SABBATH NITAK:
TU KAAL SUNG SIM DING: 2Pet. 1: 19
– 21; 1Kor. 2: 9 – 13; Late 119: 160; John 17: 17.
KAMNGAH: “Pasian’na a sem mite mi
cingtaak hi-in, na hoih namkim a septheih nadingun Lai Siangtho pen
Pasian’lamlahna tawh a hong kipia hi a, thuman thutak hilh nading, a khialte
taii nading, a man lote a manin
puah nading, a manin nuntak theih nading thuhilh nadingin a manpha mahmah ahi
hi “ (2Tim. 3: 16, 17).
Lai Siangtho in thuman thutak hilh
nading, a khialte taii nading, a man lote a manin puah nading, a manin nuntak
theih nading thuhilh nading (2Tim. 3: 16, 17) ahih mah bangin tua bang mahin hi
takpi hi. Bang hang hiam cihleh Lai Siangtho in Kha Siangtho tungtawnin Pasian’
kammal mihing tungah hong lak hi. Kha Siangtho in Pasian’ deihna, Amah a
lungkimsak ding nunzia hong hilh hi.
Kha Siangtho in tua bangin lam hong
lak hi bek lo-in Amah mah in Lai Siangtho’ bulpi ahi hi. Tuni dongin i nuntakna
ah Kha Siangtho in Pasian’ kammal tungtawnin nasem hi. Lai Siangtho simin,
thuman thutak a hi bangin i tel ding lunggulhna takpi kisam hi. Tua dingin Kha
Siangtho i kisam mahmah hi. Kha Siangtho in Topa’ kammal hong lunggulhna hong
guan hi.
Topa’kammal bangin nuntakna ding
Kha Siangtho kisam hi. Tua ahih manin Topa’ kammal tungtawnin Kha Siangtho in
nasemin Khrih sungah nunna thak hong neisak hi. Kha Siangtho le Lai Siangtho
kizopzia tu kaal sungin i sin ding hi.
SUNDAY JAN.1
KHA SIANGTHO LEH PASIAN’ PULAAK THU
Koi bangin Pasian in mihing tungah
Ama deihna pulaak hiam? Kha Siangtho in Pasian’ pulaak thute le a kiciamteh
thute koi bangin nasem khawm hiam?
Lai Siangtho gelhte in Pasian’
lahkhiat thute a ciamteh ciangun mihing sangin vanglian zaw Kha Siangtho in
amaute makaih hi. Bang hang hiam cihleh mihing in mawhnei mi hi-in Pasian’
lahkhiat thute mihing in tel zo lo hi. Kha Siangtho in hong hilh kei leh mihing
in i pianpih lungsim tawh thuman thutak i thei kei ding hi (Dan. 2: 19 – 23).
Mihing in Ama deihna i theih
nadingin Pasian in amah le amah hong kilaak hi. Tua pen Mangmuhna kiciamteh hi.
Mangmuhna i cih ciangin kipholak, kihong khia, a kikhuhna hemkhia cihna hi.
Pasian in amah le amah hong kilaakkhiat kisam hi. Bang hang hiam cihleh mawhna
hangin mihing in Pasian tawh kigamla khinin, mihing ngaihsutna khempeuh in
ciangtan nei hi. Topa Pasian’ deihna i theihtel nadingin Ama hong lah thute
tungah i kinga hi. Bang hang hiam cihleh eite in Pasian i hi kei a, Amah i
theihna kicing lo hi.
2Pet. 1: 19 – 21 sim in. Koi bangin
kamsangte’ gen thute hong kipatkhiatna pulaak hiam? Lai Siangtho bulpi in Lai
Siangtho’ thuneihna bang pulaak hiam?
_____________________________________________________________________
_____________________________________________________________________
Kamsangte’ gen thute in mihing tung
pan hong kipan hi lo hi. Kamsangte in Pasian’ pulaak khiat bangin a pulaak
theih nadingin Kha Siangtho in amaute makaih hi. Kamsangte in amau deih bangin
thugen lo hi. Amau tungtawnin thu hong pai hi-in, a gen uh thute in amau kiang
pan hong kipan hi lo hi. Peter in hih thu limtakin hong hilh hi: “ kamsangte in
a genkhiat thute amau deih bangin a gen uh hi lo hi” (2Pet. 1:21). Amau gen
thute in Pasian kiang pan hong pai thute ahih manin tua thute in vanglian in
mihingte tungah thunei hi.
Pasian in Ama thuman thutak a
pulaak dingin mihing hong zang hi. Lai Siangtho gelh ding hi lo-in a kigelh
thute pulaak dingin, tu-in zong koi bangin Kha Siangtho in na nuntakna hong
zang thei hiam?
