HUN NUNUNG ADING KIGIN KHOLHNA
KHAWKPI 8
LUNGKHAM HUN MALEP
Hih lungkham hun cih pen, asimte in
na buaipih khak lohna ding un, khawk bup khat ah ih tellah ding hi. Mrs. White
genna ah, khawk nih in khen a, leitungte thu veve hi napi, apianzia zong dei
tuam hi.
A. Hun hoih kong khak ma a omom a,
kong khak ciang a bei pen akhawk masa (or) amalep ih cih pen hi. Topa in ahilh
kholhna thugenna ah: Leitung minamte hong khalau ding a, buai gawp ding uh hi.
Tuipi hual gingte hangin leitung a hong piang ding nate en khol in, mite
lungsim alau ding uh hi, ci hi. LK. 21:25, 26.
Hih hun pen, galpite, zinlingte,
natgualte, kamsang zuaute numei leh pasal pheng tatna te, vantung a na lamdang
kilak te, mi taangpi khalaunate leh leitung bupa gupna thupha kihilhna hunte
ahi uh hi. Tua hun pen, Mang 22:11 sunga, kammal akilawh khiat ciangin tha khat
in a bei hi ding a, tua ban ah, nakpi a ahaksa zaw hun ah lut ding hi. Tua hun
lai tak phet mah in hun hoih kong aki khak hong hi ding hi.
B. a hun kik pen, tua hun hoih kong
aki khak pan ki panto pah ding a, Topa zeisu nih veina hong pai, meii tunga
tuang hong ki dawk’ dong hi ding hi. Tua hun nihte kilam dang na pen ih theih
khialh loh nading in hih anuai a bangin khen le hang:
1. Hun masa khawk pen, lungkhamna
hun malep
2. Hun nihna khawk pen, lung khampi
hun, “Gimna nam sagih te ki buak hun.
Lungkhamna hun malep tawh kisai agen
lom thum lak ni.
Pasian in Sabbath thu athei lo, a
zui lo mite nei lai ka mu hi. Amau in hih khuavak nial lo uh hi. Lungkham hun
hong ki khah khiat ciangin, eite in, Khasiangtho tawh kidim in, Sabbath thu aki
cing zaw in ih tangko a…namsau te, kialpite, natgual te, leitung ah nasia takin
tung ka mu hi. EW 33,34.
Hih lungkhamna hun hong ki khah
khiatna pen agen na ah gimna dan sagih te ki buak khia nai lo, bua khia dek
dek, a buak khiat mazek, Khris biakinn sungah omlai hun huam hi.” EW 58.
“Tua hun ciangin gupna nasep akikhak
ding hi ta a, leitung ah lungkhamna te tungta a, minamte lungngol in, ahih
hangin vantung mi thum tangkona te kidal cip nai lo hi.” EW 85,86.
Hih akhawk thumna agenna a, tu hun
khawnga leitung a apiang nate ih muh ciangin gupna nasep pen among tung ding hi
ta cih hong lak hi. Tua hak satna te pen Topa Khris hilh kholhna omsa bang in
leitung buppi ah kizel ding hi. Minamte lung ngol semsem ding hi. Hih thute
tuni mahmah in piangpiang laitak hi ci in ih mu hi. Mite lung ham uh hi. Gam
agol pipite huai ham angsung khualna tawh ki lung tuak thei lo hi. Galvante
kumsial in behlap toto uh hi. Galkap te behlap in leitung galvante dal theihna ding
leh, do nading khan’ toto uh hi. Gal kidona omsa khat in adang pian beh sak zel
hi. Kilemna ding vaihawm te in, kido lo dingin dala, a vaihawm na uh ah,
haksatna tam sem sem hi.
Kisiatna ding pilna tuamtuam avom
mite in galvan leh adalna nam tuamtuamte gamkhat leh gam khat leh gamkhat kidem
in kholkhol uh a, mihing te kisiat cip theihna Nuclear bomb akici te khawng
bawl behbeh uh a, launa leh lung kiat huai na tawh kidim ta hi. Leitung uk
makaite bek hilo, galkapte mipilte baan ah, mi khempeuh in, leitung bup pen
tawm vei no sungin meisa in ahal tum mang thei ding hi ta, ci-in a ngaihsun tek
uh hi.
Mite lungsim gim mahmah ta hi.
Kialpi in mi citeng vaat ta hi. Kipawlna khempeuh ah kilem lohna, ki-elna,
kidemnate piangin, mihingte lungsim in abaan zonbeh to zel hi. Kipawlna
khempeuh ah launa leh lungkiatna om den hi. Setzungte ah, khuapi kong zingte
ah, mulkim huai thu vive om hi. Khangno te khuavak sung bang in gamta lo uh hi.
Anaa neite’ sukzawh loh patauh huai
gamtatsia te khang khang hi. Nute pate lung kham pia uh hi. Innkuan sunga khat
peuh kigu manga, ki buan gawp cih bang peuh tawh khangmoi numeite thuaksia uh
hi. Mi taangpi in zong ama nuntakna bang ci ding thei lo, kician salo in
lungkham tek uh hi. Ciaptehna lai sung te ah, sisan luan’na buai nate khang
toto hi. Mun khat a thusia piang kiza te pen in, mun khempeuh a mi omte kalsuan
na bukk in pang kawikawi hi.
A kinial thei lo thusia pung dang
khat pen, amah kithat, cih thu leh, amah leh amah lungkham lua a, lungsim kisia
natna, hai nate ahihi. American (Neuro Psychiatrist) lungsim kisai zatui pia lo
a, kampau hopihna na tawh puah kik theihna kisin na sangpite panin thu kizak na
ah, America gam bek ah mi awn nih sanga tawm zaw lo te in, amah leh amah kithah
ding sawm ngei hi, ci-in kiza hi.
Kipawl nate peuh mah ah, sian’tho
lohna om zel a, gitlohna kihel zel hi. Zuneekna te, zatui zatnate, mai vak
lohna ding limte, ki kihtaknate buainate in tuh den hi. Hih nate khempeuh in
Pasian hehpihna nitum ta ding, hehpihna hun bei ta ding, hun tom kha sung buaina
hong ki khah ta, cihna ahi hi. Tua te khempeuh in eite lamet penpen minthan’na
na ngah nading hun hong nai ta ci-in hong laklak ahi uh hi. Ahih hangin hun bei
mazek a thu lianpi piang ding khat ih upna pen, Pasian koppihna taktak ih neih
kul ding hi. Tua hi leh kisiatna pan ih suakta zo bek ding hi.
