JAN 28, 2017 Huan Sungah Lamsiau Poland gam pan Dorota thupuak

Huan Sungah Lamsiau 
Poland gam pan 

Dorota thupuak

A neutung a kipan Dorota in Pasian hopihna za nuam hi. Poland gamah tua bangin naupang in Pasian thu lunggulh ding cih pen a kikhaat mahmah hi. Kum 5 bek ahih hangin Dorota in a pi zui-in Roman Catholic biakna zui-in
kikhawm den uh hi. Sunday ni khat a kikhop khit inn a tun uhteh Dorota in a pi kiangah “i biakinn ah Pasian om kei. Pasian’ aw za thei keng” ci hi. Tua leh a pi in khua nawl, lopa dum dildial mun khat ah paipih in, “Tun Pasian tawh kiho in. Na ut bangin Pasian hopih in” ci-in sawl hi. Tua bangin a pi sawl bangin Dorota in khua nawl ah Pasian’ hong hopihna ka za hi,” ci-in pulaak hi. Tawl khat khitteh Dorota’ pi in sihsan hi. Tua a kipan Dorota in a biakna sungah nuamsa lo hi. Pasian tawh kizopna nei thei lo hi.

Damlohna tuamtuam:

Dorota in nisimin thungen den hi. Pasal nei-in tapa khat le tanu khat hong nei uh hi. Tua bang teng tawh Dorota a ci hong dam lo semsem hi. Nakpi-in thungen ngen taleh, noptuam tuan lo hi. A lawm a gual in Dorota kiangah Pasian om takpi hi leh na thunget hong za khin lo diam, ci ci mah ta le-uh, Dorota in thunget kiam lo hi. Ama damlohna panin Pasian in damna pia ding hi, ci-in Dorota in lametna lianpi nei hi. Pasian in hong nusia ngei lo hi; a ompihna thei den hi.

Dorota in ama natna tawh kisai damna dingin Ireland gam ah siavuante tawh kilak dingin Ireland gam ah hong zin khia hi. Dublin a tun takteh a natna khempeuh dam mawk hi. Amah zong Carryduff khua ah om suak ding hong geel hi.

Paak Huan ah:

Dorota in Carryduff khua-a om paak huante a muh ciangin a lungnuam mahmah hi. Tua bangin a tanu tawh paak huan ah a vak uh leh, a gei uah Polish pau tawh kiho mi pawl khat tuak kha uh hi. Amau zong kinuihsan tuak uh hi. Koi pan hong pai cih bangin khat le khat kiho uh hi. Hih mite zong Poland gam panin Ireland gamah a teng Polish minamte mah na hi uh hi. Tua bangin kiho ho uh a, biakna cihte hong kikum uh hi. Hih mite pen SDA thu-um hi-in, amau biakinn ah kikhawm dingin hong zawn uh hi. Dorota zong Barbara’ kikhopna ah hong kikhawm hi. Amau pau tawh Pasian thugenna Hope Channel, TV tawh kigenna panin SDA thupuak thute hong thei thei uh hi.

Lawpna lianpi

Dorota in SDA biakinn ah hong kikhawm hi. Tui kiphum ding zong lunglut mahmah hi. Ahi zongin Dorota in ama gam ah kituiphum ding lunggulh hi. Poland ah ciahin tuiphum ding hong khensat hi. Ahi zongin a tate in zui thei lo ding ahih manin a lung nuam lo hi. A tate in a zuih theih nadingin thungen hi. Poland gam hong tungin, Dorota in a kituiphumna a tate leh a sanggamte in a et theih nadingun internet tungtawnin kimu thei dingin vaihawm hi.

Nai khat kicing lo

Ireland ah hong pai kik a, hih gam a kikhop uhteh nai khat val ngei lo hi. Ahi zongin Dorota in nai khat sung bek hawmthawh hi. Kikhop khitteh ama mipihte samin thu kikhupna tuamtuam nei uh hi. Poland gama om SDA hi lo a lawmte kiangah Hope Channel le internet tawh Pasian thugennate a ngai dingin zong hanthawn hi. Dorota in SDA pawlpi sungah nuamsa mahmah hi.

Geelna Lianpi Khat

Poland gam in Europe ah gam ki-ukna thukhunpi a nei masa penpen gam hi. Leitung in ni kimvelin kipei hi, ci-in a pulaak mi minthang, vantung nate tawh kisai mipil mahmah Nicolus Copernicus zong Poland gam mi hi. Polish laimal in nam 32 nei hi.

Tu quarter 13^th Sabbath School sumpi in Poland gamah Hope Channel, TV tawh Pasian thugenna studio bawl nadingin kipuak ding hi. Hih mun ah a kisam van tuamtuamte lei nadingin zong kizeek ding hi. Hih bangin TV tawh Pasian thugenna in muibun mahmah hi. Dorota in hih bangin pawlpi in a geelnate a theih ciangin lungdam mahmah hi. Dorota in Camp cihte ah kihel zo lo hi. Ahi zongin TV tawh thugennate ngai-in a upna kip semsem hi. MUC in Laibung khuathak a pawlpi huhna dingin kipuak ding hi.