MUC

Print Friendly and PDF

Tuesday, December 20, 2016

LESSON 6 FEB. 4 – 10 KHA SIANGTHO LE A SIANGTHO NUNZIA




SABBATH NITAK: 

TU KAAL SUNG SIM DING: 1Pet. 1: 14 – 16; Isa. 6:3; Heb. 12: 14; 1Kor. 6: 11; 1Tim. 1:8; Late 15: 1, 2.

KAMNGAH: “Nopsakna a hong pia Pasian in na khempeuhah sianthona le kicinna hong pia hen la, na kha uh, na nuntakna uh, le na pumpi uh hoihtakin hong kem henla, i Topa Jesuh

Khrih hong pai ciangin mawhna khat zong a nei hetlo dingin hong bawl tahen” (1Thess. 5: 23).

Pasian in mawhna, gitlohna a deihlohlam i phawk loh banah a sianthona ngaihsutin i nei kei hi.Khristian thu-um mi khempeuh in sianthona, Khrih mah bangin itna le sianthona i masak ding hong deih hi.

“ Nang sangin siangtho zaw ing,” cih lungsim hepkhiat kul hi. Ahi zongin a siangtho, a kisiansuah nunna tawh a nungta ding i hihlam mangngilh ding hi lo hi. Pasian’ itna le Ama siangthona kikhen lo hi. Sianthona om kei leh itna in ci le sa itna tawh kibang ding hi. Itna om kei leh Ama siangthona in lauhuaina tawh kidimin kuamah in Ama kiang tung lo ding hi. Pasian in Pasian ahihna – siangthona le itna, in Ama nunzia bulpi hi.

Kha Siangtho in i nunna hong siangthosak hi. Ama min in zong Siangtho Pa ahih manin sianthona Kha kici hi (Rom. 1:4). Ama min in Pasian in siangtho hi, cih hong phawksak hi. Pasian in mawhnei khempeuh Ama lim le mel sunin a siangtho dingin hong deih hi. Tu kaal sungin thusin dingte in: siangtho cih le a siangtho nunzia cihte ahi hi.

SUNDAY          FEB. 5

PASIAN’ SIANGTHO-NA


1Pet. 1: 14 – 16 sim in. Bang hangin a siangtho dingin hong kihanthawn hiam? Bang in a siangtho-in hong nungta-sak hiam? Pasian in siangtho hi, cih thu a khiatna bang hiam?

___________________________________________________________

____________________________________________________________________

Mi tampi in Pasian’ siantho-na pulaak lo-in A hong itna bek gen uh hi. Pasian nunzia tuamtuamte sangin a siantho-na in Ama min tawh kizopna nei zaw hi (Late 89: 18; Isa. 40: 25; Jer. 51:5; Ezek. 39:7; Mang. 4:8). Ama’ zia le tong in siangtho-in kawkbaang lo hi. Pasian’ siantho-na i cih in hoihna khempeuh tawh kidimin, siatna, mawhna nei lo hi. Pasian nunzia le tong khempeuh in siantho-na siksan hi. Pasian in na khempeuh sem thei-in, na khempeuh thei-in, mun khempeuh ah a om Pasian hi; siantho-na khempeuh tawh kidim lo hi leh, a it huai lo, kihtak huai Pasian hi ding hi. Ahi zongin Pasian in it huai-in i it ding kisam hi.

Ama hatna, Ama hehpihna, Ama pilna le a hong itna in siangtho hi. Siantho-na in Pasian a hihna khempeuh siksan hi. Bang hang hiam cihleh Ama nunzia mahmah in siangtho hi. Pasian’ siantho-na a nial mi in Pasian a nial hi pah hi. Siantho-na nei lo Pasian hi leh a kihhuai pasian hi ding hi.

Pasian in siangtho hi, cih thu in Pasian in mawhna tawh kikhen hi. Ama siantho-na in hoihna bek a deih Pasian hi. Siantho-na in kizopzia ding gamtat zia hong hilh hi. Siatna pan kihemkhia-in Pasian minthan nadingin a nungta dingin hong hilh hi.

