KHAWKPI 5 | PASIAN NASEP KIZAWHNA AWNGAIHPI

KHAWKPI 5

PASIAN NASEP KIZAWHNA AWNGAIHPI

THU OMZIA

Pawlpi sungah ki puahphatna, ciaptehna piakna, haihkhiatna guah nunung zukna, Pasian mite in a tang kona thahatna tuam vilvel khat tawh zawhna, hih te a hun kibang in, a kituak in tun khat kisuah ding hi. Pasian’ mang mu pa in, hih tang kona thumna awging ngaihpi pen vantungmi thum in vanpi kantan in, phiatsiang zah in, mu hi. Mang. 14:6-10.

“Hih laitakah Pasian mite’ nasepna zia hong kilak hi. A mau in thuphamawh mahmah tangko ding nei uh a, thupuak kawi kawi in leitung ah a leeng uh hi. Amau in leitung kialpi ading nuntakna moh akhut uh ah tawi uh hi. Khris itna in amaute len gige hi. Tua pan in tangkona dang om nawnlo hi. Tua baan ah hehpihna ki hel sapna dang om nawnlo ding hi.” 5 T 266,267.

Mang. 18:1 ah, vanglian mahmah vantung mi, leitung khempeuh a vang tawh a tansak thu om hi. Tua vantungmi pen vanglian dang leh thuthak hong pua hi lo hi. Vantungmi thumna’ tangko pen mah a hong picing sak hi lel zaw hi. Leimong dongin zelgawp sak hi zaw hi. Hun tomno sung mahmah in zo gawp ding cihna hi. Babylon puk a, amaute lak pan hong pai khia dingin sap khiatna, a maidal a susia omlo in, siangtak teltak in piakhia ding cihna ahi hi.

Hih thu in kinial na, bawlsiatna phong khia ding hi. Tua hang mah in Topa in ama khut zang in, a lamdang nasep zawhna bawlta ding hi. Tua nasepna dingin amah in, siate leh pawlpi mite khempeuh, angsung khualna pai khia a, Khasiangtho tawh kidim sak ding hi, pawlpi buppi in thalawp takin kha gupna na sem tek ding uh hi. Sawltaknu gelh na ah,
“Tua hun ciangin din’mun sang anei, a zaliante bek hi lo, committee member te bek hi lo, tuipi pen tui in a khuh bangin mi khempeuh in nasep ki zawhna dingin Topa theih telna tawh kidim ding uh hi. Nasepna pen Pasian vangin hong makaihna tawh kizo thei ding hi.” T 47.

TEL-HILHNA

Laisiangtho in eite cin’ zawhloh nasep kizawh nading hong genna ah: “Amah in a nasep zo dinga, thumaanna tawh tomsak ding aa, Topa in in leitung ah tomno sungin a nasep zo lel ding hi.” Rom. 3:28.

“Hih lungdamna thu pen, leitung bupah mi namkimte tungah teci dingin ki tangko phot ding aa, tua teh beina hi ding hi” Matt.24:14. Vantungmi a sagihna pa aw’ a kizak ciangin, Topa thuthukpi nasep a kizo ta hong hi ding hi.” Mang 10:7.

“Tua hun ciangin vantungmi thumna tangkona hong khang ding a, awngaihpi hong suak ding a, leitung buppi Topa minthan’na tawh hong taang ding hi.” 6T 401.

“Tangkona in a tha khiam hetlo in mainawt aa, leitung buppi minthan’na tawh atan’ mateng in khang toto hi, cih John in na mu hi. Pasian thukham azui mite in mainawt in nawt behbeh hi. Ih puak tangkona in mi namcin, pau namcin teng zeel hi. A sawt lo in awngaihpi tawh amin than’na in leitung taan’ ding hi. Eite in tua Pasian Khasiangtho kibua ding pen asang thei dingin ih na kiging khol hiam?” 5 T 383.

