KHAWKPI 3 (GUAH NUNUNG) GUAH MASA TE NGAH NGEI PHOT NADING

KHAWKPI 3 (GUAH NUNUNG)

A OMZIA

Khasiangtho in mimal tung leh pawlpi tungah piak theih ding thupha te khempeuh Pasian in hong buak hi. Khalam thupha piak ding khempeuh zong hong tunpih sak ta hi. Pasian hihna pan aa, a thumna pa in, Pasian leh Khris aiawh in mite tungah hong kilang hi. Pasian vang tawh mite lungsim a kulna bangin nem sak hi. Amah lo in kua mah kikhel thei lo hi. Tua  Kha Siangtho nasep pawl khat te gen leng:

---

Mawhna pan kikhel in, thu maan sak. A dik lam in lungsim heina piang sak hi. John 16:8. Pasian thu theihna ding in lungsimte puah aa, thumaan musak hi. John 14:26, 16:13. A kisim ngeisa Lai Siangtho munte a kisap laitak phawk kik vat sak hi. John 14:26, Mark 13:1 Pa leh eite kikal ah, ih thungetna a siangtho in, puah in na puak sawn sak hi. Rom 8:26 Pasian tate ih hihna hong telphawk sak hi. Rom 8:16.

Pasian mite in thupha ih tangko na ah vangliatna tawh hong huh in hong zo sak hi. Sawl. 1:8. Khasiangtho in a khang khang in mite a ding hong sepsak aa, ahih hangin tua bek zong hilo ahun tuam vilvel khat teh a kisap na zui in a piak ngei den lel te bang lo, alom aa piak ding Topa in hong kham lai hi. Tua tawh kisai in guah masa zong ama kisap hun in Sawltak te in mun citeng aa ana sep uh apuak zawh na dingun, na buak suk zo hi. Guah nunung zong a hong khapsa tulai ei khang hun a dingin leitung khempeuh a nasep ih zawhna dingin pawlpite tungah hong buak lai ding hi. A kisam thu phawk in tua guah nunung pawlpi tungah hong buah nadingin nakpi in thu ih nget ding ahihi. Mun khatkhat te ah hong kibuak ta cih zong ih muh tei hang in, tua bang bek hilo, alam dang sak huai zah in, ih pawlpi, ih siate, pawlpi mite, akisam bang ki puahphatna ih neih hun ciangin, guah nunung pipen hong kibuak lai ding hi.

TELLAHNA

“Lungdam un, No Zion tate aw, Topa na Pasian sung uh ah nuam un. Amah in ahoih bek tak in guah masa ahong buah mah bangin note ading guah hong zu aa, guah masa, guah nunung kha kik sungin hong buak ta ding hi.” Joel 2:23.

“Tua nung ciangin ka kha, mite tungah ka bua ding aa, na tanu te un hilhkholhna gen ding uh aa, na khanghaam te un mang man ding uh aa, na khangmoi te un mang mu ding uh a, nasem numei pasal te tungah zong tua ni ciangin ka kha ka bua ding hi. Tua thu Topa hong pai ding ni lianpi ni hong tun’ ma in apiang ding hi. Joel 2:28,31. Tua khapna pen Sawl 2:17-20 ah hong gen kik sak leuleu hi.

“Topa thei nuam a anung ih zuih leh, tua hun ciangin ih thei ding hi. Ama hong pai khiat nading zing sang ki seem silsial bangin hi ta hi. Amah in guahzu bangin leitungah hong pai ding aa, guah masa leh guah nunung hong zu sak ding hi.” Hosea 6:3.

“Nisuahna lam gamte ah, khai tuh hun le, khai lak hun in a kisam bang in guah masa leh guah nunung zu a, Hebrew kamsangte gen kholhna ah, Pasian pawlpite tungah Khasiangtho thupha tehna dimlet in kibuak ding hi, ci uh hi. Sawltakte khanglai aa ki buak pen guah masa hi a, ana sepna ki patcilna pan minthan’na angah pah hi. Tulai hun beikuan a hong kibuak ding Khasiangtho pen pawlpi maan tungah hi ding hi. AA 54,55.

ADEIHNA

“Tua hun ciangin “Guah nunung” Topa mai ah kithak suaksak kik na hun hong tung ding a, vantung mi thum tangkona aw ging ngaihsak in, misiangthote gimna nam sagihte a kibuak hun ciang a dingin kiging khol sak ding hi.” EW 86.

