Khenpi 5

Page 8

         

         MYUM Sunga Zuauphuahnate

                                      

Thupatna

Hih thulu sungah MYUM sunga makaite in kiteelna ah amaumite panmun guan nuam uh ahihmana kiteelna akimawlna uha azat uh zuauphuahna le Conference-te adona dinguha azat uh thumanlo le zuauphuahna akilang zawdeuh pawlkhat anuaia bang ahi hi. Hihte in buaina apiangsak thuliante ahi hi.

Kiteelna Ah:

1.       1992 MYUM Session ah MYUM makaite in nominating committee lutding atelciangin, local mission tekah adeih uh kiteel sak hi. Ahizongin UMM pana Mandalay pawlpimi U Kan Ngyunt pen ama membership omna ahilo Yangoon pan in delegate in lutsak hi. Tua pen UMM President lui Pr Thang Siangh in kiteelna ah UMM president panmun angahkik lohtheihtheih nadingin ava kankuat dinga alutsak ahi hi.

2.     1993 in MYUM huzapna tawh pawlpimi zangin Conference Planning Committee akihel mi 13 pen kumpi Galkap thukante(MI) tungah kikia hi. Tua huhauin Kai Za Dal, Mandalay Nandwin ah khatam simsim taihpeih in kikoih hi. Akhiate paulap pen, akhiat uh mi 13 te in Upper Chindwin Independence ngah nading in gamta uha, India gama Zomi singnuaimite phiangsiah pia uh hi, cih zuauthu ahi hi.

3.     2001, 2003 MYUM Session le UMM Session ah, GC Policy thak cin, nominating committee telna pen policy zuia mipitel ding kimlai, EC pan telsak ziau hi. Tua pen GC Policy thak hi cin mipi khemziau uh hi.

4.     2003 Kimin UMM president in SSD president tungah, Kai Za Dal in pawlpimite sawm-a khat dongin ama adingin zang cih thu email khak hi. Tua email pen Pr Boccala, SSD President in thukkik hi. Tua lai pen Yangoon Zomi kikhopna hun ah Pr Langh Sawm Mang in mipi zak dingin sim khia hi. Tua bang lai a om ciangin Sia Kai Za Dal in UMM President tungah tua vai amanlohna le zuauthu phuahna hangin mindaisakna suak aimanin athumkika laitawh ahawmkhiat kikdingin kiho uha, kiholem theisam uh hi.

5.     2006: Pr Daniel Nangno pensen kha 9 sung union in pialo hi. Amah pen Kawlgam SDA sungah, Lai Siangtho lam, EGWhite laigelhte le English lam, muanbela om siakhat ahihmanin, MMCC in laihilh dingin ciala, 2002 pan MMCC ah siasem hi. Conference thapiakna le MUAS simloh college sangdang a om ding union in deihlo uh hi. Nidangin a pensen pen Tahan Circle ah Pr Malsawma tungtawn-a athohsak zel uh hinapi, napia nawnlo hi. Pr D. Nangno in Union adot ciangin, SSD pan pensen thoh nading form ong khak kei uh ci uh hi. Tuaciangin Pr Nangno in SSD laikhakin pensen angahloh thu zasak hi. Ahihhangin bangmah kilamdang tuanlo hi. Tua bangteng tawh kha 9 ong sawt ciangin, 2006 February kha-in, UMM Session ah SSD President Pr A C Gulfan Jr. ong pai hi. Pr D Nangno in SSD President tungah laikhaka, Kalemyo pan ong puasakin, keimahteh in kapia hi. Azingciang in ongsamsak ahihmanin, azintunna Eden Motel ah nitaklam nai 1-3:50 kim dong kakiho uh hi. Pr Daniel in a pensen angahlo thu ong gena, Union kadotuh ciangin, Union in, “Pr D Nangno tungah pensen form kakhak uh hangin ong khakkiklo hi, ong ci uh hi” cin keitungah ong gen hi—Kua zuauphuak aihia?

