SABBATH NITAK:
TU KAAL SUNG SIM
DING: 1Kor. 12: 4 -7, 11, 14 - 31; Eph. 4:7; Rom. 12: 3 – 8: 1;
1John 4: 1-3.
KAMNGAH: “Tu-in siamna a nam
tuamtuam om a, ahi zongin a hong pia Kha Siangtho a kibang ahi hi. Nasepna a
nam tuamtuam om a, ahi zongin a na i sepsak Topa a kibang ahi hi. Nasep nading
siamna a nam tuamtuam om a, ahi zongin septheih nading siamna a hong pia Pasian
a kibang ahi hi” (1Kor. 12: 4 -6).
Papi khat in zinkhia ding ahih
manin a neihsa khempeuh a kemcing dingin a tapa ap hi. A tapa in nasepzia ding
thei lo ahih manin a lungkia-in bangmah semlo-in a hun mawk beisak hi.
Jesuh in a nungzuite nusia-in
vantunga om a Pa kiangah a pai madeuh in nungzuite sep ding hotkhiatna thu
pulaak ding thupia hi. A sepzia ding uh zong hilh hi. Nasem thei lo dingin
nusia lo hi. Kha Siangtho’ huhna le Ama min tawh na lianpi sem dingin thupia
hi. Paul in, “Jesuh Khrih hangin note tungah Pasian in hehpihna thupha hong pia
ahih manin ka lungdamna thu, Pasian tungah ka ko tawntung hi. Bang hang hiam
cihleh Khrih tawh na kipawlna hangun, thugen siamna le thu theihtel siamna a
kipan siamna nam khempeuh na neikim uh hi. Note sungah Khrih thu kiptakin om
ahih manin i Topa Jesuh Khrih hong kilatkik ding ngakin na om hun sungun thupha
na ngah loh uh khat beek om lo hi,” ci-in pulaak hi (1Kor. 1: 4 -7). Khrih
sunga om mite in Ama pawlpi nasem dingin Kha Siangtho in siamna pia hi.
Tukaal sungin Kha Siangtho in
vangliatna tawh kidim siamna hong Pia ahihna, Kha Siangtho gah le Kha piak
siamna cihte i kikum ding hi.
SUNDAY FEB. 19
KHA SIANGTHO GAH LEH KHA SIANGTHO
LETSONGTE
Kha Siangtho gah hong pianna le Kha
Siangtho letsong hong pai-na a mun kibang hi. Ahi zongin hih thu nih in kibang
lo hi. Kha Siangtho letsong tawh nasep ding thu-um khempeuh hong sawl lo a, ahi
zongin thu-um mi khempeuh in Kha Siangtho gah nei dingin hong gen hi. Kha
Siangtho letsongte in Khrih sungah nuntakna kipsakna hi pah lo hi. Ahi zongin
Kha Siangtho gah a nei mi ahih leh Khrih lo-in tua bang gah hoih gah thei lo
hi. Kha Siangtho gah in khat bek hi-in, Kha Siangtho letsong ahih leh nam tampi
hi. Letsong ahih leh a neu, a lian zaw cih bangin kikhen hi.
1Kor. 12: 4 – 7, 11 sim in. Paul in
bang thulaigil pulaak hiam?
_________________________________________________________
______________________________________________________________
Kha Siangtho letsongte in thu-um mi
lakah a kimu thei dingin Pasian in hong piak hi-in, letsong a tuamtuam om a,
khat le khat ngah kibang lo hi. Pasian in thu-um mite tungah kisam a sak bangin
hong pia hi. Pawlpi phungvuh nading, pawlpi nasep a huh dingin Pasian in a piak
ahi hi. Mimal minthanna ding, gualnopna dingin hong kipia hi lo hi. Pasian gam
zai nading, Ama minthan nadingin hong kipia hi zaw hi.
Tua hi-in Kha Siangtho gah a nei
lo-in Kha letsong in mannei lo hi. Kha letsong ah itna mah thupi takin kikoih
hi. Kha letsong pulaak 1Kor. 12 khitteh itna thu limtak kipulaak hi (1Kor. 13).
Eph. 4: 11 – 13 ah letsong thu a pulaak khitteh itna thu mah in zompah hi (Aneu
15, 16). Romans 12: 3 – 8 ah zong Kha letsong a pulaak khitteh itna mah pulaak
hi (Rom. 12:9, 10).
