SABBATH NITAK:
TU KAAL SUNG SIM DING: John 15:7;
Matt. 7:7; Late 66: 18; James 1: 6 -8; 1John
5: 14, 15; Sawl. 2: 38.
KAMNGAH:“Tua ahih manin eite
bangzahin ginalo hitalehang eite a hong huh dingin Kha Siangtho a hong pai hi.
Eite in a kilawm bangin thunget ding nangawn i thei kei a, ahi zongin Kha
Siangtho mah in tau-na tawh eite a’ dingin a hong thumsak hi.
Kha Siangtho in Pasian’ deihna tawh
kizui-in Pasian’ mite a’dingin hong thumsak ahih manin mihingte’lungsimtawng
thu a thei Pasian in Kha Siangtho’ ngaihsutna a thei hi” Romans 8: 26, 27.
Thungetna le thuzuihna tawnkhawm
hi. Thungen lo-in thuzuihna om lo hi. I kitangsap pen in mawh kisikna le
thungetna ahi hi. Kha Siangtho’ huhna lo-in thungetna in a mawkna hi. Thungetna
in Pasian tawh hong kinaisak hi. Thungetna in Pasian kiang hong tunpih hi. Upna
tawh kinget in Pasian’ kamciam hong ngahsak hi. A hong kamciam mah bangin Pasian
in a thupha hong pia hi, ci-in i pulaak ciangin i nunzia zong hong khel hi.
Pasian in eite kitangsapna khempeuh sangin vanglian zaw hi (Phil. 4: 19).
Thungetna diktak le thuzuihna mantaktak in Pasian mitsuan hi. Thungetna le
thuzuihna in Lai Siangtho siksan hi.
Mihing in hoih a sak thute siksanin
thuzuihna in hoih lo hi. Lai Siangtho sim lo - kisamsa lo-in thungetna bek in
lauhuai hi. Lai Siangtho’ gen bangin thuzuihna in siatna tawh hong kipelhsak
ding hi. Kha Siangtho in thuman thutak hong theitelsak hi. Kha Siangtho in
Pasian’ makai ding hong lunggulhsak ding hi.
SUNDAY MARCH 5
PASIAN A
LUNGKIMSAK THUNGETNA
Thunget
hahkat mahmah napi ngimna hoih lo thunget om kha ding hi. Khat ii cidam nading
thungetsak hi hang. Ei kia bek nuntak ding ut loh manin i ompih ding mi khat aa
ding thu kingetsak thei hi.Pasian nasepna ah i lawhcin nading thu kingen hi.
Bang hang hiam cihleh eima nasepna khat hi.Mi khat a hong kikhel nading thu
kingetsak thei hi. Hong kikhel leh buaina tuak nawn lo ding cih ngimna kinei
thei hi. I thunget a tam zaw in Pasian deihna sangin mihing’ deihna tam zaw hi.
Pasian a lungkimsak thunget in mimal’ deihna sangin Pasian deihna masak hi.
John 15:
7 sim in. Bang hangin Jesuh, Ama kammalte tawh nungta-in thunget in thupi hiam?
Jesuh sungah a nungta lo mi khat ii
thunget in bang
mitsuan hiam?
__________________________________________________________
__________________________________________________________
Pasian
in na dangdangte sangin Amah zong masa zaw-in Amah tawh kikholh nopsakna hong
pia nuam ding hi. I nuntakna ah Pasian masak lehang Ama deih bang i deih ding
a, Ama lungsim in i deihna hong zuun ding hi. Thunget ciangin Pasian bek mah
mitsuan lehang Ama deihna tawh kituakin thu i ngen ding hi. Ama muh bangin i mu
thei ding hi. Hih thungetna a manpha thungetna ahi hi.
Pasian
in i nunzia hong en tawntung hi. I dah zongi nuam zongin a tawntungin Pasian in
hong hopih hi. I nuamna, lametna, lawhcinna, lawhsapna, na khempeuh ah eite
hong ompih hi. Topa tawh lawmta bangin
i kiho, kikhawl thei hi. Thunget in Pasian kikhelsak
lo hi. Thungetna in ei hong khel zaw hi. Thungetna in nuntak hong khel thei
Pasian kiang tunpih hi. “Thunget in Pasian tawh lawmta bangin kiho-na a hi hi.
Pasian in thei lo ding ahihteh ci-in a va pulaak hi lo-in i nuntakna ah Amah a
hong om nading Amah a va naih i hi zaw hi. Thungetna in eite kiangah Pasian
hong pai nading hi lo-in, thungetna in Pasian kiang eite hong tunpih zaw hi.”
Ellen G. White, Steps To Christ, 93.
