MUC

Print Friendly and PDF

Saturday, September 10, 2016

KHENPI 7 | TUICIIN TUNNA

TUANPU PA LEH KAMSANG TE THU

KHENPI 7 | TUICIIN TUNNA

NOAH hun caingin Adam mawhna leh Kain mithahna hanga samsiatna pen a zahnihin hong tam hi. Ahi ta zongin, hih in lei maitang ki naak siatsak lua nai lo hi.

Siatna a ki manawh lam kithei thei hi sam napi-in, leitungin etlawm mahmah lai-in, mun citeng noptuak mahmah lai hi. Mualtungte pen gammang singkung liangpipite tawh kituama, tua singdawnte leh a hiangte ah leenggah bawk tampi pite kaai gihgiah kawikawi hi. Zaangkuamte lah paak huan hoih mahmah bangin hing dikdeka, paakte in anam tul a kisim thei in tama, namtui vauvau hi. Singgah lah nam tam lua kisa-in, ciangtan omlo bang liang hi. Singkungte in tu laia singkungte liatna, hoihna leh kilawmna tawh geenteh theihlohin om a, sing gilte sak lua kisa-in suang bang phial hi. Kham, ngun leh suang manpha tuamtuamte a lomlom in om kawikawi lel hi.

Mihing in PiangsakPa bawl laia thahaatna tampi mah nei lai hi. Khan sausak thei singkung tawh a kisuk khak nawn loh uh kum tam mahmah khin hi ta napi, mite nuntaak hun sung pen akum za mah a sim hi lai veve hi. Tua sauveipi a nungta mi thagolte in amau khuak pilna tek uh tawh Pasian minthan nading zong uh henla, seem hi le uh, PiangsakPa min in lei maiteng mun citengah phatin a om ding a, amau in zong a nuntaak sung uh Pasian ngiimna tawh kituakin nuam a sa ding uh hi. Ahih hangin, hih bangin a seem kei mawk uh hi. Tua mite lakah mi thagol mahmah leh thahat mahmah te, mipil mahmah te, khutsiamna lama minthang mahmahte a om uh hi. Ahih hangin amaute in amau siamna tek uh tawh mawhna gamsung nasepte a seem zaw uh hi.

Pasian in tuiciin tunma a mite tungah hauhna leh pilna, siamna, letsong tuamtuam a pia hi. Ahih hangin, amaute in hih Pasian piak nate tawh a mau leh amau ki pahtawi uh a, a Piapa tungah a lungdam saangsik un, a neihsa a vante peuh it zaw in, pahtawi zaw mawk uh hi. Kham leh ngun, suang manphate leh sing gil to mahmah te peuh tawh a mau om nading innte lam uha, akhut siamnate uh tawh a innte uh zeemin khat leh khat akidem uh hi. A hauhnate uh leh a siamnate uh amau deih bang lel in, a lungkim theih nading un zangh uh a, gualnopna leh gitlohna, kihhuaina lamah uang tat-in a kidem uh hi. Pasian theih nopna lungsim peuhmah nei lo in, a sawt lo in Pasian a om lam zongh a nial ta uh hi. Pasian omlo hi hong ci ta mai uh hi. A bawlpa biak ding saang un bawlsa nate a bia zaw uh hi. Mihing khuakpilna pahtawi-in, akhut uh tawh a bawlsa nate peuh bia-in, milim mai ah kuun dingin a tu leh a tate uh ahilh uh hi.

A hing dikdek mun zaang lai khawng leh a etlawm mahmah a bawk litliat singkung nuai peuhah milim tuate a koih kawikawi uh hi. A kum tawna hing dikdek singkung lian tata peuh a milim pasian uh biak nadingin ap uh hi. Hih singkung te tawh kizom in huan hoih no note nei uh a, mihing duh leh deih theih ding singgah namkim ciing uh a, tua nate tawh a milim pasiante a bia uh hi.

Mihingte in Pasian kithei lo sak uha, a lungsim uh tawh a bawl tawm ganhing meel pua khat peuh a biak manun, mihing dinmun in hong niam kiat seemseem hi. Laphuakpa in milim biak mana a biapa din mun hih bangin geen hi. "Milim bawlte in a milim te tawh kibang uh hi. Tua mah bangin milim a muang a suangte zongh tua milim tawh a kibang hi. " Ps. 115:8. Mihing in ih lungsim tawh nakpi taka ih ngaihsutna thumaanm, siangthona leh deihhuaina saanga saang zaw ah kahto ngei lo ding hi. Mihing lungsim in mihing dinmun saanga saang zaw ah a kilaptoh kei a mong neilo itna leh pilna a ngaihsut kei leh, a niam kiat suk seemseem ding ahi hi. Milim bia mite in a milim pasiante uh mihing bangin aheh thei, adah akap thei, ahuuk a lan thei in koih uh a, amau dinmun pen niam suk seemseem hi. "Pasian in hih leitungah mihingte gitlohna nasia sa lua hi. Mihing ngaihsutna peuh mah siatna bekbek hi tawntung hi. 

