MUC

Print Friendly and PDF

Tuesday, December 20, 2016

LESSON 12 MARCH 18 – 24 KHA SIANGTHO’ NASEP



SABBATH NITAK: 

TU KAAL SUNG SIM DING: John 16: 8 – 11; Rom. 5:10; Heb. 4: 15, 16; 1Pet. 5:8, 9; 1John 5: 12, 13; Late 31: 24.

KAMNGAH: Kha Siangtho’ huhna tawh note’ lametna a khan semsem theih nadingin, lametna a hong pia thei Pasian in, amah na upna uh hangin lungdamna le nopsakna tawh note hong kidimsak tahen.” Romans 15: 13.

Jesuh in Pa Pasian kiang ciah ding thu a nungzuite hilh hi. Amah a pai khiat khit ciangin Kha Siangtho hong pai ding hi, ci-in kamciam hi. “Ahi zongin keima tangin a hong sawl ding Huhpa Kha Siangtho a hong tun ciangin note tungah thu khempeuh hong hilh ding a, note tungah ka hong gensa thu khempeuh zong hong phawksakkik ding hi” ci-in genkhol hi (John 14: 26).

Jesuh in Kha Siangtho pen “paracletos” ci-in pulaak a, “Huhpa,” “ Hehneppa” eite a adingin “ Palai” ci-in hong hilh hi. Tua banah Kha Siangtho in mawhna thu, thuman thu le thukhenna thu hong laktel ding hi, ci-in hong hilh hi (John 16:8).


Tu kaal sung thusin ding thu in: Kha Siangtho’ nasep thunihte – hotkhiatna ah lungmuanna le vangliatna tawh kidim lametna in Khrih nungzui hong suaksak hi, cih thu ahi hi.

SUNDAY MARCH 19
I MAWHNA KIPHAWK

John 16: 8, 9 sim in. Kha Siangtho in i nunna ah bang sem hiam? Bang hangin tua nasep in thupi hiam? ___________________________________________________________

__________________________________________________________________

Jesuh in Kha Siangtho a pulaakna ah ‘paraclete’ cih kammal zang hi. A khiatna in ‘huhpa’ ‘hehneppa’ ‘palaai’ cihna hi. Kha Siangtho in mawhna hong theisak hi. Ahi zongin hong mawhsak, thu hong khen lo hi. Mawhsak dingin Jesuh in Kha Siangtho a sawl hi lo hi. Ahi zongin hehpihna kitangsaplam hong theisak dingin hong sawl hi. Hong hehnempa in hong huhpa hi. Thu-um Khristian tampi in mi huh ding sangin mite mawhna pulaak nuam kisa zaw hi. Jesuh in mite mawhna a pulaak dingin ei hong sawl lo hi. Ei mahmah zong mawhna tawh kidim i hih manin mite mawhna pulaak ding hi lo hi.

Romans 2: 1; Matt. 7: 3 sim in. Bang hong hilh uh hiam?

___________________________________________________________

_________________________________________________________________

Eite in Ama teci i hi hi. Mawh zong, mawh kawk dingin a hong sap i hi kei hi. A vanglian hotkhiatna teci dingin a hong sap i hi hi. Mi khat ii mawhna pulaakin, a kisik sak ding i hi kei hi. Hih in Kha Siangtho’ nasep hi. Hehnempa in bang in mawhna hi, cih hong theisak hi (John 16: 8). Jesuh tungah a ki-ap lo mi in mawhna, mawhna a siatzia theithei lo hi.

Kha Siangtho in mawhna kici khempeuh hong pholaak ding hi, cihna hi lo hi. Khrih uplohna in mawhna khempeuh kipatna hi. Kha Siangtho in Khrih hong umsak hi (John 16:9). Pasian tawh kigamlatna, Ama kiang panin taikhiatna, a hong hotkhiatna nialna cihte in gamtat zia le tong hoihlohna, ginatlohna cihte sangin siahuai zaw hi.

