Khenpi 3

Page 6

                   

Kum 13 sunga Paulap Dingte

Bangteng Semkha Peuhmah  Zawzen Uh Ahia?

        

Thupatna

Hih vai tawh kisaia et ding hun pen kum 13 sung huam hi-a, 2002 pan 2014 ciang ahi hi. Hih hunsunga MYUM makaite nawkkhak thunawngkai buaina lianpi 5 om hi. Amasa pen Insein SDA pawlpi vai siang nailo. Anihna pen 2001 Union Session Kiteelna  vai le  ATI  vai;  a thumna pen 2002  January akipan UMM sunga conference deihte union in alehdona le kumpi zum le thukhenzum ah khiatna le 2003 UMM Triennial Session Kiteelna;  alina pen 2007 MUAS minamvai buaina; le a ngana pen SDA zatopi ngetkikna ahi hi.

Buainate  MYUM Makaite Nawkdan:

In Sein Pawlpi vai: Makaite in buaipihlo

Hih pen 1995 kim pekpan kipan hia, union tawh kizomlo le pawlpi leitanga Pr Aye Han lei innmun le innlam vai zong ahi hi. Union makaite in In Sein huanga mun awng teng innmun sehin zuak uha, siapi pensen lakuan dingte in lei ngeingai uh hi.  In Sein vai pen Union makaite in tamveipi ahanciam uh hangin siangtheilo hi. 2002-2014 sunga  union makaite in va lawng senawnlo uh hi. Tua manin tutunga union makaite khawlna ah Insein vai kihello hi.  

Session le ATI Vai: Makaite Khak in kiteelna Kimawlna in zang

2001 December in MYUM Session ah, SSD makaipi ong tunghak hi.  Nominating committee alut ding sehna ah, GC Sessiona kizang, policy thak hi, ci’n union makaite in EC  sehsak ziau hi(election hilo-in appointment) suak hi. Tua vai UMM mipi alungkim loh ciangin kiteelna pen SSD mai ah paulapin ong om hi. 2002 January in UMM in Singunau ah Session nei leuleu hi. Tua ah Union President Pr Tin Tun ong zekai leuleu hi. Ong tun ciangin UMM president Pr Kenneth tawh anih un, GC kiteelna thak cin policy lopi khat ong pan leuleu uha, kibuai pian leuleu hi. Tua zom, 2002 February kha-in  MYUM EC in Yangoon ah ATI sang khakna vote uh hi. UMM in April, 2002 Tandaung khua ah Pr Kenneth makai-in ATI khakna vote la leuleu hi. Tua EC ah union representative in Pr Muller le Sia Memory kihel uh hi.

UMM ah Pastor Kenneth ong tuntoh ciangin sang pawlkhat phiat ding vai ah mipite lunghimawh in patau uh hi. Hih thu nihte in UMM pawlpimi sungah lungkimlohna khangsak hi.

ATI vai ah Union President Pr Tin Tun tawh tamveipi ka kikum uh hi. President council ah,”Hun khat ciang ipom loh phamawh ding hun ong tung ding hi” cin, Pr Muller, Pr Samuel Po le Syam Pricilla mai ah gen ngei hi. Syama Pricilla simloh in layte hon hiphial lezong deih keng, ci ciat uh hi. Aih hangin kei le Pr Tin Tun bek a zum sungah kakikup uh nunung pen ah, “ U Yan Aye, U Muller, U Memory, Syama Pricilla te pen mipil vive himawk uh in, kikantan zolo hi veh aw!” ong ci a tua khit a kipan ATI vai amah tawh tampi ka kikum nawn kei hi.

 “Kiteelna vai, 2001 le 2003 a pen keima khialna hi. Kiteel dan nam 2 om, khat zawzaw kizang thei cin ulian khat in ong cihmanin mang kha ing, tua lah amanlopi an hi hi” cin Pr Muller in ama kimawlna strategy zat ahilamtak 2005 October 31 in laihawm khia hi. Tua hunlaia, kiteelna ah uliante kimawl athei, MYUM Chief Accountant, U Doe Doe Chit in, “Daai kasa dar, dai gah sa tua da pawh” ci ziau hi. Amah pen Pr Muller-ii sunghpa ahi hi.

Conference Planning Committee:  Makaite Dolian pen

Hih thulu pen khen nih suahin I en ding hi. Akhen khatna pen hihbuaina hun 2002-2014 ma-a union makaite in Conference le agimnam peuhmah asimthama a dona thu hi. Khen nihna pen hih buaina huamsunga union makaite in akilanga conference adona thu ahi hi.