“Tua khit ciangin adang vanglian vantungmi khat leitung a tuaksuk dingin kisawl ka mu a, ama aw pen vantung mi thumna aw tawh gawm in, atha hat sak hi. Vangliatna leh minthan’ na ama sungah kiguan’ a, atuahsuk ciangin ama vang tawh leitung teng tang hi. Hih vantungmi’ ken’ khuavak in, awngaih thakhauh tawh a tangko mah bang in, mun citeng tan’ hi. A lian Babylon puk zo hi. Dawite leh kha gilo khempeuh kikhumna, a siangtho lo namcin leh kihhuai vasate kikhumna kaw hawmpi a suak zo hi, ci in nakpi in kiko hi.” EW 277.

“Mawh maisak Gumpa Khris thumaanna hong kilang ta a, vantung mi thumna awngaihni ading in, eite hong ki ze-et hun hong tung ta hi. Tu in leitung bup ama minthan’na tawh a dimh ding, vantungmi’ khuavak kipanta hi. Hih patau tangkona in, a za mi khempeuhte in Zeisu pahtawi aa, Athu leitungbup ah puaksawn ding ahihi. Kamsangpa tunga kilak alim ciin kholhna pen, atak hong kilang ta a, anung zuite tung a ahilhsa thu teng, kihong khiata in mihing tate a dingin na lamdangte kibawl ta hi. Lai Siangtho ah, ama adinga teci pan’ kholhnate zong khia dih un.” 1 SM 363.

“Vantungmi thumna tangkona ahuh vantung mipa in, ama vang tawh leitung bup tangsak hi. Leitung bup a, akidal zolo mainawt nasepna ding hiah kigen khol zo hi. 1840-1844 lai aa, lamente nasepna zong Pasian vanglian kilatna khat mah hi. Vantungmi masa thupuak pen, mun tuamtuam a Mission mun khempeuh ah tunga, kum zalom 16 lai a kipuahphatna khit zawh peuh mah biakna lam lawpna a nasia penpen hi a, ahih hangin vantungmi thumna’ aw ngaihpi patau tangkona pen nakpi in nasia zaw lai ding hi.” GC 611.

THUPIAK TANGTAK LEH ATELZAW A PIAKNA DING HUN TUAM VILVEL

“Vantung pan vantungmi dang khat vanglianpi tawh hong kumsuk ka mu a, leitung buppi ama minthan’na tawh taang hi. Amah nakpi in kiko a agen in ah, Alian Babylon puk zo hi, puk zo hi. Dawite ten’na leh kha gilo teng kikholhna, anin a muhdah huai vasate kawhawmpi suak zo hi” ci hi. Van pan aw dang khat ka za a, “Ka mite aw, amau lak pan hong paikhia un, amaute mawhna leh amaute dan nan thuakpih khak loh na ding un” cih ka za hi. Mang. 18:1-4.

HIh mun in Mang 14:8 a vantungmi nihna gen bangin Babylon pukna tangko hi. Tua pukna pen, Babylon sungah a lip khap huai pawlpawl, din’ mun tuam tuam tampi kigawm ahih na, 1844 khuakhal laitak a ki pan ki tangko zo hi.” GC 603.

 PUAHPHATE’ NASEPNATE ETTEH DING OM

“Puahphate tampi in, a nasepnate uh ah, pawlpi leh minamte mawhna bangci lah khiat ding cih ngimna lian nei uh hi. Amaute in Laisiangtho sung thumaan om bangin tapidaw gamtat hoih lak in, mite makaih sawm uh hi. Pasian Khasiangtho in Elijah tungah hong kipia bangin, amaute tungah hong tunga, lampial minamte leh gilo kumpipa mawhnate taai hi. Laisiangtho thumaan ahilhnate uh, amau deihloh upnate a ki hilh ding adal nop uh hang in, a dal zokei uh hi. Mite khate’ lauhuai thu om pholak dingin ki pelh thei lo zah in thanuam uh hi. Pasian in amaute’ gen dinga a deih thu omte, amaute thuak kik ding lauhuai na zong khual zo lo in, gen uh a, tua patau thu ki pelh thei lo zah in mite in za uh hi.”