Isa. 6: 3 le Mang. 4:8 ah, Pasian in siangtho, siangtho, siangtho hi, ci-in kipulaak hi. Lai Siangtho gelhte in kammal khat a zat kik kik uh ciangin tua kammal a thupitna i phawk nading deihna hi. A gen thute i phawk nadingin Jesuh in zong pulaak kikkik hi “ A mantakpi” ‘ a mantakpi’ kong cihna in ah (John 5: 24; 6: 47) “ Jerusalem,” “Jerusalem” (Matt. 23:

37)   “Martha,” “ Martha” (Luke 10: 41) ci-in sam hi. Pasian pianzia a kipulaakte lakah siantho-na thum vei bang kipulaak hi. Tua in a thupi mahmah thu khat ahihna hong hilh hi. Pasian’ nunzia in siantho-na, itna, hoihna tawh kidim hi.

Pasian in hatna khempeuh tawh kidimin, itna, hoihna cihte a nei lo hi leh bang zahin a lauhuai Pasian hi ding hiam? Bang hangin Pasian nunzia le a gamtatziate hangin Ama tungah lungdam huai hiam?

MONDAY      FEB. 6

SIANTHO-NA’ OMZIA


“Jesuh tawh kinai zaw semsem mi in ama mawhna phawk semsem ding hi. Tua bang ciangin Khrih i mu tel zaw ding a, Ama kicinna le eite kicinlohna kilang zaw ding hi. Hih in Satan hong khemna le a vangliatna khempeuh beimangsaka, Kha Siangtho in i sungah hong tengin mawhna hong phawksak zaw ding hi” Ellen G. White, Steps to Christ, 64, 65.


Eph. 1: 4; 5: 25 – 27; Heb. 12: 14 sim in. Pasian in a mite le a pawlpi aa dingin ngimna bang nei hiam? ____________________________________________________________
__________________________________________________________________

Siantho-na in Pasian’ letsong hi; a siangtho dingin thu hong pia hi. Nisimin nuntakna a siangtho dingin thunget kul hi. Siantho-na in Kha Siangtho gah hi; Khrih tawh a nungta mi in siantho-na nei hamtang hi (Gal. 5: 16, 22, 25). Siantho-na in Khrih tawh kisutna hi. Khrih tawh a kisun mi in Khrih tawh kipawl mi hi-in Ama sawl bangbang mangin, Ama tungah citak mi ahi hi. Tua bang mi in Khrih tawh kisun semsem ding hi. Siantho-na cih kammal in Pasian aa dingin a kituamkoih cihna hi. Siantho-na in a mannei nunzia, khuasak zia, Pasian tawh kizopzia ding hong hilh hi. Nunna siantho le gamtat siantho a tonkhawm hi.

Thuciam Thak sungah thu-um mite in mi siangtho ci-in kiciamteh hi. Bang hang hiam cihleh Jesuh aa dingin a kituam koih mite ahi uh hi. A siangtho mi in mawhna nei lo ahi kei a, kicinna tawh kidim cihna hi lo hi. Ahi zongin a nunzia uh a kikhel ahih manin siantho-in nungta uh hi ( 1Kor.

1: 2 ah Korin khua thu-um mite in mawh nei lo hi lo, kicinna nei lo hi mah ta le-uh Paul in amaute mi siangtho, ci-in pulaak hi. A siangtho dingin hong kisawl hi. Siantho-na lo-in kuamah in Pasian mu thei lo ding hi (Heb. 12: 14). Pasian in a hong san a kipan kicinna tawh hong tuam hi mah taleh siantho-na in a kizom pai suak ding ahi hi. Mawhna nei lo Honpa i sut dong a siangtho zaw semsem ding i hi hi.

Khrih in hong siangthosak khin napi mihing’ tha tawh siantho ding hanciamna pen a mawkna hi. Pasian tawh kipawl khin ihihna phawk hi lehang siantho-na thu i muhzia kilamdang ding hi. Khrih in eite thuak ding khempeuh hong tuakkhin ahih manin Ama sungah om ihihlam phawk hi lehang i nunzia kilamdang lo-in om ding hiam?