Disbandment Bawl Na ah:

2006  February in, 2004-a kikamtamsul-a disbandment kibawlsa pen disbandment bawlkik uh hi. SSD President Pr Gulfan Jr. in, 2003 UMM session-a kipan, akikhangsa pawlpi gawmkik nadingin 2006 session ah ong pai ning ci hi. Session taktak ciangin Conference deih pawlpi 17 disbandment bawlna in amah na welcome zawsop hi. Session delegation pen C le M deidanlo-a sapkim dingin SSD in vaikhak hi. UMM/MYUM makaite in Mission deih lamteng bek sam uh hi. Tua tungin pawlpi 17 te adinga representative omlo hi.  Tua kimlai SSD tungah, avekpi in kasap uh hi, C lamte ong pailo uh hi, ci uh hi.

Session kipat ni’n Disbandment bawl uha, aziingni-in SSD pupi tawh Eden Motel, Cherry Road, Pyin Oo Lwin ah kakihona uh pan SSD pupi in ong gen hi. Ataktak in akipatlamin UMM Secretary in session sapna laipia-in, C deih pawlpite ahihleh travel expense ong kipialo ding ci-in laikhak pen Yangngophai(Ye-Aye) pawlpi pan Sia khatin onglaka kamu kha hi. Session anaihtaktak ciangin ong kisam nawnlo cin phone tawh zasak kik uh hi, ci hi. Chanthagyi pawlpi pen M deih le C deih pawl nih pha uha, C lam mi 93 le M lam mi 30 dektak pha uh hi. Session delegation ding kitelna ah C deihlam in ngah napi, UMM zum panin, M deih Pa Thang Lian Nang sam ziau uh hi.

Tua tunga disbandment piak nadingin Conference Planing Committee (CPC) in   Sunday tangte tawh kipawlin upna lampial khinzo uh hi, ci-in Pr Ngin Kok in gen hi. Sia Gin Dopau le Pa Lianpu in Conference-te athuaklahna uh gen hi. Alanglam pan a anial ding(debut) le amaanlohna hilhcian Conference-te ading, delegate kuamah omlo ahihmanin thuman bangin sang uh hi.

Apaulapte uh manlo hi, ci-in, tuakum August/October kim ciangin Dr. Sangchia in survey abawlna pan CPC te Dinmun Pulaakna (Official Declaration) lai SSD le MYUM puak hi. Tua sungah CPC-te in Sunday ah upna lampiallo ahihna uh pulaak uh hi.

Hih vai ah UMM/MYUM in thukantel masa nailopi-in, paulap kiplopipi mahin, hehna(emotional) huhau tawh mipi thuzawh nadingin a maan bangin azang uh ahi hi. Hihmunah Kawlgam SDA worker le makaite sungah critical reasoning thanem hi cih ki muthei hi.

Thukhenzum ah Zuauphuahna:

1.      Sia Gin Do Pau:  Tazalu semin Kalaymyo-ne Tazazi Zum ah Zazatat Gyi Pohmah 195 tawh mi 8 te khia hi. Hih thu ah apaulap dingin, biakpiakna neia kakikhop laitakun, Hau Lian Kham, le Tung Sian Muang te biakinn paden pauh pan kahin ong lut uh, biakpiakna nei theiloin kaciah uh hi, Tazazi Zum ah gen hi. Ataktakin tuani-in apualam ah kei sunhunpi zatni hia, biakinn sung mission lamte nawngkaina omloin kikhawm uh hi. Aman uh ciangin Pa Sian Cin Zam in sia Gin Do Pau tungah kikhopna senpi le pilo adot ciangin, senpi mah cin dawng lai hi.

Thukhen Zum ah thu akidot ciangin, kikhawm thei gige kimlai, kikhawm thei kei ung acih uh pen thusuakzolo le Conference-te, biakinn pualama kikhopna lah kumpi phalna laitawh ahihmanin, amau thusun thusuaklo ding cih amuh uh ciangin athubawl pen dokkik hi.

