TUANPU PA LEH KAMSANG TE THU
KHENPI 56 | ELI LEH A TATE
ELI pen Israelte' siampi leh thukhen ahi hi. Pasian mite lak ah dinmun saangpen leh tavuan lian pen neipa ahi hi. Siampi ding leh thukhen dinga Pasian teelsa ahih mah bangin, mite'n ettehpi pen in nei pah uh hi. Israel mite tungah HUZAAP nasia a nei hi. Mite uk dinga kisawl hi napi, a innkuan sung a uk kei hi. Eli pen a awi-aam pa ahi hi. Kilemna leh om hiithiatna a deih mi khat ahih mah bangin a tate gamtatna leh a zongsatna hoih lo nate nangawnah bangmah kam pau se lo-in, a tate a ut bangun a om sak lel hi. A tate thu hilh ding taai ding, daan piak ding cih thadah, a tate cih bangbangin om zaw hi. A tate a kihtaak manin a sep ding a bawl ding tampi sep lo-in a nusia hi. Tua bek tham lo-in, a tate Pasian biakbuuka naseem thei dingin thuhilhna leh lamlahna a pia kei hi.
Pasian in Abraham tawh kisai in, "Amah Ka thei hi, a tate leh a innkuanpihte a uk dinga, amaute in Pasian deihna zui-in, a thumang ding uh hi." ci hi. Gen 18:19. Ahih hangin, Eli in a tate kileh uk sak zawsop hi. A tate deihna bangbangin a om zaw leh bung hi. A tate siatna kilangh mahmah hi. Pasian kihtaakna leh zahtaakna a thei kei uh-a, A thukhaam ii sianthona zongh a thei kei uh hi. Pasian nasep pen nasep dang mawkmawkte bangin a ngaihsun uh hi. A neu tuung ua kipan biakbuuk leh biakbuuk nasepte mumu uh ahih manun, thei mahmah uh hi. Ahih hangin, a zahtaak seemseem ding saangsik un neu seh seemseem uh-a, hih munte ah TAAI BAWL, THUHILH BAWL hetlo mawk hi. Tua hi-a, a picin tak uh ciangin, biakbuuk nasepte zahtaak lo lua kisa in, a langpan bawl zawsop uh hi.
Kicing lo pipi mah-in Pasian maai-a palai ding, Siampi dingin kikoih hi. Topa in biakpiakna tawh kisai-in, zuih ding thu kician takin tuam koih sinsen hi. Ahih hangin, hih unaute in hih Pasian koihsa, biakpiakna tawh kisai thukhaamte, a awlmawh kei uh hi. Biakpiakna a kigo ganhing in KHRIST sih nading kawk khol ahih mah bangin, mite lungsimah hong pai ding HONPA upna nei in, tua biakpiakna a kithupi seh pen ahi hi. HIh biakpiakna pen kilemna biakpiakna kici-a Pasian kianga lungdam kohna hi pen hi. Hih biakpiakna ah, ganhing thau bek biakna taau tungah kihaal tum phot dinga, a takte pawlkhat siampite adingin kituam koih-a, adang teng aneite kiangah kipia kik hi. Tua bangin mi khempeuh in, lungdamna leh upna tawh, leitung mawhnateng a pua khia Honpa mitsuanin a om uh hi.
Eili tate'n hih biakpiakna ii phat mawhzia leh thupi ziate phawk kha lo-in, amau deuh bang bek sep theih nadingin lampi a zongh uh hi. Amau adiniga kiseh khia, a kigo ganhing satak tawh lungkim lo-in, a dang nget beh lai uh hi. Hih hun cianga a ngah uh sa tan tampi tawh a hauh lawh nuam uh hi. Eli tate'n khengvaala a nget uh bek hi lo-in, a kigo ganhingte' sathau biakna taau tunga aki haal tum phot ding ngaak nuam lo uh hi. amau deih deihna la uh a, kipiak nop loh ciangin, nasia takin a tawng gawp uh hi.
Hih banga agamtat manun, biakpiakna ii siangthona leh thupi na om nawnlo-a, mite in "Topa kiangah biakpiakna a pianuam nawn kei uh hi." Tua biakpiakna in bang kawk hiam cihte kiphawk kha nawn keei keei lo ahih manin, "Eli tate mawhna Pasian mai ah lian mahmah hi."
