Khenpi 8
SDA Upna
Thugui Tello Uh Ahia, Bang?
A Theology uh khial aihmana a Missiology
uh Sawilen gawppah
Thupatna
Hih thulu in
laisimte ngaihsut ding thu nih ong pia hi—SDA Upna thuguilet Sutna(theology)
telnapi atello kineih uh hiam? 2) Atello takpi mah uh hiam cih ngaihsut ding
thu nih om hi.
Ka neulai-in ka
uu(Hau Suan Mang) tawh zingsang phalvakma in gamkang vu liaka vak gamsa bengin
ka kuan uh hi. Mun khat pan apam mual ka en uh le ken sazuk gol mahmah khat ka
mu hi. Ka uukiangah hi alai ah sazuk, cin kawkin kagen khialkhial hi. Athau
keekin, meisah khup sain, kunpian khikhee in aman zong en hi. Kawk kawmin hilh
hilh taleng, muthei mahmahlo hi. Tawlpi khat ka kihilhna un khua ong vakta hi.
Tua ciangin, keimuh sazuk pen, agalaa singbawk nahileh dih mawk hi.
Ih muhna a man
kei leh ingimna zong manlo-a, isepkhiatna zong manlo pah hi. Tua manin Kawlgam
SDA Mission makaite in Conference deihte tungah hizaha sum, hun le thatang beia
alangdona uh ahang pen Pawlpi le Kipawlna(Church and Organiztion) thu tawh
kisai amau telzia tunga kinga ahi hi.
RB Tongluan in amei ong dawksak:
Hih anuaia lai
copy pen, RB Tongluan Adventist Thukizakna Lom 7, Hawm 1; March 1, 2013
a kihawmkhia, Seventh-day Adventist (Mission),
Pinlon 9, Kalemyo pan ahi hi(A laimai bup ettheih dingin Apendix - K
ah om hi). Hih in upna thuguilet pomzia tawh kisai-a union buppi thumuhdan a
huamkhin loh hangin Conference langdona ah nasiataka diangte thumuhdan omzia hi, cih pen kinial
theilo hi.
Athu simsuksuk
lehang pawlpi kizop dan le innkuan genteh hi. Pawlpi kizopzia hinapi gupna tawh
thukhupna bawl hi-- SDA pen leitungbup ah pawlpi khat bek hi, GC pan Division,
union, local mission, le Circle dong kizom diudeu, ci hi. Atawpna ah, Kale,
Tahan, Tamu, circle leader Pr Ngo Khaw Nang, Pr Vanlal Chhawnna, le Pr Khai Lian Mang-te
tawh kizomlo, Adventist kici pong mawkte pen, Pasian in “Note kong thei ngei
kei hi(Matt 25:12) cih san lel ding hi” cih tawh khum hi.
Tua dan himawk
leh, China gama Adventist kici mi tul 100 valte bang dinmun ah koih ding? Amau
pen SSD huam sung ah om napi, SSD sungah kizopna omlo hi. GC tawh zong kizomlo
uh hi.
Hih atunga
ankampak meel tawh kiciamteh mun teng
pen athukhupna ahi hi. Lai siangtho mun thudopphah(context) le Laisiangtho
thuguisutna ah Gupnathu Laisiangtho gen dan tawh akituak mah hiam cia ngaihsut
phat mahmah ding akisam mun teng ahi hi.
Thu Omzia Etphatna
1)
Hih atunga lai in SDA Pawlpi kizop diu-deu dan gen hi. Tua
pen leitungbup SDA pawlpi kizopna (organizational administrative structure) hi.
Pasian in pawlpi nih neilo hi, ci-in Noah Tembaw tawh gentehna pia hi. Pawlpi
le kipawlna(Church le organization) thu nih kibang mah hiam? Organization le pawlpi
ahi hiam?
2)
Tua sunga omte bek Pasian in thei ding cih ahihleh, tua
pualama omte Pasian in theikhalo a, gumlo takpi ding cihna ong suaksak uh hi.
Hih pen Middle Ages laia Roman Catholic in Pawlpi thu apomdan uh tawh kibang
lian ahi hi.
3)
Hih in Gupna vai-a SDA pawlpi upna thuguipom sutna (sotereology)
tawh akituak mah ahi hiam?
4)
Ahihkeh, Conference-te a huatman uha, tuabanga gelh/gen gawp
ponguh hizaw hiam?
Hilcianna Atom
1.
Pasian in pawlpi nih neilo hi cih pen a tangpi in khiallo hi.
