SABBATH NITAK:
TU KAAL SUNG SIM DING: Mark 1:8;
Eph. 5: 18; Sawl. 13: 52; 5: 32; Luke 11: 8 – 10; Gal. 5: 16 – 26.
KAMNGAH: “Gutate pen a gu ding, a
that ding, le a siasak ding bekin hong pai hi. Kei ka hih leh tuute a nungta
maimai bek hi lo-in nuntakna cingtaak a neihtheih nadingun a hong pai ka hi hi”
John 10: 10.
Kha Siangtho tawh kidim ding kisam
hi. Kha Siangtho lo-in upna, Christian nuntakna in muibun lo, a mawkna banah
vangikpi suak ding hi. Pilna, siamna, thuhilhsiam hi kha mah ding, ahi zongin
Kha Siangtho lo-in Pasian in hong geelkholhsak nunzia bangin kuamah nungta zo
lo hi. Khrih sungah lungmuanna om lo ding hi. Ama na sepna hangin nuamna i nei
kei ding hi. A min bekin Khristian hi-in, min bek in Khristian hihna taktak hi
lo hi.
Ahi zongin Jesuh in a cingtaakin a
nungta dingin hong deih hi. Mannei nuntakna, kicinna tawh kidim nunna hong pia
nuam hi. Bang hang hiam cihleh Amah mah in nuntakna nak hi; nuntakna a Bawlpa
hi; amah bek mah in nuntakna lampi hi. “ Keimah in Lampi ka hi a, Thuman, le
Nuntakna zong ka hi hi. Kei hong suang loin Pa kiangah kuamah tung thei lo ding
hi” (John 14: 6). Amah tawh kizopna om loin cingtaak nunna kuamah in nei thei
lo ding hi. Kha Siangtho bek mah in a cingtaaknunna hong nei theisak ding hi.
Kha Siangtho tawh kiphumna, Kha Siangtho tawh kidim cihte tu kaal sungin i
pulaak ding hi.
SUNDAY JAN 29
KHA SIANGTHO TAWH KIPHUM
Mark 1:8 le Matt. 3:11; Luke 3: 16;
John 1: 33; Sawl. 1:5 le Sawl. 11: 16 cihte enkak in. Kha Siangtho tawh
kiphumna le bang tonkhawm hiam?
__________________________________________________________
_____________________________________________________________________
Thuciam Thak sungah Kha Siangtho
tawh kiphumna mun sagih ah kimu thei hi. Mun li in Tuiphum John le Pentecost
tawh kizopna nei hi. Eite a hong kitatkhiat nading leitung bei a kipatna dingin
Kha Siangtho hong kipia hi.
John in Kha Siangtho tawh kiphum a
gennate ah mailam ah a piang ding hi, ci ngei lo hi. A beisa hun a kipan tu
dongin a kizom pai suak ding hi, ci-in pulaak hi (John 1: 33). Khrih in leitung
mite’ mawhna a puakhia Jesuh hi, ci’n pulaak hi ( John 1: 29). Tu ciang dong
huamkha ahihzia kimu thei hi. Jesuh in i mawhna hong maisak banah Kha Siangtho
hong pia hi. Hih thunihte (Sawl. 2: 38 ) Sawltakte in zong pulaak hi. Nungzuite
in Khrih tungah a lungsim kongkhakte uh a hon manun mawhmai-na ngahin Kha
Siangtho tawh kidim uh hi. Tua bang mahin Cornelius’ inn ah kikhawm thu-um mite
in zong mawhmai-in Kha Siangtho tawh kidim uh hi (Sawl. 10: 43, 44; 11: 16).
Tuiphumna in mawhna kisik mite aa
ding ahi hi (Sawl. 19: 4). I mawhna kisikin Jesuh min tawh tuiphumna nei-in Kha
Siangtho tawh a kidim thu-um mi i hi hi ( Sawl. 2: 28 – 39).
Thuciam Thak ah tuiphumna le Kha
Siangtho ngahna tonkhawm hi. Suahthakna nei cihna hi. Tuiphumna in Khrih tawh
pumkhat hihna a pulaak hi-in, Jesuh in Kha Siangtho hong guanin Kha Siangtho
vangliatna tawh a hong tatkhiatna thu a tangko i hi hi.Kha Siangtho tawh
tuiphumna in Kha Siangtho letsongte bangin hehpihna ngah khitteh a hong
kinungpiak hi lo hi.
Pentecost Ni a mite tung bek ah Kha
Siangtho kipia hi lo-in thu-um mi khempeuh tungah Kha Siangtho hong kipia hi.
Kha Siangtho sungah thu-um mi khempeuh in pumkhat suakin a nungta i hi hi. Paul
in thu-um mite pumkhat hihna tam veipi pulaak hi. Kha Siangtho tawh kiphumna
tungtawnin thu-um mite in Khrih pumpi tawh pumkhat suak uh hi.
