MUC

Print Friendly and PDF

Saturday, September 17, 2016

LESSON 11 DECEMBER 3 -9 GIMNA HUIHPI SUNG PAN


SABBATH NITAK


TU KAAL SUNG SIM DING: Job 38 -39; 40: 1-4; 42: 1-6; John 1:29;

Matt. 16: 13; 1Kor. 1:18 -27; Luke 5: 1-8.


KAMNGAH: “Leitung ka bawl laitakin nang om na hiam? Thei kisa na hih leh tua thu hong gen in. Job 38:4.

Job le a lawmte kikal ah kilamdanna tuamtuam om mah taleh a kibang khat om a Pasian a theihzia uh pulaak ciat uh hi. Tua thute lakpan

“ahi zongin gamsate va dong un, hong hilh ding uh hi. Vasate va dong un, hong hilh ding uh hi. Leitung ganhingte va dong un, hong hilh ding uh hi. Tui sung ngasate zong va dong un, hong hilh ding uh hi. Pasian’khut in amaute a bawlna thu a vekpi-un thei kim uh hi lo ahi hiam?A piansaksate’ nuntakna Pasian mah in a uk ahi hi.Mihing khempeuhte’nuntakna ama khut sungah om hi.” Job 12: 7 -10. “Pasian in thutang a zanglo sa na hiam? Vanlianpa in thuman a zanglo sa na hiam? Job 8: 3.

Job lawmte in ama thuakna a pulaakna uah a kisiksan bel uh thu in Pasian hi. Job 1-2 sung simloh a kihona uah Pasian pulaak lo uh hi.


Ahi zongin a taktakin Pasian mahmah thu a pulaak uh hi-in, tua Pasian mahmah in Ama thu teltakin kilangsak hi.

SUNDAY DECEMBER 4

HUIHPI LAKPAN

Job 38:1 sim in. A kiho ngeinate bang lo-in a tuam thu bang kipulaak hiam?

____________________________________________________

___________________________________________________________

Ahi zongin Topa Pasian in “en in na khut sungah Job kong pia hi. Ahi zongin a nuntakna su kei in,” ci-in Satan kiangah gen hi (Job 2:6). Job 37ah Elihu thugen nunung pen hi-in tua khitteh “huihpi lakah Topa in Job tungah thu hong gen hi (Job 38:1). Job le Pasian kikal thu hi-in, tua lo a lawmte gen thute in khiatna nei lo hi. Huihpi cih kammal in Pasian in a mite tungah a hong kilat sialin a kizang mun mahmah kammal khat hi (Isa. 29:6; Zech. 9:14). Elijah in vantungah laktohna a ngahin zong huihpi tungtawnin laktohna ngah hi: Topa in pingpei-in vantungah Elijah a lak ding lai-in Elijah le Elisha in Gilgal panin inn zuanin lamkal a om hi uh hi (2Kum.2:1). Koi bangin Pasian in mihingte tungah kilangkhia cih a kicingin i thei kei zongin Pasian in aw nem neu tawh Job hopih lo hi. (1Kum.19: 12). Aw nem sangin a vanglian mahmah Job lungsim a khanglosak ding aw tawh hopih hi. Pasian in mihingte hopih hih mun bek hi lo hi. Pasian in mihingte hong hopih tawntung hi.

Pian.15: 1; 32: 24 -32; John 1:29 sim in. Hihte in koi bangin Pasian in mihing tawh hong omkhawm hiam?

_______________________________________________________

_____________________________________________________________

Pasian in mihingte tawh kigamla-in a om Pasian hi lo hi. Na khempeuh a Piangsak Pasian in hong nusia lo hi. Eite tawh hong omkhawm Pasian hi. Dahna, gimna, bang bang i tuak khaphial zongin Pasian in i kiangah hong omin, amah bek mah i muan ding kisam hi.

Pasian in kei tawh hong om hi, ci-in a thu-in theihna le Pasian in ei tawh hong om takpi hi,ci-in i nuntakna tawh i phutkhak kibang lo hi. Koi bangin Pasian tawh kinai zaw thei ding na hiam? Koi bangin Amah tawh na kizopna panin lungnop khamuanna le lametna na ngah hiam?


MONDAY DECEMBER 5

PASIAN DOTNA

Pasian in Job a hopih loh tawlkhat khit ciangin Pasian in hopihkik hi. Pasian gen thute Job ngaihsutna tawh kituak kha lo-in za nuam khollo hi.

Pasian in Job tungah bang thu dong masa pen hiam? Bang deihna nei hiam? Job 38:2.

___________________________________________________________________

___________________________________________________________________

Lai Siangtho sung en lehang Pasian in mihingte thu dotna mun tampi ah kimu thei hi. A theih loh manin tua bangin a dong hi lo hi. Pasian in tua bangin thu a dot ciangin mihing in a nunzia kiphawkin kisittel a, a kipuahphat ding deihna ahi hi. Topa in a theihloh manin hong dong hi lo zaw-in a hong dot mihing in thuman thutak thei-in Amah theihtelna i neih nadingin thudong hi zaw hi. Thuman i muh nading ahi hi.

