Thupuak: Tatiana
Eastern Orthodox thu-um innkuan sung
pan a khangkhia ka hi hi. Ka nu, ka pate in hong kikhoppihin, Pasian thu hong
hilh uh hi. Tua hun a kipan thu ka ngen thei hi. Pasian in ka thunget hong za
hi, ci-in ka um hi. Ka naupan lai-in Saturday tawh kisai laibu khat hong kipia
hi. Ahi zongin ko innkuan in ka pawlpite hong piak laibu ahih kei leh sim
dingin ka ngaihsun kei uh a, ka hal tum uh hi. Pasian tawh kinai-in Lai
Siangtho zong ka simsim uh hi. Pasian tawh kinai semsemin Pasian tawh kisai van
khat peuhpeuh a siangtho pah hi, ci-in ka ngaihsun hi.
Pasal ka nei baih hi. Ireland gamah
nuntak nuam zaw dingin ka ngaihsun hi. Ireland gamah pai ding ka geel uh hi.
Kum 19 ka phakin nunzia hamsatzia ka thei pan hi. Czech gamah ka pai masa uh a,
tua panin France gam ka zuan uh hi. Paris khuapi ah kha guk ka om sungin nau ka
paai hi. Giak nading om lo, lampi ah giak, nek ding an ngen kawikawi cih bang
ahih manin nuntak hamsa mahmah hi.
Nitak khat meileng tuangin England
gam ka zuan uh hi. Gamgi ka tun uhteh meileng pai suak nawnlo ahih manin gam sungah
ka giak uh hi. A hong kimuh ding ut lo ka hih manun, ippi sungah ka kisel uh
hi. Sathau pua meileng khat hong pai-in, tua meileng ah ka tuang uh hi. Meileng
sungah nai 11 sung bang ka bu uh hi. Ka gil sunga om naungek pen nungta dingin
ka lamen kei hi.
A sawtteh England gam ka tung thei
uh hi. Meileng tung pan ka tuakkhia uh hi. Ka passport uh le sum tawm khat lo
buang, a dang bang mah ka nei kei uh hi. Tua bangin Dover ka tung uh hi. Hih
khuapi ka tun uhteh Red Cross kipawlnate in a kitangsap bangbang uh hong pia uh
hi.
England gam panin mawtaw tuangin
Scotland ka tung uh hi. Scotland panin Ireland zuanin ka pai uh hi. Gamgi panin
zan tungtawn ka pai uh hi. Khuavak ciangin Ireland gam ka tung thei uh hi.
Dublin khuapi ka tun uhteh gambeel mi hihna ka gen pah uh hi. Limerick khuapi
ah om dingin ka kituah uh hi. Hih khua Limerick ka tun uhteh tapa khat nei hi.Gammi
suahna ka ngah pah uh hi. Hih khua ah ka om sungin kimlepaam tawh kizopna
nei-in meltheih zong ka nei uh hi. Hih khua panin Dublin ah kituah dingin ka
geel uh hi. Ka meltheihte khat un Dublin khua ah om a meltheihte omna hong hilh
hi.
Irish passport ka ngah khit uhteh
Moldova ah om dingin ka pai khia leuleu uh hi. Vanleng tuangcil ding ka hih
manin ka patau mahmah hi. Thu ka ngen a, Moldova ka tun uhteh Lai Siangtho khat
lei ding ka geel hi. Moldova ka tun uhteh Lai Siangtho bu khat ka lei pah hi.
Biakna tawh kisai van tuamtuam zong ka lei hi. Dublin a meltheihte hong piak
phone nambat mekin ka hopih leh , tua mite in an ne dingin hong sam uh hi. Ka
omna uh kigam la lo, kinai mahmah na hi bilbel hi.
Ka kihopihte uh zong hong hawh uh
hi. Lai Siangtho ka sim masakna hong suak ahih manin, thungenin Pasian in a
hong theihsak nopte hong hilh dingin thu ka ngen hi. Ka meltheihte tawh anne
khawm ding ka kithawi uh a, zu, sa cihte ka lui uh leh, “ko hihte ne lo” hong
cih uhteh lamdang ka sa mahmah hi. Bang dingin hihte ne lo, dawn lo na hi uh
hiam, ci-in ka dong hi. “ Bang hanga zu dawn lo, voksa ne lo ka hi uh hiam, cih
leh Lai Siangtho in tuate nek ding hong phallo hi,” ci-in hong dawng uh hi. Kei
zong “Koi munah tua bang kigelh hiam, ci-in ka dong pah hi. Bang pawlpi pan na
hi uh hiam” ci-in ka dong hi. “ Seventh-day Adventist”cih pen ka za ngei peuh
mah kei hi. Saturday ni-in kikhawm cihte zong ka thei ngei kei hi. Tua bangin
kiho-in, na biakinn uah hong kikhawm nung, ci-in ka ngen hi.
Saturday ni hong tun ciangin kei
zong amau biakinn ah kikhawm dingin ka pai hi. Tua kipan Orthodox biakinn ah ka
pai nawn kei hi. Topa Pasian in thuman hong theisak ahih manin ka lung a dam
hi. 1861 kumin Ireland gamah SDA thuman tung hi. USA gam a om a sanggamte un
laibu sim ding khak uh a, tuate a simna tungtawnin Sabbath zui mi 5 tawh SDA
pawlpi kipan hi. 1902 kumin pawlpi kiphut a, tu-in biakinn 10 om a, pawlpi mi
783 om hi.
Dublin khuapi a om SDA thu-um mite
in biakinn nei zo nai lo hi. Sanginn khan khat sap uh a, tua munah kikhawm uh
hi. Tu quarter leitungbup 13 Sabbath School sumpi in Dublin khuapi a om SDA
thu-um mite kikhop nading biakinn lam nadingin kipuak ding hi.
MUC in Laibung Khuathak a pawlpi
huhna dingin kipuak ding hi.
