MUC

Print Friendly and PDF

Wednesday, July 6, 2016

Khangno te Pasian in Khansuah Nuam


KHANGNOTE PASIAN IN KHANSUAH NUAM


Late 127:3 - “… Ta te pen ama (Topa’ ) hong piak ahi hi.” Thuhilhsia 11:9 – Na khangno lai un na lungkimna zah-un om un. Thuhilhsia 12:1 – Ahi zongin na kisik kik khak ding uh tuat khol

un.
1 Timoti 4:12   - Etteh tham cing dingin nungta un.
1 Johan 2:13 - “….Tangval te aw (nungak te aw), Dawi mangpa zo khin na hih man un lai a hong gelh (khak)ka hihi..”(Tang 14)

Hih laikhak a ngah ei khangdawngte hampha hang. Pasian’ pahtaak kaan-a lungnop lungmuan a hong piathei ding bang dang i mu a leh?

Daniel te lawm tengin leitung kumpi lian pen pa’ pahtaak ngah tham uh hi. Ahi zongin tua pahtaakna sangin Pasian’pahtaak thupi seh zaw pah uh a sihna a teel zaw uh hi pah hi.(Dan. 3:16)


Pilsin Siamsinna

Pasian’ deih sak pilna theihna tawh Evua na lungkim suk pah leh tu a thusia leh thupha saaikaak den keei pen a om loding ahi hi. Saang i kahkah –a degree saang pipi ngah ding iki dem den keei na pen Evua’ thu theih nop luat man ahi hi. Pasian in theih a kul lote thei ta kei lehang deih zaw hi.Theih a kulte lah hong hilh lo cih bang hilo hi. Adam tungah tua thute a gen khit a hilh khit sa siksek hi. Tua val a deih uh teh hih zahta a ki buai hi
Biakna sanga kisinte bang sangin zong kumpi saanga kisinte kideih zaw ahih manin sabbath palsatsat-in kum 10 val bang Pasian’ hong deih sak lohna saang ah ikahkah pen Evua sangin kitam khialh zaw lai hi. Evua pen khatvei bek khial hi. Ei bel kum 10 val khial hi hang. I saang teng i man siang ciangin ki sik kik ding cih geelsa-a saang kahkah ihi hi. A lung muanhuai na diam? Ellen G. White in tua bangte in Pasian’ ciamtehna a tal tang tung uh ah kikheen thei lo dinga a sem uh ahi hi, ci hi. 1T 217 (tampi om ) .


Pasian’ Galkap Khangdawngte

A deih loh pi mah-in Pasian in gal nei hi. Tua a gal in amah tawh a kop nuam khempeuh galmahin hong nei pah hi. Tua ahih man-in satan in mihing a muhdah a etsat nading a omlopi kimlai gal-a a hong neihna kammal masa pen Pian. 3:15 ah na om hi. Satan’bawlin Evua in a deih huailo pilna a deih se ciangin tua pilna apia Pasian’ gal pa in Evua’ tate tute ama adingin hong deih suk pah a nahi hi. Ahi zongin Pasian in Satan’ aa ki hi khinlo ding a hih thu na gen khin hi. Atam zaw a ngah hangin a vek pi-in ngah khin zo ngeilo ding cih ahi hi. Tua a ngah zawhloh teng a bei siang nading hanciamin a seem ahi hi. Kibeisiang het lo ahih manin, ahi zongin kitam mello zel ahih manin, hong ngap thawh sim tham hi. Tua lakah Pasian tawh a kop nuam a tawmnote mah in luang khaamin Satan na do uh hi. Satan in Pasian a hehsak nop manin hih zahta a septe tel muh thei hi lehang ama lamah kop zaw lo-in Pasian i beel cinten nuam ding hi. Atuaci zongi om mah hi.

Agilkial lo, a kisapna a om lo Evua pen satan in zol zo ahih leh, ei, a gilkial , kisapna tampi anei te, zol nop ahong sa lua ding ahi hi. Bang te khawng tawh? ---

Khat,  A masa pen zolna in neekvai hi. Mihingte neek tawh zol nop pen hi ding hi. Topa nangawn tua mah tawh na zol hi, Pian. 3:1-5,6; Matt.4:1-4.
Nih,    a patna lam a tawm i gen samah hi – pilna, theihna, siamna a khengval pian a Pasian deihloh ciang va kan tohna
Thum, Mihing leh Pasian kikhihna:  Thuman’na

Li,       Mihing leh mihing kikhihna:  innkuan vai

Paisian’ Thupiak 10 ah a kim-in ki mu hi. Tua te khat peuh i thupi sim kei leh migina kihilo pah hi. Tuate lakah satan in Pasian i tel muh loh nadingin milim biakna a khaamna thu Thupiak a nihna tawh mite zol khia phot hi. Tua khit ciangin Pasian hep khiatna ciang tun’ nadingin Thupiak a lina tawh na zol leuleu-in, tua pen SDA sung mahmah ah hong lawhcing tham hi.