“Tua mah bangin vantungmi thumaan tangkona zong ki pulak ding hi. Tua tangkona hat-tak a aki piak ding hun atun’ ciangin, Topa in a kiniam khiat mi, Ama nasepna a aki-ap taktak mite zang ding hi. Nasem ding mite, mihingte phuat pilna sinna, lai siamna neite khawng hi zaw lo in, Khasiangtho tawh a ki nilh mite hi zaw ding hi. Thu um takpi mi, thu ngen den mi, a siangtho thanopna nei mite Pasian in a thumaan pho laak sak hi. Babylon mawhna luui-khia in, lakhia ding hi. Sikha hopihna zang a, kumpi leh pawlpi te kikopna lauhuai, simtham tak leh ma liau mahmah a kin Pope power te pen, tang thei lo lel ding hi. Tua bang thu kigen a za ngei lo mi a tul lomlom in thu ngai ding uh hi. GC 606.

THUPUAK IN BAWLSIATNA PIANGSAK

“Pasian nasem te in a Tuuhon te uh tung a khuavak tang ding dalnate hong khia dingin mihing sep ngeiloh zah tawh hanciam in sem uh hi. A ki sawlna khempeuh ah atel gen theihna ding un hanciam uh hi. Pawlpi puukte in kumpi anaa ngen a, Pope leh Protestant te kikop, nasep ahi hi. Sunday anaa hial aa, Sunday tan’ ding pen, khauh semsem in, khentel sa ahi hi.

Pasian thukham zui nuamte tua anaa in su kha mahmah ding hi. Amaute sum daan, thong daan ki tat ding hi. Pawlkhatte ta leuleu, anaa nei din’ mun kipia in, letsong leh hamphatna tuamtuam tawh amau upna a nusiat theih nading un, ki bawl ding hi. Ahih hangin amaute phi kik nading panin, “Pasian Laisiangtho pan in khial ka hih na uh hong lak un” a cih ding Luther in zong a na cih ngei sa ahi hi. Thukhen na zum mai khawng ah aki puak ciangin, thumaan om bang, hang tak in pulaak ding uh a, aza mite Pasian thukham zuih nopsakna ah kai ding uh hi. Tua hi leh hi thu a zakna ding uh lampi dang a omlo mite in za ding uh hi. GC 607.

Paul kammal mantakin tung kim hi, “Khris sungah gamtat hoih a nei peuh mah in bawlsiatna thuak ding uh hi.” 2 Tim. 3:12. Ih thumaan lente in Sunday-nipi pen zahtak nuam lo uh ahih ciangin, kimkhatte thong ah kikhia aa, kimkhatte ki nawhkhia in, kimkhatte sila in kinei ding hi. Mihing te ngaihsutna ah hi bang bel, piang thei ding in kilawm lo ding hi. Ahih hangin tua bang thusiate adal niloh Pasian Khasiangtho mite lakpan kihok khia ding a, Pasian thukham mudahpa Satan in ukcip ding ahih manin, up theih loh zah mahin, kheltatna dim ding hi. Pasian zahtakna leh itna abei ciangin, gitlohna pen uang mahmah hi.” GC 608.

TAWMVEI SUNG LUNGKHAM A’ CIMAWH

“Hih bawlsiatna hun sung tengin Topa nasemte upna ki ze-et ding hi. Amaute in Pasian leh a thumaan bek en ding in ki hansuah hi. Amaute’ lungsim a uk Pasian’ Khasiangtho in amaute pausak hi. Amau tunga kipia Pasian hansuahna in siangtho hanciamna pia a, amaute sep ding a om bangbang daicip mawk lo in sem in a gen ding uh hi. Amaute in leitung nuntakna a ding hamphatnate zong lo ding uh hi.

