LESSON 9 NOVEMBER 19 – 25 LAMET NEIHLAM KIPHAWK

SABBATH NITAK

TU KAAL SUNG SIM DING: Pau. 17: 28; Job 13: 1 – 15; James 2: 20 – 22; 1Kor. 15: 11 – 

20; 1Pet. 1: 18 – 20; Pian. 22: 8 

_KAMNGAH: “Pasian’ mai-ah migilote pai ngam lo uh ahih

manin ka hanna pen ka gualzawhna hi ding hi” (Job 13: 16).

British laigelh minthang William Hazlitt in “kap thei, dah thei, a sia le a pha a khentel thei ganhing khat om a tua in mihing hi.” Na khat peuhpeuh mihing lamet bangin piang lo hi.Ahi zongin Nihvei Kumkikna a lamen Khristiante aa dingin lametna khat om a, tua lametna in na khempeuh kilamdangsak ding hi (2Pet. 3: 13). Mawhna tawh kidim lungsim in a hong tung ding nopnate ngaihsun thei lo hi (1Kor. 13: 12). Pasian a thei lo mite ngaihsutna in tua bang lametna nei lo hi.

Job in bangzahin gimin, genthei, thuman lopi-in a thuak hi mahtaleh lametna tawh kidim veve hi. Tua a lamet in bang hi-a, eite in zong bang lametna nei dingin hong hilh hiam?

SUNDAY NOVEMBER 20

A ZUAU LO BANGIN OM

“Mihaite pau lo-in om leh a pil mahin kingaihsun hi. Thungaihsun thei na hihna a kilat nadingin pau lo-in om khinkhian in” (Pau. 17: 28).

____________________________________________________

_________________________________________________________________________

Job lawmte in Job thuaknate hangin amau gen bangbang Job in a um pah dingin ngaihsun kha uh hi. Ahi zongin Job in tua bangin na um pah lo hi. A up sangin a lawmte gen thuman le zuau thu helhin a gen thute Job in na dawng kik hi. Hih mite in Job hehpihna lungsim nei lo uh hi; a gim mahmah Job hopihzia ding zong thei lo uh hi. Job tungah thu a gen uh ciangin Pasian aitangin thugenin kinei uh hi. Job in a thuak dingin kilawmzahin thuak nai lo hi, ci sawnsawn uh hi. Job tungah a lawmte mawhsakna in kicing mahmah hi.

Job 13: 1- 14 sim in. Koi bangin a kimawhsaknate Job in dawngkik hiam?

____________________________________________________

_________________________________________________________________________

A lawmte in Job thuakna a muh tak uhteh amaute in ni nih sung pau lo-in daicip uh hi (Job 2). Hopih sim loh a dang om tuan lo hi. Tua dingin Job in zong lamen hi. Job lawmte in zuau thu gen bek hi lo-in Pasian thuman a man lopi-in pulaak hi gige hi (Job 42: 7). Zuau thu gen ding sang pau lo-in kamcipna in hoih zaw hi. Pau lo-in om ding sangin gen ding lah thei lo, zuau na gen kha ngei hiam? Thuman pen thuman lo-in gen pen hoih lo zawkan hi. Job lawmte in Pasian aitangin thugen a kinei uh hi-in Job mawhsak uh a, a taktakin a zuau gen lamuh kiphawk lo uh hi. Job in a thuak gimnate hangin lungmang hi. Bang hangin tua bangin gim thuah cih thu thei lo hi. Ahi zongin a lawmte gen thute zuau thu hi, ci-in Job in bel tel mahmah hi (Job 13: 4).

Zuau thu gen dingin kilawm lopi mah na gen khak a nunung pen bang hun hiam? Tua bangin na khialh kik nawn lohna dingin koi bangin na tuahkhak thu in hong hilh hiam?