Eli tate a tate siampi a nasep a sep sak manin a khial mahmah hi. Amaute ki mawh phelhna hangin, a khialhna uh zongh a muh pih kei hi. Ahih hangin, a mawhna uh nasia seemseem ahih manin, a tawpna ah a kiseel zo nawn kei hi. A gamtat hoih lohnate uh mite'n Elli kiangah lawt uh-a, Eli zong dah in alung mang mahmah hi. Tua kipan a om mawk ngam nawn kei hi. Ahih hangin, a tate un, amau bek mah thupi kisa uh-a, Siampi nasep midang tungah a aap nuam kei uh hi. A pa uh adah mahmah lam mu napi-un, alungsim uh a lawng kha peuhmah kei hi. A thuhilhna zongh a za uh hi. Ahih hangin kikheel a sawm tuan mahmah kei uh hi. Eli in a tate tungah thumaan takin thukhen hi leh a tate un a siampi dinmun uh taanin, sihna daan thuak ding uh hi. Tua hi leh mipi te linglawng kha ding ahih teh ci-in a tate a sep ngei bang uh a seem suak sak hi. Israelte thukhenpa in ahi ding banga a khen loh ciangin, Pasian mahmah in tua thu a khen hi.
Tua ciangin Pasian mi khat Eli kiangah va kilangh-a, "Na pu na pate uh hun akipan Ka siampi ding, Ka tau tunga paak namtui haal ding, Ka maai-a Ephod silh dinga Kong teelsa hi napi'n bang hangin Kei hong kibiakna ganhingte nungkik sak na hiam? Bang hangin in Kei saangin pahtawi zaw na hiam? Ka mite biakpiakna ganhing thau tawh ki vaak thau pikpek hi lo na hi hiam? Na innkuan leh na pa innkuanpihte in a tawntungin Ka maai-ah pai ding uh hi. Ka cih bangin, tua a kipan na pai nawn kei ding uh hi. Kei hong pahtawite Ka pahtawi dinga, Kei hong simmawhte Ka thuipi et tuan kei ding hi. Ka deih bang lian, Ka lungsim bang liana a seem ding siampi ka ding sak dinga, amah ka kip sak ding hi." Topa in ci hi a va ci hi.
Pasian in Eli pen a Pasian sanga atate pahtawi zaw in amawh sak hi. Eli in mite thupha saan nadinga kikoih biakpiakna pen a kimuhdah zo ding zahin, a tate sai sak hi. A tate uh khialhnate kawk khia lo-a, a tate thuhilhna a pia ngeilote in Pasian saanga tate pahtawi zawte ahi uh hi. Pasian min a thansak ding uh saangin amau minthan ding thupi sak zaw uh-a, Pasian a lungdam sak ding saangun a tate a lungdam sak nuam zaw ahi uh hi.
Pasian in Eli pen a mite mawhna leh a diakdiakin a tate hoihloh nateng hang a mawh sak hi. Eli in siatna a om ciilin aw zawl tawh kho dinga, tua bang tawh a pian zawh kei leh a lauhuai pen anasia thei penpen tawh a khawl sak ding ahi hi. Mawhna a kawk khiat loh man leh amawhte thuak bang ding thu akhen loh manin, Pasian in Eli mawh sak hi. THADAH MAN PEUH LEH UK LOH MAN PEUH-A, PASIAN PAWLPI SIANTHO THEIH NADINGA MAWHNA A KAWK KHIA NGAM LOTE, A KAWK KHIAT NGAMLOH MAN UN APIANG SIATNATENG AMAU KI NGAWH DING HI. Mawhna ih khawl sak theih nading mun om gige napi-a ih sep kei leh tua mawhna pen ei mawhna bangin kisim ding hi.
Eli in Pasian deihna bangin a innkuanpihte uk lo hi. Ama deihna bang bek a zui hi. A tate khialhna leh mawhnate a thei lo kineih-in, A GOL KHIT UH TEH HOIH LEL UNTEH ci hi. Eli bang nu leh pa tampi om hi. Amaute in Pasian koihsa kihilhna, innkuan sung kikepnate saanga thei zaw, apil a siam zaw kisa kha uh hi. Ki thusiam sakin a tate uh "DAAN PIAK DING IN NAU PANG LAI LUA UH HI. Tawm hong gol lai le uh amau tawh thu kingaihsun khawm thei ding hi." ci -in a tate khialhnate awlmawh lo-in a koih khong uh hi. Tua bangin zongsatna hoih lote thuukpi ah zungkikha saka, anung ciangin pianpih bangin a seh uh hi. A ki zankhah khangnote in amah leh mau bek tungah hi lo-in midangte tung nangawnah hoih lohna gah sak uh hi.
