lo, nasep in
thu-um mite hong kipumkhatsak hi.” Upna in kikhenna piangsak hi,” ci uh hi. Upna
hangin kikhen hi pah lo hi. Bang hangin upna kibang lo ahih manin sepna le
mungtup zong kikhat thei lo hiam? Bang hangin upna ah kipumkhatna in sepna le
mungtup lawhcingsak hiam?
1. Lai
Siangtho thu sanzia kibatlohna a om thei mah ding hi lo hiam? Mi kim khat in
ahihleh a hi bang lianlianin sangthei
2. uh hi. Upna
kipumkhat ding hi mah taleh sanzia kibatlohna zong a om thei ding mah hi lo
hiam? Tua bangin kibatlohnate koi bangin na pawlpi in ngaihsun hiam?
3. Koi bangin
Lai Siangtho in hong kipumkhatsak hiam? Upna le mungtup kikhat nadingin Lai
Siangtho thuman thutak ah kipumkhat nadingin bangci lungsim puak kisam hiam?