MONDAY NOVEMBER 21

AMAH HONG THAH HANGIN

Job kipatna ah Job in thupha a ngahzia kipulaak hi. Job in gimna sung pan lametna tawh nungta hi. Job in ama nuntak sung mahin leitung bei ciangin a ngah ding thute mukhol hi. A tate khempeuh si-in, a neihsa khempeuh beimangin, a pumpi mahmah gimin omin, bang gimna thuak lai ding cih pen ngaihsun khol thei lo hi. A theih khat bek om a, tua in a nunna in gimna vive tawh kidim hi.

Khat veivei ciangin a thuak gimna lian lua ahih manin a nu sung panin piang kei zaw leh a ut hun, ahih kei leh a suahtung a kipan hankhuk zuan suak hi leh, ci-in a pulaak hun om hi. Ahi zongin Job in Pasian sungah lametna nei veve hi. Tu-in Pasian maipha ngah a kisak loh hangin Pasian in maipha a piak hun om ding hi, ci-in a gimthuaknate kahtan zo hi.

Job 13: 15 sim in. Lametna bang kiciamteh hiam? Job in bang thugen hiam?

__________________________________________________________

_________________________________________________________________________

“Ka nuntakna a bei hangin Topa ka muang veve ding hi.” Bang zahin a lian upna! A piang khempeuh a tawp khakna ah ama aa dingin thupha hi ding hi, ci-in lamen veve hi. A tawpkhakna ah a leitung nuntakna bei ding hi, cih zong thei hi. Tua zong Pasian kamciam a tangtunna hi. Job in a nuntakna ah bang bang a piang zongin Topa mah muang tawntung hi.

Khrih hong hehpihna kicing phawk tawntung ding kisam hi. Ama hong itna manphasa-in limtak kem in. Na upna in Job’upna bang hi henla “ka si zongin Topa ka muang ding hi,” ci ngam in. Vantung i Pa Pasian’ hong kamciamte muang tawntung in. Kamsangte, sawltakte a ompihzia, a makaihzia mangngilh kei in. Amah a it, a um mite aa dingin Topa in a hoih pen nasem hi.” Ellen G.White, The Advent Review and Sabbath Herald, October 20, 1910.

Mihing lampanin en lehang Job in a lamet ding bang mah om lo hi. Ahi zongin Job in tua bangin mihing’ mit tawh en lo hi. A en hi leh a lamet in bang hi ding hiam? Lamet nei lo hi. Ahi zongin Pasian muang ahih manin upna le lametna tawh nungta hi.

Koi bangin Job in a gentheihna panin lametna nei hiam? Job 1: 1; James 2: 20 – 22 sim in. Koi bangin lametna le upna neisak thei hiam? Cihtakna le thumannna a thupitzia bang hong hilh hiam?

TUESDAY NOVEMBER 22

LAMETNA PHAWKSAK

“Ama mai-ah Pasian neilote pai ngam lo ahih manin hih in kei kihutna hong lehsuah hi” ( Job 13: 16). Bang bang a thuak zongin Job in Topa a muantheihna, a upna bang pulaak hiam?

____________________________________________________

___________________________________________________________________________

A si ding phialin gimna a thuak hangin Job in Topa mah muang tinten hi. Pasian hotkhiatna sungah kiptakin om hi. Mite in mihai bangin a muh uh hangin Topa tungah a cihtakna kilang zaw hi. Tatkhiatna in sihna pan suahtakna sim loh a dang bang hi ding hiam? Tua bangin a kitankhia mi khat aa dingin a si zongin thokik ding a lamen mi aa dingin tawl khat, tomno khat sung tawlngakna, sihna in gentham lo hi. Hih sangin lametna lian zaw thu-um mite aa dingin bang om ding hiam? Job in zong hih mah lamet lian belin nei hi.

1Kor. 15: 11 – 20 sim in. Bang lametna bang kimu thei hiam? Hih lametna om kei leh bang hangin lametna nei lo taktak hi ding hiam?