KHANGNOTE IH MAWK ZANKHAHNA SAANGA LAUHUAI ZAW SAMSIATNA INNKUAN SUNGAH OMLO HI. Nu leh pate'n a tate uh gamtatnate a hoih loh lam thei gegu napi'n a khaam kei uha, atate deih bang lela a om sak uh leh, a tate un, nu leh pa zahtaakna leh Pasian kihtaakna nei thei nawn lo-in, Dawi Mangpa gaalmatsa ahi lel uh hi. Aki uk lo, innkuan sia ii huzaap in veeng leh paam, khua leh tui nangawn sia sak zo hi. Tua siatna kigawm in innkuante, beh leh phungte, leh khua bup a gambupin sia sak thei hi.
Din mun saang ahih manin, Eli huzaap pen mi mawkmawk khat huzaap tawh kibang thei lo hi. Israel mite in ama innkuan sung nuntaakna etteh in anei uh hi. Atate a thuhilhlo, apuahpha lo in tul tampi om hi. Pate in biakna ki-um sak kisa a om laitakun, a tate un gamtat hoih lohna a tuamtuamte a neih uh leh tua in Pasian thumaan a GEENSIA, a NIAMSAK, a SELPHO ahi hi. Thuhilh siate, saang siate innkuan sungah kithuhilhna a om loh ciangin, nu leh pa mawkmawk ahi innkuante saangin, a zah sawmin sia zaw hi. Amau innkuan sung a uk zawh loh uh ciangin, amau gamtatna hoih lo tawh midang tampi a makaih khial uh hi. A dinmun uh a saan zawk mah bangin, a mawhna uh zongh a zah tampi in lian zaw hi.
Aaron tungah a innkuanpihte a tawntungin Pasian maai ah pai ding hi ci-in thuciam kipia hi. Ahi zongin, hi thuciam pen, a gamtat a luheekna, a sep a bawlna khempeuh uah lungsim khat bek tawh Pasian a pahtawi uh leh bek hi se hi. Eli leh a tate a kisittel ciangin, Topa in siampi dingin saan tham cing sa lo ahih manin, "Ka maai ah na pai nawn kei ding uh hi" ci hi.
Pasian naseemte in midangte Pasian a kihta sak, a zahtaak sak leh a it sak etteh taak cing gamtat luheek, kampaunate aneih ding uh ahi hi. Khrist taanga Pasian mite kianga thu geen banga om napi'n, amau duh leh deih thu bek a geente DAWI MANGPA KHUT ZAT NASIA PENTE ahi uh hi. Hophni leh Phinehas bangin amaute in Pasian biakna a kihhuai, amauhdah huai sak uh hi. A ngimna hoih lo pen uh tawl khat sung a sep theih hangun, a gamtatna, a sung a pua, a pianzia khempeuh uh a kilat khiat hun a tung ding hi. "Hih mipa a siangtho mahmah ding ih sak leh ahi ci hi mawk aw" aki cih ciangin Pasian thu in bang mah kimanna a nei lo tawh ki bang hi. Mite'n Pasian thu a thupi seh zah ding un seh zo nawn lo pah uh hi.
Eli tunga Pasian thuhilhna in Pasian naseem mite adinga kithuhilhna zongh ahi hi. "Mikhat in a dang khat tungah a mawh leh thukhenpa in thu a khen thei-a, ahih hangin, mikhat in Topa tungah a mawh ciangin, kua in thu nget sak ding hiam?" Eli tate'n a mipihte tung bek ua mawh hi le uh, Mawhna daan kipia-in, amawhna ki maai sak thei ding hi. Ahih hangin Saangpenpa tungah a mawh ciangin, Pasian nasepna niin bang lua -in, a kih huai zah phialin ki mu ahih manin, amaute mawhna a ki maai sak theih nading thuumna omlo hi. Amaupa mahmah nangawn in zong thuum sak ngam lo hi. Mite gupkhiat nadinga kibawl lampi neu sehna hang tawh "Pasian Tapa a khailum kika amaaizum sakte in" mi mawh pente ahi uh hi. Heb. 6:6.
Source: Vantungmi Thumte Tangkona