Thungetna
in ei aa ding le ei tungah a piang thute hong hilh hi. Thungetna bek mah in
Pasian’ hehpihna, a vangliatna le Amah tawh a hong ompihtheihna lampi ahi hi.
Thungetna in Pasian tawh hong kinaisak ahihlam a tuakkha lo a om hiam?
Na
thunget ngaihsun in. Bang aa ding na ngen hiam? Bang hunin na ngen hiam? Bang
hangin ngen na hiam? Tuate in Pasian tawh na kizopzia bang pulaak hiam? Bang
kipuahphat ding na nei hiam?
MONDAY MARCH 6
PASIAN’
KAMMAL SIKSAN THUNGETNA: NGEN UN.
Matt.
7:7 sim in. Ngahma-in i nget kul hi. Pasian in na khempeuh thei khin ahih leh,
bang hangin nget ding thupi hiam?
_______________________________________________________________
________________________________________________________________
Ngetna
in i deih, i muanna pulaak hi. Thungetna in hong huh Pasian tawh hong kinaisak
hi. Pasian kiang i nget tak ciangin eite sep ding tangin Aman a hong sep ding a
pulaak i hi hi. Pasian in i nget ding deih hi. Kitangsapna khempeuh Ama tung a
pulaak dingin hong deih hi. I nget kei leh Ama hong kamciamte i ngah kei ding
hi. Jesuh in: “ Ngen un; na nget uh leh hong kipia ding hi. Kiu un. Kongkhak
hong kihon ding hi. Zong un. Na mu ding uh hi” (Luke 11: 9, 10).
Mark 11:
24; 1John 5: 14, 15; Late 66: 18 sim in. Bang hangin Pasian sep zawh loh ding
ngetna om lo hiam? Bang hangin Pasian in na khempeuh a hong piaknopzian theih
ding thupi hiam? Pasian in i thunget a hong dawn nadingin bang kisam hiam?
___________________________________________________________
____________________________________________________________
Pasian
tung pan na khempeuh kingen thei hi. Ama aa dingin cihtham lo, thupi lo
thungetna om lo hi. Ama sep zawh loh ding a lianlua thungetna om lo hi. Amah in
na khempeuh sem thei hi. Lai Siangtho sunga kamciam khempeuh Topa deihna bangin
upna tawh i ngah thei hi (2Kor. 1: 20). Ahi zongin i nget nate i ngah nadingin
a kisam om hi. Pasian tungah ki-apna a om kei leh thunget kingah lo hi (Isa.
59: 1, 2). Thunget ngah nadingin Pasian’ deihna bang a zui dingin ki-apna kisam
masa hi. Pasian’ kamciam khempeuh Ama thu manna tungtawnin hong kipia ding ahi
hi.” Ellen G. White, Christ’s Object Lessons, 145.
Pasian
in na khempeuh hong pia nuam tawntung hi, cih phawkin maingal takin Ama kiang i
zuan thei hi. Meidawi-na le uplahna in Topa minthanna hi lo hi. Amah a zuan
khempeuh in muanna, lungkiptakin zuan ding hi.’ Ellen G. White, Signs of the
Times, 7, 1901.
TUESDAY MARCH 7
PASIAN’
KAMMAL SIKSAN THUNGETNA: UM
Mark
11: 24 sim in. Thungetna le a dang bang thute in kizopna nei hiam?
__________________________________________________________
____________________________________________________________
Thungetna
bek kicing lo hi. Thunget ciangin a kisam mahmah khat om hi. Tua in upna hi. “
Upna lo-in Pasian lung kidamsak thei lo hi” (Heb. 11:6). Pasian mai-ah
kiniamkhiatna tawh Lai Siangtho simin, Lai Siangtho sunga Pasian’ kamciam tul
thum valte lak pan khat sim inla tua kamciam na nuntakna ah a tangtung dingin
thungen in. Pasian in hun a sak ciangin a mite aa ding a hoih pen sem hi.
James 1:
6 -8 sim in. Koi bangin upna nei lo mi zia le tong pulaak hiam? Bang hangin
kamciamte ngah nadingin upna kisam masa hiam?
___________________________________________________________
_____________________________________________________________
Pasian a
zuan mi khempeuh in Pasian om takpi-in Amah a zong mi khempeuh tungah a kamciam
tangtungsak hi, cih upna kul hi. Pasian in i thunget hong dawng hi, ci-in up
ding banah Ama deihna tawh kituakin nasem ding hi hong sawl hi.
Upna le
muanna kikhen lo hi. Mi khat a muanhuai-lam i theihtakteh kimuang ngam pan hi.