TUESDAY      FEB. 7        
A HONG SIANGTHO-SAK THUTE


1Kor. 6: 11; Titus 3:5; Heb. 13: 12 cihte in siantho-na thu bang pulaak uh hiam?

__________________________________________________________

___________________________________________________________________

Upna tawh Kha Siangtho’ vangliatna in hong siangthosak hi (Heb. 11: 6; 2Thess. 2: 13; 1Pet. 1: 2). Paul in “Note pawl khat, tua bangin na gamta uh hi. Ahi zongin note pen i Topa Jesuh Khrih le i Pasian’ Kha Siangtho hangin mawhna panin a hong kisiangsak khinsa, Pasian’ tungah a kipiasa, Pasian tawh a kipawlsa mite na hi uh hi” (1Kor. 6: 11). Khrih in nisimin hong siangthosakin Kha Siangtho’ gah hong gahkhia-sak hi. Kha Siangtho in Topa’ nunzia a suun semsemin hong puahpha hi (2Kor. 3: 18).


Gal. 5: 16, 17 sim in. Paul in bang pulaak hiam?
___________________________________________________________


Thu-um mite in galdo tawntung hi. Bang hang hiam cihleh i sungah mawhna teng hi (Rom. 7: 20). Hih thu Paul in a nunna bei madeuhin hih bangin pulaak hi: “ Sanggamte aw, tua hamphatna a ngah khinin ka kingaihsun kei hi. Tua ahih manin a beisa thute mangngilh bawlin mainawtin ka hanciam a, Khrih Jesuh nasepna tawh vantung nuntakna-ah Pasian’ hong sapna ahi hamphatna ka ngahtheih nadingin, a kung lam zuanin tangtakin ka tai hi” (Phil. 3: 13, 14).


Heb. 12: 1, 2 sim in. Upna tawh i do mawhna thu bang pulaak hiam?

__________________________________________________________

__________________________________________________________________

“Eite hong makai-in i upna a hong cingtaaksak Jesuh mitsuan” tawntung ding ahi hi (Heb. 12: 2). Biakna-ah ei mimal hamphat nading kizong tawntung hi. Mawhna khempeuh hong zo sak thei Pasian i mitsuan zawk sangin mimal lawhcinna, tasapnate kimitsuan zaw kha zel hi. Jesuh mitsuan dingin Kha Siangtho in a hong makaih ciangin siatna, mawhna i lunggulh nawn kei ding a, hong hencip khempeuh panin hong suakta sak ding hi (Heb. 12: 1). Ahi zongin i lungsim in mawhna le i lawpsapnate tawh a kidimteh ei le ei ki-en hanga, Jesuh et ding kimangngilh hi. Hih in guallelhna hi. Bang hang hiam cihleh lawpsapnate i mai-ah hong om takteh tuate in hong lungkia-sak hi. Ahi zongin Jesuh mitsuan lehang eite i kikhel ding a, zawhna tawh i nungta ding hi.

Mi khat in “koi bangin mawhna tungah gualzawhna ngah ding kamciam koi ah om hiam? ci-in hong dong leh bang na dawng diam? Bang hangin tua bangin dawngkik ding na hiam? Na lawmte tawh kikum in.


WEDNESDAY     FEB. 8
PASIAN’ THUKHAM SIKSANIN SIANTHO-NA

Pasian in a thukham nuntakpih dingin hong sawl hi. Thukham in mawhna sung pan hong honkhia thei lo ahih leh bang hangin thukham kisam hiam? Hih thu siantho-na in hong hilh hi.


Romans 7: 12; 1Tim. 1:8 sim in. Paul in thukham pianzia bang pulaak hiam? Koi bangin thukham in Pasian’zia le tong kilangsak hiam?