“Nasep dan pen Pentecost ni a tawh kibang ding hi. Thupha tangkona a kipat tunga ih thupha khaici posak ding guah masa a na kibuah mah bangin, khaici minta aa, at na dingin guah nunung zong hong ki buak ding hi. GC 611.

AKI MAN’NA LEH A KISAM

“Hih hong khap thupha in, upna tawh thupha dang khempeuh zong hong tun’ ding hi. Tua pen Khris in hehpihna a neihzah zui a hong kipia ding hi aa, Amah in a sang ding mite’n a san theih zahzah pia dingin a kiging khol zo hi. GW 255. Tapidawte hoihna leh thupha san’na in Khasiangtho gah ahi hi. Gal 5:22,23.

“A kipat tung limphet in eite hong huh hong hatsak pen ei deih banga ih zeek hi lo hi. Guah masa thupha ih san’ zong atawp donga akisam bang hong kipia hi zaw hi. Tua bek kicing nai lo hi. Tua guah masa bek tawh lungkim in guah nunung ding mu lo in om leng, khaici min ta a, at nading phiau kawi kiging thei lo ding aa, khaici tuh te tasamh ding hi. A ki pat lim panin Pasian hehpihna thupha bek in zo thei hi. Awlmawh lo a om theih ding hi lo hi. Khris hong cian piak mangngilh ngei loh ding ahi hi. “Thu ngen in ngak un. Thu ngen den sa in ngak un” hong ci hi. Mai ih nawtna dingin Pasian huhna kisam tawm tawm den hi. Ahih hang in ih nget beh det ding hi. Ih nasepna hong mot bei sak lo ding hi. Mai ih nawt kei aa, guah masa leh guah nunung sang thei ding a ih na om kei leh, ih kha te taan leng, eima bang kua tavuan ahi hi.” TM 507, 508.

GUAH MASA TE NGAH NGEI PHOT NADING 

“Tua a masa hun lai in zong, mawhna teng pulak a, siang khin in, mawhna khempeuh ki maisak khin a, aam liang in thu ngetna tawh Pasian kiang ah ki-aap ciat uh hi. A thu ci leng, tu hun in zong tapidaw khantohna tawh kipuah siang ding a kul ahi hi.

“Mi tampi in guah masa angah nading taan uh hi. Pasian in amaute apiak thupha te ngah kha lo uh hi. Amaute in, “Aki sapna mun ah Pasian in hong huh ding hi,” ci uh hi. A tampi hong ki buak ciangin a sang thei dingin ih lungsim ih hong ding hi ci uh hi. Tua bang mite in akhial pha mahmah uh hi. Mihing lungsim sunga Pasian nasepna pen Ama khuavak piak theih nate kizom in, khang toto ding ahi zaw hi. Mi khempeuh in amau kisapna tek teltheih ding ahi hi. Lungsimte mawhna pan ki puah siang ding a, Kha siangtho ten’ na ding in awn sak ding ahi hi.

Pentecost ni a guah masa Khasiangtho a ki buah lai in zong a mawhnate uh pulak a, nusia in, aam liangin thu ngen uh aa, Pasian ah kipum ap in, nungzuipite in Khasiangtho a dingin na kiging uh hi. Tu in zong tua bang veve a golzaw kingah ding ahi bek hi. Mihing in thupha ngen aa, Ama na ih sepna ah, Topa ngak ding ih hihi.

Ahih hangin guah masa pen tawh hehpihna a om toto ding hi aa, awlmawh loh ding hilo hi. Tua khuavak ngah a, tua khuavak azangte bek mah in, khuavak pi pen zong ngah ding hi bek zaw hi. Ni sial in tapidaw nuntak na ah mai ih nawt tohtoh kei leh, guah nunung zuk ciang a kilang Khasiangtho pen ih ngah kha ngei kei ding hi. Ih kiim ih paam ah mite in ngah in, e’n ih ngah kei lel mawk kha ding hi.” TM 507.

“Khris biakna in mawh kimaisakna ciang bek hi lo a, mawhna paikhia in tua mawhna a om ngeina mun teng omna ah, Khasiangtho hehpihna dim ding ahihi.” COL 419, 42.

