MUC

Print Friendly and PDF

Sunday, September 18, 2016

LESSON 5 OCTOBER 22 – 28 NA SUAHNI SAMSIA IN



SABBATH NITAK


TU KAAL SUNG SIM DING: Job 3: 1 -10; 6: 1-3; 7: 1 -11, 17 – 21; John

11: 11 – 14; James 4: 14; Late 8: 4 -6.


KAMNGAH: “ Kote’ Topa Pasian aw, nangmah in na khempeuh piangsakin, nangma deihna bangin na khempeuh omin, na khempeuh kipiangsak ahih manin, minthanna, pahtawina, le vangliatna na ngah tawntung dingin a kilawm hi,” a ci uh hi (Mang. 4:

11).

Job in hamphatna thunih hong hilh hi. Khatna ah,  koi bangin

Kidona Lianpi bei ding a; nihna ah, Kidona Lianpi kipat khiatna cihte ahi hi. Job in hih thute thei kha lo hi. Ama theih thu in a innkuan sung nuamsa, lungnuamin a om laitakin gimna, sihna khat khit khat thuak kha-in, nisuahna lama mi khempeuh lak pan a lian pen in gim thuakin a neihlelamh khempeuh vui le vai suak mang khin hi.


Job dinmun ah om dingin kingaihsun lecin a thuak gimnate a dahnate telzo lo-in lungmanzia ding na phawk thei ding hi. Job thuak bangin i thuak kei zongin ama thuak gimnate tel ham lo hi. Topa Pasian bia-in Ama tungah a cihtak mite in siatna tawh kidim i nuntakna sungah tua bang thute a tuak khak ngei lo kua om hiam?

SUNDAY OCTOBER 23

KA SUAH NI KIMANGNGILH HEN

Job dingin kingaihsun dih! Na sep khempeuh matut loh om lo, na hihna khempeuh Topa in thupha hong pia-in hun khatteh tua teng khempeuh beimang pak dingin ngaihsun in. Khiatna nei het lo ding hi. Bang deihna hi peuh mah ding hiam cih kitel zo lo ding hi.

Hun khat lai-in sangnaupangte a pua mawtaw khat kibung hi. Naupangno tampi in sihlawh hi. Pasian om kei a ci mi khat in leitung le i nuntakna in mannei kei, na khempeuh a mawkna hi, ci-in pulaak hi. Tua bang tuahsiatna in mannei lo hi. Bang hang hiam cihleh leitung mahmah in mannei lo hi. Ahi zongin Pasian a um mite aa dingin tua bang hi lo hi. Topa tungah a citak Job in zong tua bangin ngaihsun lo hi. Ahi zongin Job in tua bangin a tuahsiatna hangin a dahna, a gimna a pulaak simloh bang mah dang pulaak thei lo hi.

Job 3: 1-10 sim in. Koi bangin Job in a gimna pulaak masa hiam? Ama gen thute in koi danin na nunzia tawh kizopna nei hiam?

___________________________________________________________________

____________________________________________________________________

Nuntakna in Pasian’ letsong hi. Pasian in hong bawl ahih manin a nungta i hi hi (Sawl. 17: 28; Mang. 4: 11). I nuntakna mahmah nalamdang hi. Leitung pilna in nuntakna i cih in bang hi-a, koi bangin hong kipan, bang hangin kinungta cihte muhzia tuamtuam nei hi. Lamet bei mi khat in nuntakna in bang ngimna nei hiam cih a ngaihsun kha lo a om diam? Job bangin gimna a thuak kha mi khat in mihingin piang se kei zaw vet leng hoih zaw ding hi veh, a cih khak hun om thei ding hi.

Nidang Greek mite in “Leitung gimnate tawh kipelh theihna ding sihna simloh in mihingin piangkhia kei vet leng” ci uh hi. A piang nai lote’n gimna tuak kha lo, gimna tawh kipelh uh, piankhiat loh mah hoih pen hi, ci uh hi.

