MUC

Print Friendly and PDF

Wednesday, July 6, 2016

Khangno leh Thumanna


KHANGNO LEH THUMANNA

KAS ah Conference worker khat ahi Sia Nang Za Mung in laibu khat bawl nuam ing; thulu khat ong gelh sak zo lecin ci-in hong ngen a, kei zong lungdamtakin ka na sang a, hih thulu gelh dingin ka na teel hi. I Zolai kicingnailo i cidiam, i deih aw a gingkhia sak dingin i gelh laimal gawmin suak khia sak zolo thei hi. Tua hang mah-in zong i Zolai ong bawl sak J.H.Cope in "Zopau a baih kei hi" na ci hi. Zolai pen puahphat kul hi cih na geel,na khung khin hi. Tua mah bangin tu-in zong thumanna i cih ciangin (Thumang) cih a gen nuam ihi kei a,(faithful,faithfulness) thuman, thutang, citak, ngentel, kuhkal cihte pawl a gen nuam ihi hi.

Thu-um mi vive, biakna mi vive hita ihih manin hih i leitung vaite ban-ah Pasian' thu, Lai Siangtho thu mah bulphuh-in a gen nuam ihi zaw hi. "Naupang khat aneu lai-in lampi man tawn sak lecin a teek dongin lampial nawnlo ding hi." (Paunak 22:6) Lampi man icih pen Topa Zeisu (lampi) hipah a, Topa Zeisu upna, muanna, Lai Siangtho kimakaihsakna ahi hi. Ahi zongin tutungin tua lampi man thu igen dinga, tawn cih thu isuut ding hi. Tawn cih kammal in zui, lenkip, piallo, hoilo, cihna ahi hi.

Mi khempeuh in tua lampi man katawn hi i cih ciat mah bangin tua lampi man i tot laitak mahin haksatna, lungkiatna, i thuak kha ciat hi. Lai Siangtho in 'Haksatna na thuak ciangin na lung akiat leh mi ginalo nahi hi." hong ci hi. Paunak 24:10. Tua ahih leh haksat hun i cih pen bang hun hi hiam? Mikim ii haksat hun tampi om dinga, ahi zongin ahuampi-in pawlkhat i gen ding hi.

Kei sangsia khat ka hih manin sangnaupang vai, sangsia vai mah tawh kong pan ding hi. Sang naupang khat ii haksatna pen a bulpi-in nih om a, sum leh paai (sangsap+ annek tuidawn) leh sang lai mahmah haksa sakna ahi hi. I sangnaupang lai-in i siate in haksatna a neilo ding i sak leh sangsiate in zong apuak khop mah haksatna na nei veve hi. Eite in khasum sang cih khat bekin i mu a, khasum a san nadingin asep abawl ding, azuih ding thukhun tampi om hi. Sangsia bek hilo-in kumpi nasem khempeuh huam khin hi.

Sum bawl mi khat zong a tawntungin meet den lo hi. Sum mah taleh zong gilkialna, dangtaakna, nisa khasa thuakna, guahzu khuadam thuakna tampi phukha a, mitampi tak lungkia in ma tun zolo-in khawl uh hi. Mitampi in tua bangte thei siam lo-in inn leh lo khawng ong neih khit uh teh hampha si, eng sing ici hi. A hi zongin thu khinkhai thei zawdeuhte in a thuak haksatnate ka ngaihsut ciangin eng ngam keng, ka thuak bang thuak inla, ka neih teng nei in ong ci leh athuak zolo, azui atawn zolo dinghici uh hi.

Atunga i gente pen leitung mite, mimawkmawk te ci mai ni. Pasian' mi kahi hi, thu-um mi kahi hi, biakna mi kahi hi, ka piangthak hi. Pasian' nasem kahi hi aci mi tampi tak in zong haksat hun nei veve uh hi. Biakinn kikhopna, sumpi piakkhiatna, sumpi kepna, sumpi zeekna zatnate haksa sa-in pelh nuam mahmah, thuman zolo, citak zol cih mitmuh ahi hi. Tanglai zong tua bang-a na-om ngei hi. Gehazi IIKum 5:23,27; I Topa Zeisu a lehheekpa Judas Matt 27:5; Annaniaste' nupa Sawltak 5: 1,2 kimu thei hi.

Atunga i gensa haksatna lungkiatna, thuman zawhlohna sung panin mi pawlkhat na thuman veve, mipil pipi, milian pipi, mihau pipi, Pasian' thugen minthang pipi, Pasian' nasem minthang pipi suak uh hi.
Hih a tung-a i gente pen angah nuam , adeih, ahuaihamte ci mai ni. Anei khin, angah khin athumanlo, adiktat lo khat en lai pak ni. Luke 15:16 Tapa taimang in sum le paai tampi nei khin hi. Asum le apaai tungah thuman zolo, numei tungah thuman zolo, nek le dawn tungah thuman zolo ahih manin sawt zong khom lo-in zawng gawp a, vok annek nagawn duhgawhin genthei tak leh khasiathuai dinmun-ah tung hi.

A tunga i gen mi tampi ii lungkiatna, thuman lohna hi pilsinna, kumpi nasepna, sum le paai zonnna, Pasian' nasepna sungah athuman veve, ahi mipil pipi, milian pipi, mihau pipi, miminthang pipi, mahin a minthang Pasian' tunga a thuman, a citak khangno pawlkhat en lai ni.