“Eite in ih theih dingin, guah masa ciamkha lo a omte in guah nunung Khasiangtho hong ki buak teh zong a ngah kha lo a phawk kha lote hi ding uh hi,” cihna hi. TM 399.

“Mi tampi in tu laitak a ama hih theih thuphate, puah in sem ning ci lo in, Khasiangtho kipuahphatna hunpi hong tun’ teh, ka kiim a teng taang sak ning, ci in ngak thei uh hi. Amau in tulai tak a sep ding te awlmawh lo in a khuavak uh hum cip ta dih uh hi. Mai lam ah, thupha lom kibuah ciangin amau thasan kul lo in a sem thei ding uh kisa kha ta zen uh hi. AA 54.

“Tuni in na bungpi uh na puah siang ding uh kul hi. Vantung daitui zong in kiging le uh cin, khaici atna guah nunung pen na sang thei bek ding uh hi. Tua guah nunung hong pai ciangin Pasian hehpihna in amah ana kipuah siang sa te bek hong zang thei ding ahihi.” EV. 702.

“Guah nunung ih mot ngak kei ding hi. Tua pen hong pai ciangin vantung daitui leh khaici atna thupha ih tungah hong bua ding hi. Eite in khuavak tuamtuam te kaikhawm aa, Pasian hehpihna om teng ih nasan’ ciangin, Amah ih it ding a ut PA in, a hong khap thu hong pia ding ahi pan hi. Isa. 61:11. Leitung buppi Pasian minthan’na tawh kidim ta ding ahi hi.” 7 BC 984.

KHASIANGTHO HONG MAKAIHNA LAWPTAK IN ZANG DING 

“Khris in apawlpi tungah Khasiangtho hong piak ding khamm, mah hi. Tua khapna pen nungzui pite tunga kipia zah mah hi ding, ci hi. Ahih hangin a khapna dangte mah bangin a piakna ding mun pen, a mihing te a na omzia zui in pia ding, ci hi. Mi tampi te in Topa hong khapna thu, a um in kigen uh aa, Khris leh Khasiangtho thute gen uh aa, ahih hangin amau in a sang kha nai kei uh hi. Amau in tua kha’ makaihna leh a ukna ah kipia nuam lo uh hi, Khasiangtho pen e’n zang ding hi zaw lo in, Khasiangtho in eite hong zang ding hi zaw hi. Tua Khasiangtho mah tawh Pasian in amite sungah nasem aa, ama deihna bang lawp taka sep ding ahi hi. Phil. 2:13. Ahih hangin mitampi te in tua dingin kipia nuam lo uh hi. Amau leh amau na asem nuam zaw uh hi. Tua manin vantung letsong ngah thei lo uh hi. Pasian makaihna kiniamkhiat taka angak mi, ahehpihna’ sawl bang bang a zui mi tung bek ah tua Khasiangtho kipia hi.” DA 672.

KI THEIH KHIALHNA TE LEH KILEM LOHNA TE PAIKHIA DING

“Pentecost ni hong tun’ ma in amaute ki kaikhawm uh aa, akilem lohna te khempeuh uh hemkhia uh hi. Amaute thu khat in luang uh hi.” DA 827. “Pentecost ni hong tun’ ciangin amaute thu khat in luang uh hi.” Sawl. 2:1.

Tapidaw te a kilemlohna teng uh hemkhia sak unla, gammang mite honkhia dingin, amau leh amau Pasian tungah ki aap uh hen. Tua ciangin muan’na tawh tua thupha ngen le uh hong pia ding hi.” DA 827.

HONG KHAPNA LEH PASIAN DEIHNA

“Note migilo na hih na pipi un, ahoih bang zah na pia nuam uh thei unla, vantung a om na pa un, a ngente Khasiangtho thupha a bangzah hong pia nuam zaw ding hiam? LK 11:13.

Leitung mite lam ah Ama thupha tampi hong luan theih lohna pen, Pasian kiang pan a ki taangsam thu hi zaw lo hi. Mi khempeuh in deih takpi henla, Khasiangtho tawh kidim nuam takpi le uh, Topa in tua Khasiangtho pen ama nasemte tungah pate in atate tungah na hoih apiak nopna sangin hong pia nuam zaw lai hi. Ni sial in Khasiangtho tawh ki tuiphum in, nasemte khempeuh in Pasian kiangah ngen den ding hi.” AAp. 50.