Amaute langdona khuapi hong kipei ciangin, pawlkhatte lau in, ih thugente in hih bangin buaina hong piangsak in teh cih muhsa mah hi aa, daitak in om lel le hang ka cih mah hi” ci in gen khia ding uh hi. Amaute haksatna tuamtuam in um cih ding hi. Satan in ze-etna tuamtuam tawh nawk ding hi. Amau nasepnate amaute’ zawhtheih bang lo ding hi. Amaute in, suksiatna vive thuak uh hi. Amau lawpna nopna khempeuh bei hi. Lah ki leh kik theih nawn lo uh hi. Cih nang dang thei nawn lo in, thahatpipa kiang zuan uh hi. Amau thu gente zong amau utthu mawkpau hilo in, patau tangko dinga Ama thupiak ahih lam a phawk uh hi. Pasian in tua thumaan a lungsim sung uh ah guan’ a, gen lo in ki om theilo, ahi zaw hi.

“Tua bang thuak siatna pen hun beisa sungah zong Pasian mite in a thuak ngei zel sa uh hi napi, Wycliff, Huss, Luther, Tyndale, Baxter, Wesly, te in zong tua Laisiangtho sung thumaan om bang sittel a, tua bu sunga deihlohte nial ding gen den ngei zo uh hi. Tua bang mite langdo in bawlsia nate hong tho a, hehpih hetlo in zial gawp napi, amau in thumaan om bang gen khiat ding dual tuan het lo uh hi.” GC 608,609.

UPNA LEH VANGLIATNA TAWH THUPUAK KI TANGKO DING

“Topa in mite tungah thupha nawh kin mahmah thupia khia hi. Kua in tangko lo in nial ngam ding hiam? A mah in a nasemte hih hehpihna sepna leitungah pia khia ding in sawl hi. A kha uh kisia ahih liang kei leh daicip mawk thei lo uh hi. Khris aiawh mi-in hong piang ding launa khual in, dai cip mawk thei lo uh hi.

“Lang pan’na hong nasiat semsem ciangin Pasian nasemte buai gawp uh a, amaute in tua buai na ding phuang khia tawh kibang ding uh hi. Ahih hangin amau lungsim leh Pasian thu om pen a maan ahih na amu uh hi. Haksatna mainawt zel ahih hangin a thuak zawhna dingun hatna kipia hi. Ki-elna pen nai zaw, hiam zaw, ahih hangin amau upna leh khauhna hong tho a, huh hi. Amau teci pan’na in, Kote in Pasian thu ka nial ngam kei uh hi. A thukham siangtho ka phelkhap ngam kei uh hi. Pawlkhat kullai, pawlkhat kul nawn kei ci-in leitungte maipha ka zong ngam kei uh hi. Kote in ka nasep uh Topa in, hong hum thei hi. Khris in leitung ah vanglian khin zo hi. A ki zosa tua leitung vangliatna kihta lailai ding ih hi hiam?” GC 609, 610.

“Mite thu sangin Pasian thu a mang nuam zaw mite ki netniam hun hong tungta hi. Pasian thukham pen khenuai a, aki sikcip thu genkhialo in, amah awlmawh loh ding a ki lawm ding hiam? 5 T 716, (2 TT 323)

“Bawlsiatna pingpei hong ki zial ciangin, tuu maan in Tuucing maanpa aw, a theithei ding hi. A mangthang mi’ gupna ei leh ei kipia in sem in, a mangthangsa mi tampi in Tuucing maanpa nungzui dingin hong kihei kik ding uh hi. Pasian mite ki hon’ pawl in alom un galpa maidal ding uh hi. Kisiatna taangpi ahi tungnun’ kituhnate bei ta ding hi.

“Tua bang thumaan pen ih gamtatna tawh ki lak ta ding aa, ki niamkhiatsa a Khris in a sih mazek lai a thu ngetna hong kipia ta ahi hi. “A maute in ei mau sungah pum khat a suah na ding un, nang mah ka Pa in kei sungah leh kei mah in nangma sunga ka om bangin amaute in ei mau sung a aom nading un, tua thu in, nang mah in kei nong sawl ahihna leitung mite in a up theih nading un,” ci a anget pen hong kipia ahihi. John 12:12. Khris ki itna ahi, u leh nau itnate, eite in Khris theitel a, ama tung pan ih ngah thu hi aa, leitung te adingin teci ahi ding hi. Tuaciangin vantungmi thumna tangkona ah aw ngaihpi ging pen hong suak ding a, Topa minthan’na in leitung bup taan’ ding hi.” 6 T 401.