Pasian kamciamte i muanmawh leh tua kamciamte i ngah kei ding hi. Um cih
ciangin Topa kammal ahi bangin upna hi. Um cih ciangin bang bang piang taleh
Topa le a kamciamte tungah kingakna ahi hi. “ Upna in i lamet nate tungah
lungmuanna le a kimunailo nate telcianna ahi hi” (Heb. 11: 1). Upna in Topa
kamciamte tungah kingakna hi. Bang hang hiam cihleh a gen thute i muang hi
(Heb. 11: 11). “ Pasian zuau ngei lo hi (Heb. 6:18). Pasian in zanni, tu ni,
cihmahin kikhel ngei lo hi (Heb. 13:8). Upna in Pasian aa dingin a piang thei
lo om lo hi, ci-in pulaak hi (Luke 1: 37).
Upna in
vantung kongkhak hong hon hi. Mihing in Pasian’ kammal a muang dingin Kha
Siangtho tungtawnin Pasian in mihing lungtang ah nasem hi. Thungetna in na
khempeuh a hih thei Pasian gamtangsak hi.
Bang in
upna khauhsak hiam? Bang in na hamsat ciangin Khrih hong muangsak hiam?
WEDNESDAY MARCH 8
PASIAN’ KAMMAL SIKSAN THUNGETNA:
KAMCIAMTE MUANG
Thunget ciangin Topa’thupha i ngah
ding hi, cih upna a om kei leh upna in a mawkna ahi hi. 1John 5: 14, 15 sim in.
Bang thu siksanin thungen i hiam? Bang siksanin Pasian in i ngetna hong za
hiam?
____________________________________________________________________
__________________________________________________________________
Thunget ciangin i thunget ngah ding
cih upna kisam hi. Pasian tung pan ngenin a kamciamte i up leh tua kamciamte in
kei aa ding hi, cih ding kisam hi. Pasian hong piak thuphate hangin
lungdamkohna in a kamciamte a pulaak i hi hi. Tua hi-in Topa’ kamciamte hangin
lungdamkoh ding a hi hi. Ellen G. White, “ A hong ciamkholh vantung siamnate i
nget ciangin upna tawh i nget takteh Pasian in hong pia-in tua hong piak
thuphate hangin Ama tungah lungdam a ko i hi hi.” Ellen G. White, Education,
258.
Jesuh in Pasian’ kammal khaici tawh
genteh hi (Luke 8:11). Apple pum khat sungah apple tang a om bang mahin Ama
thupha a kamciam sungah om hi. A kamciamte kei aa hi, ci-in pulaakin Topa
tungah lungdam i koh ciangin a hong kamciam mah bangin tua thuphate i ngah
takpi hi. I muhma, i ngahma-in upna tawh tua kamciam thuphate i ngah hi.
Jesuh in kamciam siksanin Lazarus
sihna pan hingkiksak hi (John 11). Jesuh in tua mun ah Pasian in bang deih hiam
cih theitel hi. Pasian lungkimna bangin nasem ding le Ama thu mang dingin
nungta hi (John 11:11). Sihna pan Lazarus a thawhsak ma-in Jesuh in Pasian
tungah lungdamna pulaak masa hi. Lungdam a kohin Lazarus in hankhuk sungah om
lai hi. Tua bangin lungdam a koh ciangin Ama nget thu ngah hi. Ei Pasian’ tapa
tanute in zong Pasian’ kamciamte siksanin a nungta ding i hi hi. I telzawh loh
thu tampi om hi mah taleh Ama kamciamte muan ding kisam hi.
Hamsatna na tuah uh ciangin kei
hong ko un (Late 50: 15). Kitangsapna, lunghimawhna khempeuh hong ko un. Tatsat
lo-in thungen dingin hong sawl hi. Lungkia lo-in thungetna in Ama i muanna a
pulaak hi. Kitangsapna in tatsat lo-in Topa tawh kizopna hong neisak a, Topa in
eite lam ah a bil hong ngat tawntung hi.” Ellen G. White, Christ’s Object
Lesson, 172.
Bang hangin na khempeuh Pasian
tungah koh ding thupi hiam?
THURSDAY MARCH 9
KHA
SIANGTHO NGAH DINGIN THUNGEN
Eph.
3: 16; Sawl. 2: 38 sim in. Kha Siangtho tawh kidim nunzia bang hong hilh hiam?
__________________________________________________________
__________________________________________________________________
Thunget nget
ding tampi om hi. Ahi zongin i kitangsap lian pen in Kha Siangtho letsong hi.
Hih in Jesuh hong piak theih a lian penpen letsong hi. Tua sangin na hoih zaw
hong piak ding om lo hi. Pa Pasian in Kha Siangtho tungtawnin i sungah nasemin,
kitangsap khempeuh hong pia hi. Kha Siangtho tawh a kidim mi in a kitangsap
khempeuh ngah thuah hi. Ahi zongin Kha Siangtho hong daltan na lian pen in Kha
Siangtho tawh kidim dingin a kiging lo lungsim ahi hi.
