TU KAAL SUNG SIM DING: John 15: 1
-11; Gal.5: 22; 1Kor. 13; Rom. 14:17; Eph. 5:9; Matt. 5:5
KAMNGAH: “Ahi zongin Kha Siangtho’
sawlna bangin gamtatnate pen: itna, lungdamna, lungnopna, lungduaina, migitna,
hoihna, cihtakna, dikna le pumpi ki-ukzawhna hi a, hih bangina gamta mite,
Thukham in bangmah cih thei lo hi” (Galati 5: 22, 23)
Kha Siangtho gah in thu-um mite
nunzia ding hong hilh hi.Paul in tua gahte nam kua-in a pulaak hangin a vekin
gah nam khat hi. Topa’ piak siamnate zangin na lianpi pi a sem zo dingin Kha
Siangtho gah hong kipia hi lo hi. Ahi zongin Kha Siangtho gah in Pasian tawh
kizopna ah i nunzia ding hong hilh hi. [Kha Siangtho gah in bangci mi cih
pulaak hi. Gal. 5: 22, 23 sunga gah hoih khempeuh Jesuh in nei hi. Kha Siangtho
tungtawnin i sungah Khrih a hong nuntak ciangin Kha Siangtho’ gah gahkhia ding
hi.
Mihing in ama tha le ngal tawh Kha
Siangtho gah nei zo lo hi. Hanciamna tawh mi hoih, gamtat hoih kha mah ding hi.
Ahi zongin Kha Siangtho kihel lo gamtat hoih in a etlawm hi bek hi-a, hoihna
taktak hi lo hi. Kha Siangtho tawh kizopna bek in gah hoih kinei thei ding hi.
Kha Siangtho in Lai Siangtho tungtawnin Jesuh tawh hong kizomsak ciangin Khrih
nunzia i nei thei ding hi.
SUNDAY FEB. 12
GAH HOIH NADINGIN
John 15: 1-11 sim in. Bang hangin
‘lenggah kung’ Jesuh tawh kizopna bekin gah hoih hong gahsak thei hiam? Bang
hangin Jesuh sungah nuntak ding thupi hiam? Koi bangin Jesuh sungah na om hiam?
___________________________________________________________________
___________________________________________________________________
Gah hoih nading thusim in Khrih
sungah a nungta nunzia ahi hi. Khrih lo-in kuamah in kha a gah kei hi. Kha
Siangtho’ gah in a pua panin hong om ding hi lo-in i sungah Khrih hong om ciang
bekin gah hoih hi. Thu-um mi in lenggah gui tawh kizomin, Khrih’ nunzia i neih
ciangin gah hoih hong gahsak thei hi. Jesuh Khrih tungtawnin Pasian in gah hoih
hong gahsak hi.
Thu-um mi khat ciat in Jesuh sungah
a om ding uh ahi hi. Ngaihsutna khempeuh Khrih in a hong makaih ciangin i
gamtatna khempeuh in Amah kilangsak hi. Khrih in i sungah hong om ciangin i
nunzia in Khrih’ nunzia, Ama zia le tong a kilangsak nunzia a nei i hi ding hi.
Kha Siangtho gah in Jesuh’ zia le
tong ahi hi. Kha Siangtho in Jesuh nungzuite sungah tua gah hong neisak hi.
Nuntakna ah Khrih a hong om ciangin Kha Siangtho kimakaihsak nunna hi ding a,
ci le sa deihna kimu lo ding hi (Gal. 5: 16). Jesuh in a genin ah: “Tua ahih
manin singkung ginalote in gah ginalo gah uh hi. Singkung cidamte in gah gina
lo gah ngei lo a, singkung ginalote in gah limci a gah ngei lo hi” (Matt. 7:
17, 18). Gah gina in Kha Siangtho tungtawnin Jesuh tawh kizopna panin gahkhia
hi. Kha Siangtho in a hong hopihna za-in tua bangin i nuntak leh Kha Siangtho
gah gah lo-in i om kei ding hi. Gamtat zia le tong, i ngaihsutna dongin Jesuh’
zia le tong, lungsim pulaak ding hi. Kha Siangtho bek in tua bangin hong
nungta-sak thei hi. Kha Siangtho bek in Pasian’ deih nunzia bangin hong nungta
sak thei hi.
Mi kimkhat nunzia Paul in “ Biakna
thu a puathamteng zui napi-in biakna hangin vangliatna thu a omte deih lo mite
hi, ci-in pulaak hi (2Tim. 3: 5). Biakna zui mi le Kha Siangtho tawh kidim
nunzia bang kilamdang hiam? Koi bangin Kha Siangtho’ deihna bangin nungta le
nungta lo khentel na hiam?