Asimthama dona: 1987 - 2001

UMM ah Conference nget kipat pen 1987 hia, FED in thuhoih ding tampi gelpih ngeikhin hi. UMM in zong a Local Conference ading Bylaws and Working Policy zong bawlin apkhin uh hi. Ahizongin, a sawtloin Conference mipi tanga ding mi 13 pen Galkap Thukan Zum( Mandalay a Military Inteligent) ah Upper Chindwin Liberation Movement hi, Gamnuai mite tungah phiangsiah pia den uh hi, cin zuauphuakin kumpi telkhialh theidingin khiangei khin uh hi. A support siate elbawl le hepbawlna tampi om toto hi—a motto uh pen “Kyu Pin khoh, Kyu ngoh ma kyan sii zah”( က်ဴ ပင္ခုတ္၊ က်ဴငုတ္ မ က်န္ေစရ  )  ahi hi.

Akilanga dona: 2002 - 2014

Hih pen anihveina Conference ading mipi diankhiatna ahi hi.

2003 January in, Pr Tin Tun in Conference-te pen “cancerous disease” hi, ahunlapin atkhiat ding hi, cin laihawm hi. Ahih hangin ama hun sungin SSD mai-ah union le Conference makaite kihokhop theihna tampi vei omthei lai hi. Amah ong cidamlo vat-a, Pr Muller in union ong let cianga kipan buaina beilam sangin khanlam ong manawh zawta hi.

September 24-25, 2003 in SSD makaipi Pr A. C Gulfan Jr. pen Kawlpi ah ong paito in conference ngetdan ding lamlahna mipi tungah hilhcianna nei hi. September 25 in Yangon ciah suka, ama nung ah UMM officer 3(Pr Min Lwin, Pr Kai Khan Khual, le Sia Thang Lam Mung) in zingsang nai 9:00 gual in Pinlon Kale biakinn sungah CPC upate tawh kimuhkhopna nei hi. Tua lai ah Conference ngetna lai fill up le plan suaih ding kikum, kithukim in lungdamtak in kikhen uh hi. Ahizongin October ciangin union pan conference-te paikhia ding cih kam ong ging veve mawk hi.

2003 Kum kipatlam in Union President in conference deiha kipan UMM layte pen “cancerous disease bang ahihmanin, ahunlapin atkhiat ding ahi hi” cin a conference tunga alungsim puakzia uh dawksak hi.

2003 March in, Pr Tin Tun in, laigelhpa tungah, union pan Ministerial director le UMM ministerial director sawlin UMM-a conference deihle deihlo minla sak ding, SSD ah puak ding cin gen hi. SSD in tua bangin sawl hiam cih adot ciangin presidentpa in sawllo ci zel hi. April in bel union pan Combine Institute cin union director honkhat paito saka, pawlkhat in conference langdona laihawm uh hi.

Hihkum kipat lamin UMM president in SSD president Boccala tungah, Kai Za Dal in mikhaikhawm in a sawma-khat teng uh la hi, cih thu zaksakna hituak hi. Tua bang takpi ahihleh, sawma khat aman alak nading right neilo hi, ci-a athukkikna email lai pen Yangoon Zomi hun ah Pr Langh Sawm Mangin mipizak dingin simkhia hi. Zuau phuak hiam, thuman le manlo omzia kantellopi in makaite in a upmawh uhtawh thugen ziau uh ong suak hi.

Pr Kenneth UMM ong tun ciangin ATI phiat ding amasapen in ong semto hi. Tua ciangin mipi khasia in SSD ah complain le conference ngetkikna lai khak uh hi. Tua ciangin SSD pan UMM president vai le conference ngetna vai-in lamlak dingin 2003 April in Dr. G T Ng, SSD Secretary, May Myo ong paito hi. UMM, MYUM le CPC khutkilen in conference kalsuantoh dingin lamlahna pia hi. Tua kum September 24-25 sungin SSD President thak Pr Gulfan Jr. Kalemyo ah ong paito in worker teng tungah conference a thapiak nading hanthawn hi. Azing ciangin mipi tungah kalsuan zia ding hilhna nei hi. UMM Secretary in Conference ngetna ding keima masuan hi ci ingh, cin mipi kamciam pia hi. Azing ciangin UMM officer 3 le CPC kimu in kalsuankhopzia ding kikamkupna nei uha, kithukim uh hi.

2003 October in MYUM pan Conference-te pammaih kisalo, kipaikhia lel ding cin, abeisa thu teng kikhel in aw ong ging hi. Amai kha November-in CPC in Pa Khualzanang kisawlin MYUM officer Pr Muller tawh kiho dingin pai hi--thute ahoihlama geel ding in kithukim uh ci hi.

