MUC

Print Friendly and PDF

Saturday, September 17, 2016

LESSON 13 (DECEMBER 17 – 23) | JOB A ZIA LE TONG



SABBATH NITAK


TU KAAL SUNG SIM DING: Job 1: 1,8; 29:8 -17; 31: 1-23; Pai. 20:17; Matt. 7:22 -23; 5: 16; Eph. 3:10.

KAMNGAH: “Tua ahih manin upna le sepna kizom khawm a, sepna in upna a kicinsakna thu na thei uh hi.”James 2:22.

Job sunga kigelh thu manpha tampi banah Job nunzia mahmah zong thupi hi. Pasian in a muan mahmah, Pasian tungah a citak, a upna khahsuak lo Job in kua hiam? A thuak gimnate bang hangin thuak cih thei lo-in, a thuak gimnate hangin a hehna, a thangpaihna a pulaak Job in a bangci mi hiam?

Job sunga thute in a gim thuak khit a thupiang vive hi zaw hi. Ama nunzia en lehang Topa tungah a citak mi, gimna bangbang thuak taleh, Pasian kiang pan taikhia dingin Satan in zolzol taleh bang hangin a upna a khahlo mi hi,cih kimu thei hi.


Job in bang tawh kibang hiam? Koi bangin Job nunzia in Topa tungah citak nunzia ding hong hilh hiam?

SUNDAY        DECEMBER 18
UZ PAN HONG PAI MIPA


Job 1:1, 8 sim in. Job ii zia le tong bang pulaak hiam?

_____________________________________________________________

_____________________________________________________________

Job in a thuak gimnate bang hangin thuak cih a lawmte’gen a zak loh om lo a, ahi zongin a zak thute tawh kilehbulh thuman kimu hi. Ama cihtakna, hoihna hangin Satan in Job gimpia hi. Job in bang zahin thumanin citak hiam? Job pen paubaang lo mi khat hi. Paubaang lo cih hangin mawhna nei lo cihna hi lo hi. Pasian mai-ah a paubaang lo mi in upna thu ah a khangto mi, Pasian lamet bangin a nungta mi ahi hi. Hebrew kammal in ‘tam’ kizang a, Greek kammalin ‘teleios’ kizang hi. A khiatna in ‘kicing’ ‘khangcing’ ‘picing’ cihna hi (The SDA Bible Commentary, vol., 3., 499). Job in thuman, citak mah hi taleh a nunung lamah picing zo taktak lo hi. Picingin khangto to hi.

Nihna ah Job in thuman hi. “Thuman’ cih a khiatna in ‘thutang,’ ‘thuman,’ ‘khial lo’ cihte pulaak hi. Job in gammi hoih mahmah khat ahi hi. Thumna-ah Job in Pasian kihta hi. Pasian kihta cih kammal in Thuciam Lui ah Israel mite nunzia ding ahih mah bangin Thuciam Thak ah zong Gentile mite nunzia ding zong ahi hi (Sawl. 10: 2, 22).

Job in siatna namcin pelh hi. Topa in zong tua mah bangin ciamteh hi. Topa in Satan kiangah “Ka nasem Job na phawkkha hiam? A paubaang lo, a thutang, Pasian zahtakin gamtat hoih lo a peel amah tawh a kibang midang leitungah na mu kei ding hi,” a ci hi (Job 1: 8). A tawpna ah Job in Pasian a up, Pasian mi taktak ahihlam a nunzia panin kimu hi. Tua ahih manin a nunzia in Khrih sungah a nungta mi ii nunzia ding hi-in , ama nunzia in vantungmite le leitung mi khempeuh tungah teci ahi hi (1Kor. 4:9).

Job dinmunah nangma thu kigelh ding hi leh koi bangin kigelh ding hiam? _____ gamah ______ kici min nei mi khat a om hi. Tua mipa a paubaang lo, a thutang, Pasian ____________ mi khat hi a, amah in ________________ peuhmah peel hi.