MONDAY JAN. 2
KHA SIANGTHO LEH HUMOPNA
‘Humop” cih kammal in Pasian’
pulaak thuman thute kamsangte in a pulaak khialh khak loh nadingun Kha Siangtho
in makaih hi, cihna ahi hi. Kha Siangtho nasep ahih manin Lai Siangtho sunga
kigen thuman thute khat le khat kitukalh lo hi. Thuman thutak Kha Siangtho in
thuman thu ah hong makaih hi (John 14:17; 15: 26; 16: 13).
2Pet. 1: 21; Thkna. 18: 18; 1Kor.
2:9 – 13 sim in. Lai Siangtho gelhte tawh kisai bang thu hong hilhin, koi
bangin Lai Siangtho bulpi in Pasian zia bang hong laak hiam?
___________________________________________________________
_____________________________________________________________________
“Kha Siangtho’ sawlna bangin” cih
kammal in Lai Siangtho hong piankhiatna dingin Kha Siangtho’nasepna kimu thei
hi. Paul in zong a gen thute Kha Siangtho’makaihna ahihzia pulaak hi (1Kor.
2:10). Sawltakte in zong hih bangin pulaak uh hi: “ Eite’ ngah lungsim pen
leitung mite’ lungsim hi lo a, Pasian in eite tungah a hong piak na khempeuh i
theih nadingin Pasian’ hong piak Kha Siangtho lungsim ahi hi” (1Kor. 2: 12).
Kha Siangtho’ humopzia hih bangin pulaak uh hi: “ Tua ahih manin hih bangin thu
ka hong gen uh ciangin zong, mihingte’ hong hilh pilna kamte a zang hi lo-in ,
Kha Siangtho a nei mite tungah kha tawh kisai thu ka gen uh ciangin Kha
Siangtho in a hong hilh kammalte zangin a gen ka hi uh hi” (1Kor. 2: 13). Paul
in a genkhiat thute hong kipatkhiatna bulpi theitel mahmah hi.
Lai Siangtho in a lamdang
vangliatna le Mangmuhna tungtawnin Pasian in a pulaak thute, ahi zongin Lai
Siangtho sung a kigelh khempeuh tua bang hi khin lo hi. Khat veivei ciangin a
omsa thu, midangte’ gelh thute a entelpha dingin Pasian in a kamsangte sawl hi.
Tua thute tungtawnin Pasian in A thuman thute pulaak hi (Joshua 10: 13; Luke 1:
1-3). Lai Siangtho sung a kigelh khempeuh in Pasian’ pulaak thute Kha Siangtho
humopna tawh kamsangte in a hong gelhkhia uh ahi hi (2Tim. 3: 16). Hih thu
hangin Paul in “eite in lametna i neih theih nadingin eite thuakzawhna le Lai
Siangtho hansuahnate tungtawnin a beisa hun a kigelhte khempeuh eite hong hilh
nadinga kigelh ahi hi,” ci-in pulaak hi (Rom. 15: 4). Thuman a pulaak Pasian,
kampau a bawl Pasian in Ama tel kamsangte tungtawnin a pulaak thute in
muanhuai, belhtaakcing hi.
Mi khempeuh in thuman a theih
nadingin Pasian in mihingte tungtawnin a thuman thute pulaak hi. Topa Pasian in
Ama nasem dingin a teel mite Kha Siangtho tungtawnin septheihna, matutna guan
hi. Pasian in kamsangte’gen ding thute a kipan a gelh ding uh thute hilh hi.
Vantung thumanpha a tangko mite khial thei uh a, a pulaak thute in a kisia lo
ding vantung pan hong pai thute ahi hi. Ellen G. White, 1SM., 26.
TUESDAY JAN. 3
KHA SIANGTHO LEH LAI SIANGTHO’
THUTAKNA
Pasian in a tel kamsangte
tungtawnin amah leh amah hong kipulaak khia hi. Tua bangin a kilaak thute Kha
Siangtho in makaihin Pasian deihna bangin pulaak khia uh ahi hi. Pasian in
thuman lo deih lo hi (Pai. 20: 6); zuah mudah hi (Heb. 6: 18). Amah pen thuman
Pasian kici hi (Late 31: 5; Isa. 65: 16). Tua bang mahin Kha Siangtho zong
“Thutak Kha Siangtho’ kici hi (John 14: 17).
Late 119: 160 sim in. Pasian in a
pulaak khempeuh bang hong hilh hiam?
_____________________________________________________
John 17: 17 sim in. Jesuh in Pasian
kammal tawh kisai bang pulaak hiam?
