MUC

Print Friendly and PDF

Friday, October 7, 2016

PASTOR TE' MASUAN





PASTOR TE' MASUAN

Gospel a tangko dingin a om ahi hi. Tua ngiimna kikhel ngeilo hi. Tuhunin ahih leh Mangmuhna14:6-12 sung a vantung mithumte' thupuak bulphuh a tangko ding ahi hi. Hih ngiimna apicin nading Pastorte in pawlpi amakaih ding uh ahi hi. Pastor leh khawtual pawlpi in amau'sep theih dandan ding tawh kituak in nasep danding geel khin ding hi.Hih anuai a thute Pastor in anasep na-ah a ngaih sut masak ding thu te ahi hi.

THUNGETNA:


Thugen (hilh)napanin pawlpi avaak,ahansuah , a makaih ding ahi hi. Thuhilhna amaan pen in Lai Siangtho sung a bangbang athu hilh ahi hi.Thu hilh pa in ama thu ahilh ding hi lo a, Pasian' thu puak ahilh Pasian' kamtai ahi hi.

Hih nasep lianpi asep zawh nadingin Pasian leh Lai Siang tho tawh hun zat khop kul hi. Lai sim hun apiak na uh tawh pawlpi in amah ahan suah ahuh ding uh ahi hi.Pastorte in in zingsang tung lai sim hunin zang nuam pen uh hi. Tua bang a zing sang hun te amawk na bang a ngaih sut ding hi lo hi. Pastor' masuan a thupi pen khat in thu hilhna ahi hi. Thu hilh a siam semsem nadingin Lai Siangtho sim na hun tampi azat ding kisam hi. Tua hileh amah bek hilo-in pawlpi in zong phat tuam pih ding hi.

TUUTE CINNA:


Pastor in ama masuan azawh nop leh laibu nih tawh aki mel theih mahmah kul hi, ci-in aminthang Pastor khat in gen hi. Khat pen Lai Siang tho hi -a,a dang khat pen pawlpi mi sayin ahi hi. Lai Siangtho banah tuucing pa in a tuute hoihtak a a vaak nop leh atuute a theih kim kul hi. Thu hilhna bekin a suk khak zawh loh pawlpi mi zong om thei ahih manin, mimal a nasep na zong aneih veve kul hi.

Pastor pen pawlpi mite' inn ah hawh ding ,amaute' dahna, lungdamna, hatna leh hat lohna theih pih ding hi. Hih pen Pastor nasep bulpi hi a, Ellen.G White in zong hih bangin na gelh hi: "Hih nasem dingin kipan napi, kipumpiakna atawm theithei tel a,thu hilh na bek tawh ki lung kimsak a,mimal nasep na (Personal Ministry) midangte a semsak mi-i nasepna pen na Pasian in san tham cing sa lo hi.". The Acts of the Apostles ,p.527.

Pastor nasep lakah tuucinna a thupi pen ahih hangin amah bek in a sep ding hilo hi. Elder-te ,deaconte leh deaconess te zong pawl pi' nasem (sila)mah hi uh hi. Pawlpi mi khempeuh tawh kizopna, kimel theihna kician tak a om theih nadingin pawlpi ciat in hoih takin geel kul hi

Lim tak akikan tel na-ah, Khalam vai, Sum vai,dam mawh vai leh lungzuan khuangaih laitak, tangsap lian khat peuh a om laitak amimal kizop, kidonna a om loh manin pawlpi pan atawp kik tam pen hi, cih kimu hi. Pawlpi mi khat haksatna amah guak thuak sak a, pawl pi-in a phawkkhak loh ciangin amah a lungkia-in, khasia-in pawlpi pan tawp thei hi.