Job in gimna a tuah khak ciangin mihingin piangkhia kei zaw leng hoih zaw ding hi ven ci-in, a gim thuakna pulaak hi. Amah bangin na ngaihsun kha ngei hiam? Ahi zongin Job thuakna sangin nang thuakna neu zaw ding hi. Hih sangin genthei zaw kuamah om nawn kenteh na cih hun ciangin lametna tawh kalsuan ding bang zahin thupi hiam?

MONDAY OCTOBER 24

HANKHUK AH TAWLNGA

Job 3: 11 – 16 sim in. Job in bang gen hiam? Koi bangin dah paisuak hiam? Sihna thu bangci muh hiam?

_______________________________________________________________________

_______________________________________________________________________

Job thuakzia i ngaihsun thei hi. A neih a lamh khempeuh beimangin, a pumpi in natna tawh kidim hi. A ta khempeuh si khin hi. Khat bek in nusia hileh zong kidah mahmah hi. Ta 10 nei hi. A vekin si khin hi. Job zong nuntak ding sangin si nuam zaw ding hi. Job in bang hangin tua zahin genthei cih pen tel lo hi. Thei hi leh a thuakna a nuamtuam diam?

Job in sihna tawh kisai a pulaak thute ngaihsun in. A si hi leh, a sit khitteh bang hi ding? Vantung nopsakna tawh kidim ding maw? Vantungmite tawh kikhawl ding maw? Pasian kiang tungto pah ding maw? Vantungmite tawh guasem tum pah ding maw? Lai Siangtho in tua bangin gen lo hi. Tua ahih leh Job in bang gen hiam? “ Tua hi zenzen kei leh hanah nuamtakin ka lum hithiat khin ding hi. Sihna sungah ihmu-in ka tawlnga khin ding hi” (Job 3: 13).

Thuhilhsia 9: 5; John 11: 11 – 14 sim in. Koi bangin Job pulaak sihna thute pulaak hiam?

__________________________________________________________________

__________________________________________________________________

Lai Siangtho sungah a kigelh masa penpen Lai Siangtho mah in misi-te’ omzia gelh hi. Job lunggulhpi bel in tawlngakna hi. Nuntak hamsa lua, genthei kisa lua mahmah lamet bei mi khat in bang mah phawk nawn lo-in tawlngak hithiat ding lunggulh hi; sihna simloh lunggulh dang nei nawn lo hi. Gim, tawl lua mahmahin, tuate a thuakma-in a nopsaknate mangngilh zo hi. Mihingin piang kei zaw leng hoih zaw ding hi, cih bek mah ngaihsutin hong nei hi.

Thu-um mi khat in i ngah ding kamciam i nei hi. Hamsat, gentheih thuak mahta lehang koi bangin i nopsak hunte phawk kik thei ding i hiam? Tua thute panin lungnopna, khamuanna na nei thei ding hiam?

TUESDAY OCTOBER 25

MITE’ THUAK GIMNA

Job in a gim a tawlnate khatvei pulaak khin hi (Job 3). Job 4, 5 sungah a lawmte khat Eliphaz in Job a thuhilhna kimu thei hi. Job 6, 7 ah Job in a gimnate pulaak kik hi.

Ka lunggimnate kitawikhai thei hen la, ka haksatna khempeh kitawiteh leh! Tuipi sehnel khempeuh sangin gikzaw ding ahih manin ka kampaute guhin a kha hi” (Job 6: 2,3). Bangci bangin Job in a thuak gimnate pulaak hiam?

____________________________________________________________________

_____________________________________________________________________

Limciinna zangin Job in a gimzia pulaak hi. Sehnel khempeuh le ama gimna khempeuh tawi kiteh ding hi leh, ama gimna in lek zaw ding hi. Amah bek mah in a thuak gimna hi. Midang in thuakpih lo hi. Mi khempeuhte thuak gimna khempeuh kigawm gimna zahin lian hi. Ahi zongin mi khat le khat thuakzia kibang lo hi. Mi khat ii gimna kithuakpih thei lo hi. Ei gimna zong kuamah in hong thuakpih thei lo hi. I gimna, i dahna ei kia bek mah in i thei hi. Job’ thuakna lian lua mahmah ahih manin kua mah in theihpih lo hi. Mi kimkhat in a gim a tawl mi khat kiangah “ na thuak na gimna hong thuakpih ing, “ ci-in pulaak zel uh hi. A taktakin thuakpih lo, thuakpih thei lo uh hi.