Kha letsongte in a taktakin
hehpihna letsong hi. Hehpihna letsongin itna letsong, itna panin hong pai, itna
tawh mi tungah nasem dingin hong kipia ahi hi. Midangte i it ciangin Pasian’
hong itna kilangsak i hi hi. Itna, theihna khempeuh tawh kidim Pasian in a hong
sawl bangin a kisep zawhna hong pia hi. Tua hi-in itna in letsong khempeuh lak
pan a lian pen ahi hi ( 1Kor. 13: 13).
Bang hangin itna in thupi pen hiam?
Koi bangin Pasian nasepna ah itna in vanglian hiam?
MONDAY FEB. 20
PASIAN, A VANGLIAN SIAMNATE A PIA
PA
Mimal deih siksanin siamna hong
kipia hi lo hi. Greek laimalin siamna cih kammal‘charismata’ kizangin, a
khiatna in Pasian’ hong piak hehpihna letsong hi. Ama deih bangin hawmkhiat ahi
hi. Pilna, siamna, hauhna tungtawnin a hong kipia hi lo hi. Sep ding a hong
kisawl nate sepzawhna dingin itna siksanin a khawnkhongin hong kipia ahi hi.
Eph. 4: 7 sim in. Tua letsongs a
pia Kha Siangtho hi, ci-in a tamzaw in kingaihsun tawntung hi.
Paul in Jesuh Khrih le tua letsongte kizopzia pulaak hi. Koi
bangin tua letsong kipiakna ah Jesuh kihel hiam?
__________________________________________________________
____________________________________________________________________
Khrih hehpihna hangin siamna hong
kipia hi. Khrih umin a Honpa-in a sang mi tungah Khrih in ama thuneihna
tungtawnin siamna guan hi (1Kor. 12: 11). Pianpih siamnate in Kha Siangtho
siamna tawh kibang lo hi. Pianpih siamna hi taleh sinna panin kingah thei siamnate
in Kha Siangtho’ piak siamna tawh kibang lo hi. Khristian hi lo mi tampi in
pianpih siamna nei uh hi. Ahi zongin a kicing, a hoih siamna ahih leh Pasian
kiang pan hong pai ahi hi (James 1: 17). Pasian in amah a um mi khempeuh tungah
siamna hong pia hi. Tua siamnate in pawlpi phungvuih nading, a gam aa ding le
Ama minthan nadingin a hong piak ahi hi. Mi khat in a pianpih siamna hi ta leh,
a sinna panin a ngah siamnate Pasian’ hong piak hi ci-in phawk a, Ama nasep
nadingin ki-ap, a kipia khiat leh Pasian in tua siamnate zang hi.
Koi bangin Paul in thu-um mite
tungah kipia siamnate pulaak hiam? Bang hangin tua siamnate pawlpi aa ding a
hihzia phawk ding thupi hiam? 1Kor. 12: 14 – 31.
___________________________________________________________
_____________________________________________________________________
Kha Siangtho in ama pilna le ama
deih bangin thu-um mite siamna hong pia hi. Eite hong it ahih manin ei aa ding
picing takin na hoih i sep zawhna dingin a hong geelsak ahi hi. Midang khat
tungah kipia siamna eng lo, hazat kul lo hi. Mi dang tungah kipia siamna a eng
mi in Pasian tungah a lungdam thei lo mi ahi hi. Tua bang mi in Pasian muanna
nei lo hi.
Pasian in na omna pawlpi ah bang
siamna hong pia hiam? Mihing i kibat loh mah bangin a hong kipia siamnate zong
kibang lo hi. Hih in bang hong hilh hiam?
TUESDAY FEB. 21
KHA SIANGTHO HONG PIAK SIAMNATE’
NGIMNA
Romans 12: 3 – 8; Eph. 4: 8 – 12 sim in. Pasian in siamna a hong piak ciangin bang ngimna tawh
hong piak a hiam?
_____________________________________________________ _____________________________________________________________________
Kha Siangtho hong piak letsongte in
nasep nading a hong kipia hi. Siantho ngahna ding hi lo hi. Nasep thalawp
nading, mihing lungkim ngah nading, upna picin nading, a hawm nunna a dimsak
ding, mihing’ deihna picin nadingin hong kipia hi lo hi. Kha Siangtho letsongte
in Pasian bulphuh hi; mihing bulphuh hi lo hi. Topa’ deihna tangtun nading,
pawlpi kipumkhat nading, pawlpi khantoh nadingin hong kipia hi zaw hi (Eph. 4:
12 – 16). Pasian in pawlpi tungah a piak nasep a kizawh nadingin a hong piak
ahi hi (Eph. 4: 11, 12). A tawpna ah Pasian minthan nadingin hong kipia ahi hi
(1Pet. 4: 10, 11).
