DEC. 10, 2016

Nial Theihloh Sapna: Khen Thumna
Richard

Manuel sihvuina ah kei zong ka va pai hi. Sihvui hun bawl khitteh pastor kiangah pai-in ka theih nop thute ka dong hi. Adventist’ upna, misite koi om cihte ka dong hi. Tua a kipan Lai Siangtho sinna hong neihpih hi.

Ka Pa in Thugen

Lilliane tawh kinaihna uh hat semsem ahih manin ka pate kiangah kiten ding ka pulaak hi. Ka nu le pa nuam lo uh hi. Bang hang hiamcih leh Jew numei khat tawh kiteng ding hong deih zaw uh hi. Tua manin ka pa in Canada gamah sangkah dingin hong sawl hi. Ka ni-te hon khat hon Canada ah om uh hi. Ka ut kei hi. Lungkim lo ka hih manin, ni khat ka pa nasepna ah ka va pai hi. Ka pa kiangah sum ngenin letmat lei-in, Lilliane kiangah pulaak lo-in ka zinkhia hi.

Lilliane pen dah lua, kapkap, a nu le pa in in zong hehnem zo lo uh hi, cih ka za hi. Kaal thum bang tua bangin om mawk hi. Kei zong letmat lei-in ka ciah kik hi. Ka pa heh mahmah hi. Lilliane tawh ka kigamlat theihtheihna ding vaihawm hi. Ahi zongin kikhen zo nawn lo ding cih a theih takteh ka inn uhah Lilliane hong hawh dingin ka pa in samin ah Judaism ah hong lut dingin gen hi. Ahi zongin Adventist ah lut ding a hamciam pipen kei ka hihlam hong thei hi. Ka pa in bang hongci hiam cihleh, “ na pu-te in amau biakna hangin supna tampi tuak uh hi. Tu-in nang zong amau biakna mah zui ding na hiam? ci-in hong dong hi. Na biakna na khel tuan kei leh Jew mite a bawlsia na hi ding hi, ci hong gen hi.

Tua leh ka pa in rabbi khat tawh kimu-in tua rabbi ka inn uhah hong hawh hi. Khristian biakna zui lo dingin hong gen den hi. Kha khat tawntung nitak sial tua rabbi in thusinna hong neihpih den hi. ‘Jesuh pen mi hoih hi lo hi, ci-in hong hilh den hi. Zuau kamsang hi, tangthu mawkmawk hi, ci-in hong langpan den hi. Ka pa in bang bang a gen zongin ka lungsim hong khel zolo ahih manin inn panin hawlkhiat ding sawmta hi. “ Ka ta hi nawn kei teh” ci-in kei a si khin bangin nakpi takin kapkhia hi.

“ Ka Lungsim ka khel kei hi”

Inn panin paikhia-in Adventist pastor inn khat ah ka om hi. E’cole Hotel ah nasep ka ngah hi. Inn pan ka pa in hong hawlkhiat khit zawh kaal nih khitteh ka nu le ka pa in ka nasepna mun ah hong pai uh hi. Ka pa in ka lungsim khelin Khristian biakna nusia-in inn ciah ding hong gen hi.

“ Khel kei ning,” ci-in ka pa ka dawng kik hi. Tawl khat khit ka kiho khit uhteh ka pate’n hong ciahsan uh hi. Tua khit zawh kum 10 bang ka kimu nawn kei uh hi. Ka nu bel hong pai sawm zel a, ka pa in ka nu hong pai ding phal lo hi. Kei mu dingin hong pai leh ka pa in ka nu maksawm hi. Ahi zongin ka nu in puanzuakna khat nei-in tua mun ah pai-in ka nu tawh ka kimu thei zel uh hi.   

Kum khat sung bang Lilliane tawh Lai Siangtho sinna ka neih khit utteh tuiphumna ka nei uh hi. Friday ni-in ka kiteng uh a, a zing Sabbath teh tuiphumna ka nei uh hi. Sunday niteh Adventist biakinn ah mopawi ka bawl uh a, Monday niteh Israel gam ah ka zin uh hi. Israel gam ah kha thum sung ka taam uh hi. Israel gam bup ah SDA vekpi 50 bek om hi. Pastor in bang pulaak hiam cihleh Jew mite lakah Adventist thupuak kigen thei lo hi. Um thei lo uh hi, ci-in hong gen hi. Ahi zongin tua pen man lo hi. Kei zong Jew zong khat hing, ci-in ka gen hi. Hih bang thu ka ngaihsut ciangin ka khasiat suakin ka khitui hong luang hi. Ka zi Lilliane in hong hehnem hi. Ama kiangah bangci ka hiam cihleh, ni khat niteh Israel gam ah pastor sem ning, ci-in ka pulaak hi. Tua bangin ka khensat a kipan Pasian hong ompihna ka phawk pha sansan hi.

Richard Elofer in Collonges gam Adventist University ah Lai Siangtho sin ngei khat hi. Israel gam ah Pasian nasem in tawl khat a om khitteh Paris khuapi a om Jew mite lakah nasem hi. Tua panin Jew mite le Adventist thu-um mite kipawlna khat phuan khia hi.

Tu quarter Sabbath School 13 sumpi in hih munah kipuak ding hi. Kawl gam SDA conference in Rakhine gam, Lan-ma-daw khua ah sia inn puah nadingin kipuak ding hi.