Thupuak: Agnieszka
Nowa Huta khua panin Europe gam
tuamtuam ah communist (Pasian um lo) kizelsak khuapi khat hi. Leitung Galpi
nihna khitteh kisat khua khat hi-in, Poland khua gei mahah om hi. Nowa Huta a
khiatna in “steel setzung thak” cihna hi.
Poland gam in Pasian um lo gam ahih
manin biakna kin lo uh hi. Pasian thu-um mi kimkhatte in gam ki-ukzia, amau
nunzia tawh lungkim lo-in, biakna khat teitei lunggulh uh hi. Kumpi tungah
Biakinn lam nading mun ngen tawntung uh hi. 1967 kumteh biakinn lam theihna
ding kumpi in pia hi. Ahi zongin biakinn lam nadingin kisam vante kumpi in
leisak lo ahih manin van ngah nading om lo hi. Thu-um mite in a hi thei
bangbangin van kaikhawm uh a, biakinn khat lam thei uh a, Roman Catholic
biakinn khat hi-in, tu-in tua biakinn pen “ Topa’ biakbuk” ci-in minvawh uh hi.
Mite tawh kizom:
1970 kim ciangin SDA in thugenna
nei-a, Nowa Huta khua bulphuhin SDA in nasep kipan hi. Tua hun laitakin Poland
gamah communist hat nawnlo hi. 1993 ni khat, kum 20 nungak Agnieszka in a vakna
mun khat ah cidamna, sanek sangin mehteh mehgah nekna tawh kisai thusinna ah
sapna lai kisuang khat hong mu hi. Agnieszka in sa ne lo nungak ahihna manin
hih kithusinna ah hong pai hi. Anhuanzia tuamtuam le cidamna tawh kisai
thusinnate nuamsa hi mah taleh Lai Siangtho tawh kisai thusinnate ah kihel
nuamlo hi. Lai Siangtho sin ding min kaihkhopna-ah a min pia nuamlo hi.
Ngimna Khat:
“ Hih thusinna ah kong pai-na a hang
in lametna khat nei ka hih manin hong pai ka hi hi. Tua ka lamet simloh thudang
ka za nuam kei hi” ci-in Agnieszka in pulaak hi. Anhuanzia tuamtuamte a
sinnopna kawmin a kikhopna panin Lai Siangtho thusinna-ah kihel ding hong
khensat hi. Thusin a li-na hong tun ciangin Agnieszka in Lai Siangtho sim hong
kipan hi. Zeisu Khrih hong sihna thu in a lungsim su-kha mahmah hi. Nisim
nuntak khuasakzia dingin Lai Siangtho a manphatna hong tel zaw semsem hi. Tua
bangin Lai Siangtho simsimna tungtawnin nunzia ding hong thei semsem hi.
Thusinna a man khitteh Agnieszka in
tui kiphum ding khensat hi. A nu le pa in Catholic biakna sungah om lai uh hi
mah taleh Agnieszka tui kiphum ding khaktan lo uh hi.
Pasian na kisepna Video En
Tu-in Agnieszka in South Polish
Conference zumpi ah nasem hi. Tua kawmin Krakow khua ah Central Adventist
Biakinn ah Sabbath School makai hi. Adventist Mission panin kihawm Mission
Spotlight, Pasian na kisepna video cihte zangin thuhilhna nei hi. Tuate banah
Hope Channel, TV tawh thugennate a kipan Pasian la sakna concert cihte zong en
zelzel hi. Poland gam mite pau Polish pau tawh Pasian thugennate hangin
Agnieszka hampha kisa mahmah hi.
TV le a tuamtuamte zangin Pasian
thugenna
Poland gamah 1980 kum a kipan radio
tawh Pasian thugen kipan hi. Lisbon gam panin radio tawh tangko hi. Tua hun
lai-in radio pan thugen ding khempeuh kumpite’ thukimpihna kisam hi. Kumpi’
phalna om lo-in bangmah kitangko ngam lo hi.Ahi zongin tu-in Poland gam in
kikhel hi. Gam mite in suakta takin biakna zui thei uh hi.
TV tawh Pasian thugenna om khol lo
hi phai mai hi. Ahi zongin pawlpi in TV cihte tungtawnin thuman tangkona nei uh
hi. Internet a kingah a kipan Pasian thuman tangko-na hong lemzaw hi. Mi tampi
in youtube tungtawnin Pasian thuman hong kankhia theita uh hi. Tu-in youtube
panin nai 150-200 bang a sawt ding Pasian thugennate kingai thei hi. Kha khat
sungin gam 50 panin Poland SDA Facebook ki-en hi. Poland gam panin Hope
Channel, TV panin Pasian thugenna tungtawnin mi tampi in thuman thei uh hi.
1888 kumin SDA pawlpi nasem J.
Laubhan le H. Szkubowicz in Poland ah nasem masa pente hi. 1921 kumin Polish
Union Conference kipan hi. Tu-in pawlpi 117 om hi. SDA thu-um mi 5800 om hi.
Tu quarter leitungbup 13 Sabbath
School sumpi in Poland gam ah TV, Radio tawh thugenna dingin kipuak ding hi.
MUC in Laibung khua thaka pawlpi
huhna dingin kipuak ding hi.