NASEP KINAWH IN NA LAMDANGTE PIANG

“Thupha nasepna in, a ki pat tung a Pasian vanglian hong ki lang pen sangin neu zawlo vang lian hong tun’ matengin mot khawl lo ding hi. Guah masa hilhkholhna ahong tun’ takpi mah bangin tua pen thupha konghon’ cil na hi a, akhak kik na ding ah zong guah nunung hong ki bua lai ding hi. Peter in ana lametsa ki puah siangna hun a cih pen, kisik kik un, kikhel un, na mawhna uh aki siak khiat nadingin, Topa maiah kipuahsiang nahun hong tung dinga, amah in Zeisu hong pai sak ta ding hi.” ci hi. Sawl. 3:19, 20.

“Pasian’ nasemte siangtho ki aap na hangin, a maitang uh vangtaang tawh, vantung pan akipia thu, puak kawikawi in, mun khempeuh ah, aw tul tampi in tangko hi. Na lamdangte kibawl aa, cinate kidam sak aa, thu um mite lim leh na lamdang in zui hi. Satan in zong khemna na lamdangte bawl aa, mite muh in van pan meikuang nangawn kia sak hi. Mang. 13:13. Tua bangin leitung a teng mite in adin’ mun uh len ding hi.

“Tangkona pen Pasian Khasiangtho zawhna tawh, alang pan, a sel lua om nawn lo ding hi. Kinialna ding teng kinial khin hi. Khaici tang kituh zo hi. Hong po a, agah ta ding ahihi. Laihawm ding teng kihawm khia ta aa, Mission na semte in mun citeng ah theh khin hi. Ahih hangin mite lungsim in, sang taktak a, thumaan om khempeuh a pomm kim khak ding uh a dal om lai hi. Tu in mun khempeuh ah khuavak zangin kap ta aa, thumaan pen a takin lom om ta uh hi. Innkuan hihna, pawlpi khat hih khopna cih bang lelte in dal zo nawnlo hi. Thumaan pen tua bang lelte peuh sang in manpha sa zaw ta uh hi. Thumaan langdo in a hanciam pawl a om hangin mitampi in Topa lamah hong kop ta uh hi.” GC 611-612.

“Patau tangkona nunung kipia ta a, Topa in hih nasep sem dingin mi lian pawlkhatte zong man in zang aa, kim khat thumaan sang in hun hak sapi sung ah Pasian mite tawh ding khawm uh hi.” GC 611.

“Na sepna pen Pentecost ni tawh kibang ding hi. Thupha puak khiat ding ki patcil aa, guah masa Khasiangtho ki buak mah bangin, tua pen khaici po a, a khan’toh na ding hi a, khaici minta a aki at nading in guah nunung zong kipia ding hi.” GC 611.

“Hanthawn vanglian in mi hoihte sawl a, tua Pasian vanglian akilat lai sungin, ni dang a thu um lo, a tanaute uh, amai ngap lohte uh, Pasian Khasiangtho amau kiangah ki liah hi ci a akihtaakte uh nangawn a va hilhta uh hi.” EW 268.

“Pasian in lampi tuamtuam zangin sem dinga, ama khut mahmah viik ta hi cih ki mu ding hi. Nasem mite in, Ama thumaan nasepna ki cingtak leh baih lam tak in sem lel thei ahih na mu in lamdang asa ding uh hi. TM 300.

“A lamdang nasepna Pasian in zang ding a, ahaksa mual pite tuipi sung ah ki paai lel ding hi. Leitung mite ading a ahaksalua thute, tu ciangin za in a thei telta ding uh hi. Mite in thumaan phawk thei ta ding uh hi. Leitung bup patau kohna in a zelh mateng, mai nawt in, nawt beh zel ding hi. Tua khit teh bei na piang ding hi. 9T 96 (3TT 332).