MONDAY     DECEMBER 19
GANHINGNAWI TAWH KISIL

Job in a thuak gimna khempeuh ngaihsunin nidangin bangzahin nuamtakin a nunzia hih bangin pulaak hi: “ka bawngtal le ka keelte in nawi deih zahzah hong pia uh a, suang tam penna nangawngah ka oliv kungte hoih mahmah hi, ci-in pulaak hi (Job 29:6). Mundang khat ah “ Ka nuntakna nidanga bang hi kik hen la, Pasian in kei hong et hun lai bang hong hi kik leh ka ut hi” ci hi (Job 29:2). Hebrew kammal ah “Pasian in kei hong en hi” cih kammal a khiatna in Pasian in a mite a kepzia pulaak kammal hi.

( Late 91:11; Gam. 6:24). Job in nuntak hoihin nungta hi. Amah mah in zong nuntak hoih a neihlam kitel hi.

Job 29: 8 -27 sim in. Midangte in Job a muhzia a kipan koi bangin a gim mite a huhzia pulaak hiam?

____________________________________________________________________

_____________________________________________________________________

Job in mite zahtak mahmah mi khat hi. Job in khuasung upate a kikhop uh ciangin mite zahtak khatin om hi cih thu in gamsung makai khat ahihna kimu thei hi. Tua bang munte ah mi thupite, mite zahtak makaite bek tu uh hi. Job zong khuasung upa makai khat hi. Milian khat ahih hangin mi nunniamte in itin, zahtak uh hi. Cimawh gentheite, mittaw-te, meigong tagahte, khebaite le amah bangin a cithei lo mite huhin, amaute panpih hi. Topa Pasian in a thupha piak a ngah, a sepna peuh ah a daupai mi nuamsa khat ii nunzia hong lak hi. Tua bang mi in pahtawi-na ngah ding kilawm hi.” Ellen G. White, Education, 142.
  
Hih thute in Job a cihtheihna a hang hong hilh hi. Mite mai le Pasian mai-ah maipha ngah hi. Milian, upa makaite, mi minthangte zahtak ding mah hi. Ahi zongin bang mah neilo-te tawh koi bangin kizopna nei thei ding i hiam?

TUESDAY      DECEMBER 20
MITTE LE LUNGTANG

Job in ama gamtat hoihna, sianthona, diknate mite mai-ah kisialhpih tawh kibang hi. Lai Siangtho in tua bang lungsim, gamtatna deihlo hi (Matt. 23). Ahi zongin Job in tua bang lungsim nei lo hi. Job in bang siksanin thugen a, bang hangin tua bangin thu gen hiam ci-in ngaihsut kul hi. Mite ngaihsutna ah Job in siatna tawh kidim ahih manin gim thuak hi. Ahi zongin amau gendanin Job in siatna bawl lo hi. A thuak gimnate a thuak dingin kilawm lo hi. Tua thu hangin Job in a beisa a nunziate ngaihsun kik hi.

Job 31: 1-23 sim in. Job in gimna a thuakma a nunzia bang pulaak hiam?

___________________________________________________________________

___________________________________________________________________

Job in a gamtatzia le a lungsim ngaihsutnate in a siangthozia pulaak hi. “Ka lungtang in ka mit zui leh” (Job 31:7) ci-in pulaak a, siangthona in gamtatna bek hi lo-in a kimu thei lo i ngaihsutna, lungsim puakziate zong a siantho ding hi, ci-in hong hilh hi. Pasian in gamtat zia le tong banah lungsim, ngaihsutna a sittel Pasian hi. ( 1Sam. 16:7; Pai. 20:17; Matt. 5:28). Job in pumpi tawh va mawh loh hangin lungsim tawh mawhna zong mawhna hi, ci-in pulaak hi. Pasian in a thuciampih Israel minamte a pianma pekin a man Pasian theihtelna om khin ahihzia kimu thei hi.

Job 31: 13 -15 sim in. Bang hangin thupi mahmah hiam?

____________________________________________________

_____________________________________________________________________

Job in mihing khempeuh Pasian’ muhna-ah kikim ihihna limtakin pulaak hi. Tuhun mah bangin ama hun lai-in mihing kikimna kigen nai lo hi napi, tua bangin Job in mihing kikimna pulaak theih pen lamdang mahmah hi. Mi kimkhat in midangte sangin a mihing hihna uh a lian zaw-in kipulaakin, midangte neumuhin, amau ngah ding hamphatnate nial uh hi. Ahi zongin Job in mihing khat ii manphatna, a ngah ding hamphatnate Pasian kiang panin hong pai hi, ci-in pulaak hi.Job in ama hun lai-a mite’ ngaihsut khakloh thute pulaak hi. Ama hun lai sangin kum tampi a madawk khol mi khat ahihlam kimu thei hi.

