OCT.29, 2016

Ferdinand|Beaver Ganhing tawh Lumkhawm 

Ferdinand in gam sung ganhing namkhat Beaver lakah va lum thei zel hi. Vienna khuapi ah nuamtakin teng a, ahi zongin a nasep hong bei-in, a sum na ding hong bei hi. Tua bangin nuntak hamsat takteh khutdawh ngen ding khawng
hong ngaihsun kha zel hi. Ahi zongin zanpuan pawl khat tawh inn pan hong paikhia-in, Donau Tuilakna mun khat ah hong pai-in hih munah ganhing Beaver tawh hong tengkhawm hi. Tua bangin a om nitak khat in Ferdinand in a ging khat hong za hi. Hih ganhing in Ferdinand omna lam ah hong pai-in ama omna nuai-a inn kungah hong pai hi. Ferdinand in mun dang ah a pai dingin hawlkhia hi. Tua ganhing zong paikhia pah hi.

Tawlkhat khitteh tua ganhing man dingin mi hong pai uh hi. Ferdinand in hih ganhing hehpih ahih manin a lungdam kohna in singkung nuai khat ah selbawl hi. Tua bagnin a sel manin kuamah in mu lo ahih manin kiman kha lo hi. Ferdinand in zingsang a thawh tungin a omna gei lui sung ah maiphiatin, tua khitteh a gei-a niangtui sai-ah niangtui dawnin tua khitteh khua sung laisimna library ah pai-in laisim hi. Nitak ciangin mun khat ah pai-in nek ding ngen hi. Annek khitteh khua nawl a om tuilak ah giak hi. Tua bangin a nisim nunzia hun beisak den hi.

Ferdinand in tua bangin a nuntak pen nuamsa mahmah lel hi. Ni khat Seventh-day Adventist thu-umte tawh hong kimu kha hi. Tua panin ADRA nasep hong thei-in Vienna khuapi sungah ADRA nasemte kiangah va pai hi. Hih mun panin puan, nek ding tuamtuam kingah thei hi. Ferdinand in hih muna nasem Evald, Adventist pastor khat tawh hong kimu kha hi. Pastor in Ferdinand kiangah na kisap peuh peuh hong gen in. Hong huh ding hing, ci-in a pulaak takteh Ferdinand zong tua a kipan hih mun ah hong pai den hi. Kum 6 sung tua bangin hih munah hong pai-in, pastor in biakna thu kuppih den hi. Tua bangin a thusinna tungtawnin Ferdinand in Pasian thu lunggulhna hong nei thei hi.

2014 kum ciangin pastor Evald in Ferdinand kiangah, bang hong huh ding ka hi uh hiam, ci-in dong hi. Ferdinand in nasep khat guan uh hi. Ferdinand in ADRA tawh kipawlin innnei lote lakah nasem hi. Sunday ni le Saturday nizang in innnei lote kiangah pai-in zing an pia, annek khitteh thusinna neihpih uh hi. Ferdinand nasepna lawhcing semsem hi. Huzaap tampi hong nei thei hi. Ferdinand in innnei lote lakah om ngei ahih manin amau kitangsapte theipih mahmah hi. Nasep mavang zaw semsem ahih manin Sunday, Saturday banah Tuesday le Thursday in zong anpiakna le thusinna nei thei uh hi. Tuesday ni-in pasalte puansilh pia-in, Thursday ni-in numeite le naupangte pia uh hi.

Tu-in Ferdinand in mi 65 tawh nasem khawm hi. Pawlpi mite in SDA hi lote kiangah hawhin, kikhawm dingin zon uh hi. Tua bangin kikhopna biakinn mi dim den hi. Austrian phungzi Gregor Mendel in singkung tawh kisai mipil minthang mahmah khat hi. A diakdiak in genetics tawh nasem masa penpen pa hi. Austria gam in Alpine mualtung, vuktunga kimawlna ski cihte zong minthang mahmah hi.

Tu quarter Sabbath School sumpi Rakhine gam, Lan-ma-daw khua ah sia inn puah nadingin kipuak ding hi.