_______________________________________________________

_____________________________________________________________________

Thukham in siangtho, thuman, hoihna tawh kidim hi. Pasian in siangtho, thumanin hoihna tawh kidim hi. Thukham in Pasian’ zia le tong pulaak hi. Kha Siangtho tawh a kidim mi in Pasian thukham tawh kituakin nungta hi. Thukham in a kikhel ngeilo na khempeuh a uk Pasian siantho-na hong hilh hi. Pasian a kikhel ngei loh mah bangin a thukham zong kikhel ngei lo hi. Thukham beisak dingin Jesuh hong pai hi lo-in, thukham kicingsak dingin hong pai hi (Matt.

5: 17 – 19). Thukham nuntakpih na pen gamtatna tawh dikna ngah ding hanciamna hi lo hi. Thukham nuntakpih na in cihtakna hi zaw hi. Thukham in hong hon lo hi. Hong hon thei lo hi. Thukham in hotkhiatna lampi hi lo hi; a kihonkhia mite zuih ding lampi hi zaw hi. Thukham in itna tawh kidim nunzia pulaak hi. Tua manin Jesuh in “thukham hemkhia mi tam semsem ding a, ki-itna kiam tektek ding hi,” ci hi (Matt. 24: 12). Thukham a kideih lohna mun ah itna kiam hi.


Romans 13: 10; Matt. 22: 37 – 40 sim in. Bang hangin itna in thukham kicingsak hiam?
______________________________________________________
_______________________________________________________________________

Pasian Thukham in siangtho le a siangtho lo khentel hi. Pasian’ sianthona itna siksan hi. Pasian hotkhiatna a ngah mi in itna tawh thukkik a, Pasian a it mi in Pasian tungah citak hi. Pasian thukham a nuntakpih lo mi in Jesuh nungzui hoih hi lo hi. Itna nei lo-in a puathamin thukham a zui mi a om hangin, itna taktak a nei mi in thukham zui lo-in a om kei hi. Itna man in cihtakna nei hi. Itna in thukham hemkhia lo hi. Itna in thukham kipsak hi.

Bang hangin thukham in Pasian’ hong itna pulaak hiam? Koi bangin itna le thumanna kizom hiam?

THURSDAY     FEB 9        
SIANGTHO-NA DELH


Late 15: 1, 2; Eph. 4: 22 – 24; 2Tim. 2: 21 sim in. Siantho-na tawh kisai bang pulaak hiam?

__________________________________________________________

_____________________________________________________________________

Pasian tawh kizopna nuamsa-in Pasian in a hong zat theih nadingin siantho-na kisam masa hi. “ Gamtatna panin zongsatna in zomto a, zongsatna panin gamtat zia le tong kingah hi.” Gamtat zia le tong in tawntung sihna maw, tawntung nunna hong khen ding hi. Hih leitung pan tawntung nuntakna ah i ken theih ding khat bek om a, tua ihbhhhhhn gamtat zia le tong hi.

I neih ngei loh sianthona, gamtat zia le tong hoih in mihing’hanciamna tawh kingah zo lo hi. Gamtat zia le tong hoih kipatna tungtawnin Kha Siangtho in hong siangthosak hi. Khristian nunna ah gamtatna lungduai-na, itna, cihtakna, hehpihtheihna, hoihna, dikna a kipan ei le ei kizawhna cihte kimu thei hi.

Kha Siangtho in i lungtang hong dim ciangin Pasian aa dingin nungta lo-in i om kei ding hi. Eite a hong siangsak Pasian, upna hong picingsak Pasian ( Phil. 1: 6) ahihlam mangngilhin khat veivei ciang Pasian aa ding nasem ci-in nasep tawh a buai mahmah, Topa tawh kizopna nuam thungen man lo liangin a kitaklah om hi. Thungen man lo-in a kitaaklah tawntung thu-um mi in, thu-um mi taktak a hi dingin kitaaklah mi ahi hi.

