MUC

Print Friendly and PDF

Saturday, September 17, 2016

LESSON 14 | DECEMBER 24 – 30 JOB KIANG PAN SIN DING THUTE SABBATH NITAK









TU KAAL SUNG SIM DING: 2Kor. 5:7; Job 1 – 2: 8; Matt. 4:10; 13: 39; John 8: 1-11; Heb. 11: 10; 4:15.
  
KAMNGAH: “ Tua bangin a thuak mite a hampha mahmah hi, i ci hi. Job in a thuakna-ah a lungduai-na na thei uh a, Topa in a dikna le hehpihna nei ihih manin a tawpna-ah Job tungah a piak thuphate na thei uh hi.” James 5: 11.

Tu quarter sung thusin Job thu a zo ding i hi ta hi. A laibu-in i zawh hangin theih khak loh tampi om hi; sin ding thu tampi om hi; i tel zawh loh tampi om hi. Hih leitung nate zong i tel zawh loh thuthuk tampi omin ni khat khit ni khat a kithei toto zong om hi. Atom a kipan ganhing singkung lopate thei khin zo lo ihih leh bangci bangin Pasian kammal telkhin zo ding i hiam?

I tel loh Topa kammal a om hangin Ama hong hilh thute muanlah ding om lo hi. Kimlepaam nate pianzia lamdangin i tel zawh loh tampi om hi. Mihing ngaihsut theihna in ciangtan nei-a, mihing in kicing lo ahih manin i tel loh a om ding mah ahi hi.” Ellen G. White, Education, 170.

I telzawh loh i tuahkhak thu a om mah bangin Job sunga thupiangte zong mihing batzawhloh tampi om mah hi. Gimna, hamsatnate lak pan mahin Topa muantheihzia ding a hong hilhte i sin ding hi.

SUNDAY   DECEMBER 25
MUHNA TAWH HI LO, UPNA TAWH NUNGTA

2Kor. 5:7; 4:18 sim in. Thuman bang hong hilh hiam? Koi bangin Topa nungzuite in nuntakpih ding i hiam?

_____________________________________________________________________

_____________________________________________________________________

Paul in hun nunung siksanin a genin ah sih nawnloh nunna kamciam hong hilh hi. Tua kamciam upna tawh i nuntakpih hi. Bang hang hiam cihle tua kamciam tangtung nai lo hi. Tua mah bangin Job sunga thute zong a hong tung lai ding tampi om hi. Eite in tua a hong tung nai lo thute lamdangsak ding hi lo hi. Leitung pilna in a pulaak theih loh, a kimu thei lo thu tampi om hi. Thuhilhsia khat biakinn ah thuhilh dingin a pawlpi mite mai-ah ding hi. Mihonpi daitakin a om dingin zasak hi. Tawlkhat sung kuamah paulo hi. Tua leh a khuta a tawi radio lakhia-in radio hong hi. Radio panin awging tuamtuam tampi kiza hi. Tua leh siapa in, “ koi panin hih aw tuamtuamte hong pai hiam? ci-in mipite dong hi. Radio sung panin hong pai hiam? Hi lo hi. Huihlak a om aw paina lampite zui-in hong pai uh ahi hi, ci-in pulaak hi. Ahi zongin tua aw paina lampite kimu thei lo hi. Kilawng thei lo hi. A kimuh theih loh, a kilawn theih loh hangin a om lo hi lo hi. Leitung’hupna, aw pai-na lampi cihte a kipan a kimu thei lo bang om hiam? A kimu thei lo vangliatna nei-te in koi bangin i nunzia hong huzaap thei hiam?

Job sunga kigelh mah bangin Job’ lawm thumte in bang thupiang hangin Job in gimna thuak hiam cih thei lo uh hi. Job’ lawmte in Pasian in na a piangsak Pasian, a vangliatna le Ama zia le tongte thei uh hi. Ahi zongin bang thu hangin Job in gim thuak hiam cih pen theilo uh hi. Tua bang mahin nisim i tuahkhak thute zong i telzawhloh tampi om hi lo hiam? Tua hi-in Job in a hong hilh bang mahin upna tawh nuntak ding thupi mahmah hi. Mihing in a theihna, pilna in kicing lo hi; ciangtan nei i hihlam phawk ding thupi hi.