Pasian thu-um mite in a hun, a mun ciangtan lo-in i huh theih mi khat i muh nak leh a huh dingte i hi hi ( James 1: 27; Matt. 25: 34- 40). Gimna tawh kidim leitungah a nungta mimal khat ciat in i puak lah ding gimna thuak kha buang lo ihih ciangin lungdam huai mahmah hi.



I thuak lah ding gimna kithuak kha lo cih thu ngaihsun in. Koi bangin na thuak gimna hong telsak hiam?

WEDNESDAY  OCTOBER 26

SIAMGANTE SIAMTANG


Sihna tawh kipelh ding mihing kuamah om lo hi. Bang bangin gamtat hoihin, na lianpi semta leh a si lo ding kuamah om lo hi. Methuselah kum 1000 dektak nungta hi. Ei zong kum 800, 900 bang nungta hi leng, a tawntung nunna ngaihsun lehang kum 1000 cih pen bang tham hi lo hi (Pian. 5). Kum za tampi a nungta mite nunzia koici bang cih ngaihsut hak hi. Methuselah kum 187 a phakin tapa Lamech nei hi. Tua khit kum 782 Methuselah nungta lai hi. Tuiciin tunma mite in kum tampi a nuntak uh hangin si veve uh hi.


Job 7: 1 -11 sim in. Job in bang thute hangin phun hiam? Late 39: 5, 11; James 4: 14 sim in.

_____________________________________________________________________

_____________________________________________________________________

Job in a thuak gimna panin tawldamna zong hi. Sihna simloh tua bang tawldamna dang om lo ding hi. Job in nuntak hun tomzia pulaak hi. Nuntak haksa, i nuntak sungin gimin, tawlin a tawpkhakna i nuntakna bei hi. Tua tawmno sung gimna, tawlna vive tawh kidim hi. SDA thu-um numei khat in a gimnate hangin amah le amah kithah ding nangawn ngaihsun ngei hi. Tua numei in hih bangin pulaak hi: “ A si ding kimlai Adventist ka suah a kipan kum 6 sung bang ka nungta lai hi. Hih pen ka nuntakna sungah sia penpen hi.” Hih in khiatna nei lo hi.

Nuntakna in gentheihna tawh a kidimteh nuntakna mannei lo tawh kibang hi. Gimna, lau-na, natnate hangin lamet nei nawnlo i kisa kha zel hi. Job zong a gim a tawlna panin lungkia-in lamet bei kisa hi (Job 19: 25). “ Pasian aw, ka nuntakna husan khat bek ahihlam hong phawk in; ka mit in lungnopna mu kik nawn lo ding hi” (Job 7:7), ci-in, nidang sangin sih ding tawh kinai zaw mahmahta ahih manin, bang bangin a nunzia lipkhap huai mahta leh, Job in nuntak tomzia thuumin tau hi.

 Koi bangin Mawhna, sihna le thawhkikna cihte nuntak tomzia hong theisak hiam?

THURSDAY OCTOBER 27

“Mah Enosh” (Mihing in bang hi lel hiam)


Job dinmun om dingin kingaihsun in. Bang bangin Pasian in hih bang gimna hong thuaksak hiam? Bang hangin Pasian in phal hiam? Job in ama thuak gimnate sangin a zai zaw thu mu kha lo hi. Koi bangin mu thei mah ding hiam? A thuak gimnate thei hi bekin bang hanga thuak cih pen thei lo hi. Amah bangin eite zong tua ci tek hi lo i hiam?

Job 7: 17 – 21 sim in. Job in bang pulaak hiam? Bang thu dong hiam? Ama thuakna ngaihsun lehang bang hangin tua dotnate in khiatna nei hiam?