____________________________________________________________________

_____________________________________________________________________

Hotkhiatna thu kician takin a pulaak khit ciangin Topa mai-ah migilote hong pai lo ding uh hi, ci-in Job in pulaak hi. Hebrew laimal ah Pasian a nei lo, siatna tawh kipawl a pulaak kammalin kizang hi. Hotkhiatna pen Pasian kiang pan bek hi; Ama thumang dingin ki-ap mite Pasian in honkhia hi, ci-in Job in zong pulaak hi. Tua ahih manin Pasian bia lote le migilote in tua bang lametna nei lo uh hi. Job in hotkhiatna thu sungah khamuanna a neihzia a pulaak ahi hi. Job in ganhing tawh biakpiakna a neih hangin gan tawh biakpiakna bang zahin thupi hiam cih telcian taktak lo kha mai thei hi.

Hotkhiatna thu tawh kisai-in Job akipan Khrih hong sihma-a ganhing tawh biakna a piak mite in Khrih hong sih khit a thu-um mite’n a tel bangun tel lo ding uh hi. Bang bang ahi zongin Job in a lamet hotkhiatna pen Topa sung bek mah om hi, cih pen ganhing biakpiakna a piakziate in pulaak hi.

WEDNESDAY NOVEMBER 23

LEITUNG PIANMA PEK A KIPAN LAMETNA

Gimna lianpi thuak taleh Job bangin kua in lametna nei hiam? A genkhiat thute in a upna le Pasian thupiakte a manzia pulaak hi. Job in lametna nei hi. Bang hang hiam cihleh lametna Pasian aa dingin nungta hi. Mawhna le siatna tawh kidim Adam le Eve a kipan (Pian. 3) leitung hun bei kuan a Babylon kisiat hun dongin (Mang. 14:8) mi tampi in lamet bei phial taleh Lai Siangtho in lametna pulaakin hih leitung nate hong piak theih loh thute hong hilh hi. “Mawhnei leitung in Khrih tungah ki-ap khin zo ahih manin mihing in Khrih tung panin Pasian thupha a ngah i hi hi. Khrih in mihingin hong piangin si-in a thawh khitteh Honpa ahih mah bangin mihingin a hong pianma-in zong Honpa hi.” Ellen G. White, The Desire of Ages, 210. Khrih in i lametna bulpi hi kei leh bang mi hi ding hiam?

Koi bangin hih Lai Siangtho munte in Ellen G. White’ pulaak lametna bangci gen hiam? Eph. 1: 4; Titus 1: 2; 2Tim. 1: 8, 9; 1Pet. 1: 18 – 20.

___________________________________________________________

________________________________________________________________________

Pasian in na khempeuh thei banah leitung a kipiansak ma, mawhna om ma-in, mihing in mawh ding hi, ci-in theikhol khin hi. Nate kipiansak ma-in Khrih Jesuh in hehpihna hong pia hi, ci-in 2Tim. 1: 9 in zong pulaak hi. Tua hehpihna in gamtatna, sepna tungtawnin hong kipia hi lo hi. Hotkhiatna in mihing pianma pek a kigeel khin sa ahih manin bangci-in gamtatna tawh hotkhiatna kingah thei peuh mah lo ding ahih manin Khrih hang bekin i ngah a hi hi. Mawhna om khitteh hotkhiat lametna hong piang tawm hi lo hi-in mihing pianma-in a om khin ahi hi. Mihing a hong kibawlma-in a om khin ahih manin i tangsap hunhunin a ngah thei ding i hi hi.

Khristian khat in a ngah ding thupha lametna tampi i nei hi. Lametna tawh nungta i hi hi. Eite a hong it Pasian’ bawl leitungah i nungta hi (John 3: 16), a hong honkhia Pasian ( Titus 2: 14), i thunget a za Pasian (Matt.6:6), eite aa dingin hong thuumsak Pasian ( Heb.7: 25), hong nusia ngei kei ning ci-in kamciam hong pia Pasian ( Heb. 13:5), sihna pan thawhkik kamciam hong pia Pasian (Isa. 26: 19) tawh a tawntungin a nungta khawm ding i hi hi (John 14: 2, 3).

“Hih thute khit ciangin bang gen ding i hiam? Pasian in eite hong kop nak leh kua in i langah pang zo ding a hiam?(Romans 8: 31) Koi bangin hih in lamet bei na om laitakin lametna hong guan hiam?

