Youth Congress/Camp hong tun nading ni 76
kisam lai hi. MUC a deihte Mission ten hong etcik piak uh ni 90 hi a, tua sang
i hun hong tawm zaw tham ta hi. La khat in a hun tom a nite tawm a cih mah
bangin ka ngaihsut ka lung himawh mahmah thu hong om hi. Tua Question in kei
leh kei ka kidotna ah : Youth Congress/Camp bawl nadingin kigin kholh hun tom
lua, nai lua ta a hih manin mui bun tangzai khol ken cia, hun ngah zaw lai leng
geelna picing zaw dinga budget zong tam zaw ding in mi hong tam ding hi ven maw,
kei leh kei ka lungsim ngaihsutna kitanglai ziahziah hi.
Ka
lungsimah bel ni tam manin kilawhcing hilo a Pasian hong ompih ding thupi zaw
ka sa ta hi. Topa tungah thu ka ngen a ni 76 hun nei lai ung Topa, Conference
ka kipat un ni 90 sung etcik hong kipia a, tua khit ciang hawl khiat ngah ung.
Ahizong nong ompihna mah tawh Tin Jubillee ka la khin uh a, MUC ka din zawh uh
Youth Congress/Camp MUC gambup in a (1) veina ka bawl nuam uh hi.
Gualnopna
peuh, lawm kingaite kimuhna ding peuh a bawl nuam ka hi kei uh a, MUC gam bup
sungah Adventist khangnote kipum khat in unau lungsim nei in kha khanlawhna
ding thalak nading a bawl nuam ka hi uh hi. Topa ka mai vuah hih na lianpi
sepna ding hong daltan Goliah bang in a sang Santuipi bangin a haksa "
Money" ka mai vuah om hi. Youth
Congress/Camp a pian zawh na ding hong huh in , nai 1824 sung bekbek nei lai
ung a ni in cileng ni 76 nei lai ung Topa a pian theih nading nong ompihna hih
hun sungin na lamdang hong bawl in cin thu ka ngenngen hi.
Ka lungsungah muanna khat ka ngah a, hun tom hun tam tawh kisailo hi.
Israel mite in Jericho khuapi a sim in kal khat sungin mihing sep theih loh zah
dong in na lamdang piang hi. Ni 40
sungin zong gual zawhna om man lua hi cih Topa hona ka ngah hi. Egypt hong
paikhia zawh uh Israelmite in a ni 40 thukham ngah ngah uh a Topa ompihna in
tuam a, nek ding a pautauh loh hun, sum leh pai a patauh loh hun uh pen ni 40
khit ciang ahihi.
U leh nau tuipi gal a om khempeuh aw, sum ngah nadingin na haksatna, na khua ul luang, na khitui
luang khempeuh kong theihsak hi. Tulaitak i khua hun pen a nget haksa, a piak
haksa din mun ahi hi. MUC ading tam veipi ma nong panpih khin a, tutungin MUC
gambup ah Adventist khangnote kum 10 val sung a kimuh loh uh sawt lua ta a,
kituak le uh zong pawlpi mi kisa kha lo mawk hi, kum 10 val sung MUC khangno a
kimansuahte ka kimuhkik na ding uh, ih kimuhkik nading na panpih theih zahin ma
hong panpih lai in cin MUC AY tangin huhna kong nget behbeh lai hi.
Ki it ding
kim lai, laizom melma bangin ih kum 10 val ta hi. Nong huhna hangin na lianpi
kisem zo taktak ding hi cih ka upna leh ka thungetna ahihi. Gambup Youth
Congress pen kum sim hong hilo ding hi. Hih Camp ah nong kihelna in mannei
mahmah ding hi. Mungtup pen Revival and reformation ahihi. Guhnung thupha MUC
gambup ah hong om theihna ding thungetna tawh pang ciat lai ni. Youth
Congress/Camp ading hong kihel khempeuh Topan a zah 30,60,100 dongin hong
lohsak kik ta hen. Lawhcinna, cidamna, vantung thupha, leitung thupha i biak
Topa Pasian in hong pia ciat ta hen. Lai sim khempeuh Topan MUC veina hong
lailai ta hen. Amen.
Thupuak Sia Kap Do
MMCColege, Myanmar
Limte acingzaw na etbeh nop leh Hitengpan na mekve lawm!
Youth Camp thu atheibeh nuam ta ding Hitengpan hihlink na mekve!