Asawtlo-in tua thumah athakin bawlkika, tazakhan sunga ahel mi 8 lakah abehte 2 helnawnlo-in mi 6 khia leuleu hi. Amasa-a a paulap teng kheelin, “kikhawm theivetloin inn ah ciahkik ung” cileu-leu hi. Tua ciangin Conference lamte in zong amau zuauphuah siksanin, akikhawmlopi uh, kikhawpna koici va nawngkaisak thei ding kahi uh hiam, Pohma 195 in “biakna vai khatpeuh hang tawh mihon khat kikhawmin a om laitak uh, kam tawh ahia, thale ngal tawh ahizongin kikhopna susia dinga va phinna akipan nawngkaisakna” ci ahihmanin, akikhawmlopi uh nawngkai sak cih nading omlo hi cihtawh thunial kik uh hi. Tua vai ah mission tazalu lamin athu lel hi. Kikhawm thei napi kikhawm vetloin inn ah ciah ung acih pen zuauphuahna ahi hi.

2.     2008 January: Rakhine gam:  Mission sia Soe Maung Maung in Tayalu semin Kyauk Taw Tazazi Zum, Rakhine State ah Sei Kho Hao, thu bawlhi. Apaulap pen uh thu nih hi-a, SDA Minzat vai le Mission inn No pen Conference siapa in ong gukzat sak hi cih ahi hi. Pr Memory khutzat mite mah paisakin, siapa man dingin Township Police officer-te hopih sak uh hi.  Tuate in siapa na theibilbel uha, ar-makhan napia uh hi. Conference lam in Sittwe pan Lawyer khat cialin athu gensak uha, a thunihin conference lam in zo hi. Tua Lawyer pa in laigelhpa tunga, “sakhan ate (police officers) tudoh bet mar tatmadaw thauh-langyi tayauk par de lo piau de” ong ci uh ci hi. Galkap ulian ahilopi mite in tuadan asak dingin akineih pen uh zuauphuahna ahi hi.

3.     2008 February: No 6. Galkap Thauhlanzi Bu Kineih: Yangoon, pan bugyi kineih MYUM/UMM worker Myothit, Mandalay-a pastor khat zangin, Sia Singpu tawh Tiddim va pai uh hi. Tuakhitin Pr. Ngo Bem tawh ong kithuah in Teinkaya le Khampat vapai uh hi. Khampat No 1 ah McNeilus huhna tawh kilam inn khat om hi. Tua lai ah Conference lamte in sia U Kyaw Sin omsak uh hi. Tua inn zong laksakkik sawm uh ahihmanin Pr Ngo Bem tungah ap nading sarchoh letmat thuh dingin galkapbu akicitawmpa in Sia U Kyaw Sin letmat thusak uh hi.

Khampat No 2 pastor pa sawlin U Kyaw Sint sam uh hi. Atunciangin, galkap Thukan Bugyi ahihnateng kigen uh ciangin, U Kyaw Sin in No 6 Tatmataw Thaulangyi aa sya--- na thei maw acih leh, bu kineipa in theimah ciziau vial hi. Tua ciangin U Kyaw Sin in umtakpi le Bugyi khat level pen, amah san 2 ciang a semngei khat in zahtak lua pahaa, agen khempeuh mangsukpahpahin, inn apnading, letmat thu  hi. Kai Za Dal le Kham Khen Pau kum 20 sung thongkia(kihawl) ding ci leuleu hi. Tua ciangin U Kyaw Sin omna Khampat No 1 inn pen Pr Ngo Bem tungah ap nading thukimna(Sar-choh) letmat thuh sak hi.  Tua khitin Khampat No 1 galkapgate geia Restaurant ah anlim nono nekpih uh hi. Zing ciang Kalemyo ah ong pai in, M ah ki tuiphum in, Kawlmite lakah nasem in ong kikoih dinga, kha sum tul 45 ong kipia ding hi, cin zol uh hi. Tua khitin Khampat No 2 hausapa kiang ah pai uha, Sarchoh ah letmat thu dingin kun uh hi. Biakna inn vai ahih leh, Myisazian zum, Thwe Oh Zumte kadot kul lai ding hi, acih ciangin, sumlomkhat lakin tah uh hi. Hausapa in kei sum kisam keng ci hi. Nitak nai 8 gual hita aa, Kale ciah lai ding cin nawhsa takin a hanciam uh ahi hi.

