MUC

Print Friendly and PDF

Saturday, September 10, 2016

KHENPI 10 | BABEL TAAU SAANGPI

TUANPU PA LEH KAMSANG TE THU

KHENPI 10 | BABEL TAAU SAANGPI

GAMTAT siat manin mihingte tuiciin tawh a kisuksiat khit ciangin, leitung hawm suak hi. tua ahawmsuak leitung pen mahah mite a om kim theih nadingin, Pasian Noah leh a innkuanpihte bek tuiciin panin hing khawi hi. Noah pen Pasian maiah a thumaan thumaan mi ahi hi. Ex. 7:1. Tuiciin tunma a kideidannate bang lian mah Noah ta thumte in hong nei pah uh hi. Mi namkimte bulpite ahi Shem, Ham leh Japheth te in gamtat luheek tuam tek nei uh hi.
Noah in Pasian theihsakna panin, hih mi thumte taanthu ding geenkhol hi. Ham suan leh khaakte gui suuta, Ham tungah hi lo in a tapa tungah, Noah in, "Caanan in samsiatna thuak ta hen; silate sila ahi ding," ci hi. Ham gamtat siatna in a lungsim panin zahtaakna nei thei sak nawn lo hi. Ham ii gamtat hoihlo te in Caanan leh a suan a khaakte tungah kizom suksuka, Pasian thukhenna amau leh amau tungah a tungsak uh hi.
Shem leh Japhethte'n a pa uh Noah a zahtaak manun, Pasian thu bangin, amau suan leh khaakte hamphat nading thuciamna a ngah uh hi. Amau tawh kisai in, "Shem ii Pasian, Jehovah in thupha ngah ta hen. Caanan in a sila ahi ding hi. Pasian in Japheth lian sak dinga, amah ini Shem giahbuukah a giak ding hi. Tua ciangin, Caanan in a sila ahi ding hi., " ci hi. Shem suan leh khaakte in Pasian teeltuamte ahi ding uh a, amau sung panin Honpa a hong piang ding hi. Jehovah in Shem Pasian ahi hi. Shem panini Abraham hong piang dinga, tua teh Israel minam tung tawnin Khrist a hong piang ding hi. "Pasian pen Topa aneite mi nuamsa ahi uh hi." Ps. 144:15. "Japheth in Shem giahbuuk sungah a giak ding hi." Lungdamna thupha pen Japheth suante in zong saanpih ding uh hi.
Caanan suante in lawki suuk pente suak uh hi. Sila suak ding uh hi ci agen kholhna a om zenzen hangin Pasian kum za tampi sungmah thuak keeikaai-in hoih lam a manawh uh hiam ci-in en phot hi. Ahih hangin, a tawpna ah Pasian nangawn in thuak zo nawn lo a, Shem leh Japheth suante silate a suak uh hi.
Noah hilhkholhna thupen a heh suah man leh deidanna aneih man hi lo hi. A tate gamtat luheek omzia ding amah in seh khol zenzen lo hi. Nuntaakna leh gamtat luheek a neihsa nate uh panin Noah in a tate bang ci bang mi hi ding uh hiam cih thei hi. Nu leh Pate gamtat, khawsak, luheek, ngeinate tate in ciingin, zui uh hi. Nu leh Pate mawhna bang mah tate'n zongh a bawl zeel uh hi. Tua hi a, Ham giinatlohna leh mi zahtaak a neihlohnate a suante in zongh luah to pah uh a, samsiatna tawh amau leh amau a kibuak uh hi. "Mi mawh khat in a hoih tampi susia thei hi." Eccl. 9:18.
Ham tawh kilehbulhin, Shem in a pa a zahtaak manin thupha tampi saang hi. Ama suante panin misiangthote hong kilangkhia uh hi. "Topa in a midik ii nuntaaknate theihpiha, a suante thupha piak sak hi." Ps. 37:18,26. "Tua ahih manin, na Topa Pasian pen Pasian maan ahih lam thei in. Amah in ciampeel lo a, Amah a itte leh a thukhaam a keemte khang tulna dongin a hehpih hi." Deu 7:9.
Tawlpi khat sung, Noah suante iin tembawpi kingakna mualdung tengah teng uh hi. Hong pun seemseem ciangun, kilem lohna hong om a, hong kikhen uh hi. Piangsakpa leh a Thukhaam te a kimangngilh sak nuamte in Pasian kihta mite thuhilhnate leh lamlahnate hangin hehsuak uh a, Pasian bia mite kiang pan pai khiat ding hong ut zaw uh hi. Tua ciangin, Euphrate guun pang, Shinar zaang kuam lam manawhin hong zi khia uh hi. amun noptuak leh lei hoih te amuh uh ciangin, tua zaang kuamah teen ding hong sawm uh hi.