Sawltakte
hun lai mah bangin tu-in zong a kitangsam penpen in mawhna kisikin Jesuh Khrih
tungah ki-ap ding ahi hi. Hih pen Kha Siangtho makaihna lo-in a piang thei ding
hi lo hi. Ahi zongin Kha Siangtho in a hong hopihna aw a za mi in a mawhna
kisikin ama sungah Kha Siangtho in na sem hi. Kiniamkhiatna le upna tawh mawh
kisikna kisam hi. Tua hi leh mawhna khempeuh panin suakta-in nunna siangtho
ding hi. Mawhna tawh a kidim i hihlam phawk kul a, Pasian le Ama hehpihna
kitangsaplam tel kul hi. Amah lo-in eite in mawhna tawh kidima tawntungin a
mangthang ding i hi hi.
Tatsatlo-in
thungetna in Kha Siangtho tawh hong kidimsak ding a, tua ciangin Pasian’ deihna
bangin i nungta ding hi. Pasian in Kha Siangtho a hong piak ding i nget kul hi.
Pasian in tua bangin a ngen khempeuh tungah Kha Siangtho pia hi. Ellen G.
White, Ye Shall Receive Power, 284.
Kha
Siangtho in thu-um mi khat tungah siamna a piak a tawpna hi lo hi. Kha Siangtho
Jesuh hong theisakin Khrih nunzia hong neitheisakin, thu-um mite hong kipsak
hi. Biakpiakna ah mimal hi taleh mihon in hi taleh Jesuh Khrih sangin Kha
Siangtho liatsak zawkna in khial hi. Jesuh tungtawnin Kha Siangtho in Pa kiang
hong tunpih hi. Eph. 2: 18.
Bang
hangin Jesuh hong piak theih khempeuh lak pan Kha Siangtho sangin a lian zaw om
lo hiam? Bangci bangin na nunna ah Kha Siangtho tawh na nungta hiam? Kha
Siangtho hong piak siamna nei lo hi lecin koi dinmun ah na om diam?
FRIDAY MARCH 10
NGAIHSUTBEH
DING: Ellen G. White, “Asking to Give,” pp. 139 – 149 in Christ’s Object
Lesson.
Thungen
lo-in upna khuah thei lo hi. Bang hang hiam cihleh thungetna in vangliatna,
hatna khempeuhte’ Kipatna tawh kizopna hi. Thungen lo-in Pasian tawh kizopna om
lo hi. Thungen lo thu-um mi in puatham bek tawh thu-um hi-in, a nuntakna in a
hawmpi hi. Tua bang mi in Pasian kamciamte a kipan Kha Siangtho piak siamna nei
lo hi.
Pasian
in a tate’ thungetna ngai lo-in a om kei hi. Pasian’ sawl bangin nungta-in ahi
zongin Pasian in na thungetna hong za lo hi, na cih hun ciangin bang na
ngaihsun hiam? Ahi zongin tua bang hunteh lungkiat ding hi lo hi. Leitung
nopsakna in hong zo lai hi, cih Pasian in mu ahih manin, i thungette Pasian in
hong pia pahpah lo hi thei hi. Pasian in ze-etna, hamsatna tuamtuam tawh hong
sittel phot hi. Tua bang i tuah ciangin hong kiniamkhiatsakin, i kitangsap
taktak hong musak hi. Cilesa deihna, upna susia thei ding nate i nget hangin
Pasian in hong pia lo hi. Pasian min a daisak thei nate i nget khak leh Pasian
in hong pia lo hi. Pasian in mimal kiliatsakna lungsim hong nei sak ding nate
hong pia lo hi. Thu i nget ciangin ki-apna, lungsim kitamzan, na khempeuh Topa’
deihna bang hi hen, ci-in thungetna Topa in manpha-sa hi. Ellen G. White, In
Heavenly Places, 89.
KIKUP
DING DOTNATE:
1.
Koi
bangin thungetna in upna hong huzap hiam? Koi bangin thunget in na lianpi sem
hiam? Koi bangin thungen le ngenlo kilamdang hiam?
2.
Cina
khat in “thu hong ngetsak in,” a hong cih bangin nang zong thungenin, ahi
zongin noptuam kei leh, tua cina tungah bang na pulaak diam? Koi bangin hamsat
hunteh Pasian muang veve ding i hiam?
3.
Koi
bangin thungen cih kammal na tel hiam?Nang aa dingin bang khiatna nei hiam?
bang hangin thungen cih a thei lo mi khat tungah thunget tawh kisai bang na
pulaak diam?
4.
Koi
bangin thungetna in nasem cih na telloh hangin bang hangin thunget thupi hiam?