Thu omzia teng angaihsut kik ciangin, U Kyaw Sin lunghimawh kik hi. Azingciangin bukineihte vaikhakzui inn Kalemyo pai dingin Khampat Bus ah azi tawh tuang uh hi. Teinkaya pan, ana thuzawhsa uh, Sia Thang Hlim zong, na tuanga, bukineihte vai gen hi. U Kyaw Sin in tuavai maha Kalemyo pai sawm hi-ung acih ciangin, Thang Hlim lungdam mahmaha, lengmaw ong pia ci hi. Kalemyo Car Lay Kwin(tun Institute of Nursing Training) a tun uh ciang U Kyaw Sin-te tuak uh hi. Thang Hlim in ipai nading Paangpi hi tungnailo hi hang, banghang tuak nahi uh hiam acih ciangin, maawtaw kham ungh, ciin Sia Kai Dal kiangah athu omzia teng dong uh hi. Tua pan Khalaya 49 ah dong leuleu hi. Azingciangin Kalemyo galkap thukante zum ah pai in adot leuleu ciangin, evidence bang nei nahiam ci uha, Khampat a a letmat thuna Sarchoh lak uh hi. Tuate in Kha-ya-kah ah tai leucin, galkap takpi ahihleh action la thei ding uh hi, acih ciangin U Kyaw Sin zong Khazaka zuma, G 1 kiang ah pai-in athuteng vagen hi. G1 in zong athau-atha bang nei nahiam acih ciangin, a Sarchoh mah lak hi. G1 in hihpen galkap takpi ahih le hihloh kitel kei in, Khazai Police Zum ah vapai unla va khia uh, ken zong phone na set pah ning cin a zumphone mek paha, angahloh ciangin vapai vua ci hi. Khazai Police zum in Myone Police ah va khia un cileuleu-a, apaikhiat lian uh ciangin Khazaing Police zum ah Dakasa phone lut ahihmanin, lehsapkik in U Kyaw Sin tungah athuteng dong uha, ami zongin aman ding kisawl pah uh hi. Khazai Police zumah akhiat ciangin Khazai Police ulianpa maivil in na taisim sak uha, tua vai ong khawl hi.

Tua banga zuauthu le gamtatna hoihlote kham dingin laigelhpa le Kai Za Dal in MYUM makaite tungah email tawh zasakin, SSD copy pia uh hi. MYUM ah Pr Muller Kyaw, Pr Memory Tun; SSD ah Pr AC Gulfan Jr. makai ahi uh hi. Tua khit akipan bugyi kineihpa pen union evangelist danin munkhempeuh apaikawikawi thei dingin Yangoon ah samsuk uh hi. 

U Kyaw Sin in hihvai apianna Tamu gam ahihmanin Tamu tazazi zum ah khia hi. Amau in zong U Kyaw Sin sum 5000 nesim cin khia leuleu pong uh hi. Tazakhanpa pen, ong pai mengmenglo hi, Nargis ah pai hin ong ciah nawn kei ci uh hi. Atawpnin be ong om sama, Bu Saw Htoo acih pen, “Balachaih” tawh bu cihna hikei in, “Bakung” tawh bu akici hi ung cin siamtakin athu zo uh hi. Hih vai ah, M lam in honkhat mah beituak uh ciangin Tazalu tuakin amau khiatna ah lelsaktuaka akisikim ong suak hi.

Hih Khampat lam vaiteng pen U Kyaw Sin genna pan hia, Kalemyo-a Tadin-tatphuaih zum pan Dakasa Zum, le Khazai Police zum pai dong thupiangte ah, ong zawn aihmanin,  keizong va muhpih le va zakpih kahihmanin ka zak le ka muhteng atoma kong gelhkik ahi hi

4.   2009: Pr Ngo Khaw Nang: Tayalu semin, Pr Kai Za Dal, Kham Khen Pau, le Sia Thang Khan Dal mi 3 Pohma 500 tawh khia leuleu-a, kum 1 val mah sawtin, Pastor Ngo Khaw Nang in a thu lel hi.

Tazalu teti Sia Gin Do Pau, le Sia Thang Hlim:

Sia Dopau in, “Hih tazakhan mi 3 te in Sabbath ni simin soundbox zangin, Pinlon-Kalemyo biakinn sungah, Ngo Khaw Nang pen Dek gamnuai mite tawh kipawl, organizer hi, makai ding cingtaklo mi hi, sum tungah citaklo hi, ama thu um kei un cin agen den uh, ka inn pan kaza hi, biakinn le ka inn kigamla lo hi,” ci hi.