MONDAY FEB. 13
ITNA PANIN A GAH
Gal. 5: 22; 1Kor. 13 sim in. Bang
hangin Kha Siangtho gah itna in a dang gahte lak pan a masa penpenin kikoih
hiam? Koi bangin itna gah panin a dang gahte kipan khia hiam?
_______________________________________________________________
__________________________________________________________________
Kha Siangtho gah itna in gah
tuamtuamte a makaih, a etlawmsak gah ahi hi. A dang gah tuamtuamte sungah itna
kimu thei hi. Bang hang hiam cihleh Pasian in itna hi (1John 4:8). Zia le tong
ah itna lian penpen hi (1Kor. 13). Pasian’ itna in na khempeuh kipatna le a
bulpi hi. Kha Siangtho tungtawnin i sungah Pasian in Ama itna hong guan hi
(Rom. 5: 5). Itna in Pasian’ ta ihihna pulaak hi.
Tua itna in itna mawkmawk hi lo hi.
Tua itna in mihing’ hanciamna tawh piang thei lo hi. Tua itna in Khrih sungah
nuntakna panin hong pai itna hi. Mihing hoih manin tua itna hong kipia hi lo
hi. Tua itna bek in nunzia kikhelsak hi. Tua itna in neem taleh khuah mahmah
hi.Tua itna in mawhna hong kisiksak a, a hoih zaw nunzia hong lunggulhsak hi.
Tua itna in i muhdahte tawh hong kipumkhatsak hi. I galte tawh hong kilemsak hi
(Luke 6: 27, 28; Rom. 5:8). Tua hi-in thu-um mite khat le khat a ki-itna
tungtawnun leitung mite in Jesuh nungzui taktak ihihna hong mu ding uh hi (John
13: 35). Tua itna in midangte kitangsap theipihin huh hi.
1Kor. 13 itna thu pulaak hi. Itna
thu kipulaakma le tua khit, 1Kor. 12 le 14 ah Kha Siangtho’ letsong kipulaak
hi. Cihnopna ah itna lo-in Kha Siangtho’ letsongte zong a mawkna hi, cih hong
hilh hi. Itna lo-in letsong in bang mah sem thei lo, Pasian’ deih bangin na
hoih sem thei lo hi. Ahi zongin itna in na khempeuh gawmtuahin, itna tawh sepna
khat peuh in manpha hi.
Itna na kisam hiam? Nisim na nunna ah,
mi tawh na kizopna ah itna tawh kidim dingin Kha Siangtho’ ompihna ngen in.
Midangte tungtawnin Pasian in a itna hong lak hi. Koi bangin mite tungah itna
na nei hiam? Koi bangin itna in Kha Siangtho gah tuamtuamte makaih hiam?
TUESDAY FEB. 14
NOPNA, KILEMNA LE LUNGDUAI-NA
Romans 14: 17 ah “bang hang hiam
cihleh Pasian’Ukna pen nekledawn tawh kisai thu hi lo a, Kha Siangtho hangin i
ngah Pasian’deihna bangin gamtatna, kilemna, lungdamna, cihte hi zaw hi.
Lungdamna i cih in Pasian’ hong piak thuphate, Ama hehpihna le mawhmai-na
hangin itna tawh thukkikna hi. Mi kimkhat in nate tungah kinga uh hi. Ahi
zongin Kha Siangtho hangin i ngah nopna in Pasian maingatna le eite a ding a
nasepnate hangin nuamna hi. Bang bangin hamsa taleh lungdam thei hi. Pasian’mi
ihih manin a lungdam ding i hi hi. Nuihna in lungdamna lahkhiatna ahih hangin a
tawntungin a nuinui ding cihna hi lo hi. Ahi zongin Pasian a muang khempeuh in
Ama hong tatna le i sung a hong nuntak manin a lungdam den ding i hi hi. Topa
sungah lungdam tawntungna in upna thahatna ahi hi.
John 14: 27; Romans 14: 17 sim in.
Koi bangin kilemna le Kha Siangtho’ nasep in kizopna nei hiam? __________________________________________________________
__________________________________________________________________
Kilemna in nopna sangin kip zaw hi.
