Khawkpi 6 | BAWLSIATNA—A KIKOP ANAA NEITE

PASIAN KEPNA

Tua khuapi sia kipei lak ah Pasian in Ama mite kem dingin kham khol zo hi. Hun hoih kong a kikhak ma in a maute kim khat in sih lawh man kha thei ding uh hi. A hih hang in hun hoih kong a kikhak khit vet ciangin bel, hun haksa pipen kipanta ding hi zaw napi, Pasian mite khat beek in a nuntakna uh a bei suah nawn kei ding uh hi. Amaute a lamdang mahmah tawh, Topa mahmah leh A vantung mite in kemta ding hi.

“Bang hang hiam cih leh, nang mah in kei thuakna thu na zui a, leitung bup a leitung mi khempeuh sittel a, ze-etna hun ciangin kei zong nang kong kem ding hi.” Mang. 3:10.

“A kihtak huai sittelna in Pasian mite pang gige hi. Leimong khat pan mong khat dong in minamte gal kido nopna lungsim tawh kitok tho hi. Lungkham hun lai takin tua hong piang ding hi. Tua bang lungkhamna cikmah a aom ngei lo ahi ding hi. Pasian teel mite ahih leh kip veve ding uh hi. Satan leh amite in susia zolo ding uh hi. A hat mahmah vantungmi in vil ding ahih hang hi.” 9 T 17 (3 TT 285)

“Galte in amaute thong sungah a khum uh hangin thong kulhpite in amaute Khris kizopna dal zo tuan lo hi. Amaute thanemna khempeuh a mupa khatin, a thuaksiatna khempeuh uh theih pih a, leitung Anaa khempeuh sangin a tungnung zaw pa hi a, thonginn dap dai sung khawng ah vantung mite sawl aa, khuavak leh nopna puak sak ding hi. Thong inn sung khawng pen kumpi inn sung khawng bang mah lel in, Pual leh Silas te in philipi thong inn sungah thungen aa, la asak bang lel uh in, upna tak tawh teng in, amial thong inn kawmte vantung khuavak in taan’ ding hi.” GC 627.

“Topa in amite tua hun teh a mang ngilh ding hiam? Leitung hun masa lai aa, tui cin tun’ lai in mi muanhuai Noah a mang ngilh hiam? Egypt gam a milim bia mite in a kiim um lai in Amah in Joseph a mang ngilh hiam? Lei kawhawm khuamial sunga a kikhum cip lai in, Amah in Jeremiah a mangngilh hiam? Daniel humpi kua sungah ahi zongin, meikuang sungah a lawmte thum ahi zongin a kikhiat laitakin, Amah in amaute a mangngilh hiam? GC 626.

Sapi ciap teh na ngah dinga thupiak na a mang nuam lo hing tang a kikhel ding lam en mite, Pasian in migilo te suk siat ding in phal lo ding hi. Migilo te in misiangtho te that zo leh Pasian muh dah Satan leh a mite nuam ding hi, cih na mu hi. Tua bang hi mawk leh Pasian muang a it a, a ngak ni loh te tungah Satan in ki naak gualzawh sak lua ding hi. Tua ahih sang sik in, mi gilote in mi siangthote bang zah tak in Pasian in huu cih teci pangin, minthang tak a, a hot khiat na amu zaw ding uh hi. EW 284.

TAWLNGAK NI PEN THU KITUH BULPI SUAK

Sabbath tan’na pen a kilang a Pasian ciaptehna ahih nung sang teh, thukham bawl tawm zui a, Sunday tan’ na pen Sapi ciaptehna hi a, amasa pen na khempeuhte piangsakpa thuman’na ahih mah bang in, anih na pen Satan vangliatna piak Rome thu man’na hi a, ni nunung ni ciangin tua tawlngak ni pen kinialna thu mungpi a suak hi.

Kamsangpa John in, “Numei (Pawlpi) tungah gulpi (Satan leh a pawlte) heh lua a, numei suan Pasian thukham kem a, Zeisu teci pan’na a nei pawl te tungah galdo dingin pusuak hi.” Mang 12:17.

“Pawlpi nunungte in lungkiat theihna ding ze-etna lianpi sung tung hi. Tuate in Pasian thukhamte leh Zeisu upna anei te hi a, gulpi leh amite ngoltolhna a phawk uh hi.” 5 T 472 (2 TT 175).

“Tapidaw hihna ah Sabbath pen kinialna mungpi hi a, biakna leh leitung kumpi kikop in Sunday tan’na ding pen Anaa hial aa, asawl uh ciangin, mi lom tawmno khat in a nial hamtang uh ciangin, leitung buppite in a mitsuan pen uh hong suak hi. A puk pawlpi leh gam ukte thu a nial teitei te ki dap koih thei lo ding hi. A maute in a thuaksia ta uh zongin, mi khempeuh Pasian thu mang lo a akisiat khit zaw zen sangin hoih zaw veve lai hi.” GC 615.

“Laisiangtho Sabbath a zahtakte, mite’ kipawlna maidal, thu hoih upadi nial bangin ki seh ding a, kumpi susia Pasian hehna dan apiangsak te bangin kiseh zaw leh bung ding hi. Amau lungsim maan pen, nokkhak, thu manglo, kumpi ukna dem, ngawng khauh in kigen ding hi. Kumpi deihlo a langpante kici ding hi. Pasian thukham nial pawlpi siate in pulpit pan in, hong uk kumpite thuman’na in Pasian awi hi, ci-in hilh ding uh hi. Upadi zumte matpongten zumte panin Pasian thukham zui pawlte khial sak zaw ding uh hi. A pauzia te khawng uh zep beh sak in, a omzia te uh a sia thei pen pen in bulh sak ding uh hi.” GC 592.

“Pawlpi vaang leh kumpi a kipawl theih na dingin ki golhguuk ding uh a, ki han suah in, akua ci lo Sunday tang ding uh hi, ci-in sawl ding uh hi. Pasian thukham lah om hetlo mawk ahih tak teh, netcip theihna ding thukham bawltawm zang ding uh hi.” GC 592.

“Mikhem bupipa in mite hansuah in, Pasian nasemte hih thu gilo tawh nawk ding hi. Tua a kheltatna un, vantung lungkim sak lo a, gimna tuamtuam hong tung te, Pasian thukham zui mite’ thu peksat man uh a, hong tung hi, ci-in leh ngawh zaw sop den ding uh hi. “Sunday nipi atan’ nop loh man uh a, hih gimnate hong tung hi, Sunday khaut tak a, atan’ mateng uh, hih gimnate bei lo dinga, miteng in thuak pih hi hang, ci in leh ngawh zaw sop ding uh hi. Pasian thupha leh leitung hamphatna te adalte bangin leh ngawh zaw ding uh hi. Lampial Israel te in Elijah a pum-uum bang un, Pasian kusalete heh ngawh sa in thumaan lo tawh pum uum ding uh hi.” GC 590.

