MUC

Print Friendly and PDF

Sunday, September 18, 2016

LESSON 7 NOVEMBER 5 – 11 A HONG PUAHPHA THEI GIM THUAKNA



SABBATH NITAK


TU KAAL SUNG SIM DING: Job 8: 1 -22; 11: 1- 20; Isa. 40: 12 – 14; Pian. 6: 5 – 8; 2Pet. 3: 5-7.



KAMNGAH: “Pasian’ thuthuk thei khin zo ding na hiam? Vanglianpa’ hih theihna thei khinzo ding na hi hiam? Job 11:7.

Gimna in mi khempeuh hong lausak hi. Mi hoih tuahsia tampi om hi. Mi gilo daupai mahmah tampi om hi. Hun khat lai-in ‘Bang hangin mi hoihte tuahsia uh hiam?cih laibu om hi. Bang hangin mi hoihte tuahsia-in, gilote ahihleh daupai hiam cih tawh kisai muhzia tuamtuam kigelh hi. Mipil tamp in hih thu kankhia uh hi. Ahi zongin bang hang hiam cih mukhia zo lo uh hi.


Job in zong hih thu mah limgen hi. Bang hangin mi hoihte tuahsia hiam cih thu a hang zong hi. Lai Siangtho le Pasian in tua bang tuahsiatnate koi bangin pulaak cihte thute in mi hoih tuamtuamte thuahsiatna le Job thuahsiat a kilamdangsak hi. Job a gentheihna a va mu mite in bang kampau-in, amaute tung panin bang pilna ngah thei ding i hiam? Amau khialh khakte i khialh khak loh ding thupi hi lo hiam?


SUNDAY     NOVEMBER 6

MAWHSAKNA TUAMTUAMTE


Eliphaz mawhsaknate kicing lo hi ding hiam Job mawhsak dingin Bildah va pai leuleu hi. Aman zong Eliphaz mawhsak bangin Job mawksak hi. Eliphaz sangin gitloh kampau zaw mawk hi. A tate khempeuh a si khin mi khat kiangah” Na tate ama tungah khial a, amau’mawhnate amaute a tuaksak ahi hi”( Job 8: 4) ci-in a gen dingin kingaihsun in. Job in a tate aitangin biakpiakna pia hi. A tate in Pasian tungah khial kha le-uh ci-in ngaihsun ahih manin tua bangin piakna pia hi (Job 1:5). Hih munah a kibang lo thu nih kimu thei hi: Job in hehpihna a telzia le Bildad in gamtatna suangin Job a mawhsak hi. A siahuai lai-ah Bildad in Pasian’ zia le tong siksanin Job mawhsak hi.


Job 8: 1 -22 sim in. Bildad in mawhsakna bang pulaak, bang thuman kihel hiam? Bang thu hangin tua bangin gimna thuak cih ngaihsun lo-in lungsim sukha thute tungtawnin bang thu na mu hiam?

____________________________________________________

__________________________________________________________________________

“Eite pen zan mah mi ihi a, bangmah i thei kei hi. Leitung a i nuntakna pen niliim bang lel ahi hi” (Job 8: 14). Hih thu tungtawnin bang khialhna na mu hiam? Hih pen thuman hi. Lai Siangtho tawh kituak hi (James 4: 14). Ahih kei leh upna nei lo mi in, leitung nate muan le suanin a neite maimong khau bang ding uh hi (Job 8: 14).

Bildad in Pasian’ nunziate lak pan khat bek pulaak hi. Thuman, thukham le thu mang cihte ultungsakin, hehpihna, mawhmai-na cihte pulaak lo hi. Tua bangin khat limgenin a dang khat genlohna in Pasian’ zia le tong telkhialhna piangsak hi. Thu lang gen hi-in thuman thei khialsak hi.

Thukham le hehpihna kizopzia i pulaak ciangin kidop mahmah kul hi. Thukham maw ahih kei leh hehpihna maw, koi zaw ah i khialh khak pen kipuahphatna lampi tawh kinai zaw ding hiam?