Leitung mahmah zongh Pasian mai ah kihhuai hi: bang hang hiam cih leh leitung in siatna, kithahna tawh kidim hi. Pasian in mite zuih dingin a thukhaamte pia hi napi, a thukhaamte kipalsata, mawhna namkim a piang hi. Mite gitlohna pen akilangh tangin muhtheih hi a, thudikna pen khenuaiah kisik cip hi. Bawlsiatna a thuak mite kahna aw vantung dongah a tungto hi.

Pasian phuhsa tawh kilehbulh in zi tampi neihna hong om hi. Topa in Adam adingin zi khat bek pia hi. Ahih hangin, mawhna hong om khit ciangin mihing in ama deihna bang bek zui nuama, tua manin, siatna leh gitlohna manlaang takin a pung hi. Kiteenna thubulte leh mi neihsa lamsate zahtaakna om nawnlo hi. A vengte zi peuh, aneihsa peuh a deih gawh uh leh suh gawp sak uh hi. Ganhingte khel bawlin, that that mai uh a, ganhing sa pen an in nei uh ahih manun, gilo seemseem, haangsan seemseem uh a, a tawpna ah mihing thah ding nangawn cikzia nawnlo uh hi.

Leitung ahih leh naupang mahmah lai hi. Ahih hangin mawhna pen kip mahmah bek hi lo in leitang mun citeng ah ki zeel kawikawi khin ahih manin, Pasian in thuak zo nawn lo a, "Ka bawlsa mihing pen lei maitang pan ka susia ding hi." ci hi. A Khasiangtho in mimawhte ompih thapaai den lo ding hi ci lai hi. Mite in amawhna uh pan akhawl kei uh leh, Pasian in susia maimang cip dinga, ganhing leh vasa te dongin beimang sak dinga, singkung namkim tawh a kituam nop tuak mahmah leitung pen a hawmsuak sak ding hi.

Kihhuaina leh siatna in a gual zawh laitak mahin Methuselah, Noah leh midang tampite in Pasian a kiphawk theih nadingin naakpi in naseem uh a, gamtat siatna a khawl theih nadingin na dal kankan uh hi. Tuiciin tunma kum 120 lai pekin, Topa in a vantungmi tungtawn in, Noah kiangah a ngiimna teng a geen khit ciangin, tembawpi lam dingin a sawl hi. Noah in tembawpi a lam kawmkawm in, Pasian in migilote a suksiat nadingin leitungah tuicin hong tungsak ding hi ci-in a taangko ding ahi hi. Thu ngai a, um a, kisik kika, kipuahpha mite in mawh maisakna ngah in a suakta ding uh hi. Enock in a tate kiangah tuiciin tawh kisai thu Pasian lah bangin geen pahpah a, Noah in tembaw a lam tak ciangin, Methuselah leh atate'n zongh a lampih uh hi.

Pasian in Noah kiangah tembawpi a dung leh a vaai, a saan nate a piak khit ciangin, a lam dan ding kician takin hilh sitset hi. Mihing pilna leh ngaihsutna in tua banga gol leh a to ding geel thei lo hi. Pasian pen a geelpa hi a, Noah pen a lampa hi. Tui tunga laam thei dingin tembaw peek pian danin kilam hi. Noah tembawpi-in, lam khat panin inn tawh kibang peuh mah hi. Cial thum hi a, a hih hangin kongpi khat bek nei a, tua zongh a pangah ahi lai hi. A tung lam panin khuavaak kiluut sak a, a sunga inn mengno tengah khuavaak lut thei dingin ki bawl hi. Tembawpi lam nadinga kizangh singte in cypress (gopher sing) hi a, kum za tampi sung a muat pak lo ding ahi hi. Hih tembawpi pen tha tampi tak bei leh hun sawtpi tak la a damdama kilam ahi hi. Tu hun lai a singluang ih tana sing beu ih suah sak nadinga tha leh hun ih paih saangin, tha tampi leh hun sawtpi kisam zaw hi. Mite in tu lai mite saangin a haat zawk uh hangin, singkungte in tu lai a akimu ngeilo, gammang singkung lian pipite hi a, sak mahmah hi. Mihing septheih leh bawl theih ciang bek tawh ki bawl hi a, Pasian in ompih lo hi leh pingpei, tuihual lianpipite in a susia ziau lel ding hi.