“Kinialna zai semsem in munthak ah lutzel a, Pasian thukham sikcip dingin mite kisawl kawikawi ahih ciangin, Satan thalawp mahmah hi. Tua thu a nial mite, ahai, bang lel hi ding hi. Biakna nasem peuhmah in khuavak dal nangin sep theih tawp in sem uh hi. Tua cih kei le uh, a Tuuhon te un khuavak ngah kha ding uh hi. Hih thu ah lawptak in nasem uh hi. Pawlpi puk in kumpi anaa ngen dinga, ki huh sak in, Protestant te leh Pope te ki kop ding hi. Sunday tan’na ding thu pen, thu siang, thu khauh hi ding a, Pasian thukham zuite mawh sak ding uh hi. Kimkhatte sum liau daan leh thongkhiat daan tawh phin in, kim khat te ta leuleu, zaliatna piakna tawh zol in, letsong leh hamphatna ngah na ding tawh, a upna uh akhah theih nading un a zol ding uh hi.” GC 607.

“Lungkhamna hun patcil lama sawl ma in, eite paikhia in Sabbath thu akicing zaw in ih tangko ding hi. Hih thu in Pawlpi tuamtuam te leh, a min lel tawh Adventist ahi te (Vantung mi masa leh anihna thu sang napi a, athum na in Sabbath thu hong lim gen si teh, ci a ana nial te) lung ngol sak hi. Bang hang hiam cih leh, Sabbath thumaan anial nading uh lah omlo zel, lah sang nuam lo uh ahih man hi.

Tua hun ciangin Pasian teelsa te in thumaan teel mah uh a a om na lui pan hong pusuak in eite tawh bawlsiatna hong thuak khawm uh hi. EW 33.

“A puk pawlpi leh kumpite in mailam a kidona ding a kiging kholkhol laitak ahi hi. Protestant te in Rome te hih ngeisa bangin Sunday pen mel kilamdang in Nipi maan a suah theihna ding abawlbawl laitak uh ahihi. Mun citeng ah Pope in ni dang a, abawlsiatna abawl theih ngei bang a bawl theih kik nading, simtham takin ama liatna ciang toto in, kip sak toto uh hi. Tua bangin thu pian khiatna ding ki hong toto a, ahih theih leh Satan in aki teelsa te nangawn a khem ding hi.” 5 T 449, 450 (2 TT 149).

“Mite in Pasian thukham langdo in thukham bawl in, khauh sak mahmah ding uh hi. Tua banga amau bawl tawm thukham a khauh sak uh hangin lah, Topa hongsawl hi, a cih na ding uh om hetlo ding hi. Bawltawm tawlngak ni pahtawi in, Jehovah thukham leh ama pianzia kigelhna lai simmawh ding in, mite sawl theihna lampi a zong uh hi. Bang mah tatsiatna nei keei lopi Pasian nasem te, Satan thuzawh sa mi gilo te in bawlsiatna nakpi takin thuak sak uh hi.” 9 T 229 (3 TT 392, 393).

“Kidona in Pasian hong ngetna thu a kidem ahi hi. Ni masa ni Pope phuat tawm thu in, thukham nambat lina thakhat in leh do pah a, kii nih nei sapi (USA) in tua pen mite telsitna in azang ahi hi. Tua ciangin Pasian in a lauhuai tangkona, tua sapi leh amilim zahtak pia aa, a kunte thuak ding daan hong genkhia ahi hi. Amaute in Pasian hehna hai hehpihna neilo a aki buak zu-cil pen dawn ding uh, ci hi.” 1 T 223 (1 TT 79).

“Gam ukna khel in, thumaan’ deihna susia a, thupha awlmawh lo in a suakta gam America nangawn in, ukpate, ciamtehpa te in mipi maipha a zon na un, anaa hial aa aki sawlgawp Sunday tan’na amang ding uh hi. A manpha pipen lungsim suahtakna ki zang thei nawnlo ding hi.” GC 592.

“Sunday thupi zawk na ding pen, 1885 kum panin a khuamial lampi ziik ki pan ta hi. A makaite in, a thu om bang taktak pen selcip phot uh a, tua thu luang koppih mi tampi mah in, hih thu bang ngimna ahi hiam? cih, amau leh amau ki thei lo ding uh hi. A gin’ dan neem aa, tapidaw hoih bang in ki mu in, ahih hangin hong paukhiat ciangin gulpi lungsim kilang ding hi.” 5 T 452 (2 TT 152).

“U.S. America ah hih thu luang pen akip theih nading in, pawlpite in zang khol khol a, Protestant te in Pope nung a zuih kholhna uh ahi hi. Leitung hun lui lai a, ataan sa, tungnung pen pa hih na, Pope in angah kik theih na dingin, America ah Protestant te, in lampi a zikzik uh ahi hi. Hih Sunday tan’na ki sawl gawp pen mah, tua thuluang deihna bulpi pen hi a, Rome te phuatsa hi in, “Ka Anaa neihna hi” ci a agen khiat ngeisa mah ahi hi.” GC 573.

Topa sawltak nu in a mangmuh lai in, mi khem bupipa pau teekteek mah zong za a, Satan in, “ Ahih hangin Sabbath tang te pawl pen va lawn loh phot ding hi. Mi honpi te ahehna ding in ih taw holh phot ding hi. Miliante leh mipilte ei lam ah lut sak sak phot ding hang aa, amau in aneih Anaa uh tawh, ei deihnate hong sem lel ding uh hi” ci hi. TM 437.

“Hun paisa a thu ciaptehna te ah, (tangthu bute a, Rome in Sabbath nusia aa, Sunday tan’ ding asawlnate) tel tak in kilang a, Sabbath thumaan teci a pangte Rome in langdo mahmah a, tua pen ama phuatsa thu aki zuih nading a deih ahihi. Topa Pasian in hong hilh na ah, R.C.M leh Protestant te kop in Sunday hong pahtawi ding uh hi, Tua pen in hun masa lai abang a pian’ kik na ding ahi hi. hong ci hi.” GC 579.

“Sikhate kiang pan thu hong kiza ding aa, Sunday thunial te in, nial nawn kei uh hen, Pasian thukham a zuih nop uh tawh ki bangin, tua aiawh in leitung upadi zong a zuih ding uh hi. va hilh un ci a hong ki sawl hi, hong ci ding uh hi. Amaute in leitung mite gamtat siat luat khawng, biakna nasemte dah mahmah ding uh a, tua thusia te Sunday hoih taka akitan’ kim noploh man a piang thu bang in gen ding uh hi. Amau teci pan’na anial te tungah nakpi in aheh ding uh hi.” GC 391.