“Pawlpi tungah Khasiangtho hong buasuk ding pen, mailam hun ding bang in ih nei hi. A hih hangin tu mahmah in ih neih ding thu hi zaw hi. Zong in, ngen in, um in. Vantung in pia dingin koih khol kin ken zo hi. Ih ngah takpi ding hi.” EV 701.

“Tu hun mahmah in, Ama thu sang a, Amah a beel te a dingin A Khasiangtho thupha om hi.” 8 T 20 (Ch S 250).

Topa hong khap thute eimau a ding hi. A hun tu hun hi ta hi. Topa in hong khapsa thu hong pia nuam lua ta hi. Bang hang in guah nunung ziakaai ding tawh kibang lailai hiam?

OMZIATE

Pasian hong khap nate a pian’ ciangin a tun’ na ding thu pen a nate omzia tawh kizui in piang zel hi. Khris in a pawlpite Khasiangtho buak ding in kham hi. Nung zuipite tunga akhap zah mah hong kham hi. A khap dangte mah bangin ei san tawh kizui in ong pia hi.” DA 672. “Hih thupha kikhaam te upna om zah tawh kizui in thupha dangte tawh zong pia thuah hi. “Khris hehpihna a navom zah uh tawh kizui in. Amah in mite san’ theih zah ding ciang tawh ki tuak in pia hi.” Ibid. “Khasiangtho in mite lungsim sungah, amipa thukim zah leh a deih zah zui in nuntakna thak guan hi.” COL 411.

Pasian thukhenna in leitung a vaat ma in, sawltakte khang a ki pan, hih bang kipuahphatna lian a om ngei nailo zah kipuahphatna hong om ding hi. Tuate tungah Pasian Khasiangtho vaang hong kibuak ding hi.” GC 464.

“Eite in tapidaw nuntak hoih ah, nisial in mai ih nawt den kei leh, tua guah nunung Khasiangtho kibuak pen, ei kiangah hong kilang lo kha ding hi. Ih kiim ih paam ate lungsim ah tu kha ding a, ahih hangin ei’n ngahlo, phawk khalo ding hi hang. “Eite in tua guah masa leh guah nunung ngah dingin ei leh ei kipia aa, ih na gamtat kei leh ei mahmah kha zong taan in, eima bang kua ei vai hong suak lel ding hi.” MT 507, 508. Tua omzia te honpi khat ih kheng to ta hi:

Khasiangtho kisap lam thei a, hong ompih na ding nget na.

“Mi khempeuh in deih leh, a vekpi mah un, Khasiangtho kidim ding hi. Koi mah peuh ah Khasiangtho kisapna kineu ngaihsut kha a, tua bang mun ah kha lam keuna, kha lam khua mialna, kha lam niam sukna leh sihna ki mu hi. A tung a pat in a thu neu lelte thupi kisa aa, Pasian vanglian, pawlpi lawhcin’ na ding leh mainawt nading aa akisam pen’ ki awlmawh lo hi. Thupha dangte zong hong puak kim ding zaw pen, tampi hong kipia nuam napi ngah lo in ih giau tau zaw sop hi.”

“Hih bang in tua vaang kingah thei ahih leh, bang hangin tua Khasiangtho ki tangsam in, gilkial dangtak in om ih hi hiam? Bang hangin tua thu gen in, ngen in, hilh lo ih hi hiam? Topa in tua Khasiangtho pen Ama na a semte tungah, nu leh pa in atate napha apiak nopna sangin pia nuam zawlai hi. Ni sial in siate in tua kha tawh ki tuiphum in, Pasian kiang ah a nget den ding uh ahihi.” AA 50.

“Khasiangtho in a ngente ading nuntakna moh pianuam aa angente pepeuh tungah tung ding hi.” 6 T 90 (ChS 252).

“Pasian kha hong kibuak aa, leitung bup a taan’n sak ding pen, Pasian tawh nasem khawm aa, mite ih khuavak ih salh sak mateng hong tung lo ding hi. Ih pumpi ih lungsim khempeuh Khris nasepna dingin ih piak ciangin Pasian in tehna nei lo-in Ama Kha hong bua ding hi. Pawlpi sung a tamzaw in Pasian tawh na ih sepkhawm mateng hong bua nai lo ding hi.” ChS 253.