Siatna khempeuh bulpi in mawhna le maizumna pan hong honkhia Jesuh uplohna hi. Jesuh uplohna in ei le ei kiliatsakna hi-in, Pasian’ kammal um lo dinmun hong tun ding hi. Kha Siangtho bek in mihing lungsim kongkhak hong thei hi. Tua in kisikna lampi hi. Eite tangin a hong si Jesuh bek in hong hon hi.

MONDAY MARCH 20
EIT KISAP DIKNA

Kha Siangtho in mawhna thu hong lak banah dikna thu zong hong hilh hi (John 16:8). Mawhna a thei lo mi in dikna thu zong thei lo ding hi. Nihvei a suak lo mi in a kimu thei gamtatna tawh lungkim hi. Tua bang mi in Pasian’dikna sangin ama dikna thupi sa zaw hi. Amau gamtatna, thukham zuihna tawh dikna ngah dingin kilamen uh hi. Ahi zongin gamtatna, thukham zuihna in Pasian mai-ah hong diksak thei lo hi.

Mihing gamtat hoihna, dikna khempeuh puansia tawh kibang hi (Isa. 64:  6). Mihing hoihna, dikna khempeuh in siatna tawh kidim hi. Ahi zongin Jesuh’ dikna in eite aa dingin kicing hi. Khrih’ dikna in thukham hong kalh khempeuh kicingsak hi. Jesuh’ dikna bek mah Pasian in santhamcingsa hi. Khrih sungah upna tawh tua dikna i ngah hi.

Romans 5: 10; Heb. 4: 15, 16 sim in. Koi bangin eite’ dikna in vantung Pa Pasian mai-ah Khrih’ tatkhiat nasep tawh kizom hiam?

__________________________________________________________

________________________________________________________________________

Jesuh in ama nunzia tawh Thukham’ kalh dikna kicingsak hi. Amah eite tangin hong si hi. Amah a thatte in a nial uh hangin vantung Pa Pasian in Amah na sang hi. Pa Pasian in Jesuh’ nunzia le a sepna Khrih a thawhkiksakna tawh pulaak hi. Tu-in Jesuh in eite’ palaai sem dingin nungta hi (Heb. 4: 15, 16). A hong kihotkhiatna dingin a kisam dikna eite in nei lo i hih manin eite tangin a hong sihna siksanin Ama dikna hong pia hi. Tua hi-in eite in nuntak tawntung ngah i hi hi. Tua hi-in eite i nungta ding hi. Bang hang hiam cihleh i sungah Amah hong nungta hi. “Tuhuna ka nuntakna zia pen kei hang hi nawn loin ka sungah a hong om Khrih hang ahi hi. Tua hi a, keimah hong itin, keima a’dingin a nuntakna a hong pia Pasian’ Tapa ka muanna tawh tu laitakin a nungta ka hi hi” (Gal. 2: 20). I sungah Khrih hong om ciangin Kha Siangtho tawh a nungta i hi hi (Rom. 8:

4); Kha Siangtho vangliatna tawh nunna thak tawh a nungta i hi hi (Gal. 3: 2 -5; 5: 16, 18 tawh enkak in) Pa Pasian tawh mangkhawm dingin Jesuh a lato Kha Siangtho’ vangliatna in eite tawh hong omkhawm hi. Nungzuite in Kha Siangtho vangliatna tawh kidim uh a, Khrih nun bangin nungta uh hi.

Gamtatna tawh dikna ngah ding na hanciam ciangin siatna tawh nungta na hihlam na kiphawk kha ngei hiam? Khrih’ dikna na kitangsapzia hong phawksak hiam?

