MUC

Print Friendly and PDF

Saturday, September 10, 2016

PAWL PI SUNG KIPUAH PHATNA


HUN NUNG A DING KI GIN KHOLHNA
KHAWKPI 1

PAWL PI SUNG KIPUAH PHATNA
Kum zalom sawmnih leh sagih bang sawt ta-in kamsang Joel in Khasiangtho hilhna tawh tua Pasian ni ding na gen khol zo hi “Zion ah pengkul tum un, Ka mual siangtho sungah patau tangko un, leitunga teng khempeuh linglawng sak un, Topa ni hong tun’ ding ahun nai ta hi. Khuamial lungkhamna leh asah meilom mial hong nai a, mual dawnte pan in zingsang khua-ki-seem silsel kigalmuh bang hi” ci hi. Joel 2:1,2.


Hih thu in Lai Siangtho lui hun a, Israel te a galte in azawh gawp ding ciang a thu om bang ahi hi. Ahih hang in a thu in leitung bei ding ciang a “Topa ni” a cih pen kawk hi. Tua in Khris hong paikik ni ding ni tak kawk hi. A thu in Zion ah pengkul tum un, ci hi. Tua pen pawlpi sung cihna hi a, Topa mual siangtho ah (Amite lakah) patau tangko ding hi.

Tua hi a, tu in zong Topa in kamsang hongs awl a, “Na lungsim khempeuh tawh Kei lam hong hong ki hei un la ann ngawl in kap un, thum un, na puanbek uh balkek lo-in na lungsim uh balkek un la, Topa Pasian lam zuan un, Zion ah pengkul tum unla manlang in kisiangtho sak uh hen, kikhoppi sam un, mite kaikhawm un, mipite kisiangtho sak hen, siampite sia te biakna tau leh biakna kikal ah kap hen, Na mite hong khawi lai in, Topa aw, ci sak un” (aneu 12-17).

Zinlingte khawng ih et ciangin, Topa ni-a apiang ding n ate hi. Pawlpi mite khanglo a patau a tangko ding uh, lungsim khempeuh tawh kikhel na takpi azon’ ding hun uh hi ta hi. Huna bei kuan a na-piang lianpipite nan’ zawh theih nading, pawlpi mite kigin’ kholh nading in khalam kipuahphatna taktak kisam ahi hi.

Hun thupi penpen nitak tungta ih hih lam uplah nading om lo hi. Tua ahih ciangin kipuahphatna Zion a tangko ding pen ahun hi ta hi.

KIPUAH PHAT DING KI SAM

Eite laka amaan kipuahphatna neih ding thu in, ih kisapna lian pen ahi hi. HIh thu ih zon’ ding nasep masa pen ahi hi. Topa in thupha hong buahsuk nading in nakpi hanciam in zong ni. Bang hang hiam cih leh Pasian in Athupha hong buak nuamlo hilo a, eite in thupha sang thei dingin kiging khol nai lo ih hih man zaw ahihi. Vantung a ih Pa in atate A Khasiangtho apiak nop zia pen leitung ah pa-te in tate na hoih apiak nopna sangin lian zaw hi. Tua Pasian hong khap thupha ih ngahna dingin, eima sep ding pen: kipulaak ding, kiniamkhiat ding, kisik kik ding, nakpi in thu nget ding kisam hi. I SM 121.

“Pasian mite in kipuahphatna leh kibawl phatna aneih kei uh leh, tua ze-et nate a do zo kei ding uh hi. Amah leh amah akimuang mi khat peuh pen midikte bek om nading a kibawl inn sungah Topa in tua mi a lut sak kei ding hi.” 7T. 285.

“Khasiangtho makaih in kipuahphatna leh kibawlphatna om ding hi. Tua gel in adeihna thu nih mah a om ahi hi. Kipuahphatna cih pen khalam sihna pan khanlawhna, kithak sakna; lungsim sungah kha nuntakna thak sak cihna hi a, kibawl phatna cih pen din’ mun te khek a, lungsimte, upnate, gamtatna te zongsatnate khek cih na hi. Ki bawlphatna in khalam puah phatna a om kei leh thumaan gah agah tuan kei ding hi. Kipuahphatna leh kibawlphatna in amau panmun tuak sem in kikop ding hi” Ch S. 42.

“Zan a ahong kilak thu khat in ka lungsim nakpi in bun hi. Thu khat piang hi. Kipuahphat na ding ahi hi. Mun citing ah zaam kawikawi hi. Ih mite kigual in Topa sapna dawng uh hi. Ute naute aw, Topa in hong hopih hi. Awlmawh lo in om ding ih hi hiam? Khua vak pua dinga hongs awl pen, sep tawh thuah pah ding hongs awl ahi hi”. 3TT. 441.