“Pawlpi bupin ki-aapna nei ni. Camp meeting khawng, khua pawlpi kikhop khawng leh, mimal a kha gupna ding aa nasepna khawngte ah, Pasian in hoih a sakna mun ah guah masa leh guah nunung zong kipia ding hi.” ..”Ki khopna khat pepeuh ah pel lo in, vantung huhna ngah ding hi kim lo hi. A thu leh amun tawh khaici atna thupha piak huai hiam cih hi zaw ding hi. A hih hangin Pasian mahmah in tua guah zu ding sawl ding hi. Tua ahih ciangin a nget ding pen ih mangngilh loh ding ahi hi. Ih nasepna ngei pai den lel pen muang kha mawk lo ding hi hang. Eite in Pasian kiangah nuntakna tui akhak tan lohna dingin ih ngen ding ih hihi. Ei mahmah in tua nuntakna tui ngah masa ding ih hi hi. Lungsim kisik in, tu mahmah in thu ngen dih ni. Guah nunung zuk hun hi ta a, khai ci at nang guah hong zu ta hen. Kikhopna khempeuh ah ih thungetnate kahto in, tua hun sung teek mah in, Pasian in ih khate hong nel sak in, hong lumsak ding hi.” TM 508,509.

“Thu na nget mah bangin, um inla, Pasian muang in. Tu in Topa in a Khasiangtho tampi a hong piak ding hun hi ta hi. Thungetna ah aam inla, lungsim gil tawh ngakin pang in.” TM 612.

KI PUM PIAK DING

“Eite tungah a Khasiangtho tampi hong buak nuam ahih ciangin, ei leh ei kipia aa, lampi na puah siang ding amah in hong sawl hi. Ei mah Pasian tungah ki pumpiak le hang, ih mitte kihong ding a, Khris ih bat lohna munte in midangte maidal ahihna ih mu ding hi. Tua bang mun khempeuh hemkhia dingin Pasian in hong sawl hi. Amah in, “Na mawhnate uh ki pulaak unla, khat leh khat thu kinget sak le uh cin na dam ding uh hi, hong ci hi” James 5:15. 6 T 43 (2TT 382).

“Mi khat in amah kipuah sianga, asung pan in Pasian maanlo teng anil khiat ciangin, tua mun awng ah, Khris in a Khasiangtho thun dim hi.” GW 287.

“Ahun in, akicing zaw leh ki aapna kipzaw ngen hi. Kei zong Pasian kiang ah kap in ka kiko aa: a ma tavuan nakpi asem nuam tangkote hong puak in; mawhna citeng tawh akizom, ama mai bek a khuat lo mi, Pasian nasepna dinga kipumpiak, amah leh amah singlamteh aa kikhen, nasepna siangtho a deih, tavuan a zo Pasian kiang a biakpiakna khebai lo, sepna leh ngetna a thadah lo mi kisam hi” kici hi. GW. 114.

“Ku amah in amah kisiangtho sak thei lo hi, Khris a ding nasep kizawh na ding bel ih thukim pih thei bek hi. Topa aw, ka lungsim hong tang in. Kei leh kei in kong ki pia thei kei hi. Nang ma neihsa ka hi a, a siangtho in hong kem in, Kei leh kei ka kikem thei kei hi. Kei leh kei hih zawh lohna hong huh in, Ka tha nemna, Khris ka sut zawh lohnate, hong khel in hong zeem in, A siangtho, a kician in hong diing sak in, Na itna pha luan’na in hong zang in” ih ci ding hi. Tapidaw ih kipat limphet in, a tunglai bek hi lo, a kizom to den in ih kalsuan na khempeuh ah vantung lam zuan in kithak suahsak den ding, ei angsung khualna hoih lote nilkhiat den ding ahi hi.” COL 159,160.

“Kisaktheihna leh ei leh ei phazo ki sak khakna sang a Pasian nial khakna alau huai zaw mihing, te sungah bang mah dang om lo hi.” COL 154.

“Ama deihna koih khia aa, alungsim sungah Khasiangtho in na a sep theihna bangin Pasian tung a aki-ap khin siang mi khat pen, a ki zatna nasiatzia ciangtan om lo hi.” Ch S 254.

“Pasian nasem sia khat in kiniam khiatna lianpi nei ding hi. Pasian nasepna ah a bun ngei mi khat in, ki sak theihna leh tungnun nopna a gamla paih khiat mi hi ding hi. Bang hang hiam cih leh, Pasian minthan’ na len in pahtawi ahih ciangin, ama nasepna aniam pen mun nangawn zahtak sak ding hi.” GW 142.