Hih munah khuapi khat lam a sawm uh a, tua khuapi sungah a saang mahmah taausaang, leitung a nalamdang khat dingin lam a sawm uh hi. Hih bang vaihawmnate pen mite' a ki theihthang loh nadinga khaamna bang pian khat ahi hi. Pasian in mite pen leitung mun khempeuhah kizalh dingin lamlaka, ahih hangin hih tausaang lamte in mun khatah pum khat sa khat bnga om khawmin, leitung buppi a uk zo ding kumpi khat neih a sawm uh hi. Tua hi leh, a khuapi un leitung buppi khuapi suak dinga, leitung bup in tua taausaangpi a lamte pahtawina pia thei ding hi. Tua taausaangpi pen vantung dongin saanga, alamte vaangliatna leh pilna, siamna phawk nading leh a minthanna uh khang nunung pen donga a kitheih kim nading ngimna ahi hi.
Hih Shinar zaangkuama omte in Pasian in tuiciin tung sak nawnlo ding hing ci-a, a thukhun pen um lo uh hi. Tampite in Pasian om lo hi. ci uh a, tuiciin zongh amah leh amah thu a, tung mawkmawk hi ci uh hi. Pawlkhatte leuleu in Pasian pen om maha, tua Pasian in tuiciin tung sak hi ci-in a lungtang uh Kain lungtang bangin, langpan nopna lungsim tawh kidim sak uh hi. Tua taausaangpi a lamna uh a hang khat in, a zezen in tuiciin om kik kha leh, amaute a suahtaak theih nading cihna ahi hi. Tuiciin tup laia, mual saang pen dawn saanga saangzaw thamin lam le uh, lauhuaina teng tawh kipelh ding kingaihsun ta ze uh hi. Meeilomte lak dongah kahto thei le uh, bang hangin tuiciin tung thei hiam cih thu a thei ding kisa uh hi. Vaihawmna khempeuh pen taausaang lamte kiphatsakna lahna suaka, hong pai lai ding khangthakte lampial nading leh milim biak theih nading lampi a suak hi.
Tausaangpi a kizawh dektak ciangin, a kizosa mun pawlkhat pen a lamte om nadingin seh uha, mun pawlkhat leuleu pen limtak leh kilawmtakin zeem sitsetin, milimte koihna in nei uh hi. Mite in lawhcing pian akisak uh ciangin kipaak uh a; kham leh ngun pasiante phatin, vantung leh leitung Ukpa a langpan uh hi. Thakhat thu in, tua akizo dektak a knawh mahmah nasepna pen kikhawl sak mawk hi. A lam mite ngimna a taangtun loh nading in vantung mite kisawl hi. Tausaangpi pen sang mahmah khin ta ahih manin, akhum dawna seemter in a bula seemter tawh ki gaal ho thei nawn lo uh hi. Tua hih manin, thu puak sawn dingin, a kikaalah mite ki-om saka, tua bangin thu ki puak sawn sawn in, nasepna a kisam vante a ki vaikhaak uh hi. Tua banga, thu a kipuak sawn deudeu lai takin, a kam paute uh kilamdang saka, van kisam lopipite kikhaak uh a, a kisam tata ki-awlmawh lo hi. Tua ciangin, buaina leh lungapna nasia tak hong om hi. Na kisep beh thei nawnlo ahih manin, nasepna hong khawl hiau mawk hi. Kizopna leh kithutuahna om kik thei nawn lo hi. Bang hangin, tua banga kitelkhialhna hong om hiam cih theih lo uh ahih manin, khat leh khat kipum ngawh uh a, a ki heh sak uh hi. Tua buaina pen sisan naaisan tawh kidim hi. Pasian lungkim lohna limla in, vantung pan keekte kia damdama, tua taausaangpi a tunglam pawlkhat deng khia in lei ah kia hi. Hih hun dongin, mite in pau nam khat bek mah pau lai uh hi. Tu-in ahih leh a pau kitheihpihte kipawl khat uh a, a pawlpawl in kikhenin, a utna ciat uah a pai uh hi. "Topa in amaute, lei maitangteng ah akikhen keek sak hi." Hih kikhen keekna pen leitungah mi akidim sak nading ahi hi. Tua hi a, Pasian ngiimna bangin ki taangtung sak hi.
Pasian langpangte supna nasia mah zen si maw! Pasian ngiimna in, mite kikhen in, leitung mun tuamtuamah gam va phuan ding uh a, tua gam ciatah Pasian thumaan, mit lo in, nei cintenin, khang khat khit khang khat ah akep den ding uh ahi hi. Noah, thumaan thuhilhpa in, tuiciin tun zawh kum za thum leh kum sawm nga nung ta lai hi. Shem pen kum za nga sung nung ta lai ahih manin, asuan akhaakte in Pasian deihna bang hi a, apu apate tungah bangci bangin Pasian in ompih hiam cih a theih pih uh hi. Ahih hangin hih thumaan thute a ngai nuam tuan kei uh hi. Pasian theih nopna lungsim a nei kei uh hi. Kampau buaina hong om manin, khuvaak a pai thei ding mite tawh kiho theihna hunpha tawm neih tuam mahmah uh hi.