Tuathu nipisim in Kai Za Dal, Kham Khen Pau in thuhilh lo ahihna Pr D Nangno kep hunsehna lai kum 2 sunga kingahkik a teti in kilak hi. Biakinn sunga thukigen a innpan azakloh zia ding, biakinn nunglam abitin kikhak ahihna photo tawh kilaka, Tazakhante lawyer pa tek in a biakinn nunglam abita kikhakcip ahihna ong en-in tua ciang ahitheilo thu ahihna um pan hi. Thang Khan Dal pen lah Chanthagyi a om hia, tua kum 2 sunga hunsehna ah amamin omlo hi. Kham Khen Pau in lah kha 3 cin sialin, nekkhawm bekah hun zanga, nekkhawmthu bekmah agen ahi hi. Kai Za Dal lah Mandalay, Monywa thukhenzum pai in nipisim hun zangloa, kum 2 adingin 4 vei khawng bek hunsehna ngah hi.

Sia Thang Hlim: Teinkayah ah Kai Za Dal 4 vei ongpai-in Pr Ngo Khaw Nang mindai nading(atunga mawhsaknateng) vive gen hi. Kham Khen Pau bel 1 vei bek khawng hi, cin anunga tu Kham Khen Pau lehetkawmin kisuang sapipi in Tazazi zum ah genmialmuala zuau phuak mawk zensam hi.

Kham Khen Pau pen ama adingin abelh le amuan mahmah asiapa ahi hi. Methodist pan SDA asuah nading le MUAS sang akah theih nadinga ageel sak le thudang tampi ah patahna apiapa khem ahihmana kisuang ahi hi.

Tazakhan Teti U Kyaw Sin in hihte in tuabang thu agen thei ngei keng acih ciangin, nang Khampat a om thei kei niteh cin amau lam Lawyer in adot ciangin, Khampat le Teinkaya kinai mahmah, hih tazakhante Teinkaya apai ciang keikiang nawkloin pai ngeilo uh hi ci’n agen ciangin amau zuauphuahna pen thukhenzum-ate muhtheih dingin ahong dawk suak hi.

5.    2011: Pr Min Lwin in Tazalu sem hi. McNeilus Maranatha Christian College (MMCC) huang le Pinlong Seihkantha-a SDA huang le sang pen Mission neihsa hi, ci’n Divisional Civil Court ah thu khat bawl leuleu uh hi. Tua thu Sagaing Taing le Nyipi Taw dong mah tung to hi. Thuman pen Kyas tein 5,000(Ks 500,000,000) in bawl uh hi. Lawyer cialman penTazama ah atthuman-ii (Ks tein 5,000) pan 10 %  piak kul hipah aihmanin Ks Tein 500 hipah ding hi. 

MMCC huang pen MYUM neihsa hi, acih nadingunin, Misazian Pongsan 105 Kai Za Dal min tawh a omsa kimlai, tazazum a lahding cin, Seventhd ay Adventist min tawh Sia Van Pe O bawlsak uh hi. Tua ban ah Kai Za Dal pen MYUM Building Committee in Union sum tawh Lai Siangtho sang hon nading huang alei dingin a sawl hi, cihna lai-zuau khat bawltawmin Union President, Pr Memory Tun, signature thuh hi. Tua lai pen tung ah 1998 July 6 date tawh Union zumpan UMM President tunga zaksakna lai bangkekin gelh uh hi. (APENDIX- D a). Tua lai pen Kale-Pinlong Pawlpi Elder in zong angah ciangin, Union a zasakkik bangdan mahin, Pa Pum Za Lian in minthuhin, lai khat kiphuaktawm leuleu hi (APENDIX – D b).

Hih atunga igen lai 2 tegel tunga min kithute en leng, Union pan UMM akhak pen uh ah Memory Tun signature om-in, Kale-Pinlong Pawlpi elder in Union azaksakna pen ah Pa Pum Za Lian in min thuh hi. Hiteng iet khawm ciangin, Pr Min Lwin in Tazalu sem hi. Tetti lai dingin Memory  le Pa Pum Za Lian min thuhsak cih thu aihmanin, Min Lwin, Memory Tun, le Pa Pum Za Lian kithukimin hih zuaulaite ong piangkhia hi cih ong dawk hi.