“HIh mipawlte in (Leitung a biakna makaite) hih zah a kisiatna a khan’ zawzen pen, tapidaw nipi a kici pen sian’tho sak lohna hang ngawh ding uh aa, Sunday tan’na sawl gawp na pen thahat sak tuam mahmah ding uh hi. HIh thu in, Sabbath thumaan a kizel pha masakna mun ahih mah bang in America ah kisawl masa pen ding hi.” GC 587.

“Satan in, Leitung bel, kei a ding hi lel hi, leitung ukpa, leitung kumpi ka suak ding hi. Mite lungsim ka uk cip ding a, Pasian Sabbath pen thusia pian’na bulpi suak ding hi. Limlahna khat suak dingin ka pia ding hi. Ni sagih ni tan’na pen leitung ukte thunialna ka suak sak ding hi. Mihing’ upadi ka bawlsak ding a, ni sagih nipi pen ka tang ngam kei sak ding hi. Annek tui dawn, nikten puansilh kisam kha ding launa tawh, amaute in leitung vaihawm nate zui ding uh aa, Pasian thukham palsat ding uh hi. Leitung buppi kei ma ukna nuai ah om ding hi, a ci hi.” PK 184.

MUN CITENG AH HAKSATNA TUNG

Mang. 13 sunga, kiinih nei Tuuno bang sapi in America te lim lahna hi aa, hih gam in a lim puak tawh kileh bulh in, hih a nuai a, thusia te ngeina in bawl ding hi.

1. Leitung buppi sapi masa (Rome) bia kik sak ding hi, aneu 12.

2. Leitung ateng mi khempeuh khem ding hi. aneu 14.

3. Leitung ateng mi khempeuh sapi (Rome) milim bawl sak ding hi. aneu 14.

Tuni dong dong America in biakna suahtakna pen thupi sak hi. Amah pen hau lua ahih manin leitung bup thuzawh thei hi. Tua hi a, amah in Sunday law (thukham) nei a, bawlsiatna a zat ciangin, minam dangte in amah et teh in, anung zui ding uh hi. Tua bang in leitung buppi ah haksatna ki zel kim ding hi.

“Biakna suahtakna gam ahi America in, Pope te tawh kop a, amaanlo nipi mite zuih sak a sawm ciangin leitung buppi a, gam tuamtuam te in zong amah etteh in anung hong zui ding uh hi. Ih mite in amau bat zawh ciangciang ah patau tangkona pen theh khia dingin om khong mawk hetlo sam uh hi.” 6 T 18 (2 TT 373).

Hunlui hi ta leh, hun thak hi ta leh, Pope in tua Sunday zahtaakna hangin, Rome pawlpi Anaa nei sak a, zahtakna ngah ding hi.” GC 579.

“Hih hun haksa pen minam tuamtuam te in Pasian thukham nusia dinga, hong kipawl uh ciangin hong tung ding hi.” 5 T 524.

“Pasian thukham mun ah mite upadi ki laihsak a, Laisiangtho Sabbath mun ah Sunday hong ki bulh ciangin hun beina nasep ahi ta ding hi. Tua ki laihna in leitung a zelh kim ciang in, Pasian mahmah hong kilang ta ding hi. A omna pan in leitung mite dan pia ding in hong pai khia ta ding hi.” 7 T 141.

“Anaa leh vang a hong laang tote tangtak in na sel pah kei phot leng, ih nasepna America ah ahi a, gamdang ah ahi zongin, tam zaw ki zo thei zaw ding hi. Gamdangte in America etteh ding uh hi. Ama’ makaih ahih ciangin, tua haksatna pen leitung bup a ih mite in thuak ding uh hi.” 6 T 395 (3 TT 46).

“Mihing te a hong kem upadi pen, Pasian thukham a zui nuamte a dingin a bei suak hi. Gam tuamtuam te ah a hun kisiatna thu luan’ khat kisuah ding hi.” GC 635.

TUUNO KII BANG ANEI SAPI

Mang. 13 sungah, thupiang dingte et kholhna in, sapi nam nih in kilak hi. Amasa sapi in lutang sagih ki sawm nei (aneu 1-10) tua pen Pope makaihna Rome ahi hi. A nihna pen Tuuno bang a kii nih nei (aneu 11-18) tua pen United State of America te ahihi. Hih hilhkholhna in alamdang muan loh khat lim lak hi. America gam pen suahtakna a deih gam hi, cih ih theih tek ahi hi. Biakna suahtakna dinga aki beel zawzen gam ahihi. Ama suahtakna lungsim pen Tuuno lim in ki lak hi. Amah in kumpipa na (politic) leh biakna (religion) khentuam vilvel a, mimal suahtakna thupi sak a adiakdiak in ut peuh biak theihna dingin, leitung te bawlsiatna thuakna panin amah ki beel hi zaw hi.

Tua zah bang hi napi in,, hun bei kuan ciang in tomkha sung pen, Rome sep ngei mi bawlsiatna hong zang ding hi. A zat dan ding upadi pen, eite’ khel sak mawk theih het loh in Mang 13:11-18 ah na ki gelh zo hi. Mang 13 sunga Tuuno bang kii nih nei sapi hilh kholhna in leitung bup leh a sung a teng te khempeuh Pope bia sak ding ci-in limlak hi. Tua Pope pen, kam kei bang lim sapi pen ahihi. Kii nih nei sapi pen zong leitung buppi te sapi milim bawlsak, a cih pen hi a, tham lo in a lian aneu, a zawng a hau, topeng, to nei, mi khempeuh sapi ciaptehna nei sak Mang. 13:11-16 a cih pen ahi hi.

Tua hi a, America pen hih Tuuno bang kii nih nei sapi tawh a lim lak a, America in Sunday tan’na ding Anaa hial aa hong bawl ciangin hilh kholhna te a hong tung ta hong hi ding hi. Tua pen’ Rome in, ama tungnung pen hihna teci hi, ci aa, a sialh pih ngei sa thu ahihi.” GC 578, 579.

“Hih hilhkholhna in minam ki batna, gam khat bek kawk a, aki bulh khial thei het lo, America bek tang tak in kawk hi.” GC 441.