Mihing a hong lungkimsak ding, i
nuamna dingin a hong kipia hi lo hi. Thu-um mi khat in a upna ah a kip nading
na huh zawhna dingin a hong kipia hi zaw hi (1Pet. 4: 10; 1Kor. 14: 12, 26).
Pawlpi puahhoih nading, upna ah khantohna dingin hong kipia ahi hi. Pawlpi kip
nading, khantoh nadingin a hong kipia siamnate a kizatkhialh manin siatna tampi
i tuak hi. Hih bang munte ah mihing kiliatsakna kimu hi. Tua in kikhenna,
kitapkhapna piangsak hi.
Kha Siangtho letsongte i ngaihsut
ciangin kivakna, hihtheihnate bek kingaihsun kha hi. Ahi zongin Kha Siangtho in
thu-um mite letsong a hong piak ciangin sep ding na khat hong piakhawm hi
(1Pet. 4: 10). Tua hi-in Kha Siangtho letsong i cih in Pasian in Kha Siangtho
tungtawnin a lamdangtakin a hong piak naseptheihna a hi hi. Pawlpi kilamh
nadingin thu-um mi khat ciat tungah hong piak ahi hi. Tua bangin a tangtun
nading siamna tuamtuam kisam hi.
Bang hangin Kha Siangtho letsongte
in pawlpi kipumkhatna ding hi, ci i hiam? Koi bangin thu-um mi in a kibang lo
letsongte in pawlpi kipumkhatsak hiam? A kibanglo letsongte in pawlpi buaisak
lo-in, pawlpi kipsak a hihzawkna ding bang kisam hiam?
WEDNESDAY FEB. 22
A BEISA LE TUHUN AA DINGIN LETSONG
1Kor. 14: 1 le 1Kor. 12: 7 -11, 27
– 31; Romans 12: 3 -8 le Eph. 4: 11, 12 cihte enkak in. Sawltakte bek aa kipia
hiam? Bang hangin tuhun aa dingin zong hong kipia hiam?
_____________________________________________________
______________________________________________________________
Thu-um kimkhat in, “Jesuh le
Sawltakte hun lai bekin Kha Siangtho letsong kipia hi. Sawltakte in kithahna a
thuak uhteh Kha Siangtho letsongte kipia nawn lo hi,” ci uh hi. Tua bangin a um
mite in 1Kor. 13: 10 siksan uh hi: “A kicing thu hong tun ciangin a kicingtaak
lo thuteng maiming ding hi.” Hi mah hi, tua letsongte a bei hun ding pen Jesuh
tawh maitang kimu-in na khempeuh kitel sinsena i theih hun hi ding hi. Kha
Siangtho letsongte in pawlpi kip nadingin hong kipia hi (1Kor. 12: 28). Tua
letsongte deih dingin Paul in hong hanthawn hi (1Kor. 14: 1). Tuate in pawlpi
cidam nadingin kisam hi. Kha Siangtho letsongte om nawn lo hi; beimang khin a,
kipia nawn lo hi, ci-in Lai Siangtho in hong hilhna om lo ahih manin Khrih hong
pai mateng Kha Siangtho in tua letsongte hong piapia lai hi.
Hun nunung ciangin cikmahin a om
ngei lo vanglianna tawh Pasian nasepna kizo ding hi. Pawlpi in Khrih hong pai
kik nading a kigingin na a sep Pasian nasep kizawh nadingin ama nasemte nusia
ngei lo ding hi. Kha Siangtho letsongte in Lai Siangtho aitangin hong kipia hi
lo hi. Lai Siangtho sangin lianzaw lo hi. Ahi zongin thu-um mite in Pasian’
kamciam letsongte ngahin nasepna lawhcingsakin pawlpi kilamhna le Khrih hong
pai nadingin mite kigingkholsak hi.
Eph. 4: 11 – 13 sim in. “Tua hileh
Pasian’Tapa i theihna le i upna-ah kithukhatin, eite a khangcing suakin, Khrih’
cingtaakna ciang i banto ding hi.” Koi bangin hih thu in Kha Siangtho letsong
kisapzia hong hilh hiam?