Hih lai pen Tazazizum ah ten uha, vote numbat omna original lai lak dingin Tazapiai lam in ange-a, bawltawm alah leh zuauphuakin thubawl ding cih a om ciangin, laktheilo uh aihmanin, Tazazi zum in 13/1 teti adingin Tazazizum ah guang theinawnlo uh hi. Tua ciangin, Tazalu Pr Min Lwin, MYUM Secretary, in alai pen amanmah hicin, kiciamnalai(က်မ္းက်ိန္လႊာ) bawlin,  tua(zuauphuaka kiciamna lai) bek Tazazi zum ah ten thei uh hi.  

Tazazi zum ah thu gen ding le ong kidot ding ciangin, Laisiangthobu tawisa-in, thuman ka gen ding hi cia kiciam vive uh ahi hi.

MMCC huang pen cikmahin mission tawh kipawlin leina om ngeilo hi. Mission in operating le fund khat peuh pan huhna zong pia ngeilo hi. Thamlo-in, 2002 May kha-in SSD in MYUM ah Lead Conference( makaihna lam pattahna) nei hi. Friday ni tentan man ciangin Pr Kenneth H. Suanzanang, UMM Presisent in ATI vai SSD in gennop nei ing ci ahihmanin MYUM le UMM officer-teng khanmeeng ah kimu ding cin ong zasak hi. Tua ciangin, Dr. G. T. Ng, SSD Secretary in bang thu gen ding kahia ci’n UMM le MYUM officerte lehdot zaw phing mawk hi. MYUM le UMM officer teng ong hopihna ah zong, election vai buaina donga, Pr Tin Tun in koman ahoihthei belin na phisian nung ci hi. ATI pen Training sang dingin propose-a union uliante le Pr Kenneth in asanzolohna thu gen uh hi. Tua ciangin Pr Memory in “Another problem is that Kalay myo college is going to have graduation very soon” ci hi. Tuaciangin Ng in tello-a ong dong hi. Kalaymyo ah tan 10 khit ciangin aban zomto uh hi, cih ka gen hi.  Tua leh junior college hisakin union extention hisak leucin, union vangik ong dawn dinga hoih mahmah ding hi, Dr Ng in ci hi. Tua laitakin, union ulian khatin “What kind of extention?” ci hi. Ng in AIIAS pan kawlgam ah DLC program tawh MA kong hilh dan un, MUAS pan siate 1 kum 1 in kha 3 cihbang hilh sak leucin, ci’n lampi khung pian napi union pupi Pr. Tin Tun in “We have no money” ci hi. Tuaciangin hih thu kikup, kikhawl hi—union in college hon nading sum tawh huh cih thadah, college om ding adeihlo mahmah uh hi. Azuau phuak uh ahihi.

Zuauphuah akilatna: 1) Alai tunga address apiak uh, UMM President pen tua hun lain Kham Khen Pau, hihlaigelhpa, hia tua bang lai om ngeilo hi. 2) Copy apiakna uhah, Kale Circle le Tahan Circle cin Kalemyone ah Circle 2 om sak uh hi. Tua hun lai-in, kei term sungin (1997-2001) Kale Circle bek om hi.

Hih zuauphuah awilo: Kham Khen Pau in hih lai pen zuaulai hia, Pasian thukham palsatna, Adventist le Christian nuntakzia tawh kituaklo gamtatna ahihmanin a awilohna 2014 April in Pr Memory tungah laikhak hi. (Apendix – E)

6.   Zuau Phuak Dinga Zolna Kinial Atunga athu bawl uh zonuam lua-in, UMM pan Memory mizatpa makai-in pawlkhat (Sia GLC, PZL le pawlkhat) Mandalay a om MMCC huangneipa Ginno(RC) kiangah va pai uha,  a “huang pen SDA Mission Pawlpi tunga kazuak hi,” cia

Tazazi Zum ah tetci pang dingin va kun uh hi. “Thuman agen zaw ding siate in zuauphuak dinga nong cial zawktham mawk uh, kakilei lai un note kuamah ong mukha keng. Zo mite pilna ding kadeihman-a Kai Za Dal kazuak bek hi, SDA pawlpi ading zuak ngei keng,” ci-in athumna uh manglo hi.—doctrine man len ci-a kisialte in zuauphuak, dawi doctrine pom ci-a asimmawhte in thuman gen zawsop cih ding ahi hi.