GUAH NUNUNG TUN DAN

“Khris pumpi nate ahi mite in, hun nunung a kidona Jacob lungkham hun nai na mu uh hi. Amaute in Khris sungah khangto in a Khasiangtho tampi a vom uh kul ding hi. Tangkona thumna hong picing a, aw ngaihpi ging in, nasep kizawhna dinga min than’ na leh vangliatna in ahuh ciangin, amuan huai a om Pasian mite in tua min than’na angah ding hi. Guah nunung in amaute, haksatna hunpi a kantan zawh nading in puahpha in hat sak ding hi. A maute maitang, vantung mi thum tangkona ahuh khuavak in taang sak ding hi.” 7 BC 984.

“Tua galhiam a silh vang lianpi tawh thu maan a tangko te’ aw ka za hi. Tua nasep in bun mahmah hi. A kidal mitampi zite pen apasal ten, naupangte pen anu leh apate’n, lungsim dik a thu maan za nuam kim lai a dal tan te uh’n zong, a kih tak na lungsim teng uh bei aa, thumaan bek hong pahtawi ta uh hi. Amaute thumaan duh in gilkial dangtaak uh hi. A nuntakna uh sangin manpha zaw in, a it zaw uh hi. Hih thulianpi, bang in piangsak hiam, ci in ka dong hi. Vantung mi in, “Tua thu in guah nunung in Topa mai ah kithak suaksakna pia a, vantung mi thumna awging ngaihpi ahihi” ci in hong gen hi.” EW 271.

“Patau kohna nunung ki tangko khin aa, (gam uk miliante makai liante nangawn tua thu in man a, hong sep pih uh hi. Amau te Topa in zang a, kim khat te in a thu pawm in, hun hak sapi sungah Pasian mite tawh hong ding khawm uh hi.”

“Vantung mi thumna tangkona ahuh vantungmipa in leitung bup minthan’ na tawh taang sak hi. Leitung bup ah nung tolh lo a, nasepna mai nawt ding kigen khol zo hi. 1840-44 lai a lam-et tangko na pen vantung mi masa in Pasian vangliatna lakkhia a, leitung a Mission ki phuhna mun khempeuh lok in, gam khat khat te bang a kum zalom 16 lai a phuahphatna ki tangko zawh biakna lam lawpna ah alianpen suak hi. Ahih hangin tua te khempeuh sangin hih patau kona nunung vantung mi thumna puak thukhupna pen nasia zaw tham lai ding hi.”

“Nasep dan pen Pentecost ni a bang mah hi ding hi. Khaici pokhiatna ding a thupha kong hong Khasiangtho kibua “Guah masa” a kibuak mah bangin, khaici minta aa, akaihkhop nading “Guah nunung” hong kipia lai ding hi.

“Thupha nasepna lian akizawh nading pen, aki patcil lai akipia Pasian vang liatna sangin tawm zaw lo hi. Thupha tangkona akipat ding lai a, “Guah masa” buak ding ciih hilh kholhna om pen a tun’ takpi mah bangin, atawpna a, “Guah nunung” buakk ding cih hilh kholhna zong tung takpi ding hi. Hih laitak ah Peter in a lamet kholh kipuah phatna agen, “Kisik kik unla, kikhel un, na mawhnate uh hong mai sak ding hi. Topa mai ah ki puah siang nahun om ding a, tua teh Amah in Zeisu hong pai sak ding hi” Sawl 3:19,20.

“Pasian nasem te siangtho tak a kipumpiakna tawh, a maitang te uh taang a, vantung thupiak tangko dingin, mun khat pan mun khat pai in, kin tat mahmah ding hi. tul tampi te aw tawh, lei maitang khempeuh ah, patau ki tangko ding hi. Na lamdang te ki bawl ding hi. GC 611, 612.

“Sawltakte hun lai a kibua Khasiangtho huhna in, “Guah masa hi a, minthan’na tawh kop hi. Tua sangin “Guah nunung pen tamzaw, nasia zaw ding hi.” DA 827.

“Tua lai a omzia pen kingah kik ding a, vangliatna zong gol zaw ding hi. Pentecost ni a, Khasiangtho pen, “Guah masa” hi a, a hih hangin "guah nunung" pen nasia zaw laiding hi. COL 121.