2003 December UMM Session Pan Buaikikna

2003 December 29-31 UMM Session ah Nominating Committee lut dingte sehna ah, UMM-EC in sehziau uh hi. Delegate at large ding ci-in UMM in RB makai khat amathu tawh an mawk guan leuleu hi. Tua dante policy tawh kituaklo cin layte apaungam zawdeuhte in MYUM makaipi Pr Muller Kyaw tungah gen uh ciangin, policy kizuilo mah aiphot tadih ve cin, kikamtam gawp uh hi. Tua huhauin, MYUM in UMM EC ah CPC te hawlkhiat dingin hanciamin, vote zolo ahihmanin, worker teng samin thuneihna zangin vote sak hi.

UMM/MYUM in CPC Disbandment a bawlna le Kumpizum akhiatna

2004 Januanry 1date tawh UMM pawlpi 11 disband piakna lai hawmin kumpi zumte ah pia uh hi. CPC in January 4-8 sung khawmpi ah, UMM makaite in a vote uh puahpha in CPC tawh khutkilet nading ngen uha, UMM in donkikna neilo hi.

2004 February in MYUM Acting president Pr Muller in Conference-te kumpizum ah akhiat theih nadingin UMM worker pawlkhat Special Power of Attorney(SP) pia hi.  Tua khit akipan MYUM ah Legal Department pen Pr Kenneth H. Suanzanang, Pr Kai Khan Khual, Sia Mg Mg Myo Chan-te in lensak uh hi. Hih thukhenzum thute ah MYUM president in union legal director-te tungah bangzah ciang thudonga, amaute in zong bangzah ciang bangci huzapzo uh cih ithei kei hi.

2005 sungin UMM le MYUM in CPC te Kawlgam Biakna Lamzum le Ohchozi zum, Yatkwet pan gambup Ki-ukna zum sangpen, State Law and Order Restoration Council(SLORC), Yangoon dong ah khia uh hi. Kumpi zumte in Conference makaite thusitna le dotna nei uh hi.  Conference-te in kam le lai mah tawh nungzuihin phisian uh hi. Tua hunin Ministry of Religious Affairs ah Dr. Myo Myint, PhD le U Ba Han(Kaba-aye) in hihvaite len uh hi.

  

Kalaymyo uliante in, langnih samin thu dong uh hi. Mission lam in Conference te SDA pawlpi pan a paikhiat uh hi, ci in zumah gen den uh hi.  Tua ciangin zuma uliante in Missionte tungah, Conference-te na pawlpi sung pan-un paikhia cileng, UPC, AG, Tuiphum khatpeuh suak uh hiam cih adot ciangin, Mission siate in, suak kei uh ci hi. Tua ciangin uliante in, tualeh paikhia kici thei lopi—SDA mah hilo maw! Team “A” le “B” nahi lel vevuale, cih san uh hi. Mission in athulian theithei dingin kumpi zumte ah “a paikhia uh hi” cih zangden uha, kisai nawn kei ung cih nadingin “ka hawlkhiatsa uh hi” cih kammal zang kop uh hi—Mission lamte dinmun pen passive victim le subjective prosecutor dinmun ah pang zel uh hi.

2006 February in UMM huam sunga conference deih Pawlpi 17 disbandment piakik uh hi—apaulap uh pen Conference-te Myanmar Biblical Christian Fellowship(MBCF) ah member in lut uha, Sunday ah lampialkhin uh hi cih, zuauphuah paulap in SSD mai ah gen uh hi.

Nominating committee member lakzia pen 2002 MYUM session le, UMM session ah union makaite’n zang uha, GC policy thak ci’n mipi khem uh hi.2003 in zang leuleu uh hi. Policy zuilo-a, union uliante kimawl dan pen Pr Muller sunghpa,  Doe Doe Chit, Union Chief Accountant, in ciamnuih-le-cihtakin agenna ah, “Daai in bup nek nuama kimawl aive. Dai in aluakziau tave” ci hi. 2005 October 31, in Pr Muller in session kiteelna nihvei vaia a khialhna lai hawmkika, ulian khat in, kiteeldan nam 2 om acihmanin, tualakah khat kazat hi-a, amanlopi na hi, ci’n akhialhna pulaak hi. Hih lai ahawmma deuh mahin, Sia Gin Sian Mung in UMM conference-te tungah paikhiatna abawlnailoh nadingin thumna lai Pr Muller tungah khak hi. Athukikna ah, Conference-te hicikoih leng gilo semsem uha, pawlpite in thuaklah uh hi, tua manin kum bei ciang kasepding teng uh kaseploh uh phamawh ding hi, cin thukkik hi. Amau patkhiata buaina piangkhia hia maizum sel nadingin disbandment azang uh tawh kibang hi.