Taausaang lamte in a lam kawmun phunphun uha, Pasian min geensia uh hi. Adam leh Noah tungah A hehpihna tawh Pasian thukhunte hangin lungdam khinkhian lel lo-in, Adamte nupa ki hawlkhiat man leh tuiciin tun manin Pasian pen agilo, a lungtom bangin geensia dikdek uh hi. Topa Jesu limla ahi gangawh biakpiakna pen Satan in kitelkhial saka, ahilo lamin mite biakpiakna bawl saka, a milim pasian biakna taautung peuhah a tate uh kithoihna-in go sak mawk hi. Pasian kiang pan a hong pai khiat uh ciangin, thutanna, siangthona leh ki-itnate munah nuainenna, kimuhdahna, kisuamnate hong om pah hi.
Babel taausaang lamte in Pasian tawh kisai lo kumpigam khat phuh sawm uh hi. Bang bang hi ta leh amaute lakah Pasian kihta mi zongh na om veve a, ahih hangin, tua Pasian kihta mite zongh a gilo lawmte hangin kisia veve uh hi. Hih Pasian kihta mite A ngaihsut man bekin Pasian in A thukhenna zekaai sak tuam hi. Taausaang lamte, Pasian kihtate leh kihta lote, a vekpi un kipumkhat lua uh ahih manun, a vekpi un siatna lam bek manawh uh a, a nasepna uh van panin kikhawl sak lo hi leh leitung buppin siat lawh zenzen mikmek ding hi. A kipumkhatna uh pen langpanna suaka, a kumpigam phuh uh pen amau leh amau kiliatsak nop man hi a, Pasian kipahtawi nadingin hun leh mun om sak lo uh hi. Amaute kikhah khong hiithiat mawk uh hi leh, leitung panin thumaanna, lungmuanna, lungkimna leh gaalmuanna teng ki nawlkhin in amau deih bang lel khatin om suak ding uh hi.
Taausang a kilam laitakin, Pasian kihta mite in taausaang lam nasepna a kinawngkaai sak nadingin thuum uh hi. "Tua ciangin, mite lamsa khuapi leh taausaang en ding in Topa hong paisuk hi." Ahehpih luat manin taausaang lamte ngiimna taangtung sak lo hi. A hehpih luat manin akampau te uh buai saka, tua bangin langpanna nasepna khawl sak hi. Pasian in amaute thuak keeikaai a, akisik kik theih nadingun hunpha tampi pia hi. Hun khat pan hun khatah a kimulo (Pasian) khutin mawhna tawsawn kumpi ki-uknate va subuai zel hi. Na khempeuh a Piangsakpa in pilna, itna leh thutakna tawh kidim in, vanpi leh leipi Ukpa hi a, kuamah in Amah tawng ngam ding ahih loh lam kilang sak zel hi.
Babel lamte vaihawmnate gual lelhna leh mai zumna tawh tawp hi. Lawki thu umlo te-in Pasian thu nialin, amau upmawh bangin thu tampi suut uh hi. Pasian kumpi gam tungah ukzawhna a nei bangin kingaihsun uha, A thukhaamte simmawhin, angaihsutnate uh picing sak pahpah lo ahih manin, mihing tate lungsim in a hoih lo nate sep ding bawl ding bekbek ngaihsun uh hi." Eccl. 8:11.
Khristian hi'ng a kici mi tampite in Lai Siangtho hilhna panin pialkhia uha, Lai Siangtho tawh kizawi tawnin taangthu zaknophuai nono phuaktawm uh a, tuate zui le uh vantung gam a tung thei dingin kigeen ta zen uh hi. Pasian thukhaam zuih kuul lo hi bang hang hiam cih leh mimawhte si lo ding uh hi ci-a thuhilhte paakta in pahtawi mahmah deep uh hi. Khrist nungzui hi'ng a kicite in Pasian koihsa omzia, nuntaak zia dingte saang hile uh ki pumkhat ding uh hi.
Mitampite in hauhna leh vaangliatna pen vantung gam hi ci mai uh hi. "Amau te kilian sakin, pau luauluau ta zen uh hi. " Ps. 73:8. Mite neih ding, ngah dinga kilawm zah ciang awl mawh lo-in, mizawngte a simmawh uh hi. Pasian thuneihna zongh a thupi sim kei uh hi. A kiphasak nate uh hun tomno khat sung a ding bek hi a, a tawpna ah dahna leh hagawina, zawngkhaalna a thuak ding uh hi.
Pasian thukhenna hun naai mahmah ta hi. Saangpenpa in mite bangci bangin om uh hiam cih en cik dingin hong pai dekta ding hi. A vaangliatna leh a ukzawhna hong kilat ciangin, mihing kiphatsak nate in bang mah aman nawn kei ding hi. "Mihing tate bangci om uh hiam ci-in Topa in vantung panin en suk hi." Thu umlo te thu kikupnate bangmah a suah loh nadingin Topa in a vanzatte uh kimanna nei lo-in bawl hi. Pasian vaihawmnate ahih leh a kip tawntung dinga, A ngaihsutnate in khang tawntungin a om den ding hi. " Ps. 33:13,14. 10,11.

Source: Vantungmi Thumte Tangkona


To get the latest update of me and my works

>> <<