Topa in hih galpa’ hong lutna vang a hubit dingin ei khangnote hong zang nuam hi. Isaiah58:12; 61:4; PK 677-678 – Mang.14:6-9 pen ei SDA te in i nasep thupi pen hi ci-in sin-in , hilh kaakaa hihang. Ei mahmah in lah i hilhna tuancil gawp zel hi hang! Dahhuai hi.

Khangno te aw, Topa tungah hong muanhuai un. “Thuhilh nasep a thu neuseh mite in khrist a thu neuseh uh ahi hi. Nasep vannuai ah a saang pen in lam tuamtuam tawh thuhilh nasep ahi hi. Hih pen khangnote theisak un la gospel naseemte sanga Pasian in thupha a piak zawk naseemdang omlo hi cih lak un.”-Messages to Young People, 224.

“Pasian in tupna ngimna lian a nei khangno galkap hon, Khrist leh thumaan a it tak takte, hong sam hi.” – Testimonies for the Church, Vol,6, p. 411

Innkuan a vaak a don nailo tangval nungak te in zaang khaai takin na sep zawh lai un hun lapin thukan khia un. Innkuan peuh nei le uh cin vai hong ol lo ding hi. (5T 393 ) .

Mite kampaute zong sin un (3T 204 ). Saang kah na bek ah a kisin hi lo-in mi tawh kithuahna ah kisiam baih zaw hi.


Ahi thei zah ciang theih nadingin saang kah kul hi. Ahi zongin saang kah bek tawh hun a bei leh nasep ki uuk
hi. Taan saang, degree saang kidem toto in kiniamkhiatna tawh gospel nasep ding a lawp ki tawm thei hi.
Hih thu en dih ni; Makaite a kidop ding uh thu:

“Siate (teachers ) in khangnote (sangnaupang te) biakna nasep a seem nuam kimlai nasep dang khat zong zaw le uh ci-a a lungkiat sak uh pen khialhpi-akhial ahi uh hi…..Tua bang a khangnote’ mai a khaktan te in Pasian’ geelna alangpan’ hi uh a, a sepna uh Pasian in a sittelna thuak ding uh hi.” – Counsels on Education, p. 135 .

Thukan dan kidop kul

Thu theih nadingin thu tuamtuam theih kisam mahmah hi. Radio, TV leh thukizakna tuamtuam pan thu kan ding himah hi. Laibu tampi sim ding kisam hi. Ahi zongin Khangno te in zaak nop muhnop a sak lelte Pasian thu theih nading sangin Satan’ zolna tam zaw ahih manin tua Satan’ thangsiah ah va awk khak ding kidop mahmah kisam hi. A awk photte kitom khia zo khollo zaw uh hi. Va kitah loh mah lungmuan om pen hi.

Paunak 6:27, 28 – “Na ang sungah meikuang pom lecin na puan kaang lo-in om ding ahi hiam? Mei aam tung tawnin pai lecin na khe kaang lo-in om ding ahi hiam?”

Ei’ pauzat khatah, kikausiphuum, cih zong om hi. Mawh zolna pen akul hilo hi, akul lopi hiden hi. Tua penah va kikausiphuum ding hilo hi. Vasin selo ding! Va kitah selo ding! Daang om pah ding.
Topa in a hong pahtaak lai tak leh a hong zat nop lai tak in ei mahmah, leh mi dang te peuh in thu tuam a hong genpih te, tawh lung kaat mawk mawk ding hi lo hi. “Tu hunin mi tul tampi lungsim ginalo kepna (asylum) ah om uh hi, tuate taangthu phuahtawm laibu leh thusia kigelhna laibu a sim, khoh lah kingaihna a cinat lawhte leh huih lak a innpi lamte vive ahi uh hi.” –“ The signs of the Times”, February 10, 1881.


Pasian Zahtaak Ding

Hih pen i nuntak paizia ding hi pi pen hi. I sungah Jesuh a hong teen nak leh kihoih om nuam ding hi pah hi. Jesuh in a hoih
ahih man hi. I sunga om pen in a deih lohte ei zong a i deihlo ahi hi.