“Biakna suahtakna pen ciangtan’ neihna tawh Romete huh na ding ahi upadi Protestant te thu bulphuh te phiat aa hong om ciangin, alamdang mahmah tawh Pasian in minamte tungah nasem ding a, Amah mah vangliatna tawh Pasian in Amipih te tuamna dingin na khempeuhte anei Pa’ lumm zal khia ta ding hi. Rome in ukna gilo a zat hangin, eite belh Pa in Khris ahihi.” TM 206.

“Pasian thukham susia dinga Pope bawl anaa hong ki zat gawp na tawh, Ih gam in thu maan tawh ki khen khia siang ta hong hi ding hi.” 5 T 451 (2 TT 150).

Ih gam in Sunday-law deihna hang a, kumpi ki ukna hongkhah khiat ciangin, tua thu mah tawh Protestant te in Pope hong zom ding a, sawt vei pi a ki gen khol bawlsiatna pen hong ki sem ta ding hi. Nuntakna piak ding lel lo ngal adang lampi omlo ding hi.” 5T 712 (2 TT 311, 319).

Ih gamin biakna lam ah mite lungsim uk cip dinga thukham bawl in, a thu len Council hong din’ ciangin, Sunday tang dingin hong anaa sawl ding uh a, Pasian thukham ahi ni sagih Nipi a tangte bawlsiat theih nading bang hong om dinga, ngaih sunsun a thu manglote ih gam pan ki nil khia dinga gam bup a lam pialta, ih nam bup siatna in hong zui ding ih hi ta hi.” 7 BC 977.

“Satan upadi a kizat ciangin ih minam bup a lampial khin na hi ta ding a, leitung ukte in mawhna mipa lam ah kop khin ding uh a, tua hun ciangin mawhna seng a dimta, minam bup a kisiatna ding lim a lak ahi, mi nambup a lampial ta ki hi ding hi.” SM 374.

“America mite pen, aki pakta mahmah dente hi a, ahih hangin biakna suahtakna dal in Protestant teng Pope tungah ong ki-ap kik uh ciangin, mawhna seng a dimta, minam bup in lam apial ci-in vantung laibu ah na ki ciamteh ding hi. Tua nam bup lampialna thamanh in, nambup siatna ahi ding hi.” RH, May 2, 1893.

“Satan in mihing kusale te zangin nasem hi. Tua gam ki-ukna upadi ngei pen khek aa, Sunday tan’na ding sawl gawpna thukham a bawl nuam te in, a tha manh bang hong hi ding hiam cih pen, ngaihsun kha het lo uh hi. Tua thu in eite tungah lauhuai hi.” 5 T 754 (2 TT 352).

“Mite ih mut kalin Satan in a nasepzia ding na lemh niloh a Topa mite tungah thumaan leh hehpihna a kizat lohna dingin na bawl khol khol hi. Sunday vaihawm na in khuamial sung tawn hi. Makaite in tua a vaihawm thu pen uh, bang ngimna hiam? cih thei lo uh a, thumaan a iim uh hi. Amau din’ mun in tapidaw mah kici hi a, nem ngeingei in, ahih hangin a hong pau khiat ciangin gulpi lungsim hong ki dawk ding hi.” 5 T 452 ( 2 TT 152).

VANGLIATNA KIKOP: GULPI, SAPI, KAM SANG ZUAU LEH KUMPI

Sawltak John genna ah: “Uiphuk tawh kibang kihhuai kha nam thum: gulpi, sapi leh zuau kamsangte’ kam sung pan hong pusuak ka mu hi” ci hi. Amaute dawi kha hi a, na lamdang te bawl in, leitung bupa kumpi te kiangah paikhia uh a, vanglian Pasian ni lianpi ni a, galdona dingin a ki kaikhawm sak hi.” Mang 16:13.

Mi khem vangliatna thumte kigawm a, leitung bup kumpi te huh ding ngen in, leitung ki-ukna tawh, Pasian leh ami dik te leh a thumaan, a simgawp uh hi.

Hih laitak a gulpi a cih pen, sikha bang hopih theihna hi. A bulpi in bel, gulpi cih pen Satan ahi hi. Mang. 12:9. Ahih hangin hih lai taka hilhkholhna ah bel, sikha hopih theite a zatna ding a gen na hi. Tua nasepna in lampi munli tawn ding hi. (Tanglai lawki sikha hopihna leh biakna zia zong) tu hun sikha hopih theihna zia zong tapidaw sung ah sikha hopih theihna zia zong, Protestant te hi ta leh, R.C.M te hi ta leh, mihing a sih khit ciangin, a phawk thei lai akha paikhia khat om hi ci a a-umte khempeuh leh, Datpilna nei sikha hopih theite datmaan zanga zonkhiatna nei thei te, leh mi mel et a, lungsim zon’ khiatna cih te khawng ki hel khin ding uh hi.

Sapi cih pen, Pope hi a (Mang 13 sunga sapi masa pen ahi hi) Kamsang zuau a cihte bel, Protestant pawl tuamtuam te, thumaan za napi a nialte, kikop a kumpi huhna ngente ahi uh hi.

Mang 13:1-10 sapi dang khat, kamkei banga, gulpi in anaa vangliatna, a tokhom, a anaa teng pia hi. Hih pen, Protestant te khempeuh in, Pope hi, ci-in a-up ngeisa ciat ahi hi, GC 439.

“Gulpi heh mahmah a, Pasian thukhamte zui a, Zeisu teci pan’na a nei numei suan aom lai sunsun te galdo dingin a pusuak hi.” Mang 12:17.

A sawt het lo in, hih hilh kholhna tun, na ahi, Protestant te in leitung tawh kikop a, anaa zangin, Pasian thukham a zuite alangdo na uh, ih mu ding hi. Tua lungsim kha mah tawh Pope in hun beisa ah sem ngei a, tu in Protestant te makaih na tawh Pasian thu om bang a mang nuamte sulzuih leuleu ding hi.”

“Pawlpi leh kumpi in, mailam a kidona ding thu ah kiging khol khol ta uh hi. Protestant te in Rome hih ngeisa bang mah in Sunday masuat pi in nei in, mi a khemkhem uh hi.” 5 T 449 (2 TT 149).

“Damdam in Satan in sikha hopih theihna khang saksak a, mi khemsiamna lampi zikzik san hi. A ngimna zah bel tun’ zo nai lo hi. Ahih hang in, hun bei ding teh, a ngimna zah tun ding hi. Kam sangpa genna ah, uiphuk bang kihhuai kha thum pusuak a, amaute dawi te kha hi a, leitung bup kumpi te kiangah pai in, Topa ni lianpi ni a, gal kido nading in aki kai khawm sak hi” ci hi. Mang 16:13,14.

