MUC

Print Friendly and PDF

Sunday, September 18, 2016

LESSON 6 OCTOBER 29 – NOVEMBER 4 THU OMLOPI SAMSIATNA MAW



TU KAAL SUNG SIM DING: Late 119: 65 – 72;

Job 2: 113; 4: 1 -21; Romans 3: 19, 20; 1Kor. 3: 19; Heb.12: 5; Matt. 7: 1


KAMNGAH: “Pasian’ mai-ah mi khatpeuh paubaang loin omzo
ngei ding ahi hiam? Amah a Bawlpa’ mai-ah sitbaang loin omzo ngei ding ahi hiam? (Job 4: 17).

Nung kaal sung i thusinna ah Job dinmun ah om dingin i kibulh ciangin a gimzia ding kingaihsun thei hi. Ama thuak bangin gimna a thuak kuamah om lo ding hi. I thuak gimnate hangin i lungmang a, cihmawh lamet bei-in i om zel hi. I nuntak sungin thuman lo nasep vive i tuak kha hi. Job in gimna a thuak ciangin a lawmte zong Job kiang hong pai uh a, amau hehnep theihzah sit lo-in Job hehnem ciat uh hi. A dah mi khat hehnem ngei lo i om hiam? A sumh ngei lo i om hiam? Bangci bangin a khakun mi khat hopih ding na hiam? Bang kammalte zang ding cih a ngaihsun kha ngeilo i om hiam?

Job Lai Siangtho in Job le a lawmte in itna, vangliatna tawh kidim hong cing tawntung Pasian’ bawl leitungah siatna, gimnate thute hong hilh hi.

SUNDAY OCTOBER 30
 A LIAN MAHMAH DOTNATE

Job sunga kigelh thupiang a tamzaw Job 1-2 sungah kimu thei hi. Vantung le leitung kikal hong dal khuamial sahpi kihemkhia-in vantung khuavak thuman hong kilangkhia hi. Bang zahin leitung pilna khangin telescope hoih mahmah taleh Job sunga thu piangte kimu thei tuan lo ding hi. Tuma kum tul tampi val lai-a hih thupiangte kigelh hi-in a kigelhna mun in tu hunin Saudi Arabia gam hi. Job in vantung , vantungmite le leitung a kipan kimlepaam nate kizopzia zong hong hilh hi. Job 2 khit ciangin Job le a lawmte kihona kimu thei hi. Bang thute kiho uh hiam cihleh Pasian thu, natna, ngaihsutzia upna, nunna le sihna thute kikum uh hi.

Job tunga thupiang khempeuh zong kikum uh hi lo hiam? Nisim nasep tuamtuamte a kipan, annek tuidawn le leitung vai tuamtuamte hangin a thupi mahmah thute kimangngilh kha zel hi. Gimna i tuah ciangin lunghimawhna tuamtuam hong om a, theihnop tuamtuam, dot nop tuamtuam zong hong om zel hi.
Late 119: 65 – 72 sim in. Bang thu kigen hiam?

_____________________________________________________________________

_____________________________________________________________________

Late laigelhpa in a thuak gimnate sung panin thu hoih tuamtuam a muhte pulaak hi. Khat vei vei ciangin dongtuahna pen thupha hi kha thei hi. Tuahsiatna tuamtuamte tungtawnin Pasian kiang a zuan mi om hi lo hiam? Tuahsiatna deihhuai hetlo taleh khat veivei ciang tua bang tuahsiatna in Pasian tawh hong kinaisak hi. Ahi zongin khat veiveiteh tua bang tuahsiatnate thuman lopi-in gimthuakna le khiatna nei lo-in kingaihsut khak hun zong om hi.


Na thuak gimnate panin a hoih thu na mu ngei hiam? Tua hi lo-in phattuamna hong tunlo gim thuaknate koi bangin na mu hiam?

MONDAY OCTOBER 31
 BANG HUNIN MIDIKTE MAIMANG HIAM?

Job 2: 11 – 13 sim in. Job’ lawmte in Job thuakna a muh uhteh bang pulaak uh hiam?

_____________________________________________________________________

_____________________________________________________________________

Job gimna a zak uhteh a lawmte zong Job tawh kimu dingin hong pai uh hi (Job 2: 11). A lawmte in Job a muhphetun a thuak gimnate hangin lamdangsa uh hi. A gen ding uh zong thei pak lo uh hi. Hopih thei lo uh hi. Daikhipkhep phot uh hi. Job’ thuak bangin a thuak mi khat tungah bang pulaak thei na ding hiam? Tua bangin a lawmte in paulo-in a om ciangun Job in a gimthuaknate pulaak hi. A lawmte in a gen ding uh tam mahmah kha ding hi.


Job 4: 1 -11 sim in. Eliphaz in bang thute pulaak hiam?

