Khenpi 9

Khenpi 9

Mimal Pulaaknate Etkikna

Atunga mimal pulaak thute pan Union sunga mimalte lungsim omzia le makaihzia omdan Leadership view adingin atomin ki-en thei hi:

1.       Hih atunga nasep dan igalet ciangin Executive Committee sangin president authority thupisak zawkna kimu thei hi. Gamkumpi kimakaihna zui tawh kibang hi. Dictatorship le authoritarian style makaihna ong suak hi. SDA pawlpi policy in committee tawh nasepna bulphuh hi. Tua ahihmanin hihmun ah makaite in makaihzia ah lampial(mismanage) uh hi cih kimu thei hi.

2.     No 4, 5 le 8 in, maikaite gamtat siate imcip in melhneu ding lungsim neihna ong dawksak hi. Tua dan pen thuhoih deihte omzia bangin kingaihsun hi. Thute deihlaklua le aman pen ahibang lian-a gen ngam hangsanna omlo hi. Thulianpi mitsuan ding pen mansuahin, adang thuneukhat tawh bulhkhialhna (misapplication) na hi. Na khat peuh ah kician sitsetna omloin zultamna (generalization) vive pian kimu thei hi. Thu khat peuh abuai ciangin phisian nadinga  kisam ahang diktak (Effect pan root Cause) zonkhiat nopna le zon theihna ding hunpiak na le critical thinking thanem lai ahihlam onglak hi. Tua in buaina khat peuh a omciangin thutawh lem nading sangin thatang zanga satmit nading (solution) thahatsak hi.

    Balaam Nungzuihna Lampi

Kumpi zumte adinga kipia sumlom tampite pen union EC thukimpih lohin zang uh ahihmanin, amau septheih ding zah khengval asem uh hia, authority azangkhial uh ahi hi. Tua ban ah, kumpi zumlut dinga azat uh siate pawlkhat in, motor le inn neihlawh pah sam uh ahihmanin, Bylaws and working Policy sunga “Declaration of Conflict of Interest” letmat athu-uh ahihnakleh pawlpi sum zatna ah “mismanagement” pan “corruption” ahihi. Sum deihna hangin gilohna abawl ahi hi. Hih pen Barak Kumpi zolna sum le nate nialzolo-in Balaam in Israel-te samsia dingin, akalsuana, akamkat ciangin Pasian mawhsakna atungah tung hi. Tua mah bangin, khavai thute le pawlsung thute phisian nadingin Lai Siangtho khunsa lampi zui-a Pasian tawh kop ding sangin, atute uh samsiat nadingin zuauphuak akamkaa le sumlom tawh kumpi Thukhenzum avadelh uh pen, biakna makai khat adingin, tucin lungsim nusia-in, Balaam corruption dinmun tuna khat mah ahi hi-- (1Pet 2:14-16).

Thamlo-in zuauphuahna hangsan takin azat uh pen pastor le makai dinmuh adingin, khalam ah zong corruption lianpi hia, Pasian Thukham Sawm laigil (spirit of the law) lungsim ah tenglo cihna ahi hi. Pasian thukhun-lampi(principle) pen “itna le thumanna,” “mawhmaisakna le kilemna” khutkilena tonkhawm den ahi hi(Late 85:10, Mate 5:23, 24; 1 Kor 6:1-11). Hih thukhunpi tawh  apalsat uh ahi hi.

3.     No 8, le 11 in MYUM sunga thupiang khempeuh khamit tawh et ding hanciam hi. Tua pen hoih napi, pastoral leadership ah tua bek in makaihna cingsaklo hi. Lai Siangtho dinmun pen “thu hilh ding, mawhna pulak ding, dikna lampi lak ding” in pastoral leadership ah akizang ding ahi hi(2Tim 3:16). Pastor le makai peuhmah in dinmun nih tawh nasem ding ahi hi—siampi banga palaisepna, le kamsang banga mawhna taina ahi hi. Pawlpi sung Reform bawl kisap ciangin abawl uh hi hi. Azenzenin Martin Luther in Pope nasep gilote, hun nunung aive, ci’n kihehnem lelin melhneu leh, 16^th century protestant reformation omlo ding hi. MYUM vai ah Dr. Paul Tanbauknaw, Dr. Htwe Lay cihte pen Martin Luther banga heroes hi cih ding ahi hi—MYUM sungah ei panna group makaipa lam gum dingin hangsan bangin mi a tam hangin, pawlpi maikaite khialhna le pawlpi bup puahphat nadinga thuman tawh hangsantaka dingngam omlo zahin tawm ici ding hi.

4.     No 10 in thupiang khat peuh pen azak ciangbek tawh lungkim lela, kanbeh, zonbeh ding lungsim aban om nawnlohna ong musak hi. Union sungah tua bang ahihmanin, nasepna khantoh nading lampi thak kimu, kizonbeh theih nading alunghimawh le a zong omlo suak hi.

5.     No 12 an, Pr Min Lwin in Thukhen zum a nasepnate pen, utlopipi akisem danin, dawksak hi. Ahizongin 2007 lai-a dialogue nei-in thukhenzum kitun-a buainate khawlni ci-a Tazakhan le Tazapiai lam pan (Kham Khen Pau le Kai Za Dal) kutna thudonlo uh hi. Hih in, hoihlo cih thei le kamtawh gennapi-in, ataktakin, ahoihlo pen mah semtoto veve uh cih lak hi. Tua in leadership sungah genna le sepna kibanglo atuamin pai ahihmanin, sincererity omlo cih ong lak hi.

6.     MYUM in 1987 pan tudong Conference cih pen, SSD maiah kam tawh adeih bangin a ginsak uh hangin, gamtatna tawh langdo den uh hi. Tua adingin hihtheih tawp In sum le pai ban ah zuauphuah tawh kalsuan uh hi, cih nialzawhloh zahin ong dawk hi.

Thukhupna

Makai sep ciangin lampial theih nading ze-etna tuamtuam tampi om hi. Tua ahihmanin, pawlsung nasem makaite in SDA Mission statement le working policy-te kimakaih sakin, team work ahi EC tawh nasep khop theih ding athupi ahi hi.  Lai Siangtho zui-in Christian nuntakzia dik neiha, thumante pilvang le kiniamkhiatna tawh hangsan taka agenngam ding protestant tampi kisam hi, cih ka mu hi.

Pages: 1 | 2  | 3 | 4 | 5 | 6 | 7 | 8  | 9  | 10  | 11 | 12 | 13 | 14 | 15 | 16 |  17 | 18 | 19 | 20 | 21 |  22 | 23 | 24 | 25 | 26 

Please click for more details Apiangsa thute in mailam ading thulamlak