Pasian vaang tawh kep tuam a om Ama thu om bang upna tawh zui a, adingte lo buang, leitung buppi in khem bawlna sungah kiphiatkhia khawm ding hi. GC 561, 562.

“Protestant te in Rome te tawh khut kilen ding uh hi.” Tua ciangin Pasian in piansak nasepna pan aa, akhawl ni; Sabbath langdo in upadi thukham hong koih ding uh hi. Tua ciangin Pasian in leitung ah na lamdang hong bawl ta ding hi. Minamte tat khelnate sawt vei pi thuakthuak a, amaute hong ki hei kik na ding hanciam niloh hi. Ahih hangin a kisik kik nuam lo mite in, amau seng a dip hun uh hong tung ding a, tua hun ciangin Pasian in sem ta ding hi. Tua hun ding pen hong tung dek dek ta hi. Pasian in mi namte ciamteh hi. Vantung laibu sung ah amaute langdo ding thusia teci hau mahmah ta uh hi. Nipi kal sung ni masa ni (Sunday) palsat te daan piak na ding upadi hong neih ngawngaw uh ciangin, a seng uh dimta ding hi.” 7 BC 910.

Protestant te in a ki gal sai a Rome te vaang, len dingin akhut uh a zan’ ciangin sikha hopih thei te khut lenkha pah uh aa, akikal kawhawm pi galkah in a kizop na uh tawh kha nam thum ki pawl thu zawhna nuai a tun’ uh ciangin ih gam in Protestant leh mipi kumpi in a bawl upadi hong pahtawi ding aa, Pope mi khemna zuau thu gen pen hong laang sak ding uh a, tua ciangin Satan in a na lamdang bawl hun tungta a hun beina ding nai ta hi, cih ih theihtheih na ding ahi hi.

“Nung zui pite in Rome galkap te hong dawk ciangin, a sawt lo in Jerusalem kisia ding hi, cih a theih uh mah bangin, tu in zong hih lampialna te ih muh ciangin, Topa lung duai na a mong tung ta a, ih minamte mawhna seng dimta a, hehpihna len vantung mite in, kileh kik nawn lo dingin hong len khiat san ta hi, cih ih theih nading lim a hi hi. Tua ciangin kamsangte in, Jacob lungkham hun, ci a, a gengen sa uh hun haksa pen sungah, Pasian mite hong kipap ta ahi ding hi.” 5 T 451 ( 2 TT 150, 151).

“Leitung anaa kikop in Pasian thukham galin do dinga, aneu alian, ahau a zawng, sila, to neilote (Mang. 13:15) Pawlpi ngeina zuisak in, Nipi maanlo tang sak ding uh hi.” GC 604.

“Misite kha a phawk thei lailai khat om hi ci a upna leh Sunday sian’tho sakna, hih thu nih te tawh Satan in a zuau thu sung ah mite guang ding hi. Amasa in sikha hopih na tawh pantah in, anung ciangin Rome deihsakna tawh hencip ding hi. America a Protestant te in sikha hopihna galsawk masa pen ding a, Rome tawh khut ki lenna kawhawm pi galkah phot in, hih nam thum ki pawlte’ thu zawh in om ding a, hih gam mah in Rome nungzui a mite thungahna teng a sikcip sak gam ahi ding hi.” GC 588.

“Protestant akici leitung buppi in mawhna mipa tawh kikop ding a, Pawlpi leh leitung in ki thu hual in, kisia khawm ding uh hi. Hih hun ciangin leitung ah haksatna lianpi hong tung ding hi. Laisiangtho sungah Pope in tungnung penpa hihna a taan sa hong ngah kik dinga, Protestant hun a kici pen sung mah ah bawlsiatna mei hong kuang kik ding hi, ci hi.” 2 SM 567, 368.

“Protestant te gam ukna in a lamdangpi hong suak ding hi. Amau in leitung lam ah kihei ta ding uh hi. Amaute Pasian pan ki khenkhia in, tukikhen khiatna in Pasian pan lampial a, kumpi upadi lam zuan sak ding hi.” R.H. June 15, 1897.

“America in sapi milim asuah na dingin, biakna in kumpi uk zaw ding a, kumpi in zong agam a bei na dingin pawlpi vaihawm mang ding hi.” CC 443.

“Pope te, Protestant te leh leitung te in, aki bang in biakna sangkhawm ding uh a, tua ki pawlna in leitung buppi hei in, sawt veipi a ki lamen, kumtul maan’ na a ngah dingin a ki um uh hi.” GC 588, 589.

“Hunlui leh hun thak ah zong, Pope in tua Sunday thu hang in, zahtakna ngah hi. Bang hiam ih cih leh, tua Sunday thu pen R.C.M te vaihawm zawh luat man bek a piang hi.” GC 579.

“R.C. pawlpi ngian siam na leh a pilna pen lamdang mahmah hi. Amah in hong tung ding thugeel kholh siam in hunte uk aa, Protestant te in Nipi maanlo zangin tua tawh amah zahtakna pia gige tham lo in, amah mah in a zat sak ngeisa om bangin anaa hial aa, mite zuihsak ding thu a bawlbawl lai uh hi. Thumaan nial mite in, amah leh amah a, mawh thei lo a ki ci pa huhna, angahna dingin haksa lo in zopsiam hi. Pope in, pawlpi thu a manglo te bang ci bawl ding cih a geelna sanga hoih zaw thu thei kua om ding hiam?

R.C.M leh amah pan’ aa lengkhia a meng teng, leitung a a om peuh mah ukna khat nuai a, lom khat a suah na ding, aphuan Pope piak upadi ngai sak, lawp sak hi. Gam tuamtuam a, mi, awn tampi tak te, Pope tawh akilem a kikop ahih theih na dingin, hilh sak hi. Amau gamte minam leh kumpi Anaa neihsa pen, bang bang hi se ta leh, tua te khempeuh sang in pawlpi anaa thupi sa zaw sak phot se hi. Amau gam kumpi te thu mang dingin kiciam khin ta leh Rome thupen tua thute sangin mang zaw dingin kiciam na dang khempeuh ciampel zaw dingin zokhol sak hi.” GC 530.

Rome in thu khel them thum lo hi, cih phawk sak hi. Gregory VII napa leh Innocent III napa thu bul phuh te, tu dong mah in R.C.M pawlpi in zang, lai hi. Protestant te in Rome huh na tawh Sunday a pahtawi uh ciangin, a bulpi bang deihna hiam? cih a phawk zo kei uh hi. Tua bangin ngimna teng picing a, amau in a zuih tak uh ciangin, Rome deihna pen, a vanglian sak uh a kikip sak in, Tungnung penpa ahih na a taansa, angah kik nuam ahi lel hi. America ah, khat vei a kikip saksa pawlpi in kumpi na uk zaw leh biakna thu in leitung upadi sawl zaw thei ding a, tawm vei sung in pawlpi leh kumpi Anaa kop in mite lungsim lencip in, Rome gualzawhna in ih gam sungah om takpi ding hi.” GC 581.

