MUC

Print Friendly and PDF

Tuesday, September 20, 2016

NOV.26, 2016




A Kinialzo lo sapna: part one

Richard


1956 kumin Casa Blanca khua ah ka suak hi. Tua kum sung mahin France gam panin suahtakna ka ngah uh hi. Jew biakna kip mahmah innkuan sung pan a khangkhia ka hi hi. Ka pu in gamdang ah nektheih tuamtuamte a zuak mihau khat hi. Ka pu ka pate uh pen Moroco ah a om zawh
uh kum 500 bang val khin hi. Tua ma-in Spain gam ah omin, Jew biakna ka zui uh hi. Ahi zongin 1492 kumin Spain kumpi nu in Jewte kiangah Catholic upna zui ding maw ahih kei leh Spain gam pan paikhia ding maw, ci-in thupia hi. Amau zong Catholic upna zui nuam lo uh ahih manin Spain gam pan paikhia uh gam tuamtuam – Portugal, Netherland, Turkey, Morocoo, le Africa gam khanglam ah pai khia mang uh hi. Ka pute ahih leh Morocoo ah na pai uh hi.

Kum 8 ka phakin ka pute in Morocoo ah om ding ngaihsun uh hi. Ahi zongin Morocoo gamah om ding pen lauhuai hi. Tua hi-in, Jew a tamzawte in Canada gamah vapai uh hi. Ka pate ahih leh France gamah hong pai uh hi. 1964 kumin Marseilles khuapi ah ka teng uh hi. Ahi zongin ka pa in nasep mu lo ahih manin Paris khuapi ah ka om uh hi. Paris khuapi ah puankhui nasep sem hi. Ka pa nasep lawhcing mahmah ahih manin mun nih ah puankhui sai ka honbeh uh hi.

Villejuif khua ah nunzia

Morocoo khuapi sangin Paris khua ah inn tam man zaw hi. Tua hi-in khuanawl lam mun khat ah ka om uh hi. Ka omna mun uh pen Villejuif kici hi. A khiatna in Jew khuapi cihna hi. Ahi zongin Jew minam tawh kisai, Synagogue (Jew biakinn) rabbinic sanginn, cihte om nawn lo hi. Jew khuapi khat hi, cih muh theih ding bang mah na om nawn lo hi.

Kum 9 ka phakin Villejuif ah sangkah ka kipan hi. Kum 11 ka phakteh ka ut na peuh ka vakkhia thei hi. Lawm le gual kituahin gualnuamin ka om hi. Zu le sa, nungak tawh kikhawlin ka ut bangin ka om uh hi. Ahi zongin 1968 kum ciangin Paris khuapi sung sangnaupangte buaina lianpi hong piang hi. Sang khempeuh kikhak hi. Gam makaipipa a nasepna pan kikhawlsak hi. Mipi in suahtakna lunggulh uh hi. French gam sung khempeuh hong lawh hi.

Biakna tawh kisai:

Ka pa pen biakna kin mahmah khat hi. Zingsang, suun, nitakin thungen den hi. Sabbath ni pen thupisak mahmah hi. Friday nitum ciangin Sabbath kipanta ahih manin ka inn uah Jew ngeina bangin biakpiakna ka bawl uh hi. Ahi zongin biakinn, synagogue ka nei kei uh hi. Inn golpi khat sungah innkuan thum ka om uh hi.Innkuan thum bang om ka hih manin Friday nitak, Sabbath ni le Jew pawi cihte ka vekun ka zangkhawm uh hi.

Ka sanggampa in Israel gam ah hong paisan hi. Innnei nu kiangah ka sanggampa omna mun pen thungetna mun dingin ka ngen uh hi. Innneinu in zong hong phal hi. Ka pa mah makai-in tua munah biakna ka nei uh hi. Torah (Jew mite Lai Siangtho) ka sim uh hi. Tua ka kikhopna mun uh munsiangtho-in ka ngaihsun hi. Torah kikoihna mun peuhpeuh Topa thuciamna singkuang omna mah bangin ka ngaihsun pha hi.

Deihkin thungetna

Ni khat ka u tawh ka kimawl uh hi. Kongkhak nakpi takin khak kha ka hih manin, a hoih mahmah, tampi man tua kongkhak hong kisia hi. Ka dah mahmah hi. Ka pa pen lungtom mahmah khat ahih manin ka lau peuh hi. Ka pa hong tun ding ka patau mahmah hi. Kei zong ka kikhopna mun ah pai-in Topa kiangah thu ka ngen hi. “ Topa aw, ka pa hong tun ciangin a heh loh nading hong huh in. Ka pa pen a lungtom mahmah hi, cih pen nang thei hi. Topa aw, nang om takpi na leh, ka thunget hong dawng in,” ci-in thu ka ngen hi. A piang thei lo ding thu khat hi, ci-in ngaihsun ka 
hih manin, thu ka nget hangin Pasian in ka thunget hong dawng dingin ka lamen kei hi.

Mai Sabbath zop kik ding:


To get the latest update of me and my works

>> <<