2007-2009  dong Thukhenzumte ah Conference-te Criminal Cases 5 le Civil Case 5 khia uh hi. Tua thute MYUM makaite nasep akikhawlsak 2015 kum dong man siangnailo hi. UMM pan Pr Ngo Khaw Nang tazalu sem hi. 2008 in Mandalay Myothit a pastor sema UMM koih Saw Htoo Glad galkap thukan bu danin kigena, Teinkaya, Khampat No 1, Kyauk Taw, Rakhaine le Tiddim, Chin State ah paikawikawiin Conference-te zat biakinn teng ap dingin va hanciam hi. Tua vai thulian ong suah ciangin Pr Kai Za Dal le Kham Khen Pau in MYUM makaite tungah akham nading uh le kihokhopna neia, kilemkikna bawl dingin a thum uh hangin, makaite in bangmah dawnglo uh hi—akutna uh lai le galkapbu kineihpa vaite zong SSD dong ah email copy pia uh hi.

2010 in Pr Ngo Khaw Nang in Tazalu semin Pinlon Kale biakinn huang le MMCC huang pen Mission leisa hi cin, Kaiza Dal tungpan angahkik nadinguh Tazama Muh Gyi phuan in Tein 5,000 man in amuh tambu seh uh hi. Tua adingin MYUM president letmatthuhna laizuau khat bawl uh hi.

2013 in Pr Ngo Khaw Nang in MMCC huang grant phiatnuam in, Pr Kai Za Dal tenupa le Huangneipa Ginno-te nupa, mi li Tazama Muh tawh Kale Khazaing ah khia leuleu hi.

2002 -2014 Sunga MYUM Sunga Pangpite:

Hih hunsungaa Union makaipite: (2002-2003) Pr Tin Tun, President; Pr Muller Kyaw, Secretary; Pr Memory Tun, Treasurer;  (2003-2010) Pr Muller Kyaw, President; Pr Memory Tun, Secretary, Sia Dalpu, Treasure; 2011-2014 in Pr Memory Tun, President; Pr Min Lwin, Secretary; Pr Dalpu, Treasurer ahi uh hi. UMM ah,  2002-2003, sung Pr Kenneth, President; Pr Kai Khan Khual, Secretary, Pr Min Lwin, Treasurer; 2004-2010 sungin Pr Min Lwin, President; Pr Kai Khan Khual, Secretary; Sia Thang Lam Mung, Treasurer.  2011-2015 sungin, Pr Timothy Paul, President; Pr Rozaman, Secretary; Sia Gin Lam Cin, Treasurer.  Thukhen zuma Tazalu sema Pangpite: Pr Min Lwin, Pr Ngo Khaw Nang, Pr Gin Do Pau le Rakhine gam ah Sia Soe Maung Maung ahi uh hi.

Thukhupna:

Hih atunga hun sunga buaina thumalgol diak teng iet ciangin, pawlpi makaite patkhiat gamtatna hanga piang buaina vive ahihi. Tua buaina ong omkhit ciangin, thudam le Christian lungsim dopphahin, leptuah ding sangin, thuneihna, thatanghatna muangin sukmit ding vive hanciam zaw uh hi. Tua bang gamtatna in hun, tha le ngal ban ah sum tampi hupkangto pah zel hi. Tuate hang mahin union ulian thumte panmun pan SSD in akhawlsak ahi hi.

2003 in Pr Tin Tun in MYUM ong makaih zawh nawnloh ciangin Pr Muller in MYUM makai-a 2010 dong ahi hi.  Pr Muller in pensen la-a hi buaina ah amah kihelnawnlo tawh ong kibang hi. Ahizongin ama mapatsa maban teng mah, Pr Memory in azomto hizaw hi.

Conference-te cancerous natna tawh genteh zawzena, ahunlapin atkhiat ding ahi ci-a 2003 kipata laihawm pen Pr Tin Tun hi.  Kiteelna manlo aphuak le conference-te a atkhia Pr Muller hia, kumpi zumah nuailup mangsawm pen Pr Memory ahi hi.

Hih bang teng sep nadingin bangteng kisema, bangzah bei in, zuau bangzah kiphuak cih tampi om ahi hi.

Pages: 1 | 2  | 3 | 4 | 5 | 6 | 7 | 8  | 9  | 10  | 11 | 12 | 13 | 14 | 15 | 16 |  17 | 18 | 19 | 20 | 21 |  22 | 23 | 24 | 25 | 26 

Please click for more details Apiangsa thute in mailam ading thulamlak