Kha Siangtho tawh kiphumna hangin
na nuntakzia in koi bang hiam? Koi bangin na nunna ah Kha Siangtho in mannei
hiam? Kha Siangtho tawh nungta khawm lo nunzia in koi bangin nungta hiam?
MONDAY JAN
30
KHA SIANGTHO TAWH KIDIM NUNNA
Eph. 5: 18; Sawl. 13: 52; Romans
8:9 sim in. Kha Siangtho tawh kidim nunna i cih in koi bang hiam? Koi bangin
Kha Siangtho tawh kidim nunna nei thei ding i hiam?
_____________________________________________________________________
_____________________________________________________________________
Tuikiphumin Khrih tawh a kipawl mi
in Kha Siangtho vangliatna sungah a nungta mi i hi hi. Tua bangin i nuntak
nadingin Kha Siangtho tawh kidim kul hi. Lai Siangtho in tua bang mite’ nunzia
hong hilh hi (Luke 1: 41, 67; Sawl. 2:4; 4: 8, 31; 9: 17; 13:9). Paul in a
genna ah Kha Siangtho tawh kidim cih pen Pasian tungah a nunna khempeuh tawh
ki-ap, Kha Siangtho kimakaihsak ahih manin a nunna in Pasian’ deihna kicingsak
hi.
Khamtheih zu tuamtuamte in hong uk
leh gamtatna, ngaihsutnate siatna tawh kidim ding hi. Kha Siangtho tawh kidim
hi lehang i gamtatna, i ngaihsutna khempeuh in Jesuh Khrih kilangsak ding hi.
Upna thuzakna tungtawnin Kha Siangtho hong kipia-a (Gal. 3: 2) upna tawh tuikiphum
ciangin tua Kha Siangtho hong kipia hi (Gal. 3: 14; Titus 3: 5, 6). Nisimin Kha
Siangtho tawh kidim ding i nget kul hi. A beisa kum, kha a kipan zanni-a
vangliatna a tawntung aa dingin kicing lo hi. Nisim in ze-etna i tuak hi. Tua
hi-in nisimin Kha Siangtho tawh kidim ding kisam hi. Sawl. 13:52 sungah ‘kidim’
cih Greek kammal hi. Khat vei bek hi lo, a tawntunga kidim ding pulaak hi.
Nisim a kidim tawntung ding cihna hi. “Kidim tawntung” cih thu in i nuntakna in
Kha Siangtho tawh kidim nuntakna leh Ama deih bangin nuntakzia pulaak hi.
Kha Siangtho tawh kidim cih thu in
mihing in Topa a nei zaw lo-in Amah in mihingte hong nei hi zaw hi. Nisimin i
nunna khempeuh Kha Siangtho tungah i ki-ap tak ciangin Pasian in a minthan
nadingin hong zang hi.
“Upna tawh Jesuh sungah a nungta mi
in Kha Siangtho tawh kidim lo-in a om kei hi. Mimal khat ciat in Jesuh Khrih
ama Honpa-in a sang mi in Kha Siangtho pen hong Makaihpa, hong Siangsakpa,
Lamlakpa le Teci ci-in pulaak hi.” Ellen G. White, Manuscript Releases, Vol. 14.,
71.
TUESDAY JAN
31
A KISAM NUNZIA: KHEN MASA
Kha Siangtho tawh kidim nadingin a
kisam thute tuni, zing le thai –ah i encian ding hi.
Sawl. 2: 37, 38 sim in. Kha
Siangtho ngah nadingin a masa penpenin bang kisam hiam?
____________________________________________________________
____________________________________________________________________
Kha Siangtho tawh kidim nadingin a
kisam masa pen in mawhkisikna hi. Pasian kammal zakna in sia le pha hong
khentelsak thei banah mawhna le i dinmun hong musak hi. Kisikna man taktak in
mawhna hanga gimnate lau-na bek hi lo, ngaihsutna kikhelin mawhna mahmah a
siatzia, Pasian langpan ahihlam kithei hi. Pasian’ hong itna bek in mawhna hong
kisiksak hi. “Pasian migi-in thu a diah hithiatna pen na kisikkik theih nading
uh a deihna ahihlam phawkkha lo-in, a migitna, a lungduaina, a hong thuaknate
neu ngaihsutkha na hi uh hiam? (Rom 2: 4).
Gal. 3: 14; James 1: 6-8 sim in.