Kilemna in upna tawh Khrih’ hong piak dikna hangin a ngah i hi hi (Romans 5:
1). Pasian tawh i kilemtak ciang Kha Siangtho in hong makaihin midangte tawh
zong hong kilemsak hi. Bang hang hiam cihleh Kha Sianghtho tungtawnin Pasian
kiang pan hong pai kilemna in eite sungah hong om hi (Phil. 4:9). Tua kilemna a
nei mi in a gilo kei hi. Siatna a thuk kei hi. Mite tawh kilemin nungta hi
(Romans 12: 18).
2Pet. 3:9 sim in. Koi bangin
lungduaina in Pasian’ zia le tong kilangsak hiam?
_____________________________________________________________
____________________________________________________________________
Mihing in a lungduai-na a pianpih
hi lo hi. Hamsatna thuak zawhna, mi tungah thuakzawhhatna cihte a hong
piangtawm hi lo hi. Ze-et hamsatna sungah ei kia bekin i thuak kei hi. Tua
bangte zawh nadingin Pasian in Kha Siangtho tungtawnin tha hong guanin hong
zozo sak hi. Hih in hun nununga a nungta mite nunzia pulaak hi (Mang. 14: 12).
Tupna kician neite bek in bang bang tuak taleh thuak zo ding hi.
Nopna, kilemna, thuakzawhna cihte
koi bang ciang na nei hiam? Koi mun
behlap ding na nei hiam?
WEDNESDAY FEB.
15
HEHPIHNA, HOIHNA, CIHTAKNA
1Kor.
13: 4 sim in. Bang hangin hehpihna in mite lungsim zo thei hiam? Koi mun ah
Pasian’ hong hehpihna na mu hiam?
_____________________________________________________________
_______________________________________________________________________
“Hehpihna” cih kammal in Pasian in
mite tawh a hong kizopzia pulaak hi. Cimawh genthei-te tungah lungsim puakzia
ding zong hong hilh hi. Pasian in i khialhna bangin hong thuk hi leh hong thuk
thei hi. Ahi zongin pa in ta a it bangin mawhpi mah hong it hi (Hos. 11: 1-4).
Hehpih theihlohna in i khuavak mialsak hi. Hehpihna lo-in i nasep in muibun lo
hi. Mi hehpih nadingin sum kisam masa lo hi. Ahi zongin sum in lawmlegual hong
nei thei sak hi. Mi lungsim zo thei hi. Khialhna hangin i thuhilh mi hehpih
ding kisam hi. Hehpihna siksanin thuhilhna in picinna hi.
Eph. 5:9 sim in. Hoihna le bang
kithuah hiam?
______________________________________________________________
_____________________________________________________________________
Hoihna i cih in itna siksanin
gamtatna ahi hi. Hoihna in Kha Siangtho’ gah hi-in sepna le hoihna siksan
gamtatna zong kihel hi. Itna tawh mi tungah i bawl khempeuh in hoihna hi.
KhaSiangtho in i sungah a hong om ciangin i nuntakna in hoihna tawh kidim ding
a, midangte tungah thu hoihin hong gamta-sak ding hi.
Gal. 5: 22 sim in. Bang hangin
mite’ muan theih ding thupi hiam?
__________________________________________________________
_________________________________________________________________
Kha Siangtho in cihtakna, thumanna
hong nei theisak hi. Cihtakna in muanhuai-na, belhtak cing cihna hi. A citak
mite in a kamciam pelh lo hi. Cihtakna in Jesuh’ nunzia le tong hi, “ thuman
takin teci pang” amah le amah kipulaak hi (Mang. 1:5). “A kamciam bangin a sem,
a sepna peuh ah thuman tawh nasem”ci-in kipulaak hi (1Kor. 1:9; 10: 13; 1Thess.
5: 24; 2Thess. 3:3). Cihtakna tungtawnin Pasian’ zia le tong a kilangsak i hi
hi: “Lawhcinna, gualzawhna a thupi hi masa lo hi. Ahi zongin i ngimna,
ngaihsutnate Pasian tawh kituak ding thupi masa hi. Pasian in na lianpi i sepna
sangin hoihna, cihtaknate manpha-sa zaw hi.” Ellen G. White, 2T., 510.
THURSDAY FEB. 16
LUNGNEMNA LE PUMPI KI-UKZAWHNA
Gal. 5: 23; Matt. 5:5 sim in. Bang
hangin lungnemna, dikna in Khrih bangin makaihna ah thupi hiam?