WEDNESDAY            DECEBER 21
SUANG TUNGA INN

Job 31: 24 -34 sim in. Job’ thu bang hong hilh hiam?

____________________________________________________

________________________________________________________________


Topa in Job tungah a bawl khempeuh pulaak hi. Job in a up thu nuntakpih hi. Pasian tawh kizopna kip a nei mi ahihna kilang hi. Tua thute hangin a lawm thumte in Job langpan mahmah uh hi. Job in Topa’ thu mang, citak hi. Tuate sangin a hong hilh thuthuk lianpi om hi. A beisa-in Job a nunzia in a tuahkhak gimnate koi bangin kizom hi, cih thu ngaihsun in. A zi sawl bangin Job in Pasian samsia-in a si ziau ding hi lo hi (Job 2:9). Job in Topa tungah cihtakin, Topa a muan manin a piang na khempeuh tuak zo hi.

Matt. 7:22 – 27 sim in. Job in Topa tungah a thumanzia bang kimu thei hiam?

____________________________________________________

__________________________________________________________________

Job in nisimin ze-etna neu tuamtuamte a zawhtohtoh manin in a lian mahmah ze-etna, gimnate nawktan zo hi (Luke 16:10). Thuman thutak ah citakin a up thuman pan lampial lo dingin khensat ahih manin Job in Topa’ deih bangin nungta hi. James in a pulaak upna tawh a nungta mi nunzia Job nuntakna ah kimu thei hi. “Upna le sepna kizom khawm a, sepna in upna a kicinsakna thu na thei uh hi” (James 2:22). Hih thu in Khrih a um mite’ nunzia ding hong hilh hi. Job sungah hih thulaigil kimu thei hi. Job in eite bang mahin cilesa tawh nungta mah taleh Topa tungah citakin Ama’ hehpihna in Topa’ deih bangin nungtasak hi.

Job bang mahin Topa tungah citak thumanin a nungta dingin khensat ding bang na nei hiam?

THURSDAY        DECEMBER 22 
A KICING PASIAN’ PILNA

Eliphaz le Temanite in “Na gamtatna in Pasian’phattuamna ding bangmah piangsak lo a, na hoihna in Pasian hoihsak tuan lo hi” ci-in Job zahpih uh hi. Vantung a Kidona Lianpi siksan lehang hih kiho na in a mawkna hi. Job in thumanin nungta-a, paubaanna neilo-in a nuntakna in Topa lungkimna ahi hi. Job bangin thuzui mi khempeuh a nungta dingin Topa Pasian in hong deih hi.

Matt. 5: 16 sim in. Eliphaz in Job a dot thute koi banin hong theitelsak hiam?

____________________________________________________

__________________________________________________________________

Job in Topa tungah a citak zo diam? Satan in Job pen citak zo lo ding hi, ci-in pulaak hi. Topa Pasian in ahihleh citak ding hi,ci-in pulaak hi. Job’citakna in Satan tungah Topa Pasian zawhna kilangsak hi. Hih thu in thuneu tawh a kibat hangin na khempeuh huamkha hi. A vantungmi masa in “ Pasian vangliansak un”ci-in thu pia hi (Mang. 14:7). Jesuh in “Note gamtatna hoih in Pasian min thangsak hi” ci-in pulaak hi (Matt. 5:16). Job gamtat in Pasian min thangsak hi. Eite zong a tuaci dingin hong deih hi.

Eph.3:10 sim in. Bang thulaigil kipulaakin koi bangin Job sungah kimu thei hiam?

______________________________________________________________
____________________________________________________

Topa Pasian’ min thanna ding le Ama limlemel suun dingin Topa a zui mi khempeuh nunzia a khel dingin Pasian in a tawntungin nasemin hong puahpha hi. Mihing in amah a piangsak Topa Pasian lim le mel a neih ding kisam hi. Amah nung a zui mite nunna in Pasian vangliatna, Pasian hoihna kilangsak ding uh hi. Ellen G.White, The Desire of Ages, 671.