"Upna tawh Noah ini amuh nailoh thu um in, Pasian kihtaakna tawh a innkuanpihte a gupkhiat nadingin tembawpi a lam hi. Hih a nasepna tawh leitung mawhsaka, amahin upna tawh thumaan gamluahpa a suak hi." Heb. 11:7. Hong tung ding tuiciin thu mite tungah geena, tua pen a nasepna in teci panpih sawnsawn hi. Hih bang teng tawh a upna kipicing sak hi. Pasian geen peuh up lel ding ahihna leitung mite tungah teci a pang hi. A neihsa khempeuh, tembawpi lam nadingin zangh mang kiuh keuh hi. A tembawpi pen leikeu tungah lama, mun tuamtuam panin mite'n tua tembaw en ding leh a thuhilhte ngai ding in hong pai uh hi. Tembaw lamna a, sek ging, hei ging khat peuh in mite tungah teci a pangpang na hi gige hi.

Tua a thu zaak phetun mitampi te in a zui nuam bangin a om uh hangin kisik kikna taktak tawh Pasian lamah kihei tuan lo uhhi. A mawhnate uh nusia nuam peuhmah lo uh hi. Tuiciin hong tun ma in, a upna uh a kisittel ciangin, cing zo lo pahpah uh hi. A nung ciangin a omna ngei, a upna ngei mah uh zom kik uh a, Pasian thu nial uh hi. Pawl khatte in um takpi uh a, zongh zui nuam takpi uh hi. Ahih hangin a lawm a gualte un ko gawp, zahpih gawp in geensia uh ahih manun kihei kik uh a, a nung ciangin, a geensia, a zahkote lakah a suuk pente hong suak uh hi. Khuavaak ngah khin napi a Pasian khasiangtho a nial teeiteeite zaha mawhna sunga a thuklut ding kuamah om lo hi.

Noah hun laia mite khempeuh milim bia mi hi sam lo uh hi. Tampite in Pasian bia mahin kituat uh hi. A milimte un Pasian limla bek hi a, tua milimte in Pasian ih cih in bang hiam cih hong tel theih sak hi ci uh hi. Hih mi pawlte in Noah thugeen a naak nial pen te ahi uh hi. Pasian pen nuntaakna nei lo na khat tawh limlah sawm uh ahih manin a lungsimte un Pasian vaangliatna leh thupina thei lo pah uh a, Pasian siangthona zongh mu lo in, a kikhel ngeilo Pasian hong sawl, eite zuih ding thute zong a thei kei pah uh hi. Mawhna sunga hong thukluut seemseem uh ciangin a mawhlo cikcik bangin kingaihsun uh a, a tawpna ah Pasian thukhaamte kisam nawn lo hi ci uh hi. Mawhna hangin daan pia ding cih pen Pasian ngeina tawh kilehbulh hi ci uh a, hih leitungah Pasian thukhenna ahi tuiciin hong tung ding hi cih zongh a um kei uh hi. Pasian thukhaam zui hile uh Noah thuhilhnate saangin, kiging khol thei mah ding uh hi napi, anial tak uh ciangin Noah thuhilhna pen amau adingin nuihzaak huai, kheemna tawh kibang hi.

A tam zaw leh mihonpi lam pen a maan zaw na hi khol lo hi. Leitung bupin Pasian thudikna leh Thukhaamte langpanin om uh a, Noah bang zong biakna hanga "mihaipa" ci lel uh hi. Satan in Eve a kheem laitakin, "Na si takpi kei ding hi," ci hi. Gen. 3:4. Tua bang mah in, milian, kumpi, manglian, zahtaakhuai pipite leh mipilte in "Tuiciin tung takpi lo ding hi. Patauh kul peuhmah lo hi. Pasian in a bawlsa nate tua bangin daan thuak sakin leitung bawlsia zenzen lo ding hi. Lung muang takin om unla, lau peuhmah kei un. Noah pen a hai, bang mah thu thei lo amawk ot ot hi" ci uh hi. Tua ciangin mite in Noah pen mihai bangin seh uh a, nuihsan gawpin, ciamnuih bawl gawp uh hi. Pasian maiah lungsim kiniamkhiata a om saangsikun a gitloh a satlohna mah uh zomin, thu za ngei het lo bangin kitheih mawh bawl uh hi.

