MUC

Print Friendly and PDF

Saturday, September 10, 2016

KHENPI 9 NIPI KAAL KHAT

TUANPU PA LEH KAMSANG TE THU

KHENPI 9
NIPI KAAL KHAT

PIANCIIL tunga kipan Sabbath a om mah bangin nipi kaal zongh om hi. Lai siangtho in hih nipi kaal hun na keema, tu hun dongin ih nei lai hi. Nipi kaal masa pen Pasian mahmah in na ciamteh a tua pen mah leitung bei dong kizui ding ahi hi. Nipi kaal dangte mah bangin ni sagih sung ahi hi. Niguk sung pen, pian sakna nasepna in kizangh a, a nisagih ni pen, Pasian in tawlnga-in, thupha pia-a, mite tawlngak ni dingin tuam koih hi.
Sinai mual pan thukhaam A piak laitakin, Pasian in nipi kaal thu zongh na pia hi. "Sabbath ni siangtho taka na kep ding phawk in," ci hi. Hih thu in, niguk sungin bang kiseem dinga, nisagih ni-in bang kiseem lo ding hiam cih kawk a, tua Sabbath a kitan nading thu ah Pasian in hih bangin ci hi. "Topa na Pasian in van leh lei, tuipite leh a sunga om khempeuhte niguk sungin bawla, a ni sagih ni-in tawlnga hi. Tua hi a, Topa in, Sabbath ni pen thupha pia in, a siangtho sak hi." Exo. 20:8-11. Nipi kaal khat sunga ni guk sung pen mite nasep dingin kipia hi. bang hang hiam cih leh Pasian in leitung a bawl lai-in ni guk sungin a bawl hi. Nisagih ni-in Piangsak Pa tawlngak ni phawkpihna in a tawlngak ding uh kuul hi.
Mite upmawh thu khat in Pasian in ni guk sung bek in leitunga om khempeuh piangsak hi lo a, nate a piansak nadingin kul tul za tampi sawt hi ci uh a, tua in thukhaam lina tawh kilangpan pah lian hi. Amaute in, PiangsakPa in a ki thei lo hun sawt mahmah sungin nate piangsak hi napi, mite'n ni guk sung bek na a sep nadingin Pasian in pum sawl hi ci uh hi. Pasian in a bawlsa mihingte tungah tua bangin hih ngei lo hi cih ih mu thei hi. A geente in kiciana, tel hak het lo hi. Pasian uplohna panin a tunga upmawh thute a hong piang hi a, Lai Siangtho a uma kigeen mi tampite mah zong kihel uh hi.
"Topa thu tawh vanpi kipiang saka, A kampana hu tawh a sunga om khempeuh kikipsak hi," "A geen bangin pianga, A sawl bangin kip hi." Ps. 33:6,9. A kician lo, a buai niainuai lakpana leitungin damdama a piang khia danin laisiangtho in hilh ngei lo hi. Suun leh zaan dangte mah bangi, piancil lai a nipi kaal khat sialin Piangsakpa nasepna gahte kimu thei pahpah hi. "Hih te ini vanpi leh leipi a kipiang sak laia khang simnate ahi hi," cih thu in pianciilna nipi kaal masa bei cianga kigeen thu ahi hi. Gen. 2:4. Pianciil nite in nidang te saangin sawt zaw hi cihna hi tuan peuhmah lo hi. Pianciil nipi kaal sunga ni khat pen khang khat kici hi. Bang hang hiam cih leh tua ni-in Pasian in na thak, a om ngei lo pawl khat piang beh sakin, a nasepna khang sak hi.
Suang leh leitangh tawh kisai-in mipilte in, Leitung pen, Moses ciaptehna saanga upa zaw hi ci uh hi. Mite guhte, ganhing guhte, suang suak singkungte, cih bang a tuamtuam, tu lai a ih muh theihte saanga lian zaw, gol zaw amuh uh ciangin piancil hun sunga zawh ding hi lo hi. Tua banga Lai Siangtho a muang zolo mite in Pasian om hi cih nangawn um zo lo phial uha, a tawpna ah a ututna uah siatna thuak dingin amaute kinusia hi.
Hih bang mite in upna nei lo uh hi. Pasian thu Siangtho pen leitung pilna tawh ze-et ding hi lo hi. Bang hang hiam cih leh leitung pilna in muan huai lo hi. Kiciatna nei lo hi. Khiallo hi keici thei lo hi. Lai Siangtho leh pan nuamte in a sim uh ciangin, a ki tukalh leh a kikelki bangin mu thei uh hi. Ahih hangin Lai Siangtho in amau muh mawkmawk bang hi lo a, kilem mahmah diimdiam hi. Moses in Pasian Khasiangtho Makaihna tawh Lai Siangtho na gelh hi. Tua hi a, leitung pilna in amaan bangin pai hi peuh leh Moses gelh thute tawh kileh bulh het lo ding hi. Thumaan a kici peuhmahin, a kilangkhia nate tawh kithu tuakin kilem den hi.
Pasian thu tawh kisai-in dotna tampi om ngei a, tuate pilna saang pen nei a kigeente in zongh dawng thei lo uh hi. Mihing khuak mawkmawk in bang ci bangin Pasian khuak pilna thei zo mah ding hiam? Ih nisim nuntaakna tawh kisai thute nangawn limtakin ih theih kim zawhlohpi!