________________________________________________________________
___________________________________________________________________
Lungnemna, dikna in thanemna hi lo
hi. Meidawi-na zong hi lo hi. Moses pen mihing khempeuh lak pan lungnem pen hi
(Gam. 12:3). Amah pen makai lianpi khat hi. A lungnemte mi tawh kitawngtawng lo
hi. Ngongtat lo hi. Dikna tawh mite makaih zaw hi. Lungnemna pen upna,
khamuanna pan hong piangkhia hi. A lungnem mi in amah le amah kimuang lo-in
Pasian bek a muanna a kilangsak hi. A gilo, a ngongtat mite a meidawina uh, a
launa uh a kitheihlohna dingin a selcipna hi thei hi.
Gal. 5: 23; Pau. 16: 32 sim in.
Pumpi deihna ki-uk lo mi in bang thuak ding hiam? A ki-uk zo mi in bang ngah
ding hiam?
_______________________________________________________________
__________________________________________________________________
Kha Siangtho gah tuamtuamte lakah
pumpi ki-ukzawhna zong kihel hi. Pumpi cilesa deihna nei lo mi a om diam?Khuapi
khat, pawlpi khat a uk ding mi in amah le amah ki-ukzawhna a neih masak kul hi.
Nek le dawn kideek zawhna bek hi lo-in nuntakna tawh kisai na khempeuh ah
ki-ukzawhna kisam hi.
Pumpi cilesa deihna kideek zawhna
in Kha Siangtho’ gah hi. Pasian in hong makaih ciangin Kha Siangtho’ piak
siamna tuamtuamte sangin sianthona kilang masa pen hi. Khrih tawh kisutna in na
khempeuh sangin thupi zaw hi. Bang hang hiam cihleh Kha Siangtho’ gah in thu-um
mite a hong kiciaptehna ahi hi.
Na nunzia kisittel lecin koi munah
ki-ukzawhna kisam na hiam? Mun khat sangin a dang mun khat ah na kisapzawkna om
ding hi. Bang hangin Pasian’ vangliatna tawh na khempeuh tungah ki-ukzawhna in
thupi hiam? Na lawmte tawh kikum in.
FRIDAY FEB. 17
NGAIHSUTBEH DING:
Kha Siangtho gahin it huai gamtat
zia le tong, bang bang piangta leh lungdam theihna, lungnopna, hamsatna thuak
taleh lungduaina, phin taleh migitna, siatna khat peuh thu hoih tawh thukkikna,
ama hamphat nading zong lo-in cihtakna, khialhnate ciampteh lo-in lungnemna, na
khempeuh pumpi ki-ukzawhna, cihte ahi hi. Tua thute tawh a kituaklo thukham a
om kei hi (Gal. 5: 22, 23). S. Chadwick, in Arthur Walkington Pink, The Holy
Spirit (Bellingham: Logos Bible Software, n.d.), ch. 30.
“ Thuman it hi lehang thuman pulaak
lo-in i om kei ding hi. Khrih sungah i neih thupha lametna pulaak lo-in i om
kei ding hi.Itna nei takpi lehang i sanggamte kiangah upna thu pulaak lo-in i
om kei ding hi. Siatna a piangsak thei kampau peuh mah zang vet kei in. Tua in
Satan’ nasep hi. Pasian kammal in tua bang siatna piangsak thei kampaute deih lo
ahihlam phawk tawntung in.” Ellen G. White, Ye Shall Receive Power, p. 76.
KIKUP DING DOTNATE:
1. Pumpi ki-ukzawhna tawh kisai thu na
lawmte tawh kikum in. Hehpihna tawh hotkhiatna hong kipia ahih leh, bang hangin
pumpi ki-ukzawhna thupi hiam?
2. Hotkhiatna i cih in mawhmaisakna ngahna hi lo
hiam? Judah nunzia ngaihsun in. Deihgawhna in siatna tun hi lo hiam?
3. Pumpi
ki-uk zawhna kisam mahmah ahihna hong phawksak hi lo hiam? Ellen G.White in
zawhna ngah nading tawh kisai bang pulaak hiam? “ Tatsiatna neu khat, a hoih lo
na khat nopsakna in hotkhiatna tawh hong kipelhsak thei hi.” Ellen G. White,
5T., 53.
4. Bang hangin Kha Siangtho gah in Kha
Siangtho letsong sangin thupi zaw hiam?
1Kor. 13 simkhia in. Bang deihna
hiam?
5. Bang hangin Paul in tua bangin itna limgen mahmah hiam? Koi bangin Paul’
gen itna nei ding i hiam? Bang hangin Khrih sungah nungta-in mawhna ah misi a
bang ding kisam mahmah hiam?