TUESDAY MARCH 21   
MAWH THUKHEN OM HI CIH UPNA

John 16: 8, 11 sim in. Jesuh in bang thukhen pulaak hiam? Bang hangin hih thukhen in lungdamna hi thei hiam?
 __________________________________________________________

________________________________________________________________

Kha Siangtho in mawhna thukhenna thu hong theisak hi. Mi tampi in thukhenna tawh kisai telkhial uh hi. Hih thuman panin mi tampi in lampial uh hi. Mawhna le dikna thu kikupnate ah Khrih thu-um mi tampi in lau-na tawh mawhna kisik ding bulphuh uh hi. Lau-na tawh thu upna in Pasian deihna tawh kituak lo hi. Kihtakhuai thukhenna in hong ngak gige den hi, cih thu in mite patau-sak den hi. Ahi zongin Jesuh in thukhenna thu a gen ciangin tua bang hi lo hi (John 16: 11). A hong pai ding a lauhuai thukhenna a gen hi lo-in, Calvary tungah Satan in thukhen thuak khin ahih manin lungdamhuai thu a pulaak hi zaw hi. Tu-in Satan in tua thukhenna ngak hi. Thukhenna om ding hi. Tu-in ahih leh Satan in tua thukhenna nuai-ah nungta hi (John 12: 31).


1Pet. 5: 8, 9 sim in. Koi bangin Peter in Satan pulaak hiam? Koi bangin Satan nial ding i hiam?

__________________________________________________________

____________________________________________________________________

Satan in hun tawmno a neihlam phawk hi. Tu-in a nuntak lai hangin Satan in Calvary ah a guallelh thei hi.Tua hangin heh mahmah hi. Mi a ngah zawh zahzah ngah dingin nasem hi. Ahi zongin Satan in guallel khin hi. Jesuh in gualzo khin hi. Jesuh’ sisan in mawhna sung pan hong suakta sak hi.

Leitung Galpi Nih lai-in Nazi galkapte in France zogawp uh a, June 6, 1944 kumin Hitler in gal lel hi.D-Day le VE-Day kikal kha 11 sung nasia takpi kido-na hangin mi tampi in sihlawh hi. May 8, 1945 ciangin Europe ah gal bei hi. Gal zawh nadingin nuntakna tampi bei hi. Satan in a guallelhlam phawk hi. Ahi zongin tu dongin Pasian mite do teitei, a hihtheih zah sit lo-in thu-um mite susia hi. Pilvang, kigingsa-in om ding kisam hi. Lunghimawhna khempeuh Jesuh ap in. Aman hong lunghimawh tawntung hi (1Pet. 5: 7, 8)

Bang hangin thukhenna in lungdamna thu hi thei hiam? Thukhenna ah kua in hong lungmuangsak hiam? Koi bangin thukhenna in lauhuai thu hi lo-in lungdamna thu hi, ci-in pulaak ding na hiam?

WEDNESDAY MARCH 22  
HOTKHIATNA HANGIN LUNGMUANNA

1John 5: 12, 13; Rom. 8: 15- 17; 2Kor. 5:5 sim in. Honpa-in Khrih i sang a kipan bang hangin nuntak tawntungna sungah khamuanna nei thei i hiam? Bang siksan i hiam?

____________________________________________________________

______________________________________________________________

Kha Siangtho in Jesuh kiang eite hong tunpih hi. Ei tangin hong si hi. Tua hangin Pasian tawh kizop thei i hi hi. Jesuh hong piak mawhmaina in Pasian’ tate dingin nunna thak hong neisak hi. Tu-in mawhnei eite in Pasian’ galte i hi nawn kei hi (Rom. 5: 10). Bang hang hiam cihleh eite in Kha Siangtho tawh i nungta hi (Rom. 8: 4). Kha Siangtho tawh kipawl thute i ngaihsun hi( Rom. 8: 5). Kha Siangtho lo-in Pasian’ta i suak thei kei hi; Ama tawh i kipawl thei kei ding hi ( Rom. 8:9). Ahi zongin tu-in Pasian’tate i hihlam i sunga hong teng Kha Siangtho in teci hi. Kha Siangtho in Jesuh tawh a kipawl mi i hihlam, Pa Pasian le Jesuh Khrih gamh luah dingte i hihlam zong pulaak hi (Rom. 8: 17).