MONDAY    NOVEMBER 7

I THUAK DING ZAHIN THUAKLO


“Pasian’ thuthuk thei khinzo ding na hi hiam? Vanglianpa’ hih theihna thei khinzo ding na hi hiam? Vantung sangin Pasian sangzaw a, ahi zongin tua vantung nangawn na banzo kei hi. Pasian in leinuai thu thei a, ahi zongin nangmah in tua thu na thei kei hi. Pasian’ liatna pen leitung sangin golzaw a, tuipi sangin zaizaw hi” (Job 11: 7 – 9). Bang thuman kipulaak a, bang hangin tua thuman phawk tawntung ding thupi hiam?

____________________________________________________

_____________________________________________________________________

I telzawh loh Pasian’ thuthukte pulaak hi. Bang bangin mihing in a hanciam zongin tua thute kitheitel zo lo ding hi. Richard Rorty in “ kuamah in thuman thutak thei zo lo ding hi. Tua hi-in thuman thutak theihsawm vet ding hi lo hi. Hanciamin i theih sawm sangin thuman thutak nuntakpih ding hi,”ci-in pulaak hi. Kum 2000 sung Nitumna lam mite’ ngaihsutna khempeuh in hih thu phawk kha lo uh hi. Khuamial sunga a om mi khat in tua khuamial sangin a lian zaw Piangsak Pasian a zon hangin mu thei lo ding hi. Tua thuman pen Lai Siangtho in pulaak hi. Job’ lawmte thum lakah Zophar’ thugente zong thuman ahih hangin Job mawhsakna kammal mah pulaak hi.


Job 11: 1 – 20 sim in. Zophar pulaakte lak panin bang thute thuman hi-in, bang thute in thuman lo hi, ci-in na thei hiam?

____________________________________________________

_________________________________________________________________________________________________

Job bangin genthei mahmah mi khat kiangah “ na thuak gimnate na thuak ding kilawm hi; a taktakin na thuak zah ding a kilawm thuak nai kei teh,” cih ding hamsa mahmah ding hi. Tua sangin a sia zaw lai khat om a, tua in Pasian’ zialetong le Pasian’ hoihna a pulaak ding zahun pulaak lohna ahi hi.

Pasian’ zialetong i theih nak leh i nunzia in tua zialetong kilangsak hi, cihna hi lo hi. Pasian’ zialetong kilat nadingin bang kisapbeh i hiam?


TUESDAY          NOVEMBER 8

PASIAN THUKKIKNA


Job’ lawm thumte in Pasian thuman a theihzah mah taleh thuman lo zong pulaak kha veve uh hi. Pasian in a thuman Pasian, mawhna pen koihkhong lo-in mawhna tungah thukhen Pasian hi. Gamtat hoihte tungah thupha pia hi,” ci-in pulaak uh hi. Job le a lawm thumte in bang hun a nungta mite hiam cih a kitheihcian loh hangin Moses in Midian gam ah a om lai-in Job Laibu gelh hi, ci-in kiciamteh hi. Tua hi leh Egpyt panin Paikhiatna madeuh pawl hi kha ding hi. Tuiciin khit hi kha ding hi.


Pian. 6: 5 – 8 sim in. Eliphaz, Bildad le Zophar cihte thu tampi i theihloh hangin, Tuiciin in amaute ngaihsutzia huzaap hi, cih kitel hi lo hiam?

____________________________________________________

_______________________________________________________________________

Tuiciiin pen Pasian in mawhna hangin a thukhenna a hi hi. Siatna tawh a nungta mite ngah ding a kilawm gimna thuak kha uh hi. Tua hi mahta leh hehpihna om lo hi lo hi. Bang hang hiam cihleh “Noah in tembaw lamin, a sek gingte in mite tungah thuman a tangko hi gige hi” (Ellen G. White, Spirit of Prophecy, vol. 1., 70).


Koi bangin Job’ lawmta thumte in Job thuhilh uh hiam? Mawhna hangin Pasian thukhenna kidawk hiam? Pian. 13: 13; 18: 20 – 32; 19: 24, 25?

____________________________________________________

_________________________________________________________________________

Eliphaz, Bildad le Zophar in a thupianzia a thei kei zongun Pasian in mawhna koihkhong ngeilo hi, cih pen kilang hi. Pasian in siatna bawlte nusia-in, a mawhna uh tawh kisia dingin koih khong lo hi. Tuiciin tun hun lai mah bangin Pasian in siatna kici khempeuh tungah thukhen hi. Pasian in thukhenin, siatna le mawhna susia hi.

Pasian’ zialetong, mawhmaisakna cihte thupi mahmah taleh, bang hangin mawhna hangin thuman thukhenna om hi, cih pen mangngilh loh ding kisam hiam? Siatna bawl taleh thukhen a thuak lo mite ngaihsun in. Pasian in tua bang mite bang hun, koi mun ah thukhen ding hi, cih na thei hiam?

WEDNESDAY   NOVEMBER 9

        TOPA IN NA THAK KHAT BAWL HI LEH


Pasian in siatnate siatna ngahsak, a hoihte thupha pia hi, cih pen Job le a lawm thumte sihkhit nungah kiciamteh hi.

Thkna. 6: 24, 25 sim in. Thumangte tungah bang kamciam kipia hiam?

________________________________________________________

__________________________________________________________________________

Thuciam Lui sungah Pasian thu zui-in, Ama deihna bangin a nungta mite tungah thupha, nopna ngah ding hi, ci-in kamciam om hi. Tua mah bangin Job’ lawm thumte in zong Pasian tungah a citak mite, Ama thu a mang mite, thuman thutak tawh a nungta mite in thupha a ngahna pulaak hi.

A langlam ah en lehang Pasian thu a manglote tungah thuhilhna khat khit khat om den a, tua bang mite gimthuakna zong kimu thei hi. Israel mite in Sinai mualtungaah Pasian tawh thuciamna nei uh a, tua thuciam a pelh uh leh Pasian in amaute tungah gimna tungsak hi, ci-in zong pulaak hi.”Ahi hangin note in Topa’ aw ngai lo-in Topa’ thupiakna na langpan’ uhleh Topa in note le na kumpipa uh hong langpan’ ding hi” (1Sam. 12: 15), ci-in kipulaak hi.

Gam. 16: 1 – 33 sim in. Bang thupiang in Pasian in siatna tungah thukhen ahihzia kipulaak hiam?

____________________________________________________

__________________________________________________________________________

Thuman langpang mite in kisia uh hi. Amau siatna mah kisiatpih uh hi. Langpanna le mawhna hangin Pasian in amaute tungah a thukhenzia kimu thei hi. Pasian in a lamdangtakin nasemin, nate pianngei dan zong a kikhel hong suak hi. “Pasian in a thak khat piangsak in, leitang in a kam ka-in amaute’ neih khempeuh tawh hih mite valhtumin, a hingtangin leinuai-ah a tumsuk uhleh, hih mite in Topa a simmawh ahihna thu na thei ding uh hi,” a ci hi (Gam. 16: 30).

“Piangsak” cih kammal in sepna pulaak kammal hi-in Pian. 1:1 sunga kizang na khempeuh kipatcilna pulaak kammal mah hi. Ama a langpangte tungah Pasian in thakhatin thukhen hi. A khen pah kei zongin siatna pen koihkhong lo hi, cih i phawk ding hong deih hi.


THURSDAY     NOVEMBER 10 
                         NIHNA SIHNA


A lian a vanglian penpen siatna tungah thukhenna mailam hun ah om lai hi. Tua hunteh migilo khempeuh kisia mang ding hi. Hih pen sihna nihna ci-in kiciamteh hi (Mang. 20; 14). Hih sihna le Adam hangin sihna i ngah kibang lo hi. Sihna nihna panin Jesuh in hong honkhia hi( 1Kor. 15: 26). Nihna sihna sungah kihel ding mite Pasian thukhenna a thuak uh hi-in, amaute in mawhna kisik lo, hotkhiatna zong ngah lo ding uh hi.


2Pet. 3: 5 – 7 sim in. A mangthang tawntung dingte in bang thuak ding uh hiam?

____________________________________________________

_________________________________________________________________________


Vantung panin mei hong kia suk hi. Leitang kiphelkham hi. Leisung a kikoih galvan khempeuh puakkham hi. Mun khempeuh pan meikuang bekbek pusuak hi. Suangpi golpipite kangtum hi. Na khempeuh kangtum mangkhin hi (Mal. 4: 1; 2Pet. 3: 10). Leitung maitang in meilipi hong suak hi. Pasian a langpan mite, siatna tawh a nungta mite tungah thukhenna hong tung hi. Topa in a galte tung a puulaak ni ahi hi. Zion a siasak mite a thuhkikna ahi hi (Isaiah 34: 8); Ellen G. White, The Great Controversy, 672, 673.

Mawhna in siatna hong tun hi. Pasian mahmah in mawhnei mite le mawhna a suksiat hun hong tung ding hi. Hih leitunga gimna khempeuh mawhna pan hong kipan ahi hi. Ahi zongin gimna khempeuh mawhna hanga Pasian’ thukhenna pana hong pai hi khin lo hi. Job’ thuakna in hong lak hi. Kidona Lianpi sungah gimna hong pia Galpa om hi. Ahi zongin lungdam huai mahmah thu in gimna thuak mah taleng eite aa dingin Pasian om hi. Bangbangin gimna thuakin, hamsa kha mah taleh Pasian in eite hong it tawntung hi. Bang zahin hong it hiam cih leh Jesuh in singlamteh tungah a nuntakna a hong piak dongin hong it hi. Tua sihna in siatna, sihna khempeuh beimangsak ding hi.

Mi khat in gimna a thuak ciangin Pasian kiang pan hi, ci-in koi bangin thei ding na hiam? Pasian kiang pan hi leh hi lo a thei lo ihih leh, tua bangin gimna a thuak mi kiangah bang gen lecin hoih ding hiam? Ahih kei leh nang mahmah in gim a thuak hi lecin, koi bang lungsim puak na nei diam?


FRIDAY          NOVEMBER 11

NGAIHSUTBEH DING: Kamsangte’ dinmun ah a om dingin kingaihsun lecin, amau thuakziate i tel thei ding hi. Amau dingin kingaihsun lehang Eliphaz, Bildad, Zophar in a khialh bangun khial lo thei ding i hi hi. Amaute in Job tungah thukhen thei ding dinmun nei lo uh hi. Mi khat in gimna a tuah khak leh mawhna bawl kha hi ding hi, ci-in kingaihsun pahpah hi. Tua bangin ngaihsut pah khakna pen ama gamtat zia le tong hong thei khialsak kha zel hi. Pasian thukhenna hun hong tung nai lo hi. Mi hoih le mi gilo, a sia le a pha om khawmlai hi. A nih tuakun siatna tawh kipelh lo hi. Khat veivei ciangin mihing in Pasian thuman panin lamphial kha thei-in Satan vangliatna in hong tuamcip thei hi. Pasian in tua bang gimna panin hong honkhia lo-in om thei hi. Job in meima vei gawp hi. A lawmte in mawhna hangin tua bangin natna nei hi, ci-in a mawhna pulaak dingin sawl uh hi. Tua bang gimnate hangin mawhna lianpi nei hi ding hi, ci-in ngawh uh hi. Ahi zongin Pasian in Job dikna hangin a lawmte mawhsaknate tai hi.”Ellen G. White, The SDA Bible Commentary, vol.3., 1140.

Gim thuak mi khat tungah kampau zia kidop huai hi. Bang hangin tua bangin gim thuak hi, cih i theih hun zong om kha ding hi. Zatep den mi khat in cancer ngah baih hi. Ahi zongin a khan tawnin zatep napi-in cancer nei lo zong om hi. Cancer ngah ahih manin Pasian in gawt hi. Cancer ngah lo pa pen Pasian in gawt lo hi, a kici thei diam? Eliphaz,

Bildad, Zophar mah bangun eite in zong bang hangin gimna thuak cih i theitel kei hi. I thei a, i thei kei zongin a phamawh hi lo hi. A thupi-in ah tua bang gimnate tungah lungsim puakzia thupi pen hi. Tua hi-in Job thuakna ah a lawm thumte mawhsakna pen thuman hi lo hi.

KIKUP DING DOTNATE:

1.   Mawhna hangin thukhenna in koi bangin Pasian in thuman hi, cih muanna hong nei thei sak hiam?

2.   Job in gim a thuak laitakin a lawmte in bang hangin Job in gim thuak cih thei lo uh hi. Bang hangin gimna thuak i hiam cih i theitel zo

kei hi. Tua hi-in a gim mite hehpih ding, a gimna uh i tel ding hong huh hi lo hiam? I nuntak sungin a hoih lo khat i hih leh siatna kithuak pah thei hi,cih pen i tel ding thupi hi lo hiam? 

To get the latest update of me and my works

>> <<