Habbakkuk 2:20 – “Topa a biakinn siangtho sungah om hi. Leitung bup Ama mai ah daai khipkhep uh hen.”

Biakpiak huna omzia:


Education, 242-244 –

1.
Biakna bawl hun leh a mun zahtaak ding, Ed.243
2.
Biakpiakna-a makaite zahtaak ding,
Ed. 244
3.
Lai Siangtho bu zahtaak ding,
Ed. 244
4.
Pasian’ min siangtho zahtaak ding,
Ed. 243
5. Pasian mahmah zahtaak phot ding,
Ed. 242

Biakinn siangtho sungah Dialogue lah dan kidawm ding. Nuihzaak bawlna Dialoguete zang lo ding.
Model show cih bel biakinn sung cih thadah Chapel na ngawnah kidawm lai ding.
Biakinn sung ah puansilhlo a guaktang a om te zang lo ding, I tua cih leh Pasian a simmawh ki hi pah hi.

Pulpit tung leh biakinn sung peuh mahah nuihzaak huai thu gen lo ding, (jest, jesting, joking) . A hi hamhamte (levity), taangthu maanlo khawng (fiction, anecdote ) te Lai Siangtho khiatna dan in zanglo ding.
Pasalte pasal kizep ding, a hong ki et guau guau pian leh kizep dan amaan lo hi ta hi. Pheituam zong standard nei zek ciang ahih kei leh biakna-ah zang lo ding. Nasep nadinga kikhuite biakna-ah zat ding hi lo hi. Jean pantte bang biakna puan kici lo hi. A nung amai lim kisuai bialbual te zong biakna puan hilo hi. Saang uniform ahih kei buang leh lai kigelh ziazua puan te zat loh ding hizaw hi. Pheituam a teep kaai zelzul khawng kizep puan zong hilo hi. Nasep puan hi. Biakna-ah kilawm lo hi.

Numei taleh pasal taleh, khut zungbuh leh bilbah a zangte SDA kician hi ngeilo hi. Tua bang minam ngeina a neite i hih loh man hi. Hih pen Mangkang gam lamah a zang aki om hangin America bang ah Ellen G. White in zat kullo hi ci hi. Ei Zomite lakah zang se dah ni

Innkuanpih ding Zonna

Pian.2:18-24. Innkuan neih pen Pasian’ deih, Pasian’ bawl hi. Siangtho tak-a neih ding ahi hi. Si-le-sa holhthawh thu tawh innkuan deih dan pen innkuan hoih deih na hilo-in Satan in innkuan a suksiatna ahi hi. I duh peuh i kam sunga i guan pah pah man in isi isa cidam nawn lo-in ahi lolo, ahoih lolo aki hih nuam hi ta hi.

Satan in Pasian a heh sak nadingin neekna leh inn kuan vai ah nakpi-in hong suahih manin isi isa kisia-in i lungsim maan lo a, (Pian.2:17) a sia leh a pha khentel thei nawnlo-in ihelzau gawpta hi. Evua tupna tung lo-in, pilzaw teizaw het lo-in, i amkham khin hi. Tua ahih manin innkuan vai-ah pahtaak kicing zo pha nawnlo hi. Zaangkhaai ngaih sut het kei un. Pasian a kihta mi muanhuaite thu dong unla no khangno lungsimin a lunggulhna mang kha kei un, I thu patna –a i Lai Siangtho siksan munte ki aap takin simsim un. Mundang sim ding a hoih tampi om lai hi, zong khia unla simsim un. Lunggulh maanlo-in a hong sawl a hong kaihna zui kha mang kha kei un. No guak hilo mi tampi-in tuah siat pih ding hanga, Pasian lungkim lo ding hi. A siangtholo a zi neih pasal neih pen Pasian’ deih dan hilo hi. Hih laibu, Messages To Young People, Section XIV leh XV lim tak na sim un. Kawllai-in zong a nei om ding hi.

Theih ding tam hi. Thu kan un. Leitung ah Pasian’ na sep a kizawh na ding no’ sepna bek a hong ki ngak hi ta hi. Hun hong sia leh Pasianna nasep loh uh na ki sik kik khak ding uh ( Thuhilhsia 12:1) tuat khol un. Topa in hong zang nuam hi. Ki zang sak un, AY law Phawk un.



By Pr Daniel Nangno


5 page of 18 << 1 2 3 4 5 6 7 8 9 10 11 12 13 14 15 17 18 >>


Note: Hih atunga Article pen Sia Naa Mung laibu sungpan kila ahi hi.

To get the latest update of me and my works

>> <<