THURSDAY FEB. 23
KHA SIANGTHO LE KHENTEL SIAMNA
1Kor. 12: 10; 14: 29; 1John 4: 1 -3
sim in. Bang hangin thuman le zuau khentel siamna thupi hiam?
___________________________________________________________________
____________________________________________________________________
Pasian’ piak siamna tuamtuam a om
mah bangin Dawimangpa’ piak siamna om ahih manin tuate khentelsiam ding kisam
hi (1Kor.
10). Kha niin in pawlpi lampial
nadingin nasem hi. Zuau thuhilh, kamsang zuau, thuman pan lampialsak ding
damsakna, na lamdang tuamtuamte tawh nasem hi. Pawlpi kipumkhatin thuman tawh
kalsuan a, kamsang zuau le a man lo na lamdang tuamtuamte a zuih khak loh
nadingin Pasian in pawlpi tungah thuman le zuau khensiamna guan hi. Lai
Siangtho thu-ah zungkipna, Pasian’ kammal theihna le citakin thuman le zuau
hong telsiamsak ding hi. Lai Siangtho siksanin thuman le thuman lo khentel ding
kisam hi. I zak thute, i muh thute Pasian kiang pan maw, Satan kiang pan cih i
tel nadingin Lai Siangtho tawh sittel ding kisam hi.
Upna man le man lo na lamdang
bawlna tawh a sittel mi in Satan’ khemna sung tung ding hi. Satan in Pasian
kiang pan hong pai tawh kibang dingin mite muhna ah na tuamtuam bawl ding hi.
Tua bang khemna sungah a tung ding mite honkhia lo-in na hun bei sak ken. Itna
tawh thuman a zui lo mi in Satan’ khemna sungah omin thuman mah sa ding hi.
Satan le a pawlte ina hong khemna dingin na lamdang a tuamtuam hong lak ding uh
hi. Dawi’ ukna sungah a nungta mi in tua bang na tuamtuam bawl ding hi.” Ellen
G. White, 2SM., 52. 53.
FRIDAY FEB. 24
NGAIHSUTBEH DING:
Ellen G. White,
The Great Controversy, 511 – 517; 593 – 602.
Lai Siangtho sunga na lamdang –
damna bangin tuhunin bang hangin om lo hiam? cih kidong zel hi. Na lamdang kiza
za hi. Mi kimkhat in amau nuntakna ah tuak uh hi. Kimkhat ahih leh mite’
phukkhak tungtawnin mu uh hi. Lai Siangtho sinna tungtawnin Kha Siangtho’ hong
hopihna aw na za thei hi. Ellen G. White in hih bangin pulaak hi: “Khrih in
natna damsakin, gimna thuakte tawldamsakna tungtawnin nunna Thu pulaak hi.
Tu-in Jesuh bawl bangin na lamdang kimu lo hi. Tua bangin a bawl dingin zong
Pasian in hong phal nai lo hi. Bang hang hiam cihleh tua bangin Pasian in na
lamdangbawlna hong pia leh Satan in zong bawl pah ahih manin mi tampi in thuman
mu thei lo ding hi. Tua hi-in damsakna sem kawmin nunna Thu hilh ding kisam hi.
Tua dingin zato le cidamna tawh kisai nasepna kisam hi. Zatui le damsak nasep
in tatkhiatna thu tangko nasep mah ahi hi. Zato le cidamna tawh nasepnate panin
mi tampi in damna ngahin thuman thei ding uh hi.” Ellen G. White, 2SM., 54.
KIKUP DING DOTNATE:
1. Bangci
bangin Kha Siangtho gah le Kha Siangtho letsong kibang lo hiam?
2. Koi bangin
Pasian in thu-um mite tungah a piak a kibang lo letsong tuamtuamte in etlawmin
hoih hiam?
3. Bang hangin
na lamdang tawh thuman khentelna in lauhuai hiam? Thuman theihtel nadingin a
dang bang kisam hiam?
4. “Pasian in
kei tungah hehpihna hong piakkhongna hangin note tungah kong gennop thu in: “
Note tawh a kituakzah valin kilian ngaihsutzaw kha kei un. Pasian in note
tungah upna hong piakzah tawh kizui-in kingaihsun bek zaw unla, a kilawm ciang
khat bekin kingaihsun un” (Romans 12: 3). Hih in bang thumanpha hong hilh hiam?
Koi bangin ei le ei manpha i hihlam theih ding kisam hiam?