Kum tul tampi a sawt khit hangin Job’ nunzia in Topa thu-um mite’ nunzia ding hong hilh hi. Tua bang nuntakna in hamphatna ahi hi.
  
Na nunna ah bang in Pasian a thangsak hiam? Na dawnna in na nunzia bang pulaak a, koi bangin nungta ding? Na kikhel ding bang om hiam?

FRIDAY       DECEMBER 23
NGAIHSUTBEH DING: Protestant khempeuh in upna tawh hotkhiatna kingah hi, cih thu lenkip hi. Hih upna in Eden huan panin hong kipan upna hi (Pian. 3:15), Abraham in a gamtatna tawh pulaak hi (Pian.15:6;Rom. 4:3) Paul in zong hih thu hilh kawikawi hi. Upna tawh hotkhiatna kingah hi, cih thu ah Kha Siangtho nasep kihel hi. Kha

Siangtho in i sungah na a sep ciangin a kimu thei gah gahkhia hi. Tua in hotna ngah nading hi lo-in, a ngah khin hihna pulaak zaw hi. Job nunzia in Kha Siangtho tawh kidim nunzia hong hilh hi. Hih pen Khrih hehpihna sungah khantohna, a hih kei leh siantho-na kici hi. Thu-um mi khempeuh a siangtho ding ahi hi.Tua siantho-na om lo-in Pasian mai kuamah in mu lo ding hi (Heb. 12:14). Siangthona cih ciangin Pasian aa dingin tuamkoih, cihna hi. Pasian in Israel mite tawh thuciam a bawlna ah Pasian in amaute kiangah “note na siangtho un. Bang hang hiam cihleh keimah

Topa na Pasian uh ka siangtho hi,”ci-in kipulaak hi (Siam. 19:2). Thuciam

Lui le Thuciam Thak ah kammal tuamtuam tawh sianthona a kipulaak hangin a vekin Topa Pasian in thu-um mite sung panin a hong sepkhiat thu hi, ci-in kimu thei hi. Siantho-na pen gamtat zia le tong khantohna panin hong piangkhia hi. “ Sianthona i cih in mihing in kipuahpha ding a khensat ciangin Kha Siangtho in tua khensatna tawh kopin a picing nuntakna lamah hong puahpha toto hi.” Handbook of SDA Theology, 296.

Pasian in na a hong sep ciang bekin tua sianthona a piang thei hi bel h. Ahi zongin Pasian in thatang zangin a siang dingin hong sawl lo hi. Diktan ngahna zong thatang tawh hong sawl lo hi. Ei le ei Topa tungah kipia-in, Topa in hong siangthosakin tua sianthona upna tawh i ngah hi. Upna mah tawh dikna i ngah a, Job bang mahin Pa Pasian limlemel a suun dingin hong puahpha hi. “Note sungah Khrih lim a kilat matenga nausuahna thuak banga kong thuak kik kong it tate aw,” ci-in hong hilh hi (Gal. 4:19). “Khrih in eite etteh ding hi. A kicing, a siangtho etteh takcing ahih manin Ama nung a zui ding i hi hi. Ama kicin bangin i kicing zo kei ding hi. Ahi zongin thu-um mi in ama hih theihna ciangciang tawh kituakin Ama suun dingin hong kipiangsak hi.

KIKUP DING DOTNATE:

1. Topa in a hong bawlphatna dingin bang deihtelna nei na hiam?

2. Pa Pasian bek in mihing lungsim khel thei hi. Ahi zongin a hong khel ding mihing in a phal kul hi. Amah tawh nasep ding koi bang hi ding hiam? Koi bangin kimu thei hiam?

3. Kol. 2:6 sim in. Topa na up bang mahun Ama sungah nungta un” ci-in Paul in hong hilh hi (Kol. 2:6). Koi bangin Paul kammal in upna le thumangin nuntakzia hong theitelsak hiam?

4. Koi bangin mimal le pawlpi in mite le vantungmite mai-ah Topa
Pasian min thangsak hiam? 


To get the latest update of me and my works

>> <<