__________________________________________________________

_____________________________________________________________________

Mipil kim khat ngaihsutna ah Job in Late 8: 4 -6 sung thute simmawhbawl zahpih hi, ci uh hi. “Nang ngaihsut tham dingin mihing bang hi-a, nang thudon dingin mihing tapa bang ahi hiam? Vantung mite sangin a niamzaw zekin na bawla minthanna le pahtawina na khusak hi. Na khuta na bawlte amah na uksak a; ama khe nuai ah na khempeuh na koi hi.” Late 144: 3, 4 zong simbeh in. Late a kigelh ma-in kigelh khin ahihteh Late gelhpa in Job’ thuumnate a dawnkikna hi ding hi, ci-in kiciamteh hi.

Bang bang ahi zongin bang hiam (‘Mahenosh) cih dotna pen a thupi mahmah dotna hi. Kua i hiam? Bang hangin nungta i hiam? I nuntakna in bang ngimna nei hiam? Job in Pasian um ahih manin Pasian lungsim ama tungah tu pah hi. Job in bang hangin Pasian in hong phawkkha hiam ci-in ngaihsun hi. Pasian in vanglian mahmah hi. A bawlsa nate zai mahmah hi. Bang hangin Job a kipan i lunghimawh ding hiam?

John 3: 16; 1John 3: 1 sim in. Bang hangin Pasian in mihingte tawh hong kizom hiam cih thu koi bangin hong theitelsak hiam?

__________________________________________________________

__________________________________________________________________________

John in mawhneite tungah Pasian’ hong itna a zaizia a ngaihsut ciangin Pasian zahtakna phatna tawh kidim hi. Tua itna pulaak thei ding kammal mu zo lo hi. Tua hi-in leitung mi khempeuh in tua itna a en dingin hong sam hi. En un ka tate aw a hong cih nadingin Pasian’ hong piak itna lamdang hi. Nak manphat lua zen ci mihing! Pasian thupiak palsatin Satan khut sung a tung khinsa hi mah taleng, Khrih hong tatkhiatna hangin Amah i um a, Adam tate in Pasian tate hong suak hi. Mihingin hong nungta-in i nunna hong lamsang hi.” Ellen G. White, 4T., 563.

FRIDAY OCTOBER 28

NGAIHSUTBEH DING: Leitung pilna le thutheihna ultungsak hun sungah “Lungdamna Thu” in mihingte nuntakna ah mun ngah zo lo tektek hi. Vantung thuman thu, upna tawh kisai thu leitung thu bangin ngaihsunin, ciangtan nei lo Pasian in ciangtan nei mihing khat bangin ngaihsun uh hi. Ni, kha, aksi simzawh lohin a om lakah cihtham lo mihing in a telzawh loh thute nawlkhinin, thusim lo hi. Tuate khempeuh lakah a lunghimawh huai pen in mihing mah ahi hi. Leitung pilna, thutheihnate in mun luah khin ahih manin Pasian thu-upna kiam semsem hi. Richard Tarnas, Passion of the Western Mind (New York: Ballantine Books, 1991), 305.

Hih bang ngaihsutna in khialhna bang nei hiam? Ciangtan nei leitung pilna, mihing’ ngaihsutna in a kicingin Pasian’ hong itna a theitel zo taktak ding hiam? Leitung pilna, mihing’ ngaihsutna tawh kingah thei lo Pasian kiang pan thuman i kitangsapzia hong hilh hi lo hiam?

KIKUP DING DOTNATE:

1.     Khristian na hihna tawh kizui-in “ mihing in bang hiam? cih dotna koi bangin dawng ding na hiam? Na dawnna le Pasian a thei lo mite’ muhzia a kilamdang hiam?

2.     Cormac McCarthy in “A si pak ding i hi kei-a a tawntungin a si dingte i hi hi.” ci-in gelh hi. Sihna pen nuntakna tawh tonkhawm, i puak hi phial hi. Sih khit ciangin bang piang ding hiam cih theihtelna in bang hangin i dahna hong hennemin lungmuanna hong pia hiam?

3.     Hamsatna, gim thuakin lamet bei ta phial mah taleng bang hangin nungta nuam veve i hiam?

4.     Singlamteh in mihing khat ii manphatna bang pulaak hiam? 

To get the latest update of me and my works

>> <<