PAWLPI MAKAITE PAWLPI MITE PANTAH DING HIAM GUAN DING:


Pasian' na asem dingin Pastor in pawlpi mite pantahin hiam guan ding hi. Tua nasep na-ah "pawlpi' ading "nasepna leh "pawlpi' na" sep khiatna nam nih huam hi. Pawlpi pen ama mite'a bek asem ding hilo-a,mikhempeuh kiangah hotkhiatna thu apuak ding zong ahi hi. Tua nasep na-ah pawlpi mi khem peuh kiangah hotkhiatna thu apuakding zong ahi hi.Tua nasep na-ah pawlpi khempeuh pang ding a, tua dingin kisin kipattah na zong aneih kul hi. Akipattah dan ding uh pen amau' khuatual a kisapna dan tawh kizui hi ding hi. Khawtual pawlpi a kipattah nate ah Mission Departmental Directorte in hong huh thei ding hi. A pawlpi Pastor mahmah pen tua bang ahilh thei ding mi hih kul hi. Pasian' nasepna a picin taktak na dingin biakinn (pawlpi)khempeuh kipattahna (trainning )phual hi ding a, Pawl pi mi khempeuh kihel ding hi. Pawlpi mi khempeuh in azat theih ding kha (mi)ngah om hi. Tua ban ah amau' nopsak dan tawh kizui a kha(mi)ngah thei a suah nading un,a mimal ' siam na leh lawpna ciat tawh kizui-in pattah ding zong kisam hi.


LUNGDAM THUPUAKNA AH PAWLPI MAKAIH DING:


Biakinn khempeuh lungdam thu tangkona phual, pawlpi mi khempeuh lungdam thu tangko pawlpi ahih ding kisam hi. Hunbei ding nai hi cih um a, nasep na zawh nading hunta ih sak leh,lungdamthu puak khiat ding pen tupna lianpen ih hih sak ding hunta hi. Pawlpi in ihsep ih bawl na khempeuh tua lung sim tawh ihsep dng ahi hi.


KHANLAWHNALEH KIPUAHPHATNA:


Khanlawhna,kipuahphatna leh lungdam thu puakkhiat na hih thu thum tonkhawm hi. A thadah pawipi tungah Kha Siangtho kibuak ngeilo ding hi. Mingah nasep na-ah khanlawh na zong hong om hi. Lungdam-thu puak khiat na in khanlawh na piangsak a,amaan khanlawhna pen kha (mi) ngah na in zui tawntung hi.

PAWLPI MITE KIHEL SAK DING:


Pawlpi mite' tha leh siamnate zang a, a mimal hanciam sak na in pawl pi' mainawt na ahi hi. Nasep a thupina leh goal te cit zawh nading Pastor in pawlpi' mai ah lak den ding a, amau' siamna ciat tawh kizui-in a masuan ciat uh a zawh ding a thupi na zong lak den ding hi. Pawlpi mite hansuahin, pantahin, nasep lian zaw asem dingin makaih leh, Pastor in mi ngah nading leh midang pattah nading hun tam ngah zaw ding hi.

Mikhat pawlpi sungah tui hong kiphum ciangin nasep aman hi nailo hi. Upna-ah akip nadingin vaak kul lai a,thunget dan, Lai Siangtho simna Pasian ki-ap den nading dan leh a upna midangte ahop sawn theih nading dan hilh kul lai hi.

PAWLPI' OMDAN:

Thu um thakte a sukha mahmah thu khat pen pawlpi sung a amuh loh uh omdante ahi hi.Amuh khak kha lam omdan te in ama omzia koi ciang hiam khat hong sukha ding hi. Pawlpi sungah alum lel ahih kei leh avot omdan te in, thu-um thakte upna-ah a kop taktak ma-un amaute sia sak ding a, khingcip sak ding hi. Tua hih manin Pastorte, pawlpite leh pawlpi makaihte in hih thu nakpi a a ngaihsut ding uh kisam hi.
Cimphawng

Siapa: : Kikhop pen pumpi a dingin cidamna, lungnopna leh kha a dingin kha gilvahna ahih manin zongsatna hoih khat hi. "Thadah kei un".
Pawlpimi: : Himah,Sia aw pumpi ading nacih, kei bang hoh inn om leng, ihmu theingeilo, Biakinn kong paiteh biakinn ah ihmu thei bilbel ing.

Source: Vol . 2 Conference Thu kizakna Jul- Sep, 2016

To get the latest update of me and my works

>> <<