A nuai-a Lai Siangtho munte sim inla, bang hangin Pasian in bang deihna tawh thu dong hi ding hiam? Bang thu kipulaak hiam?

Pian. 3:11 ___________________________________________

Pian. 4:9 ___________________________________________

1Kum. 19:9 __________________________________________

Sawl. 9:4_____________________________________________

Matt. 16:13 __________________________________________

Job in Pasian tawh kisai a pulaak ding hau mahmah ding hi. Tua hi mah taleh amah a Piangsakpa thu a telloh tampi om hi. Pasian in Job a dot thute le Job lawmte in Job a dot thute a kibang om hi. (Job 8: 1,2; 11: 1-3; 15: 1-3).

Topa Pasian in tu laitak na nunzia tawh kisai thu hong dong leh bang thu hong dongin na um hiam? Koi bangin tua dotnate na dawng diam? Tua thute in na nunzia bang pulaak hiam?

TUESDAY DECEMBER 6

TOPA IN PIANGSAKPA

Job 38: 4 -41 sim in. Pasian in Job bang dong hiam? Tua dotna in bang ngimna nei hiam?

________________________________________________________________

_________________________________________________________________

Job in a thuak gimnate bang hangin thuak cih a theihnop hangin thei zo lo hi. Pasian vangliatna a telzawhloh tampi om hi. Pasian in “Leitung ka bawl laitakin nang om na hiam, ci-in Job dong hi (Job 38: 21). Topa in Job kiangah a lamdang a bawlsa nate khat khit khat, aksi, khuahun omzia a thute dong hi: “Vana om Seguk henkop thei a, Zawlzawng a kikhihna phel thei na hi hiam?Ama hun hunin aksite lam lak thei a, Khawlei-uikai a pai nading lampi lak thei na hi hiam? (Job 38: 31,32). Vana om nate a pulaak khitteh leitang a om nate, (Job 38: 36) gamlak gamsate (Job 38: 39 -41). Job 39 ah a kicingin pulaak hi. Tuhunin Job kigelh ding hileh “proton, neutron, Planck gikna ka bawl lai, leitung hupna ka koih lai-in koi ah om na hiam,” ci-in dong kha ngel ding hi. Hih thute tawh kisai kikhel lo hi. Hih nate a kipiansakin Job piang nai lo hi. Job in hih piansak nate omzia thei lo hi. Pasian in Job bang hilh hiam cihleh Job in thuman, pilna nei hi mah taleh ama theihna in Pasian theihna tawh tehkakna dingin cihtham lo hi;ama theihna in ciangtan nei, kicing lo hi, cih hilh hi (Job 42: 7).Piansak nate thu a telzawhlohzia in Job theihna in ciangtan nei hi, cih kilangsak hi.

Piansak nate thu thei khin lo ihih le Piangsak Pa thu i theihna in kicing lo, ciangtan nei hi lo hiam? Piangsak Pa le piansak mihing kilamdang mahmah hi. Bang thute ah Pasian le mihing in kilamdang hiam? Koi bangin kilamdanna nei hi mah taleng eite a hong hotkhiatna ding le Amah tawh a tawntungin a nungta khawm dingin lametna hong guan hiam?

WEDNESDAY  DECEMBER 7

A PIL MIPA KIANG PAN PILNA

Tuhunin Pasian in Job a dot thute ngaihsun lehang a beisa kum tampi hun lai-in theihna kicing lo hi taleh Job in Pasian bawlsa nate thu a theihtelzia lamdang mahmah hi. Bang hang hiam cihleh ni, kha le aksi, leitung cihte in amau omna muntek pan kipei diamdiam uh ahih manin sun le zan, phalbi, khuakhal cihte hong om hi, ci-in leitung mipilte in a theih hun uh AD 1500 kim hi pan bek hi. Tuhun leitung pilna in kimlepaam nate thu pulaak uh hi. Lai Siangtho hun lai-a mite in tua bang thute thei kha lo uh hi. Tua hi taleh mihing in kimlepaam nate thu thei khin lo hi. Mihing theihna, pilna in ciangtan nei hi.

Job 38 ,39 sunga Pasian in Job a dot thute ngaihsun in. Tuhun mihing in bangci bangin tua thute theihtel hiam?

__________________________________________________________________

__________________________________________________________________

Hun khat lai-a a kithei lo thute tu-in a kithei tampi om hi. Theihna tam mihing in a theih zawhloh tampi mah om hi. Leitung pilna in Pasian a phawk khak loh hangin nidangin a kithei ngei nai lo nate’ thu tu-in tampi hong lakkhia hi. “Topa i Pasian in hong lahkhiat loh thusim om a, ahih hangin hih thukham sunga om thute khempeuh i zuih theih nadingin hong lakkhia a, eite le i suan i khakte’ zuih tawntung ding ahi hi (Thkna.

29:29). Pasian in bangci bangin nate bawl cih mihingte tungah pulaak lo hi; mihing in zong Vanglian Sangpen Pa’ thute telzo lo hi. Pasian vangliatna, Ama nunzia telzawh ding hi lo hi.Ellen G. White, Patriach and Prophets, 113.

