OCT. 8, 2016

“Tu-in ka suakta hi” Austria: Thupuak Fatima

Fatima in lauhuaina vive tawh kidim hi. Pasal gilo mahmah khat tawh kitengkha hi. A pasal’ vuat le sat thuak den hi. A pasal in a vak ding phal lo-in inn sungah kibilhcip den hi. Nuntak hamsa ahih manin kizep kipuahna sai (salon) khat ah nasem dingin a pasal in sawl hi. Mi
tawh kituahin nasem ahih hangin nisim a lungkham den a, amah le amah kithat ding peuh ngaihsun kha zel hi. Ahi zongin kithat ngam taktak sam lo hi. A lungsim in tua bangin ei le ei kithat pen hoih lo hi, cih khat ngaihsun hi. 

“Bang hangin dahmel pua na hiam?

Ni khat a nasepna ah kipuah dingin hong pai nupi khat in “ka tanu aw, bang lunggimna nei na hiam, bang hangin na mai khing den a hiam? ci-in hong dong hi. Tua bangin a kidot takteh Fatima in zong a thupiang khempeuh pulaak hi. Fatama’ gen thute a zak ciangin tua nupi in lametna, hehpihna, itna tawh kidim nuntakna thute tawh hehnem hi. Tua thute a zak a kipan Fatima in tua nupi nu hong pai ding lamet den hi.

Ni khat tua nupi nu in a innah anne dingin Fatima sam hi. Fatima’ pasal in zong a pai dingin phal hi. Jesuh thute gen khawmkhawmsa-in anne uh hi.

  

“Kimu Sim”

Nupi nu le Fatima kimu zelzel uh a, nupi nu in kuama theihlohna mun khatah kikhawm dingin Fatima hong zawn hi. Hih munah Lai Siangtho sinna le Jesuh thu genna mun khat hi. Hih mun in mi 8 kimkhawng kimuhkhopna khat hi. Lai Siangtho simin, kikupna cih bang nei uh hi. Tua munah Fatima in Lai Siangthobu a muhcilna ahih manin a khut tawh tawitawi mai hi. Fatima’ pasal in tua bangin a vakkhiat ding phal lo ahih manin tua kikhopna ah Fatima in a ut hunhunin va pai thei lo hi. Ahi zongin a innah Lai Siangtho ciahpih hi.

Ni khat a pasal in Lai Siangthobu mukha ahih manin Fatima satgawp hi. That ding zahin heh mahmah hi. A lamdangtakin Fatima in satthuakna panin suakta in a liamnate zong hong dam hi. Fatima in a dam khit ciangin a nasepna munah sepna hong zom kik thei hi. Tua ni a kipan a pasal in encit takin encit hi.

“ Hong that ding hing”

Fatima in Lai Siangtho sinna munah va kihel nuam mahmah hi. A pasal lah kihta mahmahta leh, bang le bang leh ci-in tua munah va kikhawm hi. Tua bangin a vapai a pasal in thei kha ahih manin, ‘ hong that ding hing. Tua bangin a kikhawm mite in gam thukhun a palsat mite hi-in thahmang ding hi,’ ci-in a zi tawnggawp hi.

Fatima in a inn panin hong paikhia-in a nute’ inn va bel hi. A pasal in va delhin, a sunghte kiangah “ Fatima in Khritian upna zui hi. That dingin kilawm hi,” ci-in pulaak hi. “ Ken ka thah kei leh zong no thah un,’ ci-in a pasal pusuak khia hi. Tua bang thu Fatima’ nu le pa in a zak uhteh Fatima sat dingin kithawi uh a, Fatima ahih leh kihemkhia man hi. A bawlsiat loh nadingun Fatima in a nu le pa kiangah thuum hi.

“ Sihna ding pan suakta”

Tua zan mahin Fatima in a nu-te’ inn pan taikhia hi. A lawm Khristian pihte hopihin, a lawmte’ inn khat ah tua zan va giak hi. A lawmte’ inn ah kaal nih sung va om hi. Tua hun sungin a kikhopna uha pastor pa in Fatima va mu thei zel hi. An le puan va pia zel hi. Pastor in Fatima kiangah “ Khristian nong suah taktak ding leh hong huh thei ding hing. Tua ahih kei lehlah hih mun panin na inn ah ciah kik in,” ci-in hong gen hi. Fatima in “ Khristian suak nuam mah ing,” ci-in pastor dawngkik hi. Ahi zongin Khristian suakin a gamah om suak leh a nuntakna lauhuai ahih manin Austria ah pai dingin pastor pa in geelsak hi.

Fatima zong Austria gam ah hong tung thei hi. Austria hong tun khitteh Ahmah le a zi tawh hong kimu thei uh hi. Hih nupate zong amau gam panin Austria gam ah a va teng uh nupa khat hi. Austria gamah suakta takin Pasian bia thei uh hi. Hih gam hong  

tun uh a kipan lungnopna, lametna le itna tawh kidim uh hi. Pawlpi mite in zong hih bangin mun dang pan hong peem mite hoih tak kem uh hi. Fatima in innkuan khat tawh om khawmin, hih innkuante in amau tanu bangin kem uh hi.

Austrian Union of Churches sungah pawlpi 50 om hi. Pawlpi mi 4135 bang pha uh hi. 1895 kumin L. R. Conradi in Pasian thugenna va nei hi. 1902 ciangin pawlpi in nasep kipan hi. 1909 kum ciangin Austrian tualsuak Franz Gruber in tuiphumsia masa pen hong suak hi.

Tu quarter Sabbath School sumpi in Rakhine gam, Lan-ma-daw khua ah sia inn puah nadingin kipuak ding hi.