MONDAY       DECEMBER 26
DAWI GILOTE

Siatna tawh kisia thu i tel zawh loh thuthuk lianpi khat hi. Mipil kim khat in siatna om lo hi, ci uh hi. Thu-um mite in siatna om takpi hi, ci-in i pulaak hi. Bang thu in siatna hi ci-in i pulaak theih loh hangin thu hoih lo khat i tuah khak ciangin siatna hi le hi lo i pulaak thei hi.

Siatna nam nihin kikhen thei hi. Kimlepaam panin a piang siatna le gamtat zia le tong siatna ci-in kikhen hi. Kimlepaam siatna i cih in huihpi, tuikhang, zinling, kialpi, pulnatna cihte huam hi. Gamtat zialetong siatna i cihte in guktatna, buluh, mithahna cihte ahi hi. Leitungah siatna a om lam kuama nial theih hi lo hi. Siatna khempeuh hong kipatkhiatna Satan hi. Tuhun mi tampi in Satan om lo hi, ci uh hi. Tua bang upna in Lai Siangtho nial hi pah hi. Satan pen a om takpi mah hi-in siatna khat khit khat a bawl hi. Job sungah hih thu kimu thei hi.

Job 1: 1 – 2: 8 sim in. Satan bawlin hih zahin leitungah siatna a hong tamzia koi bangin hong theitelsak hiam?

_________________________________________________________________

______________________________________________________________

Satan bawlin Job in gimna lianpi thuak hi. Gamtat siatna, zinling cihte Satan in mite a hong suksiatna in a vanzat khat hi. Ahi zongin siatna kim khat bang hang hiam cih thu i thei kei hi. Job sungah a taktakin Satan cih min kidawk lo hi. Pasian gensia-in Job mawhsakna bek kampau uh hi. Ahi zongin Satan gensia lo uh hi. Bang bang a hi zongin a tawpkhakna ah siatna khempeuh a hong kipatkhiatna Satan ahihna kidawk veve hi.

Hih a nuai-a Lai Siangtho munte in Satan nunzia bang pulaak uh hiam? Mang. 12: 12; Matt. 4:10; 13: 39; Luke 8: 12; 13:16; 22: 3, 31; Sawl. 5:3; 1Pet. 5:8.

___________________________________________________________________

_____________________________________________________

Na nunna ah Satan in kong bangin hong huzaap hiam? Bangci bangin tua panin kidal thei ding na hiam?

TUESDAY         DECEMBER 27
“HIH BANG LAWMTE TAWH ………..”


Job kiangah a lawmte thum va pai masa uh a, tua khitteh a lawm khat hong pai beh hi. A lawmte’ pulaak thute in thusia hi lo hi. Job thuakna a zak uh ciangin a hehnem dingin ama kiangah hong pai uh hi (Job 2:11). Ahi zongin Job tawh tawl khat a kiho khit uhteh hehnemin upna thu ah thapia zaw lo-in thuman zui dingin pulaak hi. Amaute in thuman gen a kisak uh hangin a vekun khial uh hi. A zenzen in a khial lo uh hi leh, Job in mawh ahih manin gimna a thuak ding kilawm hi leh Job’ lawmte thugen in thuman hi ding hi. Job in upna man kisam hiam? Ahih kei leh kisap dang nei hiam?

John 8: 1 -11 sim in. Jesuh in amaute kitangsap thu bang pulaak hiam?

____________________________________________________

_____________________________________________________________________

Hih thu ah suang tawh denlup dingin Jesuh kiang a kipaipih numei le Job’ lawmte in Job a mawhsakzia, hih thu nihte in kilamdanna nei ciat hi. Tua numei nu in siatna, mawhna bawl hi. Amah a mawhsak mite sangin mawh lo zaw kha ding hi. Ahi zongin ama mawhna kipulaak lo hi. A lawmte mawhsak bangin Job mawh lo hi. Jesuh kiangah kipaipih numei nu bangin Job a mawh hi leh, mi khempeuh bang mahin Job in hehpihna, mawhmaisakna kisam hi.