_____________________________________________________
________________________________________________________________________________________________________________________________________
Pasian kammal in muanhuai-in
belhtaakcing hi. Nial ding bangmah om lo-in sankhit ding ahi hi. Lai Siangtho
tungah thunei ding i hi kei hi. Lai Siangtho in ei tungah thu hong nei ding hi
zaw hi. “Pasian thu nungta-in hihtheihna a nei hi. Langnih a hiam namsau sangin
hiamzaw lai hi. Kha le lungsim, guh le taang kituahna, guh le guhngeek dongin
khenkhia thei hi. Mihingte’ lungsim ngimna le a ngaihsutnate zong theithei hi”
(Heb. 4: 12). Lai Siangtho in hun khat lai-a a nungta mi kimkhat ii gelh hi-in,
ngeina khuasakzia kibang loh hangin Lai Siangtho’ thupuakte neumuh ding hi lo
hi. Lai Siangtho a thupitna a nial mite in Lai Siangtho thuman sang lo uh hi.
Tua bang mite in ni sagih sungin na khempeuh kipiansakna thu, leitung tuiciin
tuna, Jesuh hong suahna le sihna pan a thawhkikna, a hong pai kik ding cih
thute nial uh hi. Tua lo a nial uh tampi om lai hi. Eite in ahih leh tua bangin
thuman a nial ding i hi kei hi.
Bang hangin mihing in Pasian kammal
tungah thunei ding sangin Lai Siangtho in mihing tungah thunei zaw hiam?
WEDNESDAY JAN.
4
KHA SIANGTHO IN THUHILHSIA BANG
HI-IN
Kha Siangtho in Lai Siangtho gelhte
a makaih banah Kha Siangtho bek mah in Lai Siangtho hong telsak hi. Mihingin
Pasian tawh kigamla-in mawhna sungah om ahih manin Lai Siangtho tel thei lo hi
(Eph. 4: 18). Tua hangin Lai Siangtho i tel nadingin, Kha Siangtho i kisam hi.
Thuman teltheih lohna a hang in Lai Siangtho’ khialhna hi lo-in, Lai Siangtho
in Pasian pulaak ahih manin, Pasian tungah i lungsim puakzia a khialh man hi
zaw hi.
Kha Siangtho in Thuhilhsia hi-in
Lai Siangtho sung thute deihna lungsim hong guanin, tua thute i tel nadingin
hong makaih tawntung hi. Kha Siangtho in Pasian kammal hong lungngaisak-in, a
thute theihtelna thak hong guanin, Pasian deihna bangin nungta-in Ama tungah i
kip den ding hi. Kiniamkhiatna le Pasian hong hilh bang i mansawm ciang bekin
tua bangin piangthei ding hi pan hi.
1Kor. 2: 13, 14 sim in. Paul in Kha
thu tawh kisai thute ah Kha Siangtho i kitangsapzia bang pulaak hiam?
____________________________________________________
_____________________________________________________________________
Lai Siangtho i tel nadingin Kha
Siangtho tungah i kingak kul hi. Kha Siangtho lo-in Lai Siangtho thuman i thei
kei ding a, laibu khat peuh sim tawh kibang ding hi. Mihing in Pasian thuman
langpan tawntung hi. Thuman a kitel zawh lohna a hangin thuman a kizuih sawm
loh man hi zaw hi. Kha Siangtho lo-in Pasian gen thute itna, deihna kinei thei
lo hi. Tua bang mi in Khrih sungah lametna, upna, itna nei lo hi. Kha Siangtho
hong hilh thute in Lai Siangtho sunga kigelhsa thuman tawh kilangdo lo hi.
“Mi tampi in Lai Siangtho hong hilh
thute khat le khat kituak lo hi, ci-in Lai Siangtho nial uh hi. Lai Siangtho in
a kitukalhin thu hong hilh lo hi. Tua bang thute in mihingte’ kicinlahna le ama
deihna siksanin Lai Siangtho a sim mite’ khialhna hi zaw hi. Mi tampi in Lai
Siangtho hong hilh thute nialin, amau ngaihsutna thupisak zaw uh hi.” Ellen G.
White, The Advent Review and Sabbath Herald, Jan. 27, 1885.
Bangci bangin kiphatsakna lungsim
in Lai Siangtho theihtel nading hong dal hiam? Koi bangin lungsimpuak,
ngaihsutna in thuman thutak dal hiam? Bangci bangin na khempeuh Pasian ap thei
ding na hiam?
THURSDAY JAN. 5
KHA SIANGTHO LEH THU
Thuman thutak a pulaak Lai Siangtho
gelhte’ a makaih Kha Siangtho in Pasian kammal tawh kilangdo-in hong makaih
ngei lo hi.