Theihna, lawhcinnate in ei le ei hong kimuangsakin Khrih muan ding hong phawklo thei sak hi. Mihing in Kha Siangtho le Khrih lo-in bangmah a tangtun kei hi. Gamtatna, sepna in siantho-na hi lo hi. Mi kimkhat in Topa aa ding na lianpi sem uh hi napi, Topa nungzui mi hi lo uh hi. “ Tua ni ciangin mi tampi in Topa aw, nangma min tawh dawite hawlkhia-in, nangma min tawh na lianpi sem-in, nangma min tawh na lamdang ka bawl uh hi,” ci ding uh hi (Matt. 7: 22, 23). Pasian’ sapna ngahin nasem mi le Pasian aa ding na khat teitei a sem mi kibang lo hi. Pasian hong sapna i zak masak kei leh, bang bang i sem zongin tua sepnate in mihing’ tha le ngal tawh sepna hi. Tua bang sepnate in lungnopna, vangliatna, hatna tawh kop lo hi. Bang hang hiam cihleh Pasian’sapna aw za lo-in nasepna ahi hi.

Tuhunin siantho nading eite kitangsap lian pen in Pasian tawh hun manpha zangin Ama aw za-a a Kammal tungtawnin hong pai Kha Siangtho’ hatna ahi hi. Hih in i sepna khat peuh mannei suaksak ding a, sepzawhna tha hong neisak ding hi

FRIDAY       FEB 10

NGAIHSUTBEH DING: Ellen G. White, “ Like Unto Leaven,” 95–102 in Christ’s Object Lesson.

Koi bangin mawhna tawh kidim i nunna in Topa’ siantho-na phawk thei ding hiam? Topa’ siantho-na pen Amah in na khempeuh tawh a kilamdanna, mawhna, sihna a kilamdannate pulaak hi. Tua banah “ Topa in Ama siantho-na sungah a nungta dingin hong siangthosak hi. Amah tawh kizopna dingin thuciam hong bawl hi. “Israel mihonte khempeuh kiangah hih bangin gen in: “Note na siangtho ding uh hi; bang hang hiam cihleh Topa note’ Pasian keimah ka siangtho hi” (Gam. 19:    2). Hebrew sungah zong “Israel mite tawh thuciamna thak ka bawl ding hun hong tung ding hi. Ahi zongin tu-in Israel mite tawh ka bawl ding thuciamna hih bang ahi hi. Amaute sungah ka thukham ka guang ding a, amaute lungtang tungah gelhin, amaute’ Pasian ka hi ding a, amaute pen keima mi ahi ding uh hi” (Heb. 8: 8, 10). Hihte in siantho-na, thuciam le thukham in kizopna nei hi, cih hong hilh hi. Pasian’ thukham nuntakpih lo-in kuamah siangtho lo hi. Topa mahmah in thukham a nuntakpih bangin Ama nungzui khempeuh in zong thukham nuntakpih ding hi. Kha Siangtho in i lungtang tungah thukham hong gelh hi. Topa in Ama siangtho-na a hong piak manin eite hamphatna lianpi hi (Heb. 12: 10). Thukham a nuntakpih mi in tua siantho-na pulaak ahi hi.


KIKUP DING DOTNATE:


1.Tuesday ni-a dotna-ah mi khat in siatna zawh nading kamciam tawh nuntakzia ding hong dong hi leh, koi bangin na dawng diam? Bang na pulaak diam?

2.Lungtang ah Pasian’ thukham gelh cih thu koi bangin na tel hiam? Bang hangin suang tungah gelh tawh kilamdang hiam?

3.Pasian’ siantho-na na ngaihsut ciangin bang thu na phawk hiam? Pasian’ siantho-na in bang tawh kibang hi, ci-in na ngaihsun thei hiam?

4.Siantho-na in bang bulphuh hiam? Bangci bangin siangtho thei i hiam?

5.“Thukham in mawhna pan hong honthei lo hi. Hong hon ngei lo ding hi. Thukham in hotkhiatna lampi hi lo hi. Ahi zongin a kihonkhia mite zuih ding ahi hi,” cih thu in koi bangin Kha Siangtho in i sungah nasemin Khrih in a hong siansakna thu na telthei hiam?


To get the latest update of me and my works

>> <<