Sihna pan Jesuh a thosak vangliatna i sungah hong om hi. Mawhna ah hong si sakin, upna thu ah hong hing kiksak hi (Rom. 8: 10). Tua banah i lungtang hong ciampteh hi; Pasian’ ta i hihlam hong lungmuangsak hi. Kha Siangtho in Pasian tawh kipawl ihihna hong ciamteh hi. Kha Siangtho in hong ciamteh hi. I ngah ding gamh hong ciam khin hi (Eph. 1: 13, 14).Thu-um mi khempeuh in tua gamh luah ding hi (John 5: 12, 13).

Eph. 1: 13, 14 sim in. Kha Siangtho in ciamteh cih in bang hi ding hiam? __________________________________________________________ ________________________________________________________________


Khrih a sang mi in khat vei a suakkik mi, Kha Siangtho’ suahsak mi ahi hi (John 3: 3, 5). Hotkhiatna ngah kitelcianna nei-in, Pasian tapa ahih manin a lungdam mi in Kha Siangtho ciamtehna ngah ahi hi. Kha Siangtho in Khrih tawh i kipawllam hong theisak hi. “Kha Siangtho a nei lo mi Khrih tawh kipawl lo mi ahi hi” ( Rom. 8: 9). Pasian in eite Pa hi; eite in Ama tate i hi hi. Jesuh a hong pai ciangin a nungta tawntung dingin nunna hong pia ding hi, ci-in Kha Siangtho in hong ciamkhin hi (1Kor. 15: 51 – 54). Hih in upna thuman hi. Hih thu hangin lungmuanna na nei lo mi in Khrih teci hoih hi thei lo hi.

“Hang san in. Upna, lametna pulaak in. Na hihna khempeuh ah khuavak tangsak in. Topa in na mai-ah kuamah in a khaktan zawh loh ding lampi hong honsak hi, cih phawk in. Topa muangin na ki-ap leh Topa in siatna hong dalsak ding hi. Tuihual bangin siatna in hong neh ciangin Kha Siangtho in nangma lamah om in na do zo ding hi.” Ellen G. White, The Advent Review and Sabbath Herald, April 16, 1889.


THURSDAY MARCH 23
KHA SIANGTHO LE LAMETNA

Romans 5: 4, 5; 15: 13; 1Kor. 13: 13 sim in. Koi bangin itna le lametna in kizopna nei hiam? Koi bangin Kha Siangtho in itna le lametna hong neisak hiam?

__________________________________________________________

_________________________________________________________________

Kha Siangtho in i sungah Pasian’ hong itna hong guan hi. Kha Siangtho in Pasian tawh hong kizopna hong bawlsak hi. Pasian’ itna hong neisak hi. A kikhel ngei lo Pasian’ hong itna le a kip tawntung a hong itna in i lametna bulpi hi. Itna om kei leh lametna zong om lo hi. Itna bek in lametna hong neisak hi. Bang hang hiam cihleh Pasian’ hong itna le a cihtakna, a thumanna in a tonkhawm hi-a, Ama omna mun ah a om dingin Jesuh in eite hong la dingin hong pai kik ding hi, ci-in lametna i nei hi.

Late 31: 24 sim in. Lametna in bang hong huzaap hiam?

___________________________________________________________

_____________________________________________________________________

Lametna in hong lawpsak hi; Lametna hatsak hi. Lametna in hong lungdamsak, la hong sa-sak hi. Lametna in nuntakna ah kisam mahmah hi. Lametna nei kei lehang nuntakna in bang ngimna nei ding hiam?