John 5: 39, 46, 47; 7: 38 sim in.
Khrih in thuneihna bang pulaak hiam? Koi bangin Lai Siangtho in Jesuh in
Messiah hi, ci-in kipsak hiam?
_____________________________________________________________________
_____________________________________________________________________
Mi kimkhat in Kha Siangtho in hong
hilh ci-in Lai Siangtho tawh kituak lo thu pulaak uh hi. Tua bang mite in
Pasian kammal sangin Kha Siangtho vangliansak zaw uh hi. Lai Siangtho tawh
kituak lo thuhilh, thugente in Kha Siangtho’ makaih hi lo ahih manin a lauhuai
dinmun ah om uh hi. Lai Siangtho bek mah eite kulhmuanhuai ahi hi. Thu-upna le
thuzuihna khempeuh Lai Siangtho bek tawh sittel ding hi zaw hi.
“Kha Siangtho in thuman pulaak hi.
Kha Siangtho tungtawnin thuman i thei hi. Tua hi-in Kha Siangtho in thuman lo
thute kilangkhiasak hi. Thutak Kha Siangtho in Pasian kammal tungtawnin Khrih
hong lak hi.” Ellen G. White, The Desire of Ages, 671.
Pasian kammal aitangin Kha Siangtho
hong kipia hi lo hi. Kha Siangtho in Pasian kammal tungtawnin Khrih tawh hong
kinaisak hi. Tua ahih manin Lai Siangtho bek mah eite siksan bulpi ahih kul hi.
Lai Siangtho tawh kituak lo thuhilhna khempeuh Kha Siangtho’ sawl hi lo hi.
Mite lungsim thu a khen ding i hi kei hi. Lai Siangtho thuthuk sinna tuamtuamte
i deih kei leh i nial thei a, ahih zongin Pasian kammal tungah thuneihna mihing
in nei lo hi. Na khempeuh Lai Siangtho tawh sittel ding hi zaw hi.
Na omna pawl sungah Lai Siangtho
tawh kituak lo kihilh thu bang om hiam? Tua bangin thuhilhte tungah bangci
lungsim puak nei-in, koi bangin tua bang thute nial ding na hiam?
FRIDAY JAN. 6
NGAIHSUTBEH DING: Ellen G. White,
The Great Controversy “The Scriptures a Safeguard,” pp. 593 – 602. The Desire
of Ages, “Let Not Your Heart be Troubled,” pp. 662 – 680, cihte sim in.
Lai Siangtho’ hong hilh na theih
thuman thutak khempeuh ngaihsun in. Gentehna in piansakna thu, leitung pilna
tuamtuamte hilh na khempeuh in amau thu in hong piangtawm hi, cih thu tawh
kilehbulh ahihzia kimu ding hi. Jesuh Nihvei hong pai kik ciangin a si mite
hong thokik ding cih thute in mihing kiang pan hong pai hi lo hi. Hih thute in
kamsangte tungtawnin Kha Siangtho in a hong pulaak thu ahi hi. Lai Siangtho
hong hilh a bulpi pen in eite mawhna hangin Jesuh hong si hi. Ama hong sep
khempeuh a um a muang mi khempeuh in mawhna vangliatna sung pan hotkhiatna ngah
ding hi. Bang hang hiam cihleh mihing in amah le amah kihonkhia thei lo hi. Hih
thu zong Lai Siangtho hong hilh thu hi-in mihingte tung pan hong piangkhia thu
hi lo hi. Lai Siangtho hong hilh thuman thutak dangte ngaihsun in. Tua thute in
i nuntakna ah bangzahin thupi-in manpha hiam?
KIKUP DING DOTNATE:
1. Bang hangin
mihingte hoihsak thute sangin Lai Siangtho in belhtaakcingin muanhuai zaw hiam?
Na khempeuh Lai Siangtho siksanin sittel loh manin bang lauhuai-na tuamtuam
kituak hiam?
2. “Thuman”
cih kammal i za mun mahmah hi. Zatna a tuamciat hi. Thu khat peuhpeuh i pulaak
ciangin zuau thu a hilhlohzia, thuman thutak hi, ci-in i pulaak teh i deihna in
bang hiam?
3. Mi khat in,
“thuman thak ka mu hi,” ci leh koi bangin na dawng diam?
4. Mihingte
gen thute le Lai Siangtho thute a kilamdanna pulaak in. Leitung mipilte’ pulaak
thute in Lai Siangtho tawh kilehbulh tampi om hi lo hiam? Bang hangin na
khempeuhte tungah Lai Siangtho mah thupisak penin muan lianpi penin nei ding i
hiam?