“Mun citeng a ngak a omte tungah khuavak ki buak a khuavak tawm bek anei pawlpite in hih tangkona thum te za nai lo a, lah anial lote in, tua sapkhiatna ngai in a puk sa pawlpite nu sia in, hong pai ta ding uh hi. EW. 278.

“Sapna nunung in, a zawng sila ahi te zong sam a, amaute lak a mihoihte in alamet uh hotkhiatna lungdamna la asa uh hi. A tote un, amaute uk thei nawn lo in, lau na leh lin’na in amaute man cip lel hi. Na lamdang pipi ki bawl aa, cinate kidam sak a, lim leh na lamdangte in thu um mite zui hi. EW. 278.

“Thumaan khuavak in kitel takin taang khia a, Sawltakte khang lai mah bangin mitampi takin thumaan hong beel uh hi. Topa minthan’na in leitung buppi ah tang hi.” 9T 46, 3TT 308.

“Thumaan langdote kikopin a hanciam uh hangin, mi tampi takin Topa lam beel in din’mun hong la zaw ta uh hi.” GC 612.

“Amah in mite, lo kho nasem ahi a, na dang tuamtuam semte lak pan ahi zongin, a kisai mite sam khia dingin teel kawikawi hi. Topa na ih sep theih na lam tampi om a, a lian Siapi pa in ana semte akisam bang siamna pia in, Ama thu a lamdan’na mu thei sak ding hi.” 9T 170 (3TT 369).

“Leitung ukte lak nangawn ah, Topa in Kusale (aiawh) nei hi, cih ka tel muh hi. Kim khat hoh, thu maan ah hong kikhel uh hi. Topa in amaute a zat nopna mun ah hong sem uh hi. Satan in zong a kusale (aiawh) te zangin sem a, ngim kholhna te nei in, Tua a ngim kholhnate bangin a sep uh ciangin, Pasian nasepna ki nengcip in, gitlohna thusia piangsak zel uh hi. Vantung mite in, Pasian kusale (aiawh) te huu in, langpangpa ngim kholhnate nakpi in nial in Satan pawlte in anang zo kei uh hi. Pasian kusale (aiawh) tawm bang bek in tua gitlohna meikuang daihsak theihna vaang anei uh hi. Tua bangin tangkona thumna in a nasep zo toto ding a, aw ging ngaih pi hong ki ko ciangin, tu kusale (aiawh) te in thmaan hong sang ta in, kimkhatte hong kikhel in mi siangtho te tawh, haksatna hunpi te hong thuakkhawm uh hi.” 1 T 203 (1 TT74).

KINIALNA PHATTUAMNA

“Pasian in thumaan sittelna pen pai masa sak a, ki kuppi in omsak a, tua sungah elbawlna om pah hi. Mite lungsim ihmu cip mawk lo a, akhan’lawhna ding zawk leh, thu a kikantel theih nading un apian sak ahi hi.” 5T 453 (2 TT 153).

Ahih hang in Sunday tan’na ding anaa hong ki theh zaak ciangin, sawt vei pi aki khalau, aki um zolo thu pen hong tung takpi cih ki mu a, tangkona thumna in tua masiah a bawl zawh loh thute hong bawl zo zaw hi.” GC 605, 606.

“Nasepna mai anawt ding zah a anawt lohna, azia kaai sak den keei teng hong ki zalh khia ta hi. Thumaan pan siangtho tak, kitel tak in, mite in cial khat khit cial khat mu toto ta uh hi. Thu khial pen, kih huai kisa ta in ki vukcip hi. Amah leh amah vantung mi puan kisilh sak a, ahih hangin ama gamtatna ataktak pen aki dawkna pepeuh uh a zawhna leh amainawtna bel, kiamkiam hi.” 5T 454 (2 TT 154).