Ahih hangin Noah pen pingpei kihual laka suangpi kip bangin om giugeu lel hi. A kim a paam pan mawhsakna leh haibawlna bekbek tawh akikim um lai takin, a thumaanna leh akip a kho upna tawh Pasian mi ahih lam kilangh cian sak hi. Pasian in ompih ahih manin, a kampaute in bun thei mahmah hi. Kum 120 tawntung thugeena, Pasian tawh a kizopna in amah thakhauh sak seemseem hi.

Tuiciin tunma mite in kum za tampi sung bang mah thu lamdang piang ngei lo a, leitung pen a om ngei in om den lel ding hi ci uh hi. Khua hun te in a kisehsa bang bangin hong om zeel zeel lel hi. Tu ciangciang guahzu nai lo hi. Leitungah guah zu ngei nai lo-in, daaitui bek tawh leimaitang kikawt sak hi. Guunte in zongh a piau kantan ngei nai lo uh a, maantakin tuipi sunga luang thei uh hi. Guunte a piau pan a leet khiatloh nadingin kikeem hi ci uh hi. Ahih hangin hih mite in tua tuite a keempa Pasian in "Hih ciang zo, a baan kuul nawn lo" Job. 38:11 a cih theih lam thei kha lo uh hi.

Hun hong bei toto a, bangmah kilamdanna vat a om loh ciangin, mite launa hong bei hi. Mitampi in a cih theih zeel mah bangin, bawlsa nate in Pasian saangin thupi zaw, kip zaw a, Pasian mahmah in zong kikheel sak thei lo hi, ci uh hi. Noah in tuiciin hong tung ding a cih pen a hi mah ding hi leh hih leitung pai dan angeina pan kilamdang ding cihna hong hi a, tua bangin om thei lo ahih manin, Noah pen zuauphuakpa hi ci uh hi. A gualnop bawlnate, a pawi khaamnate uh zom in, ann ne tui dawn, kipi kiteeng, innlam inn geelin buai henhan uh a, a gitlohna lam uh ah suuk seemseem uh hi. Pasian leh A thupiakte zongh a zaangkhai ngaihsut uh hi. Noah thugeente a maan hi leh mipil, misiam, milian mithupi a kigeente in zongh theih pih ding uh hi ci uh hi.

Tuiciin tunma a mite'n Pasian thuhilhna um in, a gitlohnate uh pan kisik le uh, Pasian in Nineveh pan ahehna a lak khiat mah bangin lakhia kik mah ding hi ven! A hih hangin Pasian leh a kamsaangpa thu a nial den manun, mawhna lamah a tawpna dong tung uh a, kisiatna thuak ding bek a ngak lai uh hi.

A kisikkik theih nading ua hunpha kipia pen tu-in bei dekta hi. Noah in Pasian sawl bang linlian in thumaan takin na seem khinta hi. Topa lamlahna mah bangin Tembaw pen kilam khin ta a, ganhing te leh mihingte neek ding annte zongh kikoih cing zo hi. Tu-in Pasian kamsaangpa in sapna nunung pen tawh a lawm a gual a khuapih a tuipihte sam hi. Deihsakna lianpi tawh tembawpi sunga lut ziau lel dingin sam hi. Tua nangawn, mite'n nialin, naakpi takin zahpihna leh simmawh bawlna tawh Noah otsan uh hi. Tua lai takin gansate, a lauhuai pen pan a migi pen dongin mualtung, zaangkuam, gamlak pan tembaw sung manawhin hong pai diamdiam uh hi. Noah a zahkote, tu-in hong daai khikhe pah uh hi. Huih nung bang dan khat kiza a, a et uh leh, mun tuamtuam panin vasate hong leeng khawm uh a, tam lua kisa in ni liah mang dektak liang uh hi. Tembaw sunga hong lut deudeu uh hi. Ganhingte'n Pasian sawlna mang uh a, mihing ten nial uh hi. Tua gansate vantung mite'n makaih uh hi. A siangtho te kop sagih ta in hong luut uh a, a siangtho lo te kop nihta in hong luut uh hi. Mite in lamdangsa mahmah uh a, pawlkhatte bang lau peuhmah uh hi. Thu ngaihsun siamte nangawn in bang hang hiam cih thei zo tuan lo uh hi. Mihingte in gitlohna lamah thuukluut khin lua uh ahih manun, a sawtlo in alaunate uh hong veng kik pah hi. Ni hong sa a, leitung pen angei mah bangin hoih mahmah lai ahih manin, mite in a launate uh beisakin, Pasian hehna hai a tun baih theih nadingin, a gitlohnate uh ah a suuk zaw kan uh hi.