THURSDAY NOVEMBER 24

LAMETNA LIMCINGTE

A nuai-a Lai Siangtho munte sim in. Lametna bang

pulaak hiam?

Pian. 3: 15___________________________________________

Pian. 22: 8 __________________________________________

Siam. 17: 11 _________________________________________

John 1: 29 ___________________________________________

Gal. 2: 16____________________________________________

Phil. 1: 6 ____________________________________________

1Kor. 10: 13_________________________________________

Dan. 7: 22 __________________________________________

Dan. 12: 1, 2  _______________________________________

Matt. 24: 27 _________________________________________

Dan. 2: 44___________________________________________

  

Moses hun a kipan kamsangte sawltakte dongah a thuzuanzia ngaihsun in. Thu-um mi khat in Jesuh sungah lametna bang nei hiam?

FRIDAY NOVEMBER 25

NGAIHSUTBEH DING: Lai Siangtho mai khat khit mai khat sim lehang lametna thu kimu thei hi. “Note in lungnopna na ngah nadingun hih thute note tungah kong gen khin hi (John 16: 33). “Leitung bei dong note tawh ka hong om khawm ding hi” (Matt.28: 20). “Thukham samsiatna sung pan a hong suahtak sak theih nadingin Khrih in thukham samsiatna hong thuak hi” (Gal. 3: 13). “ Nitumna le nisuahna a kigamlat bang mahin

Topa in i mawhna khempeuh gamla pek ah koihkhia khin hi” (Late 103: 12) “Bangmah in ama hong itna tawh hong kikhensakzo hetlo ding hi, ci-in ka thei hi. Sihna, nuntakna, vantung mite, vantung vangliatnate, tuhun nate le a hong tung ding nate, leitung a om nate, leinuai-a om nate, Pasian’ bawlsa nate khat peuhpeuh in i Topa Khrih Jesuh hangin Pasian in eite hong itna tawh hong khenzo hetlo ding hi” (Romans 8: 38, 39). “ Meii sungah sakhituihup a om ciangin keimah in ka en ding a, kei le leitung a a om nuntakna a nei khempeuh tawh tawntung thuciamna ka phawk ding hi,” a ci hi (Pian. 9: 16). “ Pa Pasian in eite bangzah takin hong itna thu thei un. Ama hong itna lian mahmah ahih manin eite pen Pasian’ tate hong kici a, hong kicih mah bangin ihi takpi hi. Leitung mite in tuhun ciang dong Pasian thei louh ahih manin eite zong a hong thei lo uh ahi hi” (1John 3: 1).” Topa, Pasian ahihna thei un. Eite hong bawlpa amah hi a, eite ama a’ ihi hi. Eite ama mi ihi a, ama gankhahna sunga om a tuute ihi hi” (Late 100: 3). Hihte in Pasian le Ama kamciam tampite lak pan kim khat hi. Lai Siangtho in lametna hong guan kei leh bang siksanin lametna tawh nungta ding i hiam?

KIKUP DING DOTNATE:

1.     Lai Siangtho bang munte panin lametna na ngah hiam? Koi kamciam in nang aa dingin thupi pen hiam? Bang hang hiam?

2.     SDA pawlpi upna thuguilet lak pan koi bel panin lametna hong neisak pen hiam?

3.     Hamsatna, gimna tuamtuam tawh kidim ta lecin koi bangin kamciamte hangin khamuang thei ding na hiam?Lametna kamciam tampi hong pia mah taleh, bang hangin kimlepaam nate in hong lungkia sak pahpah hiam? Lametna nei-in khamuangin nuntak nading bang kisam hiam?

4.     “Pasian tungah na lametna, na upnate pulaak in. Lungdam in. Khrih sungah lametna tawh nungta in. Amah phat den dingin kisin in. Hih in pumpi le lungsim dam nadingin zatui hoih mahmah khat ahi hi.” Ellen G. White, Mind, Character, and Personality, vol.2. 492. Bang hangin Topa sungah lungdam nadingin Ama min phatna thupi hiam?