NASEP KIZAWHNA DING A KISAM THU NIHTE

Topa in a kitel mahmah in, vantung mi thumna tangkona pen awging ngaihpi hong suak ding hi, ci-in hong gen hi. Minthang tak a leitung bup nasep ih zawh nading thu pen, hilhkholhna tawh a hong khaam Pasian mah ahihi. Mang. 18 sunga vanglianpi tawh ahong tuak suk vantung mi in leitung khempeuh Pasian minthan’na tawh tang sak a, hun tomno sungin minam mi pawl, pau namkim te in hih thumaan thei in, khentel thei sak hi.

Lungdamna thupuak, maa hial aa, a zopa pen Pasian ahi hi. Pasian in, amahmah in nasep zo ding ci-in hong kham hi. Ahih hangin a thu puak khiata pen bel, alam dang mahmah tawh Topa in mihing te hong zang ding hi. Mang. 14 sunga vantung mi thum a gente pen Pasian mite in thupha tangkona a puakna ding uh limlahna ahihi.

Asang penpa in Ama khut siangtho a zatding mite omzia thu nihte in SIANGTHONA leh SEPNA aneite ahi hi. Israel in ze-etna lian a thuak ni tak in Pasian vaang mah nabeel hi. Jordan gun a kantan ding lai un, Joshua in Pasian ukna mite tunga a gen sawn na ah) “Note kisiangtho sak un, Zingsang ciangin Topa in note lakah na lamdang hong bawl ding hi” na ci hi. Joshua 3:5, Nasep pen mihing tha tawh kizo thei ngei lo hi. Khasiangtho kibuakna tawh na lamdang kibawlna hang in kizo thei bek ding hi. “Thahat na tawh hi lo, vanglian na tawh zong hi lo, Kei ma Khasiangtho tawh hih ding’ mipite Topa in ci hi” Zech. 4:6.

Ih muhsa ih theihsa bangin, Khasiangtho pen, a sang ding lungsim in a sang thei ding a ana kigin’ leh bek buak hi. Tua pen sian’thona ngahta, mawhnate pulak a nusiat ciang, ei angsung khualnate abei ciang, tungnun kituhnate a bei ciang, lungnemna leh ki niamkhiatna a om ciang, thu um mite kipum aap na a om hun ciang bek in hong ki bua thei ding hi.

A omzia nihna leuleu panin, NASEPNA cih pen, lawptak a sepna ahihi. Topa sawlna ah: Note leitung khempeuh ah vak kawikawi unla, mi khempeuh thu na hilh un” Mk. 16:15, eite ciat tungah, “Lenggui huan ah hong pai un” Matt. 20:5 ah, hong ci lai hi.

Talent thu gentehna ah, Topa hong kum ding ngak aa, ih om hun sungin, ih hunte bangci zat ding cih hong lak hi. Thadah sa in ngak mawk ding ci lo hi. Nakpi in sem khawm dinga, ama hong app talent te zang ding ci hi. Topa in, ih lungsim te, ih khete, ih aw te, ih na khempeuh te, khaici at nasep zawh siang na dingin zang un, ci-in hong ngen hi. Tua bang hi leh, Topa hong pai kik thei ding hi.

NUNTAK SIANGTHO leh NASEP HANCIAM NA in, Pasian hong khap thu hong tung sak thei ding ahihi. Topa khutzat muanhuai ahi te in, lungkim na lianpen a ngah ding uh hi.

AWGING NGAIHPI SATAN IN A LANGDONA

“Khuamial khate’ mi khemsiamna vaang leh zuau thu hilh sia pipa huzaap dalna ding Pasian mite ki huutna in Laisiangtho ahihi. Satan in, mite in Laisiangtho thu a theihtel khak ding dal theihna lampi tuamtuam sehseh aa, a tatak a dawk ciangin khembawlna vive na hi zel cih kimu toto hi. Pasian sungah ki puahphatna khat peuh a om sial in, gilo kumpipa zong na ki saan’ pha sem zel a, tu in Khris lah a nungzui mite maidal dingin ahih theih tawp in a hanciam ta hi. Eite mai ah, khembawlna nasia pen leh a nunung pen lakkhia ta ding hi.” GC 593.

Tua bangin thumaan leh mawhna kidona anunung om ding hi. Khris nungzuite tungah, vangliatna khuavak leh nuntakna thak van pan hong ki piak suk ciangin, Satan kusale (aiawh) te zong leinuai pan in hong pokhia nuntakna thak tawh hong hat veve uh hi. Leitung na khempeuh ki thasaan’ hi. Kum zalom tampi a zuaupi tawh asepsa mah bangin, thusia kumpipa in khembawlna zangin nasem hi. Amah in khuavak vantung mi bangin kizem a, mihonpite in sikha khemna tawh dawi thu upna a zuan uh hi.” DA 257.

“Satan vangliatna in mite lungsim, a tawntung thumaan pan in ahei khia hi. Galpa in na khempeuh ama deihna tawh kituak ding in a zeek hi. Leitung nasep, kimawlna, ahun zui aki zepna, na khempeuh numei pasal lungsim kai dingin zeek hi.” 9T 43 (3TT 306).

“Satan in gal kido pen nop a sa hi. Tua in mite lungnemna teng lung ngolna suak sak aa, a thuak te gimna leh sisan suahna ah mul kiim cii zeet cih nei sak lo semsem hi. Gam khat leh gam khat tawholh in gal kido sak a, Pasian nilian ni ading kigin’kholhna om lo thei ding in mite lungsim lampial sak hi.” GC 589.

BIAKNA KIPUAHPHATNA ZUAU

“Upna leh zuihna niam semsem in mai nawtnawt ahih hangin, Khris nungzui thumaan mi pawlkhat pawlpi sungte ah om uh hi. (Tua pawlpi te cih pen tu khawng a atam zaizaite). Leitung a Pasian hehna thukhenna nunung atun’ ma in, sawltakte khang pan akipan hi bang ki puahphatna a om ngei nai lo kipuahphatna lian Pasian mite lakah om ding hi.

Pasian Khasiangtho leh a vanglian a mite tungah kibuak ding hi. Tua hun ciangin mi tampi in, leitung iplahna hanga Pasian leh a thumaan a paihkhiat khakna pan un pawlpi maan lote hong nusia ta ding uh hi. Tua mi honte lak pan, siate leh mipi te in lungdam takin tu lai thumaan, Pasian in Topa hong pai kik nading thu a tangko sak pen hong sang ding uh a, kigin’ kholhna thu a mang ding uh hi.

Thumaan lang pang pa in hih nasep maidal nuam hi. Tua hun tatak a tun’ ma zek in, ki puahphatna zuau tawh, tua amanh limcing khol in, mai na dal hi. Tua pawlpi maanlo ziazua te lakah, akhem zawhna munte ah, hih pen, Pasian thupha hong ki buak hi, ci-in khem a, biakna lam ah mite lawp sak hi. Tua kha maanlo nasepna tawh mipi in, Pasian in eite ading na lamdang hong sem ta hi, ci-in ki sathei mahmah zaw lai ding uh hi. Tapidaw khempeuh te tua bang a khembawlna tawh a zawh theih nadingin Satan, hanciam in ngian zongzonghi.

“Tuabang puahphatna zuau kum za lom lang tang bang paisa nungah mun tampi mah ah om khin a, hong pai lai ding hun ah zong a gol zaw aa, aneu zaw zongin zomto lai lua ding cih kimu hi.” GC 46.

“Pasian kusale (aiawhte) te ki pumpiak a na asep laitak un, Satan in zong ama kusale te nasem sak aa, ama thu amang pepeuh ki seppih sak hi.” 9 T 47 (3 TT 308).

“Tu in Khasiangtho in kitel takin hong gen aa, hun nunung ciangin kimkhat in thu upna nusia in, sikhate khemna zui in, dawi thu upna zuan ding hi.” 1 Tim 4:1.

“Tua sikhate in Laisiangtho thu ummi in ki gen uh aa, pawlpi din’ mun zahtaak in kigen uh ahih manin, amau nasepnate Pasian thu mah kisa kha ding hi.” GC 588.