Pasian Noah kiangah, "Na innkuanpihte tawh tembawpi sungah luut ta un; bang hang hiam cih leh nangmah in Ka mai-ah na thumaan hi." ci-in thu a pia hi. Noah thuhilhnate midangte'n a nial zenzen uh hangin, a thumaanna leh a cihtakna in a innkuanpihte thupha a ngah sak hi. Tua ahih manin Pasian in amah leh a innkuanpihte gumkhia hi. Nu leh Pa ahi peuhmah adingin Noah pen etteh taak cingmah si mataw!

Hehpihna kong kikhaak ta hi. Gamlaka ganhingte leh huih laka vasate zongh tembawpi sunga bu dingin hong pai khin ta uh hi. Noah leh a innkuanpihte zongh tembawpi sunga om uh a, Topa in Tembaw kongpi khaak sak hi. A te zialzial khuavaak ki mu a, vangliatna meilom in khuaphelep saanga kitel zaw in vantung pan hong tuaksuka, tembaw kong khak tung tengah om hi. Tua kongpi, a sunga omte bekin a khaak zawh peuhmah loh ding uh pen aki mulo khut in damdamin khaak ta hi. Noah leh a innkuanpihte kikalhnelh uh a, Pasian hehpihna anialte bel a pua lamah om uh hi. Tua kongkhaakpi tungah vantung ciaptehna kitum a Pasian bekin hong kik thei hi. Tua mah bangin, Khrist in migilote adingin palai nasepna a zawh ciangin, hehpihna kong kikhaak ta ding hi. Tua in meilom tawh a hong paima hi ding hi. Tua ciangin Pasian in migilote ompih nawnlo ding a, Satan in a duh a deih bangin uk kawikawi ding hi. Migilote in Pasian mite bawlsia nuam ding uh hi. Ahih hangin, Tembaw sunga Naoh a kikep bangin Pasian thahatna in a misiangthote lum bangin dal ding hi.

Noah leh a innkuanpihte tembawpi sunga a lut khit uh ni sagih sungin guah zuk meel peuh mah om lo hi. Hih hun sung in, amaute upna a kisittel ahi hi. A pualama omten gualzo kisa peuh mah uh hi. Guah a zuk pah loh manin, miten Noah thugeente zuau hi takpi in, tuiciin hong tung ngeilo ding hi ci uh hi. Ganhing leh vasate tembaw sunga a luut deudeu lam leh vantung mi in kongpi a khaak lamte ki theih mawh bawlin a gualnopna ngei mah uh zomto uh a, Pasian vangliatna neu seh in, zahpih uh hi. Tembawpi geiah hong pai khawm ngei ngai uh a, ni danga ageenkhiat ngam ngei loh uh zahpihna leh kosiatna te hong pau khia uh hi.

A ni ngiatni in meilom nasia takin hong kaai a, vantung teng tuamcip hi. A sawt lo in, van hong ging damdama, khuaphelepte leh keekkiate hong om zuazua hi. Tua zawh ciangin, guah mal golpi pi hong zu pah zuahzuah hi. Leitungah hih bang peuhmah om ngei nai lo ahih manin, mite lau in liing gawp uh hi. A simthamin khat leh khat kidong sim uh a, "Noah thugeente a maantakpi mah hi-in, leitung in kisia takpi ding hi'n teh maw?" ci uh hi. Meilom sah lua ahih manin, van zong vom demdama, guah lah nawh zuk seemseem hi. Gamsate'n lah a cih nading meel uh thei lo in, taai kawikawi uh a, haam kawikawi uh hi. Tua ciangin, lei maitang kitam khama, tuate panin zongh tui kibua bangin guah hong zu zuahzuah hi. Meilomte panin beelkhai a buak bangin tui hong kia hi. Gunte zong khangin, a piau pan letkhia in uh a, zaangkuamteng tuum mang pak uh hi. Lei panin, tui kikhawhto a, huih lakah, suangtum lianpi pite pi(feet) za tampi kikhawh pih to hi. Tua suangte a hong kiat kik ciangin leisung thukpi ah kiphuum luut pah uh hi.

Mite in a bawlsa nate kisiatna mu uh hi. A inn thupite, a huan hing dikdekte, amilim koihna uh ahi singkung bawk litliatte, keekkiate in deng sia cip suaka, a kiim a paam gamlapi dongin kitheh thang gawp uh hi. Mihing kigawhna biakpiakna taute cim mang gawpa, a mite'n zongh a nungta Pasian vangliatna lau-in a milim baikna leh akihhuai gamtatna hangin hih bang siatna hong tung hi cih thei uh hi.

