MUC

Print Friendly and PDF

Thursday, September 29, 2016

Pasian' Hun Sehna


Pasian' Hun Sehna

        Thupatna:    Leitung mite in A Tapa a san theihna dingin kigin kholh sakna ding a kisam khempeuh Pasian in bawl khin hi. Honpa dinga a kikham, Messiah a hi Jesu thei kei ung a cih theihna ding uh thu om peuhmah lo hi. A Tapa koi-ah suak ding, koi innkuan sungah, koi bang hunin, cih dong Pasian in gen khol hi. A Tapa suak a hih lam a lak dingin van ah aksi khat kilang ding a hihna, A Tapa a hih lam a kitel sak ding thupiang tuamtuamte dongin hilh khol hi. A hun lian ding nangawn kigen khol a hihna tu-in ih sin ding hi.

1.        Leitung ah Jesu a kilat hun ding Pasian in a seh khol hiam? Galatian 4:4,5.
            Theih ding:    Pasian in a hi bang lianlianin na sem a hihna hiah zong kilang hi. A kamciamsa khempeuh hih bang ngentangin tangtung hi.

2.        Daniel in thu a nget lai takin a kiangah kua pai hiam? Daniel 9:21.
            Theih ding:    Jesu' hun ma kum zaguk lai-in Daniel nungta hi. Mite' kianga Pasian' kamtai pipa Gabriel a hihi. Honpa tawi ding a hih lam Mary kianga a gen zong Gabriel mah a hihi.

3.        Judah mite' a ding hun bang tan kipia hiam? Daniel 9:24.
            Theih ding:    Abraham' khanga kipan Pasian in Judah mite angvan deuh hi. A tawntungin tua bang hi lo ding a  hih lam zong kihilh veve hi. Daniel laibu 8 sung, a zawdiakin taang 14 sunga kigen thu a hihi. A hun zaizaw nung ciangin sin ding hi hang.

4.        Hun tawh kisai gen kholhna koici khiat ding ci hiam? Ezekiel 4:6; Gamlakvakna 14:34.
            Theih ding:    Hun tawh kisai gen kholhna ah ni khat ciangin kum khat a hihi. Kal khat ciangin kum sagih hi-a, kum khat ciangin ni 350 pen kum 365 a hihi. A tangtung sa gen kholhnate in hih thu kip sak hi. Judah mite' a ding kal 70 pen a taktak in kum 490 a hihi.

5.        Messiah hong kilat ma kal 69 (kum 483) sungin bang piang ding hiam? Daniel 9:25.
            Theih ding:    Hih thu a kigen lai-in Jerusalen a sia sa-in  om hi. Babylon kumpipa Nubuchanezar in a suksiat a hihi. "Messiah" in Hebrew kammal hi-a, mawhna pan leitung mite a tan khia dinga Pasian in a seh "sathau kinilhpa" cihna a hihi.

6.        Jerusalem puah kikna ding bang thupiakna oma, bang hun ciang ding hiam? Ezra 7:7,13,21.
            Theih ding:    Artaksaste a maan kum sagihna pen a tangthu-in BC 457 kum kici hi. Tua kum pan kum 483 pen AD 27 dong hong tung hi. A kigen khol sa bangin tua kumin Honpa Messiah hong kilang hi.

7.        AD 27 kumin bang thu piang hiam? Luke 3:1,21,22.
            Theih ding:    Siberia Kaiser a maan kum 15na pen AD 27 a hihi. Tua kumin Jesu kisiansuahna, Pasian' Kha Siangtho tawh kihilhin, Ama Tapa a hih lam Pasian in tangko hi.

8.        Messiah hong kilak khit ciangin, Pasian' tel tuam minamin Judah mite bang tanvei om lai hiam? Daniel 9:27.
            Theih ding:    Kal khat in kum sagih a hihi. AD 27 pan AD 34 dong a hihi.

9.        Tua kal laizang ah bang piang ding hiam? Daniel 9:27.
            Theih ding:    AD 27 leh AD 34 kikal a laizang pen AD 31 a hihi. AD 31 ciangin sa leh an tawh biak piakna a bei ding a hihi.

10.        Jesu' sihna in Judah mite' kithoihnate bangci sak hiam? Hebrews 10:8-10.
            Theih ding:    Hih kithoihnate, mawhna pana mihing, Pasian in A Tapa tawh tan ding a hih lam a hilha a hihi. Kithoihna ganno in Jesu' lim la hi. Jesu tektek a hong sih ciangin a lim la kithoihnate kisam nawn lo hi. Genkholhna in kithoihnate bei sak ding hi a cih hun lian AD 31 kumin Jesu hong si hi.

11.        Daniel' gen kholhna a tangtuna-in Jesu a sih lian lai takin, Jerusalen biak innpi ah bang piang hiam? Matthew 27:50, 51.
            Theih ding:    Tua in kidalna puan golpi hi-a, biak inn sunga siampite in nisima na a sepna mun uh leh, siampi lianpa in kum khata khatvei na a sepna mun a kidalna a hihi. Kidalna puan a tung pan a nuai dong a kibal kek ciangin mihing' khut in a hih loh lam kithei hi. Biakinn leh kithoihnate a beina hi ta cih Pasia mahmah in a lahna a hihi.

12.        Bang hangin Lai Siangtho sungah hih bang gen kholhnate om hiam? John 14:29.

            Thukhupna:    Jesu' sihna leh nuntakna ah hih gen kholhna a tangtunna leh, ih gengen sa a tangtung sa gen kholhnate in, hong kigen bangin Jesu, Pasian' Tapa takpi a hihna a kilatna a hihi. Hih thu umin, ih sung pan Pasian in Ama deih bangbang a sep khiat theihna dingin, siit nei lo-in ih lungtang Amah pia ni. Ama hong kamciam a om lai teng zong hong tangtung sak ding hi cih eite in ih thei hi.

To get the latest update of me and my works

>> <<