“Pope pawlpi in, puuk thei lo hing, a kicih na pen uh khiam ngei lo ding hi. Ama thunial te a bawl siatna om ngei sate ah zong amahmah maan kisa lai lai hi. A hun hoih ngah peuh leh a gam tat ngei bawl kik nuam lo thei ding hiam? Tu a leitung Anaa in adal a batpakna pen, ki hemkhia in aneih Anaa Rome ki pia kik ding a, gilo leh a bawlsiat na neih ngeisa pen zang kik pah vat ding uh hi.” GC 564.

“Mite tampi mah, tua Rome omzia a deih khol lo te nangawn in, ama vaang leh a thu zawh dan za tek ding uh hi. Mi tampite Middle Age lai a, leitung pilna leh kha lam mialna ah, amau upna a pahtaak saksa uh hi aa, tu hun a pilna a khan’ zawk ciangin, theihna ki theh zau zaw in, biakna lam a suah takna in tua ci ki uk gawp ding pen dal tei hi bek hi. Mite lungsim ah, tu hun khuavak ki ngah khit ciangin, tua bang piang lailai ding nuih zak huai bek hi. Hi mah hi. Tu lai khang ah, pilnate, khalam lungsimte, thute kilahna khua vak ta hi. Pasian kam mal siangtho te, a laidal in ki lem ta a, vantung pan leitung ah hong taang hi. A hih hangin ih mangngilh loh ding thu khat in, khuavak hong tun phat semsem ciangin khua mial in amanna naak nial zaw – kan leuleu hi. GC 572.

“Tu in R.C.M te in, a gamtatna sa a kheltat luat te uh ah, leitung te kiangah thum bawl in, siam takin mai ngat uh hi. Khris kizep bang in ki zem uh a, ahih hang in a sung lam uh ki khel tuan lo hi. Tua hun lai a Pope upadi teng a kikhel om nai lo veve hi. Khuamial hun lai a upna teng mah len lai veve uh hi. Kuamah na ki khem sak kei hen. Tua Pope vaang tu a Protestant te in a pahtaak bawl peuh, ki puahphat hun lai a a-ukna bang lel mah uh a kip lai hi mawk aa, Pasian mite kip tak a ding khia in anuntakna uh a piak khiat uh ciangin, a gitlohna uh a dawk phing ding ahi hi.”

Vantung mithumna tangkona ahu vanglian pen in, amah ana nial mite hai sak hi. Pawlpi in kumpi huhna a ngetna ah, Protestant te leh Pope ki kop ahi ta uh hi. Tua Sunday tan’ sak gawpna pen, hang tak a khen tel sa hi a, Pasian thukham zuite sukha pah hi. Amaute sum daan, thongkhiat daan, leh kim khat te bel zaliat piakna leh hamphat na letsong piakna tawh a upna uh a khah theih na ding un, ki khem ding hi.” GC 607.

“Protestant te in Pope tawh khut ki len in ki kop ta uh aa thukham lina sikcip dingin din’ mun bawl uh a, Satan hansuahna tawh mawhnei mipa in a bawltawm nipi zangin Pope’ vangliatna in Pasian zaa laih dingin, ki pahtawi ding hi.” AMCC, 38. (1892).

NIMASA NI THUKHAMTE(SUNDAY LAW TE)

1961 May 29 ni in, America Supreme Court ah, khang tangthu zui aa, hilh kholhna thupi khat, “a tam zaw MEE tawh” khen tat na ki nei zo hi. Tua thu in Sunday law pen biakna tawh kisai hi lo zaw in, kumpi thu upadi hi zaw hi, ci in kip sak zo uh hi. Hih khen tatna in, State tuamtuam a, Sunday upadi bawl theihna dingin kongvang za pi tak in hong khia khin pah ta hi. Tu mahmah in zong state tam zaw in Sunday law pen nei khiin pah ta uh a, tampi mah in ciangtan’ na thu tuamtuam tawh nei uh hi. Tu in hi thu te ih lampai na ding mai nawt in khen a, ol tak a kalsuan bang in khauh zaw leh sung lut zaw ding ki puah toto lai hi. Tua te in hilh kholhna te a tun kim tohtoh na ding ahihi.

MI PAWL NIH BEK

Tua hun haksa pawlpi in a phut ciangin, tapidaw ah mi pawl nih in hong ki khen ding hi. Pawl khat pen Pasian sawlna manga Sabbath a tang te leh, galte thu mang a, Sunday a tang te ahi ding uh hi. Tua lom masa te tawm zaw ding uh aa, a tam zaw te in simmawh in a bawlsia ding uh hi.

“Migilo te Rome phuat tawm thu pahtawi in, Piangsak pa phawkna suk siatna tawh hong ki lang khia ding hi. Tu a thu in tapidaw te pawl gol nih in phelkhap ding a, Pasian thukham te zui a Zeisu upna teci pan’na anei te pawl leh, sapi leh a milim bia a, a ciaptehna anei ta pawl hi tuak ding uh hi. Pawlpi leh kumpi kop in, aneu alian, a zawng, sila leh to nei lo, vekpi in Sapi ciaptehna nei dinga aki sawl hi napi, Pasian mite in bel, tua ciaptehna sanglo ding uh hi.” 9T 16,17 (5 TT 285).

“Tua thu in tapidaw sung phel nih suah ding hi. Pasian thukhamte zui aa, Zeisu upna nei pawlte leh, sapi leh a milim bia aa, ciaptehna ngahte ahi uh hi.” GC 450.

“Satan in thu hoih a deih lohna alang pan’na nasep hong zat ciangin, hong tel dawk semsem ding hi. Pasian a kipum aap aa, Pasian kepna angah te lo buang, huih lak lam pan’ in Satan tawh kop ding a, na khempeuh te uk PA gal in a do ding uh hi.” TM 465.

“Pasian thukham langpan’na pen, vantung pan apat, hun bei dongin a zomto ding hi. Mi khempeuh ki ze-et ding hi. Leitung bup ah, thumang maw: manglo cih teldotna om ding hi. Mi khempeuh te, Pasian thukham maw, mite upadi , cih kiteel sak ding hi. Tua lai tak ah ki pawl khen na piang ding hi. Pawl nih kisuah ding hi. Hih mun ah ih lung sung thugil hong ki lang ding aa, Pasian thu mang ding maw? ahih kei leh galin pang zaw ding maw? cih hong ki lang ding hi. Tua khit ciang in bei na piang ding hi.” DA 763.