Kale Khazaing Tazama Zum ah:

2013: MMCC Huang kileina Sar-chokte kiplua ahihmanin tuateng suphiat nuam uh hi. Tua ciangin Pr Moe Khaing(Ngo Bem) in Tazalu semin, Kalay District Thukhen  Zum ah Kai Za Dal-te nupa le zuaupphuahpih nuamlo Huangnei Ginno-te nupa(mi 4) thu bawl leuleu uh hi.  Tua huang pen 2002 akipan Kai Za Dal min tawh Kalaymyo Myone Mii-sazian Zum Pongsan 105 a omsa gige pen, Sia Van Pe Oo sawlin, Thukhen zuma lah ding cih paulapin, 2010 date tawh “Tat-tama Nih Myiau-Len-chien Atendaw( သတၲမေန ့ေျမာ္လင့္ျခင္း အသင္းေတာ္ ) minin khat bawl thuah sim uh hi (APENDIX -  E).

Tua zuaulai nihte(Apendix Da le Db) le Mie Sazian zum 105, 106(Apendix-E)  pen Kalay District thukhen zum ah Upadi amengh 13/1 kici(နည္း ဥပေဒ အမိန္ ့ ၁၃/၁) ah Tet-tii Document dingin guang uh hi.

Hih banga Pastor-te zuau phuahna pen thukham palsaltna ahi hi. Church Manual zuia displinary action kila dingte ahi hi. Hihte pen corruption lianpipite hinapi, Kawlgam SDA Mission sungah siate le makaite in corruption in ngaihsun khalo uh hidingin ka um hi.

Tua banga zuauphuah nadinga kizang khia sumlom tam lua ahihmanin, thukhenzum khempeuh ah athu zototo pah zatzat helsam uh hi.  Tua manin uliante nasep pen, etpakin, Pasian in apanpih mahmah bangin pawlpimi tampi in asiatna muzolo uh hi. Ahizongin ataktakin, corruption mangpa in apanpih manin, corruption a sangmahmah ahizaw hi.

Ciapteh Ding:

Hih atunga MYUM gamtat gilote khawl nadingin Kai Za Dal le Kham Khen Pau in 2007 April le 2008 in nihvei MYUM officer-te tungah lai khakin dialogue neih ding kun uh hi. Tua kutna pen union Dept director-teng le SSD president tungah zong copy pia uh hi. Ahihhangin MYUM in dawnkikna neilo hi. Tua khit, 2012-2014 sungin laigelhpa in MYUM sunga thanghuai gamtatnate Reform ding deihin ZAC panin MYUM uliante zasak huan dingin tamveipi pulaak hi.

2014 kum March 27 in zong Pr. Memory Tun, Union President, tungah Kham Khen Pau in zong directin laigelh hi (APENDIX B).

Tua hunlaite in Conference-te bek akhialin kingaihsuna, MYUM makaite pen akhial ngeihetlo vantungmi bangin ngaihsut laitak ahihmanin, pawlpi makaihzia zong tua zaha corruption a agolmahmah dingin asunga omte kuamah in seh theilo uh hi.

Hih atunga teng pen MYUM president le Secretary in Local Mission President, Union Treasurer, Union Secretary, le Union President dong asep uh term sung(2004-2014) a Conference-te sukphiat nading MYUM sum lompi zatna le zuau phuahna a nasepna malgolte ahi hi. Hih banga gamtatnate pen corruption vive ahi hi.

Sumzatna ki audit theilo:

MYUM (Union) sungah sumzatnate auditor-te in a et ciangin, sumlom zatna tampi om napi SDA Finance Policy zui-in EC voted bawlna, authorization piakna, approval neihna cite le accounting system zuia report piakna le receipt omlo tam mahmah ci hi. Tua thu a om ciangin report a bawltawm uh hangin “after thought” suak ahihmanin, auditor in sangzolo hi, ci uh hi.