Leitung mipilte in Pasian pilna leh ciimna, a bawlsa nate tungtawnin, thei zo dingin ki-ummawh tazen uh hi. Pasian pen Ama ngeina bangin oma, tua pen mihingte theihpih zawh ding na hi lo se ciitciat hi. Tua bangin, na khempeuh theih sawmin, na khempeuh tungtawnin Pasian pilna a zonkhiat sawm uh ciangin, tel zo vet lo lua uh ahih manun Pasian min leh Pasian vaang zahtaak ding nangawn phawk kha nawnlo uh hi. A tom mahmah leh a kiciangtan mihing te pilna, theihna mawkmawk in tawp hun leh mong a nei lo Pasian pilna bangci bangin thei khin zo ngei peuh mah ding hiam! Mite theih zawh ngei ding hi lo hi.
Mi tampite in nate in thahaatna nei uh a, tua nate in amau omdan ding tek bangin om diamdiam uha, tua pen Pasian mahmah in zongh va su buai zolo hi ci tazen uh hi. Hih in kihilhna maanlo hi a, Lai Siangtho in hih bangin hilh lo hi. Nate in a Piangsakpa ii silate ahi lel uh hi.
Pasian in Ama thukhaamte phiatin, a kilehbulhin gamta lo hi. A thukhaamte khutzatini nei hi. Pa leh Tapa in nate tungtawnin na a seem den uh hi. Khrish in, "Kapa in a sep bangin, Ka seem hi." ci hi.
Levite te la, Nehemiah in hih bangin gelh hi. "Nang, Nangmah bekin Topa na hi a; Nangmang bek in vantung, vantungte' vantung, leh a sunga om khempeuh, leitung leh a sunga omteng na bawla...Nang bek in a vekpi in Na keem hi. " Neh. 9:6. Hih leitung tawh kisai-in, Pasian in piansak nasepna zo khin hi. Banghang hiam cih leh "Nasepte in leitung pianciil a kipanin zawh siang ahi hi." Heb. 4:3. Pasian in A bawlsa nate keemcing den hi. A kipat ciilin Pasianin set bang danin nuntaakna huih muama, tua pen a kizom toto den mai hi het lo hi. Huih kisang peuhmah leh lungtang kisaai peuhmah Pasian' hehpihna hi a, tuate in Pasian bekmah na khempeuh neia, Ukpa hi cih hong lak hi. "Pasian sung bekah nungta in ih gamta-a,Ih pumpite ih nei hi." Sawltak 17:28. Leitung in amah leh amah thu-in kum khat khit kum khat gah leh tehte piangsaka, ni kiimkot in kipei den mawkmawk ahi kei hi. Pasian in leitungte makaiha, vantungah amau omna ciat tekah kilem diimdiam takin koiha, keem hi. "A mah in leitung tampite piangsaka, min vawh ciat hi. Topa in a vangliatna tawh keema, khat mahmah zongh a kisia kei hi. Isaiah 40:26. Pasian vaangliatna hangin singkung lopate hong po uh a, tehnote selin, paakte zongh hong palh hi. "Topa lopate tawh mualte tuam hi. Ps. 147:8. Amah in zaangkuamte gah leh teh tawh kidim sak hi. "Gamlak sate khempeuh ini a an ciat ding uh Pasian kiang pan zong uh hi." Thovaai neu pen akipanin miingte in Pasian hehpihna haang bek tawh a nungta ta uh hi. Laphuakpa in, "Hih nate khempeuh in Nang hong ngaak uh a... Na piak bangin a kaaikhawm uh a, Na khut na hon ciangin amaute lungnuam uh hi." Ps. 104:20-21, 27,28. Pasian thu in nate uka, Amah in meeilomte tawh vantung khuhcipa, leitungah guahzu sak hi. "Tuu mul banga ngo vuukte pia a, vuuk malkiate vut bangin a kithehthang sak hi." Ps. 147:16. Thu tawh vanah tui om saka, tuikhute zong leimong panin a tunglamah kahto sak hi. Keekkiate leh guahzute kithuah saka, a sum kholna panin huihte nungsak hi." Jer. 10:13.
Pasian in na khempeuhte bulpi ahi hi. Pilna maan peuhmah in Ama nasepnate tawh kithuhual hi. Sihna maan peuhmah in Ama Kumpigam ki-ukna thu bangin om sak hi. Pilna in na lamdang tuamtuamte hong musaka, a thuukzaw ah hong luutpih hi. Ahih hangin Pasian thu tawh a kilehbulh ciangin, bangmah phattuamna hong pia lo hi.
Mihingte lungsim mawkmawk in Pasian pianzia, vangliatna, pilna leh nasepte thei kician zo ngei lo ding hi. Job in, "Zon zawh thu tawh Pasian na zong zo diam? Ama kicinna na zong khia zo ding hiam? Vantung bangin saanga, bang ci theih ding na hiam? Hell saangin thuukzaw ahih manin bang ci theih zawh ding na hiam? Leitung saang saau zawa, tuipi saangin zai zaw hi." Job 11:7-9. Leitunga khuak pilpen in zongh Pasian thei tel zo tuan lo hi. Mihingte in sin den; zong den ta leh uh a ban bei ngei lo ding hi.
A kipiangsak nate in Pasian liatna leh thahaatna teci lak hi. "Vantung in Pasian minthanna geena, vanpi in Ama nasepna taangko hi. Ps. 19:1. Lai Siangtho bulphuha nungtate in pilna Pasian telsiam zawk nadingin zangh thei ding uh hi.

Source: Vantungmi Thumte Tangkona


To get the latest update of me and my works

>> <<