“Tua bang a leitung bup in Pasian thukham a pam paih ciangin, midik a thu maante tungah bang hong tung ding hiam? Amaute in tua thu gilo mah zui hon’ pah mawk ding uh hiam? Mi tampi in khuamial kumpi nung a zuih manin, Pasian thukham zuite in zong ciampel pah mawk ding uh hiam? Hi ngei lo ding hi. Khris a bel mi khat beekbeek hoi lo ding hi. Puk lo ding hi. Ama nung zuite in leitung ukte Anaa sanga lian zaw Anaa thu amang ding uh hi. Pasian thukham tungah bawl siatna a tun ciangin, mi tampi kisia in a om hang in, mi muanhuai te pen in thumaan sangtawi in lak pha zaw kan ding uh hi.” 2 SM 368, 369.

SIH NANG THUPUAK

“Tuuno bang kii anei America in sapi milim nuntak na guan thei (tua pen kumpi tawh kop Protestant te) in, sapi milim pau thei in, sapi milim a bia nuam lo peuh that sak thei hi.” Mang. 13:15.

Hih sih nang thupiak {Decree} pen hun hoih kong kikhak khit ciangin hong pu suak ding hi. Lungkham pi hun sung hi ding a, Pasian mite in khuapi, khuaneu te anusiat hun uh hong hi ding hi. (Tua pen, Sunday law a pusuah phet a, khuapi liante bel, a nusiat sa uh ahi hi). Bang hang hiam cih leh tua thupiak khiat pen, aki zat taktak ni ding ciangtan om ta ahih man hi. Ahih hangin Pasian tungah lungdam huai hi. Mi hoih te khat beek kisia lo ding hi. Tua hun ciangin a susiatna ding nai a cin’ man in, Pasian in a teel mite a ciamtehsa te, a lamdang mah mah tawh kem ding hi. Tua nai hun ciam hong cin ciangin a lamdang mihing bawl theih loh thu hong kilang in, migilo te a tang thei kei ding uh a, mi dikte a ki hon khia ding hi. (Hih thu a kiim zaw in, GIMNA NAM SAGIH TE cih thulu ah ih gen kik ding hi.)

“Leitung Anaa kikop te in, Pasian thukham galdo a, aneu a lian, a zawng a hau, to nei, to nei lo mi vekpi tungah pawlpi ngeina bawl tuam nipi maan lo tang dingin thupia ding uh hi. Mang. 13:16. A nial peuh mah kumpi dan thuak ding hi. A tawpna ah sihdan dong ki lawm hi, ci ding uh hi.” GC 604.

“Pasian thukham nambat lina awlmawh lo in ni masa ni zahtak ding, tua ahih kei leh anuntakna uh bei ding, ci-in thu pia khia ding uh hi.” 1 T 355, 554 (1 TT131).

“Biakbuk sunga Zeisu in a nasep a zawh ma teng in vantung mi lite in huih len lai ka mu hi. Tua khit ciangin gimna nam sagih te hong kia phing ka mu hi. Tua gimnate in migilo te lung so sak a, mi siangtho te bawl in hih gimnate amau thuak bang in ngawh uh aa, leitung pan in eite hong beisiang sak zo le uh tua Pasian hehna daan a khawl ding bang in ngaihsun uh hi. Misiangtho te thah nading thupia khia uh hi. Misiangtho te in lah sun tawh zan tawh hotkhiatna ding thu a ngen uh hi. Tua hun pen Jacob lungkham hun a kici pen ahi ta hi.” EW 36, 37.

“A tuam vilvel in mite hihna in Pasian thukham zuite nambat lina tangte tungah tu hi. A tawpna ah, sihna thuak ding in ki lawm hi, ci-in thu pia uh hi.” PK 512.

“Pasian thukham a zah taak mite a dingin mite kikepna gam upadi pen a bei suak hi. Gam tuamtuam te ah ahun ki tuak in amaute suksiat na ding thu om hi. A thupiak uh {Degree} sung a ani ciangtan ni hong nai ta aa, mite in amuh dah pawlte uh a lom in phiat siang ding a ki ciam ding uh hi. Zan khat thu a, amaute dik lohna kawk a, amau tawh a thu kim thei lo teitei te khempeuh siak mang in, daih sak ding angim uh hi.” GC 635.

Hih laitak ah tua thahna ni ding pen zan in sep sawm uh hi, ci hi. Leitung upadi ah ni kipat pen zan kim pan a aki sim to hi. Tua hang mah in hih thupiak kisep na ding pen zan hong hi sese hi. Ih gen laina dingte ah na ciamteh le cin, Pasian in A mite a hot khiat na ding hun pen zan hong hi se mah hi. A thupiak khiat leh a kisep ni ding kikal pen hun tom khat om hi. Tua hun pen bang tanvei sawt ding hiam cih bel ki thei lo hi.

“Van pan a hong vilte in ahih leh muanhuai tak in hong vil lai hi. Tua Pasian thukham zui te thahna ding thupiak na in ni ciangtan nei hi napi, a galte un, tua ni ciang a cin’ kal ngak lah in, amaute nuntakna a la nuam ding uh hi. A hih hangin misiangtho te, a thahat vantungmite in uum cih uh a, kua ma’n pai let zolo hi. Amaute in khuapite khua neu te pan tai khin uh a, ahih hangin amaute nung delh aa, a do na ding nam sauté buhtuu bang bek ahi ding hi. Pawl khat te leuleu galkap mel pua in vantung mite in vil ding uh hi.” GC 631.

“Pasian mite langdo a thu kipia pen Esther khanglai a, A hasuerus in Jews mite langdo a, a thu piak khiat bang lian a hi ding hi.” 5 T 450 (2 TT 149).

“Tapidaw lu tangpi te in, Pasian thukham zuite langdo a a thu piakkhiatna un leitung kumpi hong kepna upadi bei sak ahih ciangin, Pasian mite in khuapi khuaneu nusia in, a pawl pawl in gam sim tham zuan in gam daihna ah a teng uh hi. Tampi khop mah in mual lak kawhawm sung khawng a beel ding uh hi.” GC 626.

KHUAPITE NUSIA

“Pasian in amite kiang ah ahong tung ding buaina te hehpih ahih manin, hilh khol zel a, a diakdiak in, nuntakna a kisam vante lei theih na ding in Sabbath tangte lo buang kipia (ki lei) sak bek ding cih thupiak om sak uh ahih manin, innkuan tampi mah in, Topa lamlahna mah bangin, khuapi te nusia in gam sung khua te ah, pumpi ann leh kha ann ngah theihna mun ah, ana ki nga khol uh hi.