Auditing Service

Thukhun(principles) pen SDA Bylaws and Working Policy zui in

(1) MYUM ah Union Executive Committee (EC) thuneihna asangpen hia, officerte pen EC aitanga dingin semkhia (execute) dingte hi bek ahihi—organizational structure ah EC sangin Officerte thuneihna sangzaw ngeilo hi.

(2) EC in a kipsaksa pawlpi sum thohna le zatnate (workers payroll zong) ah Officer khat teitei in approval/authorization piak lohin sum kithoh theilo hi. Mi khat bek in kem, sazian adeihbangin bawl, adeih hunin sumzeek loh nading le sum hangin thuneihna zatkhialhna le muanmawhna a omloh nading deihna hi. Tuamanin, Treasury department ah Treasurer, Accountant, le Cashier ci-in post 3 kikoih hamtanga anasep panmun (job description) nei tuamciat uh hi.

Akithoh sumte pen EC thukimna voted SDA policy zui-in kizang/zanglo, en ding uh ahi hi. Sumzatnate pen report/receipt tawh accounting department ah record kibawl dinga, Treasurer in approved ding hi. Tua tungtawnin GCAS in audit bawl ding hi, cihte ahi hi. 

 (3) Mi khatbek in sum le za tawh thunei in authoritarian le dictator danin pawlpi sung Pasian nasepna ah a omloh nading deihnain tua bang thukhun kikoih ahi hi.

Union, local Conference/mission  level dong audit bawl pen GCAS(General Conference Auditing Service) pan Division sung adinga nasemte ahi uha, atunga thukhunbulpite ngimsanin audit abawl uh ahi hi. Audit bawlna pan amuhkhiat thute ah khensatna pia theilo uha, organizing body tungah tuateng kisam cih ciang recommend in zasak thei bek uh hi. Akisam banga khensatna apia ding pen  EC ahi hi.

 Etpak dingin, Sumkempa tungpan president in Kyat Tein 500 ta thumvei (agawm in Ks tein 1,500) force in thoh hi (Apendix- G), acihte pawl zong a president hihna authority zangkhial ahihmanin, atunga mismanagement le administrative corruption lakah kihel hi.

Hih vai pen 2014 March kha-a, Kawlgam ciah, Thailand zuankik dinga kapai lai-in MYUM zumpi-a nasem, Sia Van Pe in, Kale - Yangon Bus tuan khopna ah, ong gen ngeikhin hi. “Na pupite adamdam uh hiam?” ka cih leh, “December 2014 ciang kingaksak bek hi, tua khit ciang khawlsak ding ci uh” ong ci hi.

Thukhupna

Hih atunga igendiudeute pen Union uliante makaihna sunga akiphuah zuauphuahnate ahi hi.  Muhtheih admine panin mismanagement le administrative corruption cia mawhsakna a om nadingin, union makaite in amau hunsungin, a thuneihna uh azatkhialhna munte ahi hi.  Zuauphuahna teng lakah Tazazi zuma aphuahte uh pen LST tawisa-a thuman kagen ding hi ci-in kiciamsa-a zuau gennate ahi hi.

M le C kidemna aihmanin zuauphuahtheih tawp a zat pen ahiding mah tawh akibat hangin, “Na vengte langah amanlo teci pang kei in.” cih Pasian thukham palsatna ahi hi. Tuamanin khalam adingin alauhuai mahmah zaw ahi hi.

Thamlo-in thumanlo, zuau phuahna le sumtha tawh ong kimawl uhciangin, tua adinga Union presidentpa khutzat worker-te zong, pupa gam luaha neih ahilopi-mahin, pongmaan SDA worker khat neihzawh dingzah sangin, hauzaw uha, hih thute hunsungin innmun le motor neihlawh zopah zahin gamtat siangtholo uh hi.

Hih hunsung tengin makaite pen, buaina lemtuah-a phisian ahih sangin, buaina piangsak  le alian sak semsemte ong suak zaw uh hi.

Pages: 1 | 2  | 3 | 4 | 5 | 6 | 7 | 8  | 9  | 10  | 11 | 12 | 13 | 14 | 15 | 16 |  17 | 18 | 19 | 20 | 21 |  22 | 23 | 24 | 25 | 26 

Please click for more details Apiangsa thute in mailam ading thulamlak