Bang hangin Pasian kammal muanna lo-in Kha Siangtho kingah lo hiam? ____________________________________________________________
_____________________________________________________________________
Jesuh in Ama tangin Kha Siangtho
hong sawl hi. Upna tawh Topa’ hong kamciamte i ngah hi. Ahi zongin Pasian
kamciamte le Ama kammal muanlahna a om leh lungsim nih nei mite hi ding hang a,
tua bang tawh Pasian tung pan ngah ding bang mah lamet om lo hi. Upna in
lungsim tawh theihna sangin zai zaw hi. Upna in i nunna khempeuh Pasian tungah
hong ki-ap sak a, bang bang piang taleh Ama kammal a muang khempeuh tungah Topa
in a kamciam pelh lo cih lungmuanna hong neisak hi.
Luke 11: 8 – 10, 13 sim in. Bang
hangin mite aa ding thungetsakna in nate kilamdangsak hiam?
____________________________________________________________
_____________________________________________________________________
Pasian in Kha Siangtho a hong piak
ding itsik lo hi. Nu le pa in tate tungah thudikin, a migit uh sangin Pasian in
a mite tungah Ama hoihna le migiitna lianzaw hi. Lungkia lo-in i thunget in
Pasian lungsim a khel ding hi lo hi. Thunget in ei mah hong khel dingin Pasian
tawh hong kinaisak zaw hi. Thungetna in eite kiangah Pasian hong pai nading hi
loin, thungetna in Pasian kiang eite hong tunpih hi zaw hi. Thungetna i
khensatna a pulaak hi zaw-a, Pasian thupha letsongte ngah dingin hong puahpha
hi.
Koici bangin thungetna ah citak,
ki-ap zaw thei ding i hiam? Bang hangin hih thute thupi hiam?
WEDNESDAY FEB
1
A KISAM NUNZIA: KHEN NIHNA
Sawl. 5: 32 sim in. Bang hangin
Pasian kammal in Kha Siangtho ngah nadingin kisam hiam?
__________________________________________________________
___________________________________________________________________
Sawltakte hun lai mah bangin tu
hunin zong Pasian thu a mang mite tungah Kha Siangtho kipia hi. Itna le
thumanna tonkhawm hi. Upna man in thumanna tungtawnin kilang hi. I lungsim
khempeuh tawh Pasian i muan ciangin Ama thupiak khempeuh i mang nuam ding hi.
Jesuh in “ Kei nong it uhle ka thupiakte na zui ding uh hi,” ci-in hong hilh hi
(John 14:23). Pasian deihna a pulaak Ama
thukhamte man ding le man loh ding mihing’ khensatna tungah kinga hi. Jesuh
Khrih Topa-in i san leh Ama thu a mang tawntung ding i hi hi (Luke 6: 46). “ Mi
khatpeuh in “ Pasian ka thei hi,” ci napi-in a thupiaknate a zuih kei leh tua
mi a zuaugen mi hi a, a thutak lo mi ahi hi. Ahi zongin ama thu a zui mite pen
Pasian a itna a kicingtaak taktak mi ahi hi. Hih bangin i gamtat leh Pasian
tawh a kipawl taktak ihihna i thei hi.” (1John 2: 4, 5) John in a gen mah
bangin “ Pasian’ thupiakna a zui mi khempeuh, Pasian tawh om uh a, Pasian in
zong amaute a ompih hi. Pasian in eite tungah a hong piak Kha Siangtho hangin
Pasian in eite a hong ompihna thu i thei hi” ( 1John 3: 24). Pasian in a hong
sawl bangin i nuntak ciangin lungnopna i ngah hi.
Jude 18 – 21 sim in. Bang hangin
Kha Siangtho tawh kidim nadingin a sianglo na khempeuh pelh ding kisam hiam?
__________________________________________________________
_______________________________________________________________
Leitung lungsim tawh kidim mi
nuntakna ah Kha Siangtho in nasem thei lo hi. Kha Siangtho in mawhna, leitung
cilesa gamtatna khempeuh langpan hi.Tua ahih manin Pasian itna sungah om
tawntung ding kisam hi. Thungetna tungtawnin Pasian tawh kizopna kisam hi. Tua
hi leh a sianglo na khempeuh i kipelh thei ding a, vangliatna, itna, cilesa
deihna khempeuh i nial zo ding hi (2Tim. 1: 6, 7). Mawhnopna lungsim a sih kei
leh nuntakna siangtho thei lo hi; mihing tha le ngal in nuntak siangsak zo lo
hi. Kha Siangtho teel zaw ding na hiam? ahih kei leh ci le sa lungsim teel zaw
ding na hiam? Na tel ding kisam hi.
“Ci le sa lungsim deihna nialin
Pasian tungah a ki-ap mite tungah Kha Siangtho makaihna in ciangtan nei lo hi.”
Ellen G. White, The Desire of Ages, 250, 251.
THURSDAY FEB
2
NANG LE KHRIH, KUA KIMAKAIHSAK
Gal. 5: 16 – 26 le Eph. 5: 1-9, 17
– 20 enkak in. Koi bangin ci le sa tawh kidim nuntakna le Kha Siangtho tawh
kidim nuntakna kilamdang hiam?