Eite in Pasian zahtaak lote ii hong not gawpgawp theihna mun te ah om loh ding ahihi. Sunday tan’na tawh kisai in lauhuai na hong om baih ding hi. Sunday pawl amau leh amau hong ki hansuah ding uh aa, Topa Sabbath hoih tak a kizat theihna mun ah, ih ten’ kul ding hi. Eite hi ta leng, ih tate hi ta leh in, Sabbath tan’ ding haksatna mun ah ih ten’ khak loh na dingin ih kidop ding ahihi. Pasian in khuapi tawh a ki gamlat na mun hong sehsak leh mun hoih ih ngah naa ding hi. Ih mai ah buaina hun hong tung ding om hi.”

“Kumpite tawh kikopna ding thu a ki kup uh ciangin, Pasian thu sung a tavuan neite ahih uh mah bangin, thu hoih ding deihna bangin ki dawk sak ding uh hi. Kikopna a bawl khit uh ciangin lah, Satan’ kusale te na hi mawk uh ahih ciang in, Pasian neihsa mite suksiatna ding vaihawm uh na hi zaw sop mawk ding uh hi.

Protestant leitung in, nipi lim a bawl tawm uh, Pope tawh aton toh niloh pen, Pasian Sabbath maan laihna na hi mawk ding hi. Tua hun ciangin Pasian mite in khuapi te nusia in, amau nuntakna khop angah theih nading uh lotul peuh kho aa, a om uh ka mu hi. Tua bang mun ah amau in a tate uh cidam huai tak leh zaneu takin a khan’ suah ding uh hi. A lauhuai theithei dingin nate ki bawl meng meng ka mu hi.” 2 SM 359.

“Nasem kipawlna munte ah netniam na hunte hong tung baih ding hi. Topa in, amite kiang ah a inn kuan pih te uh khuapi te pan pai khiat pih in, gam sungah amau sap zah a khawh khiat zawh na ding munte tun’ pih mengmeng dingin, lei thei loh, zuak thei loh na pan a ki tangsap loh nading un, sawl thi the hi. Tu a ki pan eite in tua ciaptehna ah khawdak siam ding ki sam mahmah ta hi. Khuapi te pan pai khia un la gamsung khuate, inn tampi a ki ziin luat lohna munte zuan un, Tua munte in hong sukha pah lo zaw deuh ding hi.” 25 M 141.

KHUAPI TE PAN NAWHSA IN TAIKEEK 

Sunday law hong pusuah a, khauh taka thu a kipiak teh, ih midik te in khuapi te nusia uh hi. Tua pen nawhsa a vai hawm kul ta hi. Hun hoih kong aki khak teh, gimnate ki buakkhia ta aa sihna ding thupiakna decree pusuak ta ding a, Pasian mite in khuapi neu leh khuanote zong nusia in, mi tam om na peuhpeuh nusia ta ding uh hi.

“Tu in Pasian mite a ding in leitung sum leh paai khol na ding a deih huai na hun om nawn lo hi. Hun gamla nawn lo hi. Nungzuite hun lai mah bang in ih bukna ding gam sim tham zon’ hun hi ta zaw hi. Rome galkap te in Jerusalem a kiim uum uh ciangin tapidaw te Khua pi pua lam ah a tai pah ding uh hilh kholh na lim a om mah bang in, hih Pope ii nipi bawl Sunday tan ding USA (eimau gam) in hongsawl gawp ciangin, ei theih ding patau kohna cian piakna ahihi. Tua hun ciangin khuapi te ih nusiat ding hun hi ta aa, khua neu zaw te zong nusia dinga ih ki gin’ ding mual kawm, buk luui, gamdai sung khawng ih zuat ding hun ahi ta ding hi.” 5 T 464, 465 (2 TT 166).

“Tapidaw sunga ukna a tuamtuam te thu piakna tawh, Pasian thukham zuite kilang do a, kumpi thukhun in mihing a hong kepna ngeina pen amau suksiat nopte a dingin a om nawn lo suak a, Pasian mite in khuapi khuaneu pan tai khia in, a pawlpawl in gam sim tham mun dai penpen na te ah, a teng uh hi. Tampite in mual kawm kawhawm khawngah lut uh hi. Minam tuamtuam panin tampi mah, asang aniam, ahau a zawng, dik lo taka bawlpa' hencipna a thuak zong a om hi. Pasian a it mite in lungkham na nite hong phukha ta uh hi. Sik khau a ki khih tawh, thong sung a kikhum tawh, thah ding a thu ki khen tawh, gilkial a si lel dinga, khuamial kuahawm sung aki khia tawh a om ziazua uh hi. Amau thumna tauna te a za mihing om lo hi. Amaute ahuh nuam mi om lo hi.

“Galte in amaute thong sungah a khum cip uh hang in Khris leh amaute kikal ah, thong kawm peek te in dal zolo hi. Amaute thanemna khempeuh amu den PA in thuaksiatna khempeuh a thuak ngei khin sa PA hi aa, leitung a Anaa om khempeuh sang in A anaa lianzaw PA in, amaute lung zuan’ kawhawm daai sungte ah khuavak galmuan’na puak dingin van pan in vantungmite a pai sak hi.” GC 626, 627.

“Misiangtho te khuapi khuaneu nusia in mun simtham gamdai penpen munte ah a lomlom in teng uh ka mu hi. Misiangtho te in gilkial dangtak haksakna a thuak lai tak un, amaute vantung mite in, ann leh tui a puak hi.” EW 212.

ZAWHNA LAA

Pasian tungah ih lung dam hi. Amah in Laisiangtho gelhte mangmuhna tawh hilhkholhna na pia a, hun nunung ni ciang a dingin, ih tel theih na dingin a zepna meel na zut sak hi. Tuu hon lomno ih mu a, Pasian ciaptehna angah misiangtho te ahi uh hi. Amaute in upna kiptak a len a, hun haksapi sung a kuamaa suksiat zawh loh, A sang bel PA in alamdang mahmah tawh a kepte ahihi. Amaute in hun tawpna a, lim lang tuipi gal a, ding a, zawhna laasa te ahi uh hi. Kamsangpa in agen na ah, “Limlang tuipi meikuang tawh ki hel bang ka mu a, sapi leh a milim leh, a ciamtehna leh amin nambat te pan zawhna angah mite in limlang tuipi gei ah ding in, Pasian tamngai te tawi uh a, Pasian nasem Mosi leh Tuuno la, asa uh ka mu hi,” ci hi. Mang. 15:2,3.