“Ama kiangah a hong kipaipih numei nu mawhna maisakin nuntak hoih a nungta dingin Jesuh in thupia hi. Tua in Ama dikna le sianthona kilangsak hi. Jesuh in mawhna awlmawh lo hi lo-in mi mawhna pulaak lo hi. Amah pen honkhia dingin hong pai hi. Mi khempeuh in tua numei nu mawhna bek mu uh hi. Ahi zongin Jesuh in tua numei kiangah lametna guanin hehnem hi.” Ellen G. White, The Desire of Ages, 462.

Job sunga thute in i tungah hong kibawl ding i deih bangin midangte tungah i bawl ding hong hilh hi. Khialhna khat kithuhilh nading hun le mun telsiam ding kisam hi. Khat ii khialhna i pulaakma-in ei mahmah zong mawhnei i hihlam kiphawkin kiniamkhiatin lungnem ding kisam hi.

Amau khilhna hangin gim thuak hi mah leh, koi bangin gimna thuak mite hehpih ding na hiam?


WEDNESDAY       DECEMBER 28
LING LE KIAK

Nuntak hamsa mahmah hi. Pasian in mawhna om a kipan mawhna hangin gimna Eden huan pan mahin Adam le Eve theisak pah hi (Pian. 3: 16 – 24). Gimna kipatkhiatna mun Eden huan mah hi-in ling le kiak bek om hi leh mihing nunzia tampi kilamdang ding hi. Na kimlepaam na et ciangin gimna, natna, zawnna, gal kido-na, gitlohna, lungkiatna, siatna namcin le thuman lohna vive na mu hiam? Leitung gimna tawh kisai Herodotus in hih bangin pulaak hi: “naungek khat hong suak khiat ciangin kapsa-in hong suakkhia hi. Bang hang hiam cihleh dahna, natna thuak kha hamtang ding cih a theihkholhna uh kilatna hi, ci-in pulaak hi. Hih in thuhoih a hih loh hangin kua in nial zo hiam?

Job sungah mite aa dingin lametna thupha kipulaak hi. Job thuakna in mi khempeuh thuakna limcing hi. A man lo pi gimna i thuak zongin mawhna tawh kuamah kipelh thei lo hi. Job in thuman lo-in gimthuak a, eite’n zong thuman lo-in gimna i thuak zel hi.Tua hi mah taleh Job hong gen thu in Pasian in ei aa dingin om tawntung hi. Pasian in a theih loh om lo hi. Na khempeuh a mawkna i lo ding hi, ci-in Pasian in kamciam hong pia hi.

Leitung laigelh minthang tampi in nuntakna in khiatna nei lo a tawntungin mangthang ding hi, ci-in pulaak uh hi. Nuntakna in bang khiatna nei hiam? Bang manphatna nei hiam ci-in kankhia uh a, mu zo lo uh hi. Bang hang hiam cihleh nunna bek in manneihna hi.

Hih leitung na khempeuh le nunna in a bat zawh loh manneihna om hi. I nuntakna, i lau-na a kipan na khempeuh in a vanglian Pasian khat om hi, ci-in hong hilh hi. Sih theihna hih leitung le leitung nate a bei khit ciangin vangliatna tawh kidim nunna om hi, ci-in Job in hong hilh hi. Job in Pasian hong lak hi. Ama kiang pan lametna hong hong neisak hi. I tuahkhak thute in thu om lo-a thuak i hi kei hi. Pasian in a piang thu khempeuh thei khin hi. Ni khat ni ciang na khempeuh hoihna tawh kidim ding hi, ci-in kamciam hong kipia hi. Pumpi leivui a suak kik zongin lametna tawh kidim nuntakna nei i hi hi. I lamet nate in leitungah i ngah pah ding lametna ahih loh hangin nuntakna in mannei-in khiatna nei hi (Pian. 3:19; Job 2:8).

Heb. 11: 10; Mang. 21: 2 sim in. Leitung in a hong piak theih loh lametna bang hong hilh hiam?

THURSDAY        DECEMBER 29
JESUH LE JOB

Lai Siangtho thuthuk theite in Jesuh thu le Job thu enkak thei uh hi. Job in Jesuh a limcing kholh ahih loh hangin a nunzia kibatna nei hi. Job sung a thu in eite a hong kihotkhiat nadingin Topa in bang pia khia hiam?

Job 1: 1 le 1John 2: 1 enkak in. James 5:6 le Sawl. 3: 14 enkak in. A kibang thu bang na om hiam?