Huihpi kipei nasia seemseema, singkungte, innte, suangtumte leitang mahmah mun citengah kikhawh, kilawn zenghzangh kawikawi hi. Mihing leh gamsate launa in kama geen zawhlohin nasia hi. Pingpei ging vuavuate banah Pasian a simmawh mite thuumna, tauna leh kahna aw kiza kawikawi hi. Satan mahmah in a si ding, a bei mang ding kisa in patau mahmah hi. Satan in miten kihhuainate seemin Pasian a langdo ding uh pen a deih pen na khat ahi hi. Tu-in Satan in Pasian pen thudik lo-in, gilo mahmah hi ci hi. Satan mah bangin, mi tampi te'n, Pasian min geensia uh a, hih zo hi le uh Pasiam mahmah bal zan nuam uh hi. Pawl khatte in lau in, tembawpi lamah a khut uh vaan uh a, a sunga a luut theih nading un ngen uh hi. Ahih hangin, amaute thuumna in a mawhna suak hi. A tawpna ah, Pasian om a, vanpi, leipi uk hi cih hong thei uh hi. Pasian kiangah naakpi takin thu hong ngen uh hi. Ahih hangin Pasian in a thungetna uh awlmawh lo hi. Tua banga a buai mahmah laitakun, Pasian thukhaam palsatna in siatna tung sak hi cih thei leuleu uh hi. A hih hangin, daan thuak ding launa manin a mawhnate uh pulaak uh a, a sunguh ah kisik kik taktak nei tuan lo uh hi. Tua bang buaina thuak lo hi le uh Pasian a tawng ngam dingte ahi uh hi. Tua mah bangin, Pasian in hih leitung pen mei leh kaat tawh a sawp siang ma-in migilote in amawhnate uh hang hi a, koi mun ah mawh uh hiam cih kithei ding uh hi. Pasian thukhaam a simmawh lam uh kithei ding uh hi. Ahih hangin, taanglai a te bang mah in, kisikikna taktak nei tuan lo ding uh hi.
Pawl khatte dah lua leh patau lua ahih manun tembawpi kawm suk keh sawm uh a, ahih hangin, kip tak leh kho taka kilam hi a, bang mah susia zolo uh hi. Pawl khatte tembawpi pangah luai uh a, tui hual peuh leh sing leh suang tawh a kinawk khaak uh teh thuak zolo in kia uh hi. Tembawpi pen tuihual leh huihpi in sing gawp, lawk gawpa mun khat pan mun dang khat ah a koi lam manawh cih ki thei tuan lo in om hi. Ganhingte humhamna in amaute lau in nasa ahihna lak hi. Tua banga buaihuai mahmah pan nangawnin tembawpi in kisaitna nei lo in tuitungah lam dide thei lai hi. Bang hang hiam cih leh a thahat mahmah vantungmite'n tua tembawpi keem in cing gige uh hi.
Gamsate in pingpei leh huihpi a kipei gawp ciangin, mihingte kiangah, huhna a lamen bang danin, hong taai uh hi. Mihingte lah tua sapite lau si-in leh tui khang lualua pan a suahtak theih nadingun mun sang thei penpente ah kahto uh hi. Pawlkhat te in singdawn khawngah kahto uh a, ahih hangin a tuanna singkungte kizung bawh in tuisan zuaizuai lak mah ah ut ta kei le uh kideenna uh hi. Mual dawn leh suang dawna bute zong tua bang mah in a bukna munte uh cim khia hi. Tua bangin, mun muanhuai a a upmawhte uh nusia zel uh hi. Tui hong khan toh seemseem ciangin, mite in mual saangpen dawnte hong beel ta uh hi. Mihing leh ganhing te omna, khe ngak nading, kituhin kitawng theih uh a, anih mahun tuihual in a taihpih dong kingik uh hi.
Mual saang pen dawnte panin mite in mongnei lo tuipi en uh hi. Tu-in ahih leh Pasian kamsaangpa thuhilhnate zahpiha, haihuai sak theih ding hi nawn lo hi. Hunpha a neih te uh pammaihsa mahmah uh hi. Noah muk pan kamkhumte a zak kik theih nading un ngen uh hi. Ahih hangin, hehpihna kampaute kiza kha nawn lo hi. Pasian itna in, a thutanna mah bangin, mawh bawlna a kikhawlsak nadingin Pasian thukhenna ngen sese hi. Phu laak nadinga kizang a so vanvan tuihualte in Pasian zahkote a vekpi un su maimang cip hi.