1. Numei tungah a Thuman, a Citak Joseph

Khangno Joseph pen i theihsa mah bangin a neutung a kipan thuman pah, hi cilteel pah hi. Hih ding akici khempeuh hih pah, hih loding akicite hih lo pah hi. Tua ahih manin tua hun laia leitung buppi akumpi lian pen ahi Egypt kumpi Pharoah ii muan pen suak hi. Kumpipa' muanpen a suah theih nadingin ze-etna lianpi khat on gtuak masa hi; Potifar in azi cih sim loh ama
Khangno Kahlei Collected by :Nang Za Mung 2010 thuneina sunga a om thu khempeuh, Potifar innsung thu khempeuh , tawhtang khempeuh, seal khempeuh, sum khempeuh ap pah hi. Potifar pen vang anei mahmah khat ahih mah bangin a zi zong vangnei-in, amel zong ahoih penpen mah na hipah hi. Potifar zi in Joseph pen lupkhoppih dingin a zot teh utloh theih ding hilo hi. Amel a sa ban-ah a gamtatna uh iim zo ding, seel zo ding, hu zo ding hi napi Joseph na ut lo-in "Bangci bangin hih gitlohna lianpi bawlin Pasian' tungah khial ding kahi hiam?" na ci hi.Piancil 39:9


2. Thungetna, Zunek Sanekna-ah a Thumaan Daniel

Khangno Daniel zong i theihsa mah bangin aneutung a kipan Pasian biakna, thungetna, zunek sanek lohna cihte-ah a thuman, a ngentel, ahi ciltel khat ahi hi. Amah leh amah kisian suah tawm ngeilo hi. A tungsiah kumpi uliante in na cidam nadingin zune, sane ding acih hangin thuman' takin ding-a, mang nuam lo hi. Kumpi thuneihna (aana) tawh milim bia dinga kisawl hangin mangnuam lo hi. Daniel pen Pasian' tungah thuman taka ding ngamna thu athei bek, aza bek, la-a-a-sa bek hi lo-in i nuntakpih ding ideih mahmah hi. Dan.1:12,3:18

Ahilo pipi hi mah ci-a, ahi pipi hilo i cih manin i khantoh dingzahin a khangto theilo ihi hi. Mun khatkhat a ahoih ding a bat hangin ahoih hetlo ahi hi. Pasian' deihna tawh kituaklo hi ven. Tua pen tu sawng kum (40) bang i zat( em;vnfrSk ) icih pen ahi hi. Kei sangsia ka hih mah bangin sang lam en pak lehang kei sang kah lai ciangciang laivuanna-ah hehpihna cih om ngeilo-in mat (39) ngahte lai kikia hi. Tua mat khat, mat nih tawh kum khat kikah kik ngiat hi. Tua hun lai a sangnaupang a tamzaw in tan(10) a zawh pah loh uh hangin ama laitan tawh kituakin a kilawm akituak ciang thei buanguh a, mawl (mak) lawmlawm lo uh hi.

Tua mah bangin sum le paai vai-ah zong akuama peuh in akoima peuhah piak ding zah kipia lo, zat ding zeek ding zah kizangh, kizeek lo ahih manin akoima peuh-ah i khantoh ding zahin i khangto zo kei a, i pil isiam zo kei hi. A hang pen ahite ahi, ahilote hilo ci-a thuman taka i dinloh man na hi gige hi.
Hi bang a igen ciangin mipawl khat in Zeisu upna muanna omlo hi. Thatang suang hi, hoihna suang hi, gamtatna suang hi cikha thei ding uh hi. Tua mah bangin apil, asiam, ahau, alian, aminthang khat in akam pan ahi a, alungsim pan ahi zongin KEI, KEI, KA, KA acih leh bel amaa hoihna gamtatna asuang hipah takpi a Topa' ong deihsak zia hilo ahih manin Topa' kiang pan a lampialna hipah hi. Banghang hiam cih leh thupha khempeuh, gualzawhna khempeuh Topa' ong piak ahih lam i phawk ding Topa' deihna ahi hi. Topa i upna hing saka, i sungah i nuntakpih ding Topa' ong deihna ahi hi.


Thukhupna:

Thumaanna in lampi maan totna hi a, mailam ah inn sung, pawlsung, khuasung, gamsung ong makaih ding khangnote in thumaanna nuntakpih lehang innsung, pawlsung, khuasung, gamsung, khantohna, deihna, nopsakna hong om takpi ding deih luatna tawh hih thulu"Thumaanna" thupha ong ngah sak kim ciat ta hen.


Hih Khangno leh Thumaanna thulu ong gelh sak Sia Kam Khan Mung pen 15.10.1944 kumin Tedim gam Anlangh khua ah piang hi. 1956 kumin SPS (BEPS) Anlangh pan Tedim gambup kumpi laivuanna tan (4) 1961 kumin SHS (BEHS) Tedim, pan kumpi laivuanna tan (7) zo a, 1964 kumin SHS (BEHS) Tedim pan Kawl gambup kumpi laivuan HSF Certificate, 1978 kumin SHS, (BEHS) Tedim pan Matriculation Certificate, 1983kumin Correspondent tawh MU pan BA degree, 1991 kumin Correspondent tawh RU pan B.Ed degree ngah hi. 1965 kum pan PAT, 1981 pan PAT Head, 1984 pan JAT, 1986 pan SAT za tawh kumpi sangsia sem a, Service (27) a cin kum 1992 ciangin pension la-in, 1997-1998 Sakollam Adventist Seminary ah Instructor, 1999-2004 Kalay Adventist Seminary ah Instructor, 2004-2008 Kalay Adventist Seminary ah Principal, 2003-2008 MUC ah Secretary (Voluntery Service) 2009-2010 MUC ah Secretary (full time) tawh asep laitak hi hi. Ed)






10 page of 18 << 1 2 3 4 5 6 7 8 9 10 11 12 13 14 15 17 18 >>


Note: Hih atunga Article pen Sia Naa Mung laibu sungpan kila ahi hi.

To get the latest update of me and my works

>> <<