___________________________________________________________

__________________________________________________________________

Matt. 4: 1 -11 sim in. Jesuh le Job in bang kibatpih nei uh hiam?

_________________________________________________________

___________________________________________________________________

Matt. 26: 61 le Luke 11: 15, 16, John 18: 30 sim in. Koi bangin Job thuakzia tawh kibang hiam?

_____________________________________________________________

__________________________________________________________________

Job 1: 22 le Heb. 4: 15 sim in. A kibang thu pulaak in.

____________________________________________________________

__________________________________________________________________

A tunga Lai Siangtho munte in Job le Jesuh tuahkhak thute kibatna honkhat pulaak hi. Ahi zongin Jesuh bangin Job in mawh nei lo hi lo hi. Job in Topa tungah citakin thuman mi khat hi. Ama nunzia in Pasian min thangsak hi. Satan in Jesuh a ze-et mah bangin Job zong ze-et hi. Mihonpi in a man lo pi-in Jesuh a mawhsak mah bangin Job zong a lawmte in mawhsak hi. Bang bangin kimawhsak taleh Job in Topa tungah citak veve hi. Eite aa dingin Jesuh in citak hi. Bang bang ze-etna a thuak hangin Jesuh in mawhna bawl lo hi. A nunzia in Pasian’ zia le tong kilangsak hi. Pasian’ lim le mel in kicing takin Jesuh tungah kimu thei hi. Mihing a hong kihot khiat nading dikna Jesuh bek mahin nei hi (Heb. 1:3).

Mi khempeuh in upna tawh Jesuh Khrih i san takteh Pasian dikna le thuman i ngah hi. Khrih hotkhiatna sungah kideidanna om lo hi. Mi khempeuh kibang kim khin hi (Rom. 3: 22).

Bang zahin Job thuakna in lian mah taleh ama thumanna le citakna in Jesuh, Honpa nunzia tawmno khat pulaak hi. Khrih hong paiteh Ama zia le tong kicing hong kilang ding hi (Job 19: 25).

FRIDAY    DECEMBER 30
NGAIHSUTBEH DING: 

Job in Islam hi taleh Khristian biakna in a kin mahmah leh thupi takin a ngaihsut thu khat hi. Job sunga thu kim khat mihing in tel zo lo hi. Ahi zongin lamdangsak ding hi lo hi. Lai Siangtho sungah zong i telzawh loh thu tampi om hi. Tatkhiatte in khawl hun om lo a tawntungin hotkhiatna le Topa hong itna suutsuut ding uh hi (The Great Controvery, 678). Tua hi-in Topa makaihna tawh kigelh Lai Siangtho hi mah taleh i telzawh loh thu khempeuh hong hilh thei lo hi (2Tim. 3:16).
Job in a vanglian mahmah, mi khempeuh aa ding thu hong hilh hi. Tua thupuak in “ze-et hamsatna om taleh cihtak thumanna’ hong hilh hi. Job in Jesuh hong hilh bangin nungta hi “ A bei dongin a thuak zote in hotkhiatna ngah ding uh hi” (Matt. 24: 13). Khrih sungah a nungta mi in na hoih sem ding hanciam taleh siatna tawh kipelh thei lo hi lo hiam? Hehpihna, thapiakna kisam mah taleh gensiat, mawhsakna thuak hi lo hiam? Hih bang thute thuak taleh Job in Topa tungah citak veve hi lo hiam? Job aa dingin a hong si Khrih um, a muangte khempeuh tungah “ huh kisam mi huh dingin a hong kisawl ciat hi ( Luke 10: 37).

KIKUP DING DOTNATE:

1.  Jesuh ma-a a nungta Jew mi khat dingin nang le nang kingaihsun in. Tua mi in tuhun a mite’ neihloh thu bang pulaak khia dingin na um hiam? Jesuh nunzia, a nasep in Job hong theitelsak zaw ding hi lo hiam?

2. Job tawh na kimuh hunteh ama kiangah bang na dong masa penpen diam? Bang hangin dong ding na hiam?

3. Tu quarter sunga Job thu i sin khak loh bang thu na phawk kha hiam?

4. Job tung panin bang thulaigil na mu hiam?


To get the latest update of me and my works

>> <<