"Pasian thu tawh ..hua hun laia leitungin tuiciin tawh sia cipa tu-a ih muh theih van leh lei pan Pasian thu mah tawh kikipsaka Pasian kihta lo mite mei tawh thu a kikhen ni dongin kikeem lai hi.." 2 Peter 3:5-7. Pingpei dang khat hong tung ding hi. Leitung pen Pasian hehna tawh kihawm suak sak dinga, mawhna leh mawhneite kisusia cip ding hi.
Pasian phulaakna a, tungsak tuiciin tunma a mawhna in tu hun in zongh om ta hi. Mite lungsim pan Pasian kihtaakna beimang a, A thukhaamte kisim mawh sak in ki awl mawh lo hi. Tuiciin tunma a mite gitlohna leh tulai khang huna gitlohna kikim ta hi. Khrist in, "Tuiciin tunma mite in tembawpi sunga Noah a luut dong, leh a mau mahmah tuihual te in a valhtum dongin, anne, tuidawn, kipi kiteeng, pawi bawlin om uh hi. Tua mah bangin Mihing Tapa hong pai ciangin a hi ding hi." ci hi. Matt. 24:38,39. Pasian in tuiciin tunma a mite a annek a tuidawn manun mawh sak lo hi. Amawhna un bang hiam cih leh amaute in Pasian tungah lungdam kohna thei lo in, a neihsa a lamsate uh amau deih bang, ut bang lel in zangh uh hi. Kipi kiteenna zongh Pasian deihna mah hi. Pasian phuh masak pen khat hi a, zuih ding leh theih ding thu Pasian in pia a; siangtho sak ding ahi hi. Ahih hangin, amaute in Pasian lam hilhna teng mangngilh khin uh a, a huukna leh a lannate uh daihsak nading bek in zangh uh hi.
Hua hun lai a mah bangin tu hun in a hi ta hi. A ki phal nate a khengvaalin ki uang sep pahpah hi. Khawlhun, a hoih bek cih thei lo in, akheng vaalin kigamta pahpah hi. Khrist nungzui hi'ng a kici tampi te in, a minte uh pawlpi laibu sunga kikhum laitak mahin, zudawna sane mite tawh om khawm uh a, ahih bang va hih pih uh hi. Kideek kidaamna omlo ahih manin mihon tampite in ahuuk leh a lannate uh khaam zolo uh a, numei pasal mawhnopna ii sila suak uh hi. Mite in nopsakna bek masuan in nei uh a, hih leitung ading bekin a nungta uh hi. Uangtatna in mi omna khempeuh kizeel zo hi. Mi ci thei, mi nuamsa hih ding ki-ut tek ahih manin thumaanna kithal sawn khia hi. Hun tomno khat sunga hausa nuamte in thudikna pampaihin mi zawng a ci mawhte mu niam uh a, sila ding peuhin lei in a deih kei uh leh zuak kik mai uh hi. Mun khempeuh, zum thupi mahmahna te dongah, golhgukna leh a simthama kipiak simna cih bang, guuk simna cih bangte tam mahmah hi. Nisim thuthakte lakah mithahna cih khawng pen lamdang kisa nawn lo in, kingeina seh ta mai hi. Gam sim, gam simah pawl kitap khapna tama, kumpi langdona khangin, gal kidona leh hawmsuakna om kawikawi hi. Tuiciin tunma a mite omzia in tu laia mite om zia tawh kibang pha mahmah hi. Tuiciin a tung sak mawhna namte leh mawhna zah tampi tu-in mun citengah om kawi kawi zo hi.
Tuiciin tunma in Pasian in mite akisikkik theih nadingun leh siatna pan a suahtaak theih nadingun Noah thu hilh sak hi. Tua mah bangin, Khrist hong pai ding hun anaai tak ciangin, Pasian in a naseemte sawl hi. Mi hon tampite in mawhna nusiat ding pen haksa sa mahmah uh hi. Bang hang hiam cih leh amaute nuntaakna in Pasian kumpi gam ki ukna siangtho tawh kileh bulha, amaute in Pasian thupiakte nialin, A thukhaamte a langpan uh hi.