Lametna le na khempeuh a hoihin muhtheihna kibang lo hi. Thu hoih a ngaihsun mi in na khempeuh - khua hun, sum zonna, sangkahna, cihte hong hoih ding hi, ci-in ngaihsun hi. Lametna na khempeuh a hoihin hong piang ding hi, ci-in upmawh mawk hi lo hi. Lametn in Pasian’ thumanna, Ama kamciamte siksanin lametna a hi hi. Lametna in Pasian in a gen bangin tangtungsak ding hi, ci-in um hi. Bang hang hiam cihleh Amah in thuman hi, thutak hi. Pasian in muantak cing ahihzia pulaak khin hi. Pasian in cikmah in lunghianna nei lo hi.

Jesuh a hong sihna in eite lametna bulpi ahi hi. Singlamteh in Pasian’ hong itna thutak hi, ci-in hong lak hi. I mawhna hangin Jesuh in singlamteh tungah sihna a hong thuakna thu in na khempeuh in Pasian in kua hi, cih theih nading a hong lakkhia hi. Pasian mai-ah gentham mihing in Pasian sungah lametna a nei thei i suak hi.

Koi bangin Khrih hong pai kik ding hi, ci-in i lametna in kamciam pelh lo Pasian’ thuman tungah kinga hiam? Koi bangin na nunzia in lungkiatna sangin lametna pulaak hiam?

FRIDAY MARCH 24
NGAIHSUTBEH DING: Ellen G. White, Ye Shall Receive Power.

Kha Siangtho’ nasep a tomin gen lehang Kha Siangtho in mihingte a hong kitatkhiatna dingin Pa, Tapa tawh nasem khawm hi. Kha Siangtho in hong khanglo sak hi. I mawhna hong musak hi; a mangthang i hihlam hong phawksak hi; kikhel ding hong lunggulhsak hi; Khrih kiang hong paipih hi. Hotkhiatna sungah hong lungmuangsak hi. Bang hang hiam cihleh a tawntungin Khrih tawh hong omkhawmsakin, a hong tatkhiatna dingin Jesuh sep khempeuh hong phawksak hi. Jesuh nunzia hong neisak hi. Pasian tungah hong citaksak hi. Pasian’ deih bangin hong nungta sak hi. Pasian nasepna sungah hong kihelsak hi. Pasian’ kammal hong phawksakin lauhuaina pan hong dal hi. Nunzia, upna Lai Siangtho tawh sittel ding kisam hi. Kha Siangtho in hong makaih lo hi leh, koi dinmun ah na om diam? Kha Siangtho kihel lo-in nasep theih a om diam? Kha Siangtho lo-in i nunzia in hehpihhuai, mangthang ding hi; Pasian min daisak i hi ding hi. Kha Siangtho hong paisak Jesuh tungah a lungdam tawntung dingte i hi hi. “Pasian a mite tungah a hong piak a manpha vantung pan a piak letsong khempeuh lak pan Kha Siangtho sangin a manpha zaw letsong om lo hi.”

KIKUP DING DOTNATE:

1.    Mawhna, dikna i cih in bang hiam? Lai Siangtho in Pasian’ kammal hi, ci-in a um Khristiante in bang hangin mawhna le dikna muhzia kibang lo hiam? Mawhna le dikna bang kilamdang hiam? Koi bangin Lai Siangtho in mawhna le dikna hong hilh hiam?

2.    Kha Siangtho manpha nasakna thu na lawmte theisak in. Bang hangin tua thu in thupi hiam? Koi bangin na nunzia hong khel hiam?
3.    Jesuh sungah na neih lametna kikum un. Bang siksanin lamet nei i hiam? Mi khat in na lametna hong dong hi leh, bang na pulaak diam? (1Pet. 3: 15). Bang hang? Koi bangin na lamet pulaak thei ding na hiam?
4.    Tu kaal sung thusin in hotkhiatna thu ah lungmuanna tawh kisai i sin hi. Hotkhiatna sungah khamuanna i cih in bang hiam? I lungmuan leh bang hangin lungmuan thei i hiam? Bang siksan in khamuang thei i hiam? Upmawh thu le khamuanna thu bang kilamdang hiam?



To get the latest update of me and my works

>> <<