1Kor. 3:19; 1: 18 -27 cihte in mihing thutheihna in ciangtan nei ahih manin i nuntakna dingin bang thute hong hilhkhol hiam?

________________________________________________________________

_________________________________________________________________

  
Mihing in piansak nate thu tampi pulaak khia mah taleh i telzawhloh tampi om veve hi. Kimlepaam nate thu theihna kibehlap den mah taleh lamdang semsemin i telzawhloh thu tam tektek hi. Koi bangin piansak nate in Pasian’vangliatna hong musak hiam?

THURSDAY DECEMBER 8

KISIKIN VUT LE VAI TAWH KIDIM

Job 40: 1 -4; 42: 1 -6 sim in. Koi bangin Pasian a hong kilatna thute dawng kik hiam?

________________________________________________________________

_________________________________________________________________

Job in Pasian lahkhiat thute lamdangsa mahmah hi. “Kei bangmah a thei lo kimlai, bang hangin ka pilna hong dem ngam na hi hiam? na hong ci hi. Keimah in ka tel zawh loh thute, kei a’dingin a lamdanglua thu a gengen ka hi hi,” ci-in pulaak hi (Job 42:3). Job in Pasian’dot thute tel lo lua ahih manin a theihloh thute mah a pulaak ahi hi.

Job 42:5 ah a pulaak thu ngaihsun in. Nidangin a thu-in a za hi bek a, tu-in ahih leh ama mit mahmah tawh mu hi; nidang sangin Pasian theitel zaw ta hi. Job in a mihing hihna kitel zaw semsem hi. Tua hangin amah le amah kihhuai kisa-in, a khialhna kisikin vui le vai tawh kidim hi.

Isa. 6: 1-5; Lk. 5: 1-8 sim in. Job tawh bang kibatpih om hiam?

____________________________________________________

______________________________________________________________

Lai Siangtho in a hong hilh thu lianpi khat ahi mihing in mawhnei mi ahihna hong phawksak hi. Job in paubaanna nei lo thuman mi khat hi-in Pasian kihta a hih manin siatna pelh hi (Job 1:1). Job in Pasian langpang dingin Satan in sawlsawl ta leh Job in Topa Pasian tungah a citakna khahsuah lo hi. Job in Pasian muangkip hi.

Isaiah le Peter mah bangun Pasian vangliatna le a sianthona in Job in mawhnei mi ahihlam kitel hi. Mawhnei mi i hih manin i nuntak khempeuh in Pasian langdo hi. Tua hi-in amah le amah a kihon thei zo ding kuamah om lo hi. Job bang mahin paubaanna nei lo midik, siatna pel mah taleh Pasian’hehpihna, Honpa kisam hi. Tua hi-in i kitangsap khempeuh Jesuh Khrih ah i nei khin hi.

Tu-in Pasian mai-ah maitang kilaak dingin kingaihsun in. Koi bangin na om diam?


FRIDAY DECEMBER 9

NGAIHSUTBEH DING: Pasian in leitung pilna tuamtuamte tungtawnin a thuman thute pulaak napi leitung mipilte in amau pilna bek uh siksan ahih manun thuman lampi pan lamphial uh hi. Lai Siangtho in a hong hilh loh thute mihing in ama ngaihsutna tawh thumanin a ngaihsun phial zongin, Pasian kammal siksan lo mihing pilna in Piangsak Pasian langpan hi. A pil, thuthei khat in Pasian a kimakaihsak kei a leh tua pilna theihna in Pasian tawh kituak ngei lo hi. Pilna, theihna in Pasian tawh a tonkhawm ding ahi hi. Bang hang hiam cihleh Piangsak Pasian le a bawlsa nate in mihing telzawh dingin vanglian mahmah ahih manin mihing’pilna in tua thuthukte thei zo lo hi. Lai Siangtho a muang zolo mite in Pasian om takpi hi, ci-in muangzo taktak lo hi. A muanhuai pen a muang lo mite in Pasian tungah a citak lo hi pah hi.” Ellen G.White,Patriachs and Prophets, 113.

KIKUP DING DOTNATE:

1.      Friday ni-a Ellen G. White gen thute ngaihsun in. Leitung pilna tawh kisai-in Ellen G. White in bang hong hilh khol hiam? Tu-in zong leitung pilna in Lai Siangtho a langpanna tuamtuamte na mu thei hiam?

2.      Alfred North Whitehead in tu-ma kum zakhat lai-in hih bangin pulaak hi: “tu-ma kum 57 hun lai University of Cambridge ah sang ka kah lai-in laihilhsia hoih mahmahte in mathematics le science hong hilh uh hi. Hih siate in bang hongci uh hiam cihleh hun khat lai-in upmawh thute tu-in a taktak hong suak hi,ci-in pulaak hi. Mihing pilna in Lai Siangtho tawh a kituah kei leh kidop ding kisam hi lo hiam?

Job in piansak nate thu a theihkhak loh hangin tu hun leitung pilna in a pulaak khiat a lamdang mahmah thu a pulaak khiat thute na phawk kha hiam? Koi bangin Topa vangliatna pulaak uh hiam

To get the latest update of me and my works

>> <<