Tuiciin tunma a mitampi lak panin mihing giat bek in Pasian thu umin, mang uh hi. Kum za leh kum sawmnih sung tawntung thumaan thu hilh pa in tuiciin a tun nading thu hilh napi, a thugeen pen miten nialin, simmawh bawl uh hi. Tua mah bangin tu hun in zongh a hi ding hi. Thukhaam Piapa in thumanglote daan pia dingin a hong pai ma in mimawhte kisik kika, thumaan a zuat theih nading un thu ki hilh hi. Ahih hangin mi a tamzaw in tua thu hilhna te sang lo uh hi. Sawltak Peter in, "Ni nunung ni ciangin, thu um lo mite hong om ding uh a, amau ut bang bek zui-in, Topa hong pai kik ding cihna thuciam koi ah om hiam? Taanglai a kipanin nate in a om ngei in kizom den hi lo ahi hiam," ci ding uh hi. 2 Peter. 3:3,4. Hih bang kammalte, thu-um lote bek pan hilo , pulpit pana thuhilhte kam pan mahmah in za pahpah hilo ih hiam? Patauh nading om lo hi. Khrist hong pai ma in leitung in kikheel dinga, kum tul khat sung thumaanna in a maang ding hi. Lungmuanna, galmuanna, kilemna om ta hen! Nate in a tuun a kipan a ngei in ngei lai hi. Kuamah in hih patau tangkote thuhilhna hangin lungbuai kei hen," ci uh hi.
Ahih hangin, hih kum tulkhat thu upna in Khrist leh A nungzuite hilhna tawh kibang het lo hi. Jesu in dotna thupi khat na dong peet mah hi. "Mihing Tapa hong pai ciangin, leitungah Amah a ummi a mu diam? na ci hi. Luke. 18:8. A tungah ih muhsa mah bangin, Khrist in leitung pen Noha khang hun mah bang ding hi ci hi. Paul in leitung bei kuan ciangin, "Dawi upna hong om ding a, upna maan pan mite pial khia in, dawi kheemna ah pai ding uh hi, " ci hi. 1 Tim. 4:1. Sawltakpa mah in, "Ni nunung ni ciangin, hun lauhuai mahmah hong om ding hi," ci hi. 2 Tim. 3:1. Pasian thu zui hi'ng a kicite lakah kimu ding mawhnate zongh gelh suk deu-deu hi.
Hehpihna kong akikhak laitak mahin, tuiciin tunma mite'n gualnopna leh pawi bawlna ah kibual thapaai uh hi. Mi zahtaak huai zaw deuh te bangin midangte amau tawh a gualnuam dingin sam puampuam uh a, kicingh sak mahmah uh hi. Tua bangin hih kei le uh mite'n Noah thugeenna um kha ding a lau uh hi. Tua bang lian mah tu in om hi lo ahi hiam? Pasian naseemte'n leitung bei nading thu a hilh lai tak un, leitungin gualnopna bek zongin a thapaai hi. Mite'n Pasian thu a up man loh nadingun, koi lai ah hiam a lawp huai gualnopna, pawi bawl na, cih bang om kawikawi se hi.
Noah hun lai-in, thu ngaihsut siamte'n, tuiciin tung ding cih pen a piang thei lo thu khat hi ci uh hi. Tua mah bangin, tu nung ciangin, mipil tampi te in leitung pen mei tawh kisusia thei lo ding hi bang hang hiam cih leh hih bang piang mawk leh nate pian zia kilam dang khin ding hi ci uh hi. Ahih hangin, bawlsa nate a piangsak Pasian, A bawlpa leh Akeempa in Akhut tawh A bawlsa nate ngimna bangin a zeek thei hi.
MIte'n tuiciin tung lo ding hi ci-in kilung muang sak uh a, Noah zongh mi hai pa, zuau thuhilh kholhna geenpa a cih laitakun, Pasianin leitung kitam saka tui hong phuulkhia in vantung tawlet vang pan tui hong buak suk ciangin, a ki lungmuang sak te tui-in tuum cip hi. Mipil a kisate in a pilna uh haina ahih lam thei hak lua uh a, Na khempeuh a ukpa in nate saangin lian zaw a, Pasian in A ngiimna bang tangtung dingin sem thei takpi cih a theih uh ciangin, zekaai lua khin ta hi. "Noah hun lai mah bangin, mihing Tapa hong kilat ciangin zongh ahi ding hi." Luke 17:26,30. "Topa ni-in zana guta bangin hong tung ding hi. Vanpi in aw ging mahmah tawh beimang dinga, nate in sa lua in tui suak ding uh a, leitung leh a sunga nasepna a omte in a kaangtum ding uh hi." 2 Peter 3:10. Leitung pilna in Pasian thukhenna ii lauhuaina a beimang sak khit ciangin leh biakna siate in hun hoih, khantoh nadinga hunpha sawtpi om lai ding hi a cih uh ciangin, leitung in nopsakna, zuanin laamin, pawibawlin, nuamsa uh a, Pasian leh A kamtaaite nial in, a om lai takun, siatna lianpi hong tung vat dinga, amaute a suakta kei ding uh hi. 1 Thess. 5:3.

Source: Vantungmi Thumte Tangkona


To get the latest update of me and my works

>> <<