_____________________________________________________________________

_____________________________________________________________________

A dah mi khat hehnep kampau zia ding Eliphaz tung panin kimu thei hi. Job masa lama kigelh thute in a gim mite tungah pulaak loh ding thute kici thei hi. Job thuakna a muh uhteh Job hehpih mahmah uh hi. Eliphaz in hehnep kampau ding sangin upna thute bulphuh zaw hi. Genthei, dongtuak mi khat kiangah ‘ na thuak ding mah hi. Pasian pen thuman hi.
Migilote bek tuahsia hi,” ci-in va gen ding pen baihhet lo ding hi.

Job in ama khialhna hangin a thuak hi mah leh zong tua bangin vagen ding hamsa mahmah ding hi. Nangma khialhna hangin gim a thuak hiteh ci-in i va genna hangin ama aa dingin bang phatuam ding hiam? Gentehna-in mawtaw hawl khat in a hat mahmahin a mawtaw hawl henla, mawtaw kibung leh, tua pa kiangah “ na mawtaw hawl hatsak lua na hih manin Pasian in daan hong pia ai veh” va ci lecin, tua in hehnepna kam ahi diam? Thuman gen mah hi lo diam? Eliphaz in Job hehpih lo-in bang hangin tua bangin Job in thuak hi ding hiam cih zong kan lo hi.
 
Cimawh beidongin na om laitak hong kihehnep hunte na phawk thei hiam? Bang kammal na za hiam? Koi bangin hong kihehnem hiam? A hong kihehnepna tungtawnin koi bangin hehnep kisam mi khat hehnemsiam ding na hiam?

TUESDAY     NOVEMBER 1
 MIHING LE AMAH A PIANGSAKPA

Eliphaz in Job hehnem dingin a pai hangin hehnem thei lo hi.

Kuamah in pakta lo hi. Job in a nopsak hunin dongtuakte hehnem ding hamsa sa lo ding hi, ci-in Eliphaz in ngaihsun hi. Ahi zongin tu-in Job in cimawhin genthei hi. Mite hehnem zo lo diam ci-in ngaihsun hi. Pasian in thuman ahih manin Job a genthei ding mah ahi hi, ci-in pulaak hi.

Job 4: 12 – 21 sim in. Eliphaz in bang thu tawh Job mawhsak hiam?

_____________________________________________________________________

_____________________________________________________________________

Thu tuamtuamte lakah Israel minam a pianma, mite tungah Pasian in Ama zia le tong le a nunzia a pulaakte lamdang hi. Job Lai Siangtho in

Pasian mi masate le Israel mite tungah Pasian thuman pulaak hi. Tua thute siksanin Eliphaz in Pasian’ zia le tong mah pulaak hi. Eliphaz in

“Zan laitak in thu hong tung hi” ci-in a pulaak thu in thuman thutak tak hi

(Late 103: 14; Isa. 64: 7; Romans 3: 19, 20). Mihing in tungman i hi hi. Tawlkhat sung bek i nungta hi. Lungno bangin i nuntakna bei hi. Pasian sangin kua in thuman zaw ding hiam?

Hih khempeuh Eliphaz in Job tungah gen hi. Pasian in thumanin, mi gilote bek in siatna thuak uh ahih leh Job in thumanlohna khat nei-in a thuak gimnate a thuak mah ding hi, ci-in mawksak hi. Tua hi-in Job’ pulaak thute in thuman lo hi, ci hi. Pasian aitangin thugen a kinei Eliphaz in Job thuhilh hi. Pilna, theihna khempeuh a nei, na khempeuh a thei Pasian hi, cih thu siksanin Eliphaz in ama gen khempeuh Pasian kiang pan hong pai thu bangin pulaak hi. Ahi zongin Eliphaz in bang hangin Job in gimna thuak cih thei lo hi.


Job le Eliphaz kihona tungtawnin bang thu na mu thei hiam? I gen khiat thuman thute in mite gimna a pia a suah khak lohna ding kisam hi lo hiam?


WEDNESDAY NOVEMBER 2
 HAINA NUNTAKPIH

Job 5 sungah Eliphaz in Job a mawhsakna kimu thei hi. Mi

gilote tungah siatna tung hi, ci-in pulaak kik kik hi. Eliphaz thute a manlohzia Job in theitel hi. Tua bangin mawhsakna bek a zak ciangin Job thuakzia ding ngaihsun in. Tua bangin gim thuakna dingin siatna nei lo hi. Ahi zongin Eliphaz gen khempeuh a khial hi khin lo hi. Ama gen pawl khat Lai Siangtho mun tuamtuam in zong

pulaak hi.

Koi bangin a nuai-a munte in Job 5 sung thute pulaak

hiam?

Late 37: 10___________________________________________

Pau. 26: 2 ____________________________________________

Luke 1: 52 ___________________________________________

1Kor. 3: 19 ___________________________________________

Late34: 6___________________________________________

Heb. 12:5 ___________________________________________

Hosea 6: 1 __________________________________________

Late 33: 19__________________________________________



THURSDAY NOVEMBER 3
THUKHEN DING MANLANG


Eliphaz in Job tungah a gen thute lakah thuman Lai Siangtho tawh a kituak om mah hi. Ahi zongin thuman lo zong om veve hi. Eliphaz in a gen thute manlo hi lo-in a siksan thute in man lo hi zaw hi. Leitung nate om zia i tel zo kei hi. Thu khat peuhpeuh a tel tawh i kibat hangin a taktakin a tel lo i hi hi. Lai Siangtho sung thutei telloh tampi om hi. Ellen G. White in hih bangin pulaak hi. Lai Siangtho in “ I gamtatna bangbangin a gah i at ding hi, ci-in hong hilh a, hih sangin thuman zaw om lo hi. I lungsim, i gamtatna bangin a nungta mite i hi.” Ellen G. White, Education, 146.