__________________________________________________________
__________________________________________________________________
Kha Siangtho a kimakaihsak mi in
Pasian’ thupiakte zui-in, midangte hehpihin it hi (2Kor. 5: 14). Ngaihsutna
thaksuakin gamtat zia le tong zong kikhel hamtang hi. Leitung nate sangin
vantung thute manpha sa zaw-in lunggulh zaw hi. Mihing tha siksan nawn lo-in
Kha Siangtho makaih dingin a ki-ap mi hong hi sak hi (Gal. 3: 3).
Mihing in ama tha bek tawh a nunzia
khel zo lo hi. A khel zo ding vanglatna mihing in nei lo hi. Mawhna in i
sungtawng ah hong belhcip khin hi. Nunzia kikhelsak ding vangliatna Pasian
kiang pan bekin hong pai hi. Kha Siangtho bek in nunzia le lungsim hong khel
hi. Gamtatsiatna khat nusiatna in Khristian hong hisak lo hi. Kha Siangtho in
lungsim hong khel kul hi.
Lungsim kikhel, nunzia kikhel in
khawl hun om lo hi. Topa tungah a ki-ap mi in ze-etna, hamsatna a tuak zongin
Topa’ kamciam bangin tangtung takpi ding hi. “ Note sungah hih nasep hoih a
hong pankhia Pasian in Jesuh Khrih hong paikik hun ciang dong, mi cingtaak na
hih nadingun hong huh ding hi, ci-in teltakin ka thei hi” (Phil. 1:6).
Na nunna ah huai-ham angsung zonna
le Kha Siangtho nasepna koi bangin kilangkhia hiam? Koi bangin na nunzia in
nangma deihtelna pulaak hiam?
FRIDAY FEB 3
NGAIHSUTBEH DING: Mihing in amah le
amah a nunzia a ki-uk ding pen mihing ngei-na hi. I hanciamna ciangciang
lawhcinna kingah kha thei mah hi. Mihing in a lunghimawhna tuamtuamte zawh sawm
tawntung hi. Tua patauhna in ukcip hi. Ahi zongin Topa Pasian, Piangsak Pa,
Honpa in tua bang patauhna, lunghimawhnate Amah i ap ding hong deih hi. Ama
hong it bangin hong it kuamah om lo hi. Ama hong itna in na sungah na a hong
sep nadingin lampi hong honsak hi. Kha Siangtho na kimakaih sak leh lungnopna
na ngah ding a, mite aa dingin thupha na hi ding hi. Tua bang nunzia lunggulh
masak ding kisam hi. Pasian in thatang zangin ki-ap dingin hong sawl lo hi.
Gamtat hoih a nei ding i hih manin
deihtel theihna, khentel siamna zong i nei hi. Khrih sungah i suahtak nadingin
ci le sa nunzia khempeuh nusia-in Kha Siangtho vangliatna hong ompih kul hi.
Suahtakna manin Kha Siangtho ki-uksak hi. Ci le sa gamtatna pan suaktakna in
mawhna vangliatna, mawhna sila pan suahtakna hi. Topa tungah a ki-ap mi sungah
Kha Siangtho teng hi. Mawhsakna om nawn lo, ci le sa deihna zui nawn lo banah
Kha Siangtho’deihna bangin nungta ding hi (Rom. 8: 1) Hih in mawh neite in a
ngah theih suahtakna ahi hi.
KIKUP DING DOTNATE:
1. Mi kimkhat in suahtakna cih ciangin ut
bangbang sepna hi, ci uh hi. Hih in Lai Siangtho’ gen suahtakna tawh bang
kilamdang hiam? Suahtakna man in koi bang hiam? Late 119: 45; Luke 4: 18; John
8: 34 – 36; 2Kor. 3: 17; Gal. 5: 1.
2. Bang hangin ei deihna nialin Pasian tungah
a ki-ap nunna tawntungin Kha Siangtho in a lamdangin nasem hiam? Mite aa ding
thupha na hih theihna dingin nangma deihna nialin Kha Siangtho in na a hong sep
theihna dingin Pasian in na nunna ah bang sem hiam?
3. Khristian nunzia in a lui puahphatna,
lemtawm hi lo hi. Nunzia kikhel kul hi. Mawhna le ci le sa deihna si hi. Tua in
Kha Siangtho’ nasepna hang ahi hi. Ellen G. White, The Desire of Ages, 172. Hih
thu in bang pulaak hiam?
4. Ci le sa nunzia le Kha Siangtho bulphuh
nunzia kilamdanna pulaak in. Kha Siangtho tawh kidim nunna panin bang gah hoih
kimu hiam?