Ahizongin gupna tawh kisai-in Mission le Conference kideidanna ah vabulh pen
Laisiangtho gen gupna ngahzia le SDA pawlpi letzia tawh kituak lo hi. LST le
SDA pawlpi pomdan ah “Pawlpi”(church) le “Kipawlna”(organization) kibanglo hi. Pawlpi(church)
pen kipawlna(organization) hilo hi.
2.
Atunga RB Tongluan sunga agen GC, division, union, section,
circle acihte uh pen, SDA Church Manual(CM) sungah “Organzational”
le “Administrative Levels” bek ci hi. Gupna zon nadinga kisam kizop nading ngimna
hilo hi. SDA pawlpi in Organization (Kiopawkkhopna dawl) level 4 nei-a, Pawlpi sung ki makaihna
(administrative level) dawl 5 nei hi, CM in ci bek zaw hi—Organization dawl 4
pen: Local church, Local Conference/mission, Union Conference/mission, le GC,
ahi hi. Administrative level 5 pen ah:
GC, Division, Union Conference/mission, Local Conference/ mission, le Local church hi, ci hi. Hih teng pen Pawlpi
(Church) cilo-a, zong hilo hi. Hihte pen Leitungbup ah pawlpi kep nading,
pattah nading le, tangkokhiat nasepna adinga kipawlkhopna, kizopna, le
kimakaihna bek hi.
Mimal gupna vai ah GC,
Division, Myanmar Union, Upper Myanmar,
le Kale, Tahan, Tamu Circle sunga Pr Ngo Khaw Nang, Pr Chhawnna, le Pr
Khai Lian Mang tawh kizopna le kizoplohna tawh bangmah kisailo hi. Tua sangin, Jesus in Ama tungtawnloin kuamah Pa kiang
tung ken teh(John 14:6), cizaw hi. Tua
ban ah “gupna ngah nadingin van nuai leitung ah min dang omlo”(Sawl 4:12),” cizaw hi. “Tuno nuntakna laibu sungah
min omte bek. . .”(Mang 13:8; 21:27) gupna ngah dingin gen zaw veh aw.
3.
RB Tongluan gendan pen gupna thu tawh kisai-a SDA pomzia tawh
kituallo hi. SDA kipawlna sunga a om uh hangin SDA upna pan alampial uh hi gige
zaw ahihlam ong dawk hi.
Thukhupna
1.
Hih atunga gupna vai pomzia manlo teng pen Conference
langdoten gupna thu(sotereology) pom dan kici thei hi. Amau in Jesus upna hanga
Pasian hehpihna in gupna ong pia cih Lai Siangtho hilhna sangin SDA Pawlpi tawh
kipawlna le Kizopna thupisak zaw uh hi. Middle Age pan Reformation hundongin
Roman Catholic in hihdan mahin pom uh hi. Tua manin, Martin Luther, John Calvin,
Zwingli, akipan pawlpi lampialna apulaakte “heretic” ci-in minpia uha, pawlpi
langdo, Pasian langdo-te’n ngaihsun uh aihmanin a zialmang zawh nadingin
thatang zangin Pawlpi nahu ngei uh hi. Tun MYUM in anu nungmah zui cih maiding
danin ong om mawk hi—A theology pomzia uh manlo aihmana a mission sepna uh
sawilen gawp ai ve le.
2.
MYUM sungah UMM in zong tua bangin pom ahihmanin 2002 pan
2014 sungin nidanglai Roman Catholic bangmahin Conference deihte vatmang nading
in sum le thatang nasi uh hi.
3.
Tua ahihmanin, hihhun sunga MYUM/UMM in sumtha hizahtak beia
Conference deihte a do-a(offensive) a thasanna uh ahang pen a theology pomdan
uh manloh man zong kihel hi cih kimu thei hi--Upna in ngimna piangsaka, ngim
bangin kisem hi. Theolgy in missiology piangsaka, sepkhiatna in zuipah hi. MYUM in a theology pom dan uh khial aihmanin
missiology sepkhiatna uhzong manthei
nawnlo hi.
Gentehna:
Tonzang bawda omlai-in,
mikhat in a meh huana, sathau so sung ah ankam teh a khah leh mei ong kuang hi. Tua
ciangin, cimawha, singkhuah-am tawh meikuang satmit ong sawm hi. Tua laitakin, ageiapa in
abeelsin tawh asit ciangin mei mit lel hi. Beel neipa le a veenga pa in tua buaina
tawh kisai amuhdan le phisianzia uh kibanglo hi. MYUM pen singkhuah-am tawh sat
sawm, meh huanpa tawh kibang hi—beelkisia mehngawl, supna ding ahihlam ngaihsun
thei khalo hi.Hehna bek masuan hi.