“Pasian thuhenna lian atun’ ma a, Topa mite lakah hih puahphatna a om bang pen sawltakte khang a kipan in om ngei nai lo hi. Pasian Kha Siangtho leh vangliatna, Amite tung ah a buak ding hi.” GC. 464

Puahphatna Omzia

Topa in pawlpite, khalam kipuahphatna bawl ding adeihna pen, Satan in thei a, amaan lo[zuau] puahphatna nakpi in sem hi. Hih nasep pen a tunglim phet a kipan ih galpa hanciam ngeina ahi hi. Thumaan thukhial tawh hel zau in, mite buaigawp sak a, lungkham in kipuah phatna maan ngah thei lo-in akisiat sak na ding ahi hi.

Satan Piak Kipuahphatna Zuau Kha siangtho in hih bang in gelhsak hi. “Kipuahphatna a om na khempeuh ah, Satan in, mite lungsim sung siangtho tak zolo, kileek kim zawhloh na guang zel hi” “Tanglai akipan in pawlpi, kipuahphatna akineih sial in amai dal zel om lo in kikhah khong ngei lo hi. Pual khanlai in zong tua bang mah ahi hi. Koi mah peuhah sawltak te in pawlpi aphuh uh ciangin, “Thu ka um hi.” ci napi in thu palsat mi pen hong kihel veu zel hi.” GC. 396

Luther khaici vawhte mun citengah pokhia hi,..Satan in kipuahphatna dangte, a suk mit zel ngeina mah bangin helzuau sak zel hi. Thumaan nasepna pen zuau tawh amaute khem in lungkim sak hi. Kum Zalom masa lai in Khris zuau a om mah bang in kum zalom 16 ciangin zong kamsang zuau a thokhia hi.” GC. 186.

Zuauthute’ pa in hunbeisa a asep mah bang in tu-a ei hun in zong sem lai hi. Tu mahmah in zong Pasian mite buai gawp sak in, tawkgawp ding in hanciam hi. Hih pen ih nasepna hun sawt nai het lo sung mah ah, tu mazek lai mah in, thumanglo-a kilem lohna bawl mi pawl khat thokhia sak hi. Amau leh amau “Kipuahphate” kici uh hi. Lambeh lo-in susia uh hi. Amau nasep in Lai Siangtho gen bang lo hi. Amaute gah in na thei ding uh hi. Matt. 7:16

KILEM LOHNA LEH KITOTNA LUNGSIM

Kipuahphatna maanlo omzia pen, kilem lohna, kitotna, kilang dona, kigensiatna, tua te pawlpi makaite lakah om hi. Hilh kholhna in a cian hong piakna ah:
“Kipuahphatna maantak hong tun’ hun om ding hi. Tua hun hong tun’ ciang in thu-um mite lungsim in thungetna tawh hong dim ding a, pawlpi sung panin kilem lohna, kitot nate bei ding hi.” 8T. (Ch S. 42)

Amaan kipuahphatna in, kilem lohna kitotna te hemkhia ding hi. A khial kipuahphatnate ahih leh, “Amah in nasepna a amakai khempeuh Pasian in tangko ding thu pia ciat hi, ci in ngaihsun uh a, tua pen akhial ahi hi” ci hi. 2 SM. 64

Amah in, Pawlpi sunga makai khempeuh kiliansak lua uh a, puk khin ding uh hi. A kiniam khiat mi honk hat hong thokhia in na lamdang tak in hong sem ding hi,” a ci hi. Amah in Testimonies te um in kigen hi. Tuate mah zang in ka thumaan hi, ci hi. Ama thu a kipsak theih nading in zang ding hi.” 2SM 64,65.

“Pasian kiang pan thu ka ngah hi, hong ci ding hi. Na um kei un. Amah ka sawl kei hi. Ama thupuak pen Pasian kiang pan a hong pai thu hi lo hi. Hong khemna thu hi.” Ci hi. 2 SM. 64.

Adang khat thupuak ka nei, a cipa thu agelhna ah: “Tua pa in zong thunial nopna nei hi. Tua pen in, Pawlpi khempeuh lampial khin a, Pasian in amaute lak pan hong paikhia un la, na lamdang te kong bawl thei sak ding hi” ci hi. 2 SM 66.

Ki puahphatna thu gen a kinei hi napi, kigensiatna, makaite leh pawlpi kiphuh dante gensiat na, kilem lohna leh kitotna a piangsak leh, tua pen ih theih tel pah nading ciamtehna hi a, thu dang zong kul nawn lo, Satan maiah kipuahna maanlo ahi pah hi. Tua bang mite in pawl angah nading un, Pasian thu um mah hi a, Pasian nasep a hanciam-gawp hong ki bawl ding uh hi. A hih hangin atawpna ah, amaute hong kitam in hong kikhenthang ding uh hi. Ahih hangin amau omzia tatak a dawk mateng in zung lim taka akha nailo mi hoih pipite, lam pialpih ding in buaina hong piang sak ding uh hi.


To get the latest update of me and my works

>> <<