Hih pen thupi mahmah hi. Mi siangtho khat in Job bangin a thuak mi khat kiangah va pai-in Ellen G. White’ thu va gen dingin ngaihsun in. Tua bangin a pulaak sangin hih thute pulaak leh hoih zaw ding hi. “ Pasian’ thumanna pulaaka a kinei mi tampi in Pasian’ hong itna, hong hehpihna pulaak lo uh hi. Gitlohna, sinsona sungah a nungta mite in ze-etna thuak uh hi. Tua bang mite Satan in ama mi dingin zawlin, lungkiasakin, thanemsak hi.” Ellen G. White, The Ministry of Healing, 163.

Eliphaz a kipan Job in a tel zawh loh thu om gige hi. Thuman pawl khat a pulaak hangin Eliphaz in ama muhna siksanin Job tungah a thukhen pen thuman hi lo hi.


A khial khat a om leh bang hangin Lai Siangtho’ hong hilhte ngaihsut masak ding thupi hiam? Matt. 7: 1, 2; Romans 2: 1-3; 1Kor. 4: 5.

_____________________________________________________________________

_____________________________________________________________________

Eliphaz ngaihsut bangin Job in a khialhna hangin gim thuak hi mah leh zong, Eliphaz ngimna in ngimna hoih hi lo hi; a lungsim sia hi. Job in mi khempeuh limcing hi. Bang hang hiam cihleh Kidona Lianpi sungah mi khempeuh kihel hi. Gimna tawh kipelh thei kuamah om lo hi. Thuhilhna sangin hehpihna, lai-atna i kisap zawk hun om hi. Thuhilh kisapna mun le hun om mah hi. Ahi zongin mi khat genthei-in, dongtuak, a ta khempeuh in sihsan, a neih khempeuh vui le vai suak khin mi khat banah a pumpi tungah mei-ma tum a dim mi in thuhilhna sangin hehpihna kisam zaw hi.

FRIDAY NOVEMBER 4
 NGAIHSUTBEH DING: Eliphaz in Job hehpih lo hi. Pasian’ zia le tong siksanin Job mawhsak hi. Job genthei mahmah hi. Pasian pen thuman hi. Tua hi-in Job in a gamtatna bangin gim ngah hi. Tua in Pasian’ thumanna hi. Tua hi-in Job in a gim thuakna hangin a thuum ding hi lo hi, ci-in Eliphaz in Job mawhsak hi.

Pasian in thuman hi. Ahi zongin a piang na khempeuh Pasian’ thumanna hang hi, cih bang hi lo hi. Thumanna le thukhenna om mah ding hi. Ahi zongin tu-in hi pah nai lo hi (Mang. 20: 12). Upna tawh nuntakna in Pasian i muanna kilatna hi-in, ni khat ni teitei ciangin thuman hong kilangkhia ding hi.

Eliphaz in Job a mawhsak mah bangin Farise-te in zong Jesuh mawhsak uh hi. Farisee-te zong amau le amau dik kisa uh hi. Topa Jesuh in Sabbath ni-in cidam a damsak ciangin Farisee-te heh uh hi (Matt. 12). A taktakin damna a ngah mite hangin a nuam ding uh hi zaw hi. Pasian a it, thuman thutak aa dingin nungta-in a kingaihsun mite’ phawk ding thu in: “a kineih thukhamhilh siate le Pharisee pawlte aw, gimna na thuak ding uh hi. Bang hang hiam cihleh lengmasel, samong sapa le cumminte sawm-a khat na piak uh hangin thukham sunga a thupi zaw ahi maantak a thukhenna, hehpihna le upnate na thudon kei uh hil A dangte thudon lo tuanlo-in hih nate na hih veve ding uh ahi hi “ (Matt. 23: 23)

KIKUP DING DOTNATE:

1.      Hehpihna, lai-natna le thuhilh kisap hun koi bangin khentel ding i hiam? Amau gamtatna hangin gim thuak hi mah taleh tua bang hun ciangin hehpih ding le lai-natpih ding bang hangin kisam hiam?

2.      Eliphaz in Job a mawhsakna Job 4, 5 sim in. Job tungah kipulaak lo-in koi bang mun, kua tungah kipulaak hi leh kilawm zaw ding hiam?

3.      Job’ lawm dingin kingaihsun in. Vut lakah tu Job kiang va hawh dingin kingaihsun in. Bang thu na gen diam? Bang hangin tua bangin gen ding na hiam? Ama dinmunah a om hi lecin, bang kammalte